Wp/tig/ሸዐብ ቀሪም አለቡ

ሸዐብ ቀሪም አለቡ፡

እትለ መደት እለ ዲብ ኤረትርየ እት አጀኒት ነኣይሽ ለረከዘት ትርድት ከሸት ገብእ ክም ህሌት ምን ኤረትርየ ጀልሕ ለህለ ኸበር ለአክድ።እለ ብሩር ወመዳይን ኤረትርየ ሻምለት ለህሌት ወዲብ ዓማሮም ስነት ሰብ ለኢበጽሐው ርክዝት ለህሌት ከሸት፡ምነ ቀደም እለ ዲብ እለን 30 ሰነት እብ ሕክም ሸዕብየት ገብእ ለዐለ ከሻት ፍንቲት ለትወድየ፡ ሸዕብየት ምስል ሕኩመት መርከዝየት አቶብየ እንዴ ገብአት ሸዐብ ትግራይ እተ ተአፈኔ እቱ ለህሌት ወቅት፡ወዲክታቶር ኢሰያስ ዲብ አስመረ እንዴ ገብአ እብ መናሰበት ተእሲስ ጀብሀት ተሕሪር ወያኔ ትግራይ ለወደየ ናይ ደንጎበ መቃበለቱ፡እተ “አነ ኸለቅኮሆም ወአነ አሞትኮሆም”ለቤሌነ እተ፡እት ክለ ለመቃበለት እግል ሸዐብ ኤረትርየ እበነቱ እንዴ ከረ እቱ፡ኩለ ህግያሁ እት አቶብየ ወአቶብዪን እንዴ ዐለት፡ እት ኣክር ሚ እግል ትበል ተሐዜ ዶል ትበሀለ፡“እግል ሸዐብ ኤረትርየ ክተት” እብሉ እንዴ ቤለ ርሳለቱ ሑሉፍ ዐለ። ለዮም ዲብ አሮበ፡ አምሪከ ወድወል ዐረብ ዴሽ ወጠኒ እንዴ ትበሀለ ልትሐሌ ለህለ ዴሽ ዲክታቶር ኢሰያስ እግል ኤረትርዪን እማት ክመ ክልዶል ወድየ አጂተን እንዴ ናዘዐ ምነን እንበዐን ለአተስትየን ህለ።

መአይዲን ሸዕብየት ወክሱሰን ለኤረትርየ ናር ኣልጅሒም እንዴ ገብአት እቶም እት ድወል ብዕድ ነብሮ ለህለው ገዲሞም ወሐዲሶም፡ መንባሆም ዲክታቶር ኢሰያስ “እግል ሸዐብ ኤረትርየ ክተት እብሉ”ዶል ቤለ ከእዕለነ፡“እለ ክተት እለ እግል ዐማር ተ”እንዴ ቤለው ዕንታት አዳም ቃጠሐው።ዲክታቶር ኢሰያስ ላኪን ምን እሊ መሽኡም ተንዚሙ አሰሰ ልግበእ አው ምነ እግል ኤረትርየ ሐረርኮ ለቤለየ፡ሐቴ አምዕልማ እግል ዐማር ወተቀድም ኤረትርየ ወሸዐበ ፍኩር ኢኮን።ጀብሀት ሸዕብየት ለምን አጅል ሕርየት ኤረትርየ እንዴ ቴለት ለከሸቶም ከዲብ እሳት ለኣቴቶም እንዴ ኢከፍየ፡ዲብ እለን 30 ሰነት ሕርየት ለትብለን ምስል ድወል ግዋሬ ሱዳን፡የመን፡ጅቡቲ ወአቶብየ ለወዴቱ ሕሩባት ምስለ ሰኣር ሐርብ እግል ሕርየት ለዐለው እንዴ ትወሰከው እብ ስሜት ኽድመት ወጠን ብዝሓም ሸባባት አንስ ወተብዐት አፍኔት ወተአፈኔ ህሌት።

እትሊ ወቅት እሊ እት ትግራይት ገብእ ለህለ ሐርብ ሸዕብየት ሹርክት እቱ እት እንተ፡ለዲብ ዳኽል ኤረትርየ ለህለ ሸዐብ እት ውላዱ ሚ ጀሬ ክም ህለ ምነ ሕኩመት እንዴ ገብአት ተሐክም ለህሌት ሸዕብየት ኩሉ ረአሱ ተውድሕ ራክብ ይህለ።ዲብ ሐርብ ትግራይ ከም ኤረትርዪን ሞተው፡ከም ትጃረሐው ወከም ትጸበጠው ሌጠ እንዴ ኢገብእ ለሰኣላት አምበል እብ አቶብዪን ሰብ ስልጠት ልትሰመዕ ለህለ እዕትራፍ መሻረከት ዴሽ ኤረትርየ ዲክታቶር ኢሰያስ ወዲብ ሐንቴሁ ለህለው ከኢድመቱ ምንለገብአት ትግበእ ሐብሬ ልጉማም ህለው። እት አካን ዲክታቶር ኢሰየስ ወብዕዳም ሰብ ስልጠቱ ወመአሰሳቱ እንዴ ገብአው እግል ዐለም ወሸዐብ ኤረትርየ ዴሽ ኤረትርየ እት ሐርብ ትግራይ እንዴ ሻረከ ጀራይም ክም ወደ እዕትሩፋም ለህለው ሰብ ሰልጠት ሕኩመት አቶብየ ሌጣቶም።እግልሚቱ ላኪን ዲክታቶር ኢሰያስ መሻረከት ዴሹ ዲብ ሐርብ ትግራይ እበ እግል ለኣዕተርፍ ለኢቀድረ ለልብል ሰኣል ምህምቱ፡እብ ህግየ ብትክት ኢሰያስ አፍወርቂ እግል ሸዐብ ኤረትርየ ሰበት ቀብቡ ወምን ሸዐብ ኤረትርየ ልግበእ ወመዓርዲን ሕነ ለልብሎ ኤረትርዪን ክመ አዜ እት መሻረከት ሐርብ አቶብየ አቶብየ እብ ስሜት ስያደት ወጠን ራክቡ ለህለ ተእዪድ ምን ኢረክብ “ለእ” ለልብሉ ክም አለቡ ሙትአክድ ቱ።እሎም ዮም ጸርመት እሳት እግል ልግበኦ ምን ክለ ኤረትርየ ልትከሸሾ ለህለው እብ ፍንቲት ስነት ሰብ ለኢበጽሐው አግሩዝ መስኡልየቶም ምን ልትሐመለ።

እሎም ዮም ሳብ ሰልጠት ወ ከድማቶም አርድ እንዴ አምረረው እቶም ኤረትርየ እብ ርሕ አፍግር ለሐድገወ፡ዲብ አርድ ሰላም እንዴ በጽሐው፡ ሸዐብ ኤረትርየ ዲብ ዳኽል ለሓልፈ ለህለ ክብድት መንበረት ሴመ እንዴ ኢመስለት እቶም፡እንዴ ኢኸጅሎ እብ ስሜት ስያደት ወጠን“ስያደት ኤረትርየ ኸጥ አስፈር ወኸጥ አሕመር” ልብሎ ለህለው፡አክል ኢሰያስ አፍወርቂ እግል ሸዐብ ኤረትርየ ለደመረ፡ለዐዘበ ወለ ቀበ ምን ህለ? እንዴ እምቤ ምን ንትሰአሎም በሊሶም ሚ ገብእ? አክል ኢሰያስ አፍወርቂ ስያደት ኤረትርየ ለሀመሸ ምን ህለ? ምን እምብሎም ህዬ ሚ እግል ልበሎ ቀድሮ? ኢሰያስ አፍወርቂ ኢኮን ምስል አቢ አሕመድ ሰላም ወዴኮ ዶል ቤለ “ምን እለ ወሐር ሸዐብ ኤረትርየ ወሸዐብ አቶብየ ክልኦት ሸዐብ ቱ ለልብል ተእሪኽ ኢለአምር” ለቤለ፡ኢሰየስ አፍወርቂ ኢኮን ፍንጌ ኤረትርየ ወአቶብየ ሕዱድ ኢለአትሐዜነ” ለቤለ፡ ኢሰያስ አፍወርቂቱ ማሚ እግል ርኢስ ውዘረእ አቶብየ ኣቢ አሕመድ ስልጠቼ እግልካ ሃይበ ህሌኮ ወእንተ ምርሐነ” ለቤለ፡ኢሰያስ አፍወርቂ ማሚ ለኖሱ አቅረሐዩ ሐርብ ሕዱድ ኤረትርየ ወአቶብየ ዲቡ ለትከዐ ደም ኤረትርዪን ደም ከልብ እንዴ ሐስበዩ ሴማ ኢከሰርነ ኩሉ መምተለካትነ በለስናሁ ብህል ዲብ እንቱ ዮም መአይዲኑ ገዲሞም ወሐዲሶም እብ ስሜት ስያደት ወጠን ዲክታቶር ዶል ለአይዶ መረቅ ለኢትከዐ እቱ ብሩድ ለአመስሉ ሌጠ እምብሎም። እሎም ዮም ዲብ አልተዋስል አልእጅትማዒ ወብዕድ ወሳይል እዕላም እንዴ ገብአው ዲክታቶር ኢሰያስ ወዕሳበቱ ለአይዶ ለህለው አኪድ መጸት ወግብእ ሸዐብ ኤረትርየ ሴመ ማስለቶም ይህሌት። እበ ካልእ እንክር አቶብዪን እበ ምን ኢሰያስ አፍወርቂ ለረክበዉ ደው አኽደር ስያደት ኤረትርየ ለለሀትክ ወዐዝ ምን ለአሰምዖ ለለአትፈክር ኢኮን። እግል ኤረትርየ ወሸዐብ አክለ ርኢስ ልትበሀል ለህለ ዲክታቶር ኢሰያስ አፍወርቂ ለሀተከ ወለ ቀበ ምን ህለ?

ሰብ ስልጠት አቶብየ ምን ኣምሪከ ወእትሓድ አሮበ እበ ለሳደፈዮም ድቁጣት ዴሽ ሸዕብየት ምን ትግራይ ፈግረ ልብሎ ምንመ ህለው ወለሐቂቀት እንዴ ትብል ዐለት እግል ትዝሀር ምንማቱ፡ አዜመ እሊ ለእበ ከበዉ ለልትከበብ ዴሽ ሸዕብየት ሞት እት አርድ ትግራይ እንዴ ኢትከፍዩ እት አቅሊም ኦሮሞ ገብእ ለህለ ሐርብ ኣህልየ ሹሩክ ክም ህለ ለትፈናተው ዔማታት ለሐብሮ ህለው። ዲክታቶር ኢሰያስ አፍወርቂ እግል እሊ ልትሰአል ምኑ ለአለቡ አውመ ቀሪም ለአለቡ ሸዐብ እንዴ አኽተጠፈዩ ምክራዩ ለአቅወ፡ እብ ለትፈናተ አስባብ ለቃተለዩ፡እት ሐርብ ግዋሬ ድወል ለአፍነዩ ወለ አልጀአዩ፡ ሸዐብ ካምል ምክራዩ አቅወ። ሕነ ለምን እሊ ጀራይም እንዴ ደሐነ እት ልጁእ እነብር ለህሌነ ክልመትነ ሐቴ በደል ገብእ ከቅብላት እሊ ጃእር ንዛም ንትዐንደቅ፡ ውፋቅ እንዴ ሐገልነ ጭንግዕ ፍቱሕ ጋብኣም ህሌነ፡ መትፈንጣር መዓረዳት ማ እግል መስለሐት ዲክታቶር ኢሰያስ ሌጠ ኸድም። እብሊ ልትረኤ ለህለ አዋይን ህዬ ኢኮን ለንትሐለም እበ ለህሌነ ኤረትርየ እግል ነአቅብል ሕካያት ሸዐብ ኤረትርየ ተእሪኽ ሌጠ እንዴ ገብአ ብዕዳም እግል ልዳግሞ እባቱ።