ሰሀም ሸባባት

ምነ ንኢሽ መኪነት ጸላም ለትከረ ሻብ ጸሊም አስክዬ እንዴ መጽእ ርኤኩሁ።ለእታከዩ ዐልኮ ነፈር ህቱቱ ሚ ህቱ ኢኮን አክልሕድ እኩድ ይዐልኮ።ህቱ ክምሰል ለአምረኒ ኸበር ሰበት ዐለ እግልዬ አስክ ኖሱ ነቅመኒ አዘምኮ ምኑ።

ዝያድ ዲብዬ ክም ሸእገ “ኣቢ”እት ልብል ሰላም እግል ኢበሉ እድሁ መደ እግልዬ። “እሊ ህቱ ገብእ” ለልብል ሸክ ምኑ እት ተእኪደት ሰበት ገብአኮ፡እግል ሰላም እዴዬ መደድኮ እሉ።

ለእግል ሰላም መደየን እቼ ኣጬብዓቱ ምስለ ግዝፉ ዶል ልትመጣወረ፡ ማሸለህ ወትባረክ አለህ ለፈርግ ሰኒ ዋስዕ ቱ፡ ናዩ ኢመስለ። ምስል ግዝፉ ወብጥረቱ ቶርማል እንዴ መስል እት ሐንቴሁ ስጋጄ እንዴ ዐጸፍኮ እብ እንቅዕራርዬ ገንሐኩሁ።መብዝሑ ዶል ፍላን እንዴ ቤለው ዶል ሰሙ እግልከ ለትትኻየል እግልከ ሱረት ህሌት።ምስለ እት ረአሼ ልትኻየል ለዐለ ሸክሉ ወለ ሐቂቀት ፈርግ ሰኒ ብዙሕ ዐለ።

“ብርሃኔ አየ ህለ? ኣቢ በዓለ ታክሲ ማጽእ ህለ በሉ” ቤሌኒ እብ ክርን ሰኒ ሕፍስት፡ እንግሊዚ ልትሃጌኒ ዐለ።

“ኣቢ” እንዴ ቤለ ሰላም እት ልብለኒ፡አነ እት ስሜት እንዴ ኸጠ “ብርሃኔ እግል ሊበል ምንሐዛቱ ኣቢ ልብል ለህለ አመስል ዐልኮ። ህቱ ላኪን ስሜቱ ለአስእለኒ ዐለ። ምነ ህግያሁ ወለ ጽልሙ ወድ ኬንየ ክምቱ ተአከድኮ።እትሎም ከም ወርሕ ለዲብ ኬንየ ጸንሐኮሆም ፍንቱይ ጠባይዕ ኬንዪን ለኣመርኮ መስለ እቼ።

“ኣቢ በዓለ ታክሲ ማጽህ ህለ በሉ እግል ብርሃኔ” ብህልዬ ሰበት ዐለ፡ብርሃኔ እንዴ ይእትላኬ፡ስሜቱ እስኡልዬ ሰበት ዐለ አናመ ላዝም እግል አስእሉ ብዬ ለልብል ረአይ መጽኤኒ ከ“ፍላን እትበሀል”እንዴ እቤሉ ስሜቼ አሰአልኩሁ።ህቱ ላኪን ወለ እት ሕስርዬ ኢገብአ።

አዜመ እብ ሐዲስ “እግል ብርሃኔ አፎ ኢትትላከዩ? ዱልያም ይህሌክም ምን ገብእ ህዬ ለታክሲ እንዴ በጠልኩሁ እግል እታኬክም?” ቤለ መዐደይ ኬን ዲብ ለአትቃምት ወለ እግለ እቅሩሕ ዐለ ስጃረት ፍሩቕ እት ለአብል።

ለሓጪር መተባትብ ለህለ እተ ቤት ዲበ እንዴ አቅበልኮ “ኣቢ” በዓለ ታክሲ ማጽእ ህለ” እቤሉ እግል ብርሃኔ። ብዲርመ ብርሃኔ ቱ “በዓለ ታክሲ እግል ልምጸእ ሰበት ቱ በረ ጽንሑ” ብህልዬ ለዐለ።

“እግልካመ ስሜቼ ኣቢ ተ” ቤሌከ፡ “ወእብ እንግሊዚ ተሃጌከ? አኪድ ወድ ኬንየ አምሰልካሁ” እት ልብል እብ ሰሓቅ በረትዕ ገብአ ብርሃኔ።

“ኣባይኔህ ተ ስሜቱ፡ ሐበሻ ቱ። ወሐበሻ ኖሱ እተየ ረክበየ ኢልስኔ እበ አምሐራይ ጸሊም ቱ፡እት ልብል ብርሃኔ አዜመ ሰሓቁ አተላለ።

“ከዱልያም ይህሌክም ምን ገብእ ለመኪነት መቶረ እግል አጥፍዩ”ልብል ህለ እቤሉ እግል ብርሃኔ።

“አነ ውህር አነ! እንተ ኖስከ ምኑ ተአኬ፡አርድ እት መኪነቱ ጭቡብ ህለ? ብዕድ ታክሲ ይእንረክብ ለአመስል ህለ ወለ ሚቱ?” እንዴ ቤለ ለእግል ልልበሰ እዱሉየ ለዐለ ከሚሸቱ ሰለስ ዶል ነግፈየ ወእግል ልልበስ እዴ ማኑ ለዐል ረፍዐ።

ምነ ጨቢበት ቤት እንዴ ፈገርኮ አስክለ ኣቢ ለዐለ እተ አካን እበ መተባትብ ተሐት ከሬኮ። ኣቢ እግለ ታክሲ ሞቶሩ እንዴ አብጠረ ሙሲቀት እት ሰምዕ፡እተ ክርሲ ሐር እንዴ ትጸገዐ ወስጃረት ፍሪቕ እት ለአብል ልትፋገዕ ዐለ።

“አስክዬ ውልብ እንዴ ወደ “ብርሃኔ ሚቱ ተአከረ? ይእትመመ?” እት ልብል ትሰአሌኒ። እት ገጹ ላኪን ለገብአት ትግበእ እሻረት ናይ ሸፋግ ይዐለትኒ። ሱኣሉ ዓዲ ዐለ፡ተእኪር ናይ ብርሃኔ ኩሉ ረአሱ ሹቁሉ ኢመስል።

አነ ሸንጠት ሓዝል ዐልኮ፡ወብርሃኔ “አስክ ኡጋንደ ለሳፍር ጋሻይ ብዬ መውገፍ ባሳት እግል ተአብጸሐነ” ብህሉ ሰበት ዐለ፡አነ ክምቱ ለእሳፍር ልትሸከክ ኢመስለኒ።

“መጽእ ህለ”እንዴ እቤሉ ምስሉ መትባጣር ሰበት አቤኮ፡ አስክለ ብርሃኔ ለዐለ እተ ቤት አቅበልኮ፡ ብርሃኔመ ግድም መዳሊቱ ሰበት አትመመ ብጉስ ሌጠ ዐለ።

“ቀደም እለ እብ ሰበት እሊ ሕጻን ዱጉም እግልከ ዐልኮ መስለኒ? ኣምሪከ ነብር ዐለ፡ ዲብ አምሪከ መኸደራት ለምደ ወዐዱ ምን ልትሸበህ እንዴ ቤለው ኖሶም አስክ አቶብየ አምጸአው። አቶብየ ዐዱ ኩሉ ረአሱ ኢፈትየ። ዎሮት ለኢነፍዕ ነፈር ቱ። እንሰር እንዴ መጽእ ምነ እት ሸዋርዕ ሰክቦ ለዐለው ‘ካምባና’ ዐለ። አዜ ህዬ እሊ እሉ ትርኤ ህሌካቱ እለ መኪነት ምስተዕምለት ትዛበ ወታክሲ ወደየ፡ እለ ሰበት መልከ ህዬ አርድ ጊስ እብዬ ልብሉ ህለ”ቤለ ብርሃኔ ወአፉሁ እግል ልበክብክ እተ ሐማም ዶል አታቱ ህግየ ለአትካረመ።ለእተ አፉሁ ዐለ ማይ ከርዐዩ እት ኢኮን እብ ሰበትለ በዓለ ታክሲ ብርሃኔ ኩሉ ረአሱ እትሙም ይዐለ።

“አዜ እግል ንትአከር አለብነ፡አተቡስ ካምፓለ እንዴ ሐድገተኒ ይእትዐጠል” እቤሉ እግል ብርሃኔ፡ ምነ በዐለ ታክሲ እኩራሙ ለዐልነ ሌጠ እንዴ ኢገብእ ሸበህ ዕርፍ ምን ለሀይቡ እንዴ እቤ ለአምጸአኩሁ ረአይቱ። ሐቴ ለኢመልክ ብርሃኔ እግለ እንዴ ሸቀ እብ ድራሩ ለለዐይር ኣቢ እግል ልቅበብ ኩሉ ረአሱ ኢፈቴኮሀ እሉ።

“እንተ ኖስከ ናፍዕ ይእንተ ሳክት እት አፉከ ለመጽአተከ ትብል፡እስዉ ባስ ቱ እግል ኢልሕደገከ ትፈርህ ለህሌከ? ተዝከረት ሓጅዝ ህሌከ?አዜ አክልሕድ ሳዐት ሰለስ አልዐስር ህሌነ፡አተቡሳት ካምፓለ ህዬ እተ ሐዜካሁ ወቅት አስክ ሳዐት ዐስር ላሊ ህለየ።እሊ ምን አስመረ፡ ከረን እንዴ ትትከሬ እት ዕዳገ ሐሙስ ትውዕል እቱ ለዐልከ ስፉፍ ተአመስሉ ህሌከ?” እት ልብል ብርሃኔ ለዲበ ጭገሩ ለዐለ ማይ እተ ምራየት እብ ቀስብ ነዝፈዩ።

እባ’ነ ምነ ጨቤበት ቤት ፈገርነ ወአስክለ ኣቢ በዐለ ታክሲ ልታኬነ እተ ለዐለ አካን ጌሰነ።ብርሃኔ ገጹ እሱር ዐለ።

ኣቢ በዐላመ ታክሲ ምን ብርሃኔ ሐይስ ይዐለ፡ ገጹ ሰኒ ጭዉግ ዐለ። ተአከርክም ምንዬ ለትብል እሻረት ገብእ አው ህዬ ጠቢዐቱ ተ።ኩሉ ረአስ ክልመት ይአፍገረ።ሳዐት ከም ክም ህሌነ እግል ለኣምርቱ መስለኒ ለዲብ እዴ ገለቡ ለዐለት ሳዐት ሌጠ አቅመተ።

“ሚቱ ሳዐትከ ምን ርኤኸ? ምስል ሐበሸ እት ኢኮን ሚዶል ምስል ኸዋጀ ዉዑድ ዐልከ? “መዋዒድ ሐበሸ” እት ልብሎ ሳምዕ ይእንተ”? ቤለ ብርሃኔ ወገጹ ምነ ዐለየ ፍስስ እንዴ አበለዩ ዲበ መገደመት ምስለ ሰዋግ እግል ልትገሴ ባብ ፈትሐ ወዲበ ክርሲ ለቀዳም ትገሰ። አናመ እተ ክርሲ ለሓራይ በይንዬ ምግሳዬ ጸበጥኮ።

“ላእ ላእ እብ ብዕደት ኢኮን ምን ዘሕመት ናይ መካይን እንዴ ፈርሀኮቱ፡ ሓለት ጠዋሪ አንበተት ምን ገብእ ህዬ ሸዋርዕ ናይሮቢ ቅዌቱ ይህሌት እግልከ?”ቤለ በዐለ ታክሲ፡ ህግያሁ እብ እንግሊዚ ዐለት።

ብርሃኔ ሉቐት እንግሊዝ ሰኒ ሰምዕ፡ዶል ልትሃጌ ላኪን ንሳሉ ሌጠ እንዴ ኢገብእ እደዩ ወብዕድ ክፋል ገሮቡ ኩሉ ልትነፈዕ።

ምነ መኪነት ባጥረት እቱ ለዐለት ሖሽ ንኢሸቶ ሐቆለ ለፈፍነ፡እብ ጀሀት ምውዳቅ ጸሓይ አስክለ ባብ ዐቢ እንክር ድማን ለፈፍነ፡ ከ ምስለ ምን ያያ ሰንተር ለትትበገስ ዐባይ ጽርግየ ተሓበርነ።እተ ሻርዕ ለዐቢ ለገብአት ትግበእ ለተአትኣክረነ ዘሕመት ናይ መካይን ይዐለት።አምበለ እተ መኪነት ትትሰመዕ ለዐለት ሙሲቀት ናይ እንግሊዝ፡ ሰልሲትነ ክርን እንዴ ኢነአፈግር ብዙሕ ሄረርነ።

“እሊ ጋሻይ እለ ዐድ አርኤካሁተ? አዛወርካሁ ገሌ?” ቤለ በዐለ ታክሲ እግል ሰልፍ ዶል አምሐረ እንዴ ልትሃጌ ሰምዐኩሁ።

“እሊ ጋሻይ እሊ እት አዛወሮቼ ሕጉዝ ኢኮን፡ አስክ ሕዱድ ሶማል ጋይስ ዐለ። ዲቡ ምን ሐረከት ኣል-ሸባብ ናይ ሶማል አምሰለዉ ከ አምዔላት ትሰጀነ”ቤለ ብርሃኔ፡እግል ትፍሀመ ቀላል ወ ሕበር-በሮ ለብእተ ሉቐት አምሐረ እበ በልሰ እሉ።

ብርሃኔ ሐር ዲብዬ እንዴ ትወለበ “አየ ጋይስ ዐልከ ኖስከ አስእሉ?” ቤሌኒ።

“ምን ላሙ ለትትበሀል መዲነት እት አቀብል፡ ሞምባሳ እንዴ ይእበጽሕ እት ማልንዲ ለትትበሀል ንኢሽ መዲነት ጸብጠውኒ። ሳምን ሐቆለ ሰጅነውኒ ሐቴ አምዕል ተሐቀቀው ምንዬ ወጠለቀውኒ!” እቤሎም።

“በክትከ ሰነ እት ኢኮን አስክ ሰለስ ሰነት ለገብእ እግል ልስጀኑከ ዐለት እሎም። ምነ ስጅን ለለአኬ ህዬ አስክ ኤረትርየ እግል ልዳገኑከ ወጅብ ዐለ” እሊ ብርሃኔ ቱ ኖሱ መሕከመት እንዴ ገብአ ፍርድ ናይለ ወጅበኒ ለቤለዩ ቀራር ለሐብረኒ ለዐለ።

ለበዐለ ታክሲ ላኪን ክልመት እንዴ ኢለአፈግር እተ ጣፍሐት ጽርግየ ልትነፌ ዐለ።

“እሊ አዜ ነሐልፍ እቡ ለህሌነ ዐቢ ሻርዕ፡ ሻርዕ መልክ ሃይሌስላሴ ክም ቱ ህዬ እግል እሊ ጋሻይ እስኡሉ እንተ?” ትሰአለዩ እግል ብርሃኔ።

“መለሀይ መለሀይ ንጉስ ሃይሌስላሴ ኑሱ ለአምር፡እብ ፍንቲት እተ እሊ መለሀዬ ለመጽአ ምኑ ደገጊት ብዙሕ ጀራይም ዋዲቱ፡ ሕነ ክም እሎም “ራስታ-ፋርያን” እንዴ ቤለው እግል ሃይሌስላሴ ለለዐብዶ በዳንያም፡ ገመመታት “ራስታ” ጸላይም ኢተአምስለነ፡ሃይሌስላሴ መልክ ሙጅርም ክም ዐለ ተአምር ሚ ኢኮን!” ቤለ ብርሃኔ ወእብ ክርን ውቅል ተሃገ።

“ቀደም እለ ክመ እለ ዳገምከ እግልዬ ወምንከ እብ ድግም ክመ ፈሀምኩሁ፡ እንተ እተ ቅባል አቶብየ ገብእ ለዐለ ሕሩባት ሻረከ ወትትሓረብ ዐልከ።ለሕሩባት ለእቱ ሻረከ ተእሲር ወደ እትከ።እንተ ኖስከ ምስል ነፍስከ ትትሓረብ ሰበት ህሌከ እንተ ወሰላም ክልኤ ገበይ ወምስል ሰላም እግል ትንበር ኢትቀድር። ወእብሊ ምስል ድዋርከ እብ ሰላም እግል ትንበር ኢትቀድር፡ ወምንኩሉ ለተአኬ አዜ ምስል ነፈር እት እድንየ ለኢህለ ትትበአስ ህሌከ።እሻረተ ትገብእ እላ እንተ ዲብ እድንየ ለኢህለ መልክ ድዱ ሐርብ ኣዕለንከ! ብዲር ትትሓረብ ዐልከ፡ አዜ ላኪን ኖሱ ለሐርብ ጋብእ ህሌከ” ቤለ በዐለ ታክሲ ሰኒ ሓርቅ ዲብ እንቱ። መልክ ሃይሌስላሴ እብ እኪት ክምሰል ትሰመ ሕሽመቱ ለትከየደት መስለ እቱ።ብርሃኔ ላኪን ለእግለ በዐለ ታክሲ ምን ጅወ ለአነድድ ለህለ ሀገጊት ዓዲ ርኢሁ ዐለ።

“ስምዑ ስምዑ ኩሉ ረአስ ኢኸጅልኒ፡ህግያሁ ክልዶል ክመ ትሰመዐ ለህሌከ ቅሎ ወቅርጡጥ ተ” ቤለ ብርሃኔ ዲብዬ እንዴ ትወለበ።

ህግየ ናይለ በዐለ ታክሲ ክመ ብርሃኔ ቤለየ ቅሎ ወቅርጡጥ ዐለት እግል ኢበል እቀድር።እግል ብርሄኔ ቅያሱ ይዐለት። እት ፈሀም ወተፍኪር፡ ቅያስ ወዝያድ ምን ቅያስ ለልብል መፍሁም ህለ። ብርሃኔ ህዬ እለ ህግየ እለ እግል ትትወሐጥ እሉ ገብአት ምን ገብእ እተ ህቱ ለልፍህሙ ደረጀት እግል ትትቃኔ ህሌት እለ።

እብ ህግየ ብትክት “ውላድ ሚንኣደም ምስል ድዋራቶም እብ ሰላም እግል ልንበሮ ገብአው ምን ገብእ ምን ከርሶም እብ ሰላም እግል ለአግርሶ ህሌት እሎም” ልብል ዐለ በዐለ ታክሲ።ለዲብ ቀበት ድንግርት ዐስከርየት ለዐበ ብርሃኔ፡ ሽዑር ናይለ ትረበ እተ ዐስከርየት ሸርሕ እግልነ ዐለ። ሸርሕ ወለ ፈልሰፈት ቅያሱ እንዴ ገብአ ምን ልፍህሞ እግል ብርሃኔ፡ ምን እሊ ልምህጹ ለዐለ ዕዝር ስራይ ወገብአ እሉ።

እትሎም ሰለስ ወርሕ ምስሉ ለጸንሐኮሆም ምን ልውሕዶ ምስል 30 (ሰላሰ) ነፈር ትበአሰ። ሐት-ሐቴ ዶል ለንቃሽ ወለ ኽፋል እት ረሽመቱ እንዴ በጽሕ እብ አስግደት አድሕድ መ በርኮ ዐለው። ምን ጅዋሁ ለገብአ ልግበእ አከይ መቅርሕ እብ ሒለቼ እባልሑ ለልብል ፈሀም ቡ።እብ መፍሁም ናይ ብርሃኔ ለገብአ ልግበእ አከይ መቅርሕ እብ ሒለት ቱ ለልትባለሕ። ለበዐለ ታክሲ ምን እሊ መፍሁም እሊ ልትሃገዩ ዐለ፡ለህግያሁ ላኪን ክመ እት በልቀት ለትዘረአት ገብአት።

ምስል ብርሃኔ እት ኤረትርየ ብዙሕ ንትኣመር ይዐልነ፡አማን ሑሁ ላኪን ምስል እንሸቄ ዐልነ።ዲብ መዲነት ናይሮቢ እግል ንትረኤ ወዲብ ቤቱ እግል እምጸኡ አማን ቱ ለአትረኤነ። እሎም ከም ወርሕ ለምስሉ ዐልኮሆም ብዙሕ ጠባይዕ ረኤኮ እቱ። ብርሃኔ አዳም ቀብብ ወምን ኩሉ ክም ለሐይስ “ወአናቱ እት ገበይ ራትዐት ህሌኮ” ለልብል መፍሁም ቡ።ሐቴ መስአለት ክም ታመት እንዴ ነስአየ፡ ኖሱ መከለሲ እግል ልውዴ እለ ንኢሽ እምቡተት ለአትሐዝዩ።ዶል ለሐርቅ ህዬ እሳት ዐልመት ቱ።

ጠባይዕ ብርሃኔ ዶል እርኤ አማን ሑሁ እፈቅድ። እት መላምሕ ገጽ አሕድ ምስሎ። ለገብአ ልገብእ ነፈር ስድፈት ዶል ልርእዮም ሐው ክምቶም ለአምር።እት ጠባይዕ ላኪን ፎሖ ወብሶት ቶም።

አማን ምን እሎም “እዴከ እት አፉሆም እንዴ ኣቴከ ኢነክሾ” ለልትበሀሎ ሰብ ሰብር ቱ። ልንአሾ ወልዕበው ውላድ ሚንኣደም ለለሐሽም፡ገበዩ ለጻብጥ ወሃድእ ቱ። ምስል እት ሽቅል እት ሕነ “አማን” እንዴ እምቤ እብ ፍቲ ወሕሽመት ንትላከዩ ዐልነ። ለዐዱ ሰመዉተ“ኣማንኤል” ለትብል ስሜቱ እንዴ ተርፈት ኩሉ አዳም አማን ልብሉ።እብ መእማን አማን፡ አማን ክም ስሜቱ ቱ።

ጠባይዕ ብርሃኔ ላኪን ምን ናይ አማን ሰኒ ልትፈንቴ። “አነ ብርሃኔ አነ! እት ልብል ወዲብ ለአደፋርስ ወነፍሱ እንዴ ለአተባቅርቱ ለልትሰመዕ።

ክመ አማን ሑሁ ሾከት አለቡ፡ “እዴከ እት አፉሁ ምን ተኣትየ ኢነክሸከ ለልትበሀል፡ብርሃኔ ኢኮን እዴከ እት አፉሁ እግል ተኣትየ፡እዴከ እት አፉከ ምን ተኣትየ ኢለሐድገከ። ርሕም ገሽ ቱ እንዴ ልትበሀል እሰምዕ ዐልኮ፡ላኪን ዲብ ውላድ እም እክል እሊ ፈርግ ለሀሌ እብል ይዐልኮ።ናዬ ተቅዪም ሌጠ ምን ገብእ እክል እሊ ወይእቤ እቱ እግል ብርሃኔ፡እለ ሐቂቀት እለ ላኪን ብዝሓም ልሽህዶ እተ።

ኖሱ አማን “ብርሃኔ ሑዬ እት ኬንየ ህለ ጌስከ ምን ገብእ ረአዩ” ልብለኒ እት ህለ፡አነ ወ ብርሃኔ ክም ኢንትኣመር ኣምር ሰበት ዐለ፡ “ብርሃኔ ሽወየ ሕፉን ቱ” እንዴ ቤለ እብ ወለት ገበይ እፍሁምዬ ዐለ። አነ ላኪን ዐደድ እላቱ አመስል ይዐልኮ።

ብዝሓም እሎም እግል አማን ለሐንክሽ ክምሰል ልርእዉ ሕማም ሸለል ለአመሱሉ። ህቱ ላኪን ንኡሽ እት እንቱ ሐኪም እት አካን እኪት እብረት ረግዘዩ ከእግረ ገለቡ መስከነት። እብሊቱ ህዬ ምነ ዲብ ኤረትርየ ለህሌት ደንጎባሀ ለኢልደሌ ዐስከርየት እንዴ ደሕነ እት ኤረትርየ ነብር ለህለ።

ብርሃኔ ላኪን ወድ 16 ሰነት እት እንቱ ድራሰቱ እንዴ ሐድገ “ንኡሽ ህሌከ” እግል ኢለቦሉ እት ዕምሩ ክልኤ ሰነት ወሰከ ከዲብ ካልኣይት ደውረት ክድመት ወጠን ሳወ ጌሰ ወምነ እት ዴሽ ነብር ዐለ።

“ዐስከሪ ህለ” ልትበሀል ዐለ እት ኢኮን፡ ምነ እት ውሕደቱ ለጸንሑ ዘመን እት ስጅን ለሓልፉ ለዐለ በዝሕ። ወክልኤ ዶል ምን ኤረትርየ አስክ ኻርጅ እግል ትህረብ ጀረብከ እንዴ ትበሀለ እት ክል ጀርቤ ዝያድ ሰነት ወሰር ስጅን ቱ። እ’ታ ሸዕብየት “ምክብላል” እንዴ ቴለት ለትሰምዩ ዎሮት ዐስከሪ ምን ውሕደቱ አምበል እጃዘት ዐዱ አው ለሐዘየ አካን ዶል ገይስ ወሐቆሁ ለህለ ዐዛብ ወስጅን፡ ዲብ እሊ ለትሰጀነዩ ምን ክትር ብዝሔ ብርሃኔ ኖሱመ ከም ዶል ክም ትሰጀነ ኣምር ኢኮን።

ብርሃኔ እት ብዙሕ ሕሩባት ክም ሻረካቱ ለዳግም። ሰለስ ዶል እንዴ ተሐከረ ሕክምነ ጋይስ ቱ። ለመትጀረሖት ላኪን “ለገብአ ልግበእ አሰር ናይ ምስክነ ይሐድገ እቼ” ልብል።

አማንተ፡ ብርሃኔ ክም አማን ሑሁ እብ ዕንታት ለልትረኤ ምስክነ አለቡ። እለ አዜ ዲብ እለ ገበይነ ለበዐለ ታክሲ ለቤለየ ህግየ ላኪን ምን ምስክነ ገሮብ ለለአኬ ናይ ተፍኪር ወፈሀም ምስክናቱ።

ብርሃኔ ምን ንእሹ ምስል አዋምር “እለ ደየ ወእለ ኢቲደየ” ሌጠ ለልብል ጠባይዕ ዐስከርየት ዓቢቱ። ዐስከርየት እብ ዐስከርየተ ከማን ለቀዋኒን ወእንድባጥ ዐለም ለኢትተበዕ ዐስከርየት ጀብሀት ሸዕብየት ዲበ ትረበ። ለገብአት ትግበእ መስአለት ትክበድ ወትቅለል እብ ሒለት ሌጠ እግል ትትባለሕ ትቀድር” እተ ልብል ፈሀም ለካርዩ፡ እሊ ዓዳት ወለመድ ዐስከርየት እግል ልግበእ ቀድር።

እተ ክርሲ ለሓራይ ናይለ ተክሲ ግሱይ ዲብ አነ ወዲብ ተፍኪር ሽሙም እት ህሌኮ፡ እግለ ዐባዪ መባኒ መዲነት ናይሮቢ እንዴ ተሐለፍነ መውገፍ አተቡስ በጽሐነ።ቀደም ሰለስ ወርሕ ገብእ ምን መዲነት ካምፓለ ዶል መጽአኮ ምስል ሐቴ እት ከነደ ለትነብር ወለት ኬንየ ወሐቴ ብዕደት ኢራንየት እብ መኪነት ናይ ብሕተ ሰበት መጽአነ፡ ለመውገፍለ አተቡሳት ጋሸ እቱ ዐልኮ።

ለበዐለ ታክሲ ማሉ እንዴ ነስአ ምንመ ጌሰ ምኒን ብርሃኔ ግራሁመ ልትሃጌ እቡ ዐለ። በዐለ ታክሲ እግል ብርሃኔ “ኖስከ እንተ ሰላም ሰበት አለብካ ቱ ሰላም ድዋራትከ ተሐምርግ ለህሌከ” ለቤለየ እተ እፈክር ዐልኮ።

አክለ በዐለ ታክሲ ለሸርሐየ እግል እሽረሐ ኢቀደርኮ እት ኢኮን፡ ጽርሓታት ወበአስ ናይ ብርሃኔ ምን ከርስ ለዳርኩ ዐዋምል ክም ለሀሌ አናመ ባዲ ምንዬ ይዐለ።

ሳዐት 7 አመቅረብ ተዝከረት ሐጀዝነ። አነ አስክለ ላሊ ወአምዕል ዲብ ሕድ ለትሓብረን ገበይ ናይሮቢ ወካምፓለ ወብርሃኔ ህዬ አስክለ ምስል ክልኦት መልህያሙ ለነብሮ እተ ጸባብ ቤቱ እግል ለአቅብል ለንትፈናቴ እቱ ወቅት ተመ።

“ግድም ትሰለም ወገበይ ርኤኮ ምን ገብእ እግል እምጸአካቱ፡ ምስተነድ ለእቡ እሳፍር አለብዬ እግል እምጸእ እቤ ምን ገብእ ላኪን ለትከረዐኒ ቡ ኢመስለኒ። ክመ ፍንጌ አቶብየ ወኬንየ ለህሌት ገበይ ቀላል ፍንጌ ኡጋንደ ወኬንያመ ሳህለት ተ ሰምዐኮ” እንዴ ቤለ ክልኤ እዴሁ መደ ወእግል ሰላም ሕድ ሐቀፍነ።

“ገበይ ሰላም” እንዴ ቤለ ካልእ ዶል እንዴ ኢልትወለበኒ ቀበትለ ዎሮትከ እብ ጋሪቱ እተ ሻርዕ ፈልዐጅ ልብል ለዐለ ሸዐብ ትሸረበ ምንዬ። ሰኒ ሻፍግ ቱ ወኩለ ሓለቱ ህዬ እንድባጥ ዐስከርየት ለአለቡ ዐስከሪ ቱ።

ምነ ለትረኤነ እተ አምዕል አስክለ ትፈናቴነ እተ ሳዐት ሰኒ ተዓመለ ምስልዬ።ለእግል ብዕዳም ለአርእዩ ለዐለ አከይ ጠባይዕ እግልዬ ይአርኤኒቱ። ሐት-ሐቴ ዶል እብ ሰኣላት ልቡ ቀርሐኮ እቱ ምን ገብእ በሊስ እንዴ እታኬ እብ ሰኣል ለበልስ እቱ እግልዬ ወቅትመ ዐለ፡ ወእሊ እብ እኪት እነስኡ እሉ ይዐልኮ።

ለገብአ ልግበእ ነፈር “ኬንየ እግል ኢጊስቱ” ቴልካሁ ምን ገብእ “ናይሮቢ ክም ካምፓለ ኢተአምስለ እንዴ ትበጥር ለሳልቡከ ሽርዑናም ሴርቀት ህለው፡ “ሳከት ኢተአንገዋጌ” እንዴ ቤለው ለለአትፋርሆ ሑዳም ኢኮን።

ሰብለ አተቡስ “ክል ዎሮት ከ ዲብ ክርሲሁ ልትገሴ እግል ንትበገስቱ አስክ ልብሉነ፡እተ አካነ እንትዛር እንዴ ገብአኮ፡ብርሃኔ ምነ ትከበቴኒ እተ አካነት አስክለ ጨባብ ቤቱ፡ ምኑ ለሰምዐኩሁ፡ ለትባሀልናሁ ወለ ወዴናሁ ኩሉ እግል እትፋቀድ አንበትኮ።

“እትለ መዲነት ናይሮቢ ብዝሓም ሴርቀት ህለው” እንዴ እቤ ሰልፍ ለትሰአልኩህተ ሰኣል ዐለት። “ደሐንቶም ክመ ምን ረዪም ልትሀደገ ወለ ልትሰምዖ ኢኮን” ልብለኒ እት ህለ ነፍሼ እግል አትሳጅዕ እንዴ እቤ ለትሰአልኮሁ ሰኣል ቱ።

“ኣዮእ! ሐበሻ ተክቢረት ትግበእ እትክም፡አምበል ቤለው ወትበሀለ ሽቅል ብዕድ አለብክም፡ እግል ተኣምር ምን እለ መዲነት ለተሐይስ አለቡ። አነ ዲብ አዲስ አበበ ሰነት ከልአኮ። ለዲብ አዲስ አበበ ለህለው ሴርቀት ፍንቱያም ቶም። አምበል አትራዘቆት ሐዘው ምን ገብእ ለእለ ባልዕ ህሌከ ነብረ ምን ድርጽከ እግል ልስረቆ ለቀድሮ ሰብ መቅደረት ቶም” ቤሌኒ።

ክእነ እት ልብል እብ ክርን ወቅል ልትሀራሀረኒ እት ህለ፡ እበ ለምንዬ እንዴ ነስአየ ሓዝለ ለዐለ ሸንጠት እግለ እተ ሻርዕ እብ ገበዮም ለሐልፎ ለዐለው አንፋር ዶልተ ከዎሮት ደግሽ ዐለ።ምስል ብዝሔ ሸዐብ ላመ ብዕዳም አድሕድ ዳርኮ ሰበት ዐለው እብ ፍንቱይ እግል ብርሃኔ ለአግረሰ እቡ ይዐለ። አነ ሰልፍ ዶል እርእዩ ሰበት ዐልኮ እተ ጠባይዑ ሰኒ ተፈከርኮ።

“ብዝሓም ክእነ ሰበት ልብሎ፡ እለ ዛህረት እለ ተሀሌ ገብእ? ክመ ክልኦት ነፈር ረአስከ ይህለ ሐቆ ቤለውከ ተምትሙ ለልትበሀል”እቤሉ።

“ዲብ እለ ላኪን ክልኦት ረአስ ለቦም አንፋር፡ ረአስከ ይህለ ሐቆ ቤለውካቱ ለእግል ትተምትሙ ለህሌት እግልከ። ሐበሻ ላኪን ኖሱ ረአስ ሰበት አለቡ ከአፎ እብ ረአስ እግል ልትሃጌ፡ “አርዌ ረአ ምን ሐብል ሰከ” ክመ ልትበሀል ፈርሀት ትዘረአት እቶም። ብዲር ልባስከ እት መቅጠንከ እት እንቱ እት ቤት እንዴ መጽአውከ ለሰርቆ ሽርዑናም ሴርቀት ዐለው። ወእሊ ኩሉ እብ ድግም እንሰምዑ ለዐልናቱ። አዜ ላኪን ለረኤናሀ አለቡ፡ እሊ ቤለ ቤለው ናይ ሐበሻ ቱ”ቤለ ብርሃኔ።

አክልሕድ እለ “ሐበሻ” ለትብል ዘዐት ወለ ቤለ ወትበሀለ ዲብ ምን ማስሰ ሀለ መትፈሃም እግልዬ አበ። እትለ መዲነት እብ ሰበብ ስርቅ ክመ እሰምዑ ለዐልኮ ለልትራዘቅ ክም ኢኮን ሰበት ፈሀምኮ እብ ሀዳአት ሸዐርኮ።

“እት ጅወ መዲነት ናይሮቢ ኢ-ስሊ ለልትበሀል ደዋይሕ ህለ ሶማልዪን ለነቡሩ። ሐቴ አምዕል እግል ኒጊስ እቱቱ እንታዲ እግል ትርአዩ።ለሰያቄን ደሀቦም እብ ከዋሊ እት አፍ-ባብ እንዴ ፈርሸው ለአዘቡ። ተሕዊለት ለሸቁመ ሰላዲሆም ሕዘም እንዴ ወደወ እት ሻርዕ ፋርሻም ልውዕሎ። ዲብ እሊ ሱግ እሊ ለህለው ኬንዪን እግል ልስረቅ ለጀርብ አለቦም፡ እብ አደቦም ነብሮ። ሶማልዪን ሓዩት ቶም። ኬንዪን ሐበሻ ቶም ሌጠ ለእሎም ሰርቆ። ሐበሻ ምን ጽላሎም ፈርሆ ሰኒ ፍጀዓም ቶም፡”ቤለ ብርሃኔ ወአተንፈሰ።

ም’ነ አምዕል ሰልፍ ዶል ትረኤነ አስክ እለ ሳዐት ለእግል ልሳርሐኒ መውገፍ አተቡሳት እንዴ አብጸሔኒ ለአቅበለየ ምንዬ ብርሃኔ፡ “ሐበሻ” ሐቆ ቤለ ላዝም ቱ እብ ሕውነ ወእኪት እግል ልስመዮም። ሐት-ሐቴ ዶል ነብረ ሐበሻ፡ ቡን ሐበሻ ወልባስ ሐበሻ እግል ሊበል ዶል ለሐዜ ምን ኢገብእ እትለ በዝሐት ህጅኩ እቢ ወቅብብ እግል ሐበሻ ሰኒ ዛህራት እቱ ተን።

እተ እብ አስማጠ እብ ሕሩፋት ላቲን “Gate-Way” ጌት-ወይ” ለትከተበ አተቡስ ምን እንሳፍር ወቅት ብዙሕ ዋድያም ይዐልነ። እበ ባብ ምን ቀደም ዶል ተአቴ እብ እንክር ድገለብ ለዐለ ከራሲ እት ምግብ ናይለ ዐባይ አተቡስ፡ ሸንጠቼ እንዴ ከሬኮ እበጥር ዐልኮ።

ክመ ብርሃኔ ልብሉ ለዐለ ሀገጊት ሐበሻ ምን ኢገብእ፡ምን ናይሮቢ አስክ ካምፓለ “በደል አምዕል ላሊ፡ ወላመ ገበይ በደል ቡስየ ለትትበሀል መዲነት እበ ትነስእ እብ ማላባ ለትትበሀል ዐድ ምን ትሳፍር ሐይስ” ልትበሀል።

ለገበይ እንዴ ኢትገብእ ሰኔት ትትበሀል ለህሌት እተ መዕበር ለህለው መወዘፊን ጀዋዛት፡“ለ ላሊ ሸቁ ሰንያም ቶም” ልትበሀል። ዓመተን ላኪን ኬንዪን ፖሊስ፡አምን ወመወዘፊን ጀዋዛት እብ ፍንቲት እግል ኤረትርዪን “አክል እሊ ማል ድፍዖ አው አስክ ዐድክም እግል ንዳገነክምቱ” እንዴ ቤለው ለአትፋርሆ ወእሊ አከይ መዋዲት ክም መስደር ርዝቆም ናስኣሙ ቶም።

ኤረትሪ “አስክ ኤረትርየ እግል ንጥረዘካቱ” እንዴ ቤለው አትፋርሀዉ ምን ገብእ፡ ምን ቤት ሼጣን እንዴ አምጸአ ደፍዖም። እብሊቱ ህዬ ኸጥ ማባለ ላሊ ዝያድ ኸጥ ቡስየ ሐረከት ሙሳፍሪን ለትትረኤ እቱ።

ባክለ ክርስዬ እት እበጥር እናስ ረዪም ሸካም ክመ ሓጀት ባድየት ምኑ ድማን ወድገል እንዴ ልትዋለብ ረኤኩሁ። እግለ እተ አተቡስ አድሕድ ዳርኮ ለዐለው ሙሳፍሪን እንዴ ለአሻክት ዲብዬ መጽአ።

እግለ እት ባከቼ ለዐለው አንፋር እብ እደዩ እት ዳርኮም ወዕንቱ ዲብዬ ካርሀ እት እንቱ ክም ረኤኩሁ፡ “የእ እናስ በዐል ደሐን ኢመስል” እቤ ወሰኒ ገንሐኩሁ። ሸከሙ ሰር ናይለ ወጅሁ ግልቡብቱ ወአምበለ ዲብዬ ካሬሀን ለዐለ ክልኤ ዕንቱ ለገጹ ሐቴ ትትረኤ ምኑ ይዐለት።

እግል ልትሃጌኒ እተ ለቀድር ንሳፈት ክምሰል በጽሐ “ሰላም ሐበሻ እንተ” እንዴ ቤለ እግል ሰላም እዴሁ መደ። አናመ እዴዬ እንዴ መደድኮ ሰላም ዲብ እብሉ ለ “ሐበሻ እንተ” እንዴ ቤለ ለትሰአሌኒቱ ሰኣል እንዴ ይእበልስ፡ እት ረአሽ ብዕድ ሰኣል አዳወርኮ።

ለአተቡስ ናይ ሱማልዪንተ። ለበዝሐው ሙሳፍሪንመ ሶማልዪን ዐለው። ህቶም ኖሶም ሶማሊ እንዴ አምሰለውኒ “ሆርየ” እት ልብሎ እብ ሉቐት ሶማል ዲብ ልትሃገውኒ፡ እሊ አናስ እት ቀበት እሊ ኩሉ ፈልዐጅ ወዴ ለህለ ሸዐብ ከአፎ ፈረጌኒ? እንዴ እቤ ሐስብ ዐልኮ።

እሊ ልትሰአለኒ ለህለ እናስ “ሐበሻ” እግሉ ክመ ብርሃኔ ለልብለ ወለ ልፍህመ ናይ አኽባረት ወቤለ ቤለው ለሐስበ ሐቆ ገብአ፡ “ኣቤ ሐበሻ አነ” እቤሉ ምን ገብእ? ሚ እግል ሊበለኒቱ? ዲብ እብል እት ናይ በል ወሸም ወቅት እሊ ሕሳብ እሊ እት ረአሼ አዳወርኩሁ።

ለበዝሐ እትሊ ደዋይሕ ምፍጋር ጸሓይ አፍሪቀ ለህለ ሸዐብ “ሐበሻ” እግል ኤረትርዪን አው እግል አቶብዪን ልቡለ።

“ኣቤ ሐበሻ አነ!” እቤሉ ለእግለ እግል ሊበል አው እግል ልውዴ ለሐዜ ለህለ እብ አኖካይ ታኬኮ።

“አልሐምዱ ልለህ ሰኒ ገብአከ መረ ሕጉዝ ህሌኮ፡ ተስፋይ እትበሀል።ዲብ እለ አተቡስ አስክ ኡጋንደ እግል ትሳፍር ወለት ሑዬ ሓጅዘት ህሌት።በስ መተንስይ እግል ትግበእ እለ እግልዬ ሐዜኮ። በነ እግል አሳፍረ ይሐዜኮ ወድ ዐድ ምን ይእረክብ ህዬ ኖሼ እግል አብጸሐ ሐዜ ዐልኮ” ቤሌኒ። ሰኒ ክም አምኔኒ ምነ ክርንቱ እሙር ዐለ።

“ከአፎ ፈረግከኒ ሐበሻ ክም አነ፡ እሎም ሶማልዪን ሶማሊ እንዴ አምሰለውኒ እብ ሉቐት ሶማል ልትሃገውኒ ህለው ማሚ?” እቤሉ ሰኒ እስትቅሩብ ዲብ አነ ወዲብ እትበሰም።

“ክትምየት ኤረትርዪን ኢትገይስኒ፡ ዝያድ እግል ተአስተቅርብ ሰልፍ እበ ባብ ናይለ አተቡስ ዶል ሸበብኮ ኤረትሪ ክም እንተ ኣመርኮከ። ኤረትርዪን እብ ክትምየት ምን ቀበት ሚልዮን እሎም እግል አሌልዮም እቀድር። ሕነ ቤለ! ወለ ሐበሻ እንዴ ቤለ ለአስተብደየ ዘዐት ሐቴ ዶል ከአፎ እት ክትምየት ኤረትርዪን በደለየ መትፈራግ እግልዬ አበ።

“ክትምየት ኤረትርዪን! ዶል ቤለ ብዕደት ቅሰት እግለ ትፋቀድኮ።

“ከላስ እግል እምጸእቱ” እንዴ ቤለ እተ መርከብዬ ክም ጠፍጠፌኒ ለምስሉ ጋርብ ዐልኮ ዝክርያት ምኑ በልሴኒ።

እንዴ ኢልትአከር እት ቀበት ሑዳት ደቃይቅ ሐመልማል ግሰ፡ ዕንታት ፈናጂን፡ ዞቲ ጸሊም ለልብሰት ወእብ ወግም እት ዕምር ሰልፍ ዕስራታት ለህሌት ወለት ሻበት አሰሩ እንዴ ትገይስ አቅበሌኒ።

እግል ሰላም እዴሀ እንዴ መደት “ራሄል እትበሀል” ቴለተኒ።

አናመ እግል እሳለመ እዴዬ ማድድ ዲብ አነ ስሜቼ አሰአልኮሀ። ለማይማዮ መስል አጬብዓተ ምነ እዴዬ ልትመላሐጥ ህለ አምሰልኮ። ሽቅል ለኢሸቄት እብ ሕንቃቄ ወመራዐየት ሰኔት ለዐቤት ወለት ራክባም ትመስል፡ እቤ እብ ልብዬ። ጠረፍ ሽባክ ለተሌ ክርሲ ዲቡ እግል ትትገሴ እብ እዴዬ አሸርኮ እለ።

አሻይር ሐምዴ ወሕሽመት እንዴ ተአርኤ አስክለ ዲቡ አሸርኮ እለ ክርሲ ሐልፈት ወትገሴት።ሰኒ ኸጃሊት ትመስል፡ ኽጅል ህዬ እት አንሳይት ሰኒ ሌጠ እንዴ ኢገብእ፡ምነ እቡ ትትፈቴ ወትትሐሸም ሕሙድ ጠባይዕ ቱ።

ለ ምን ሐበሻ ክም አነ እብ ጼነ ለረክቤኒ እናስ፡ እግለ ጼነ ውላድ ዐድ ለሐዜ እ’ለ ለዐለ ወለት ሑሁ ክም ሰለሜኒ፡ አማነት ለአርፈዔኒ እት መስል እት ገጹ ራሐት ትትረኤ ዐለት።

እት ክልኢትነ እንዴ ትወለበ “ኢልብክም ረኤክም ምን ገብእ ዲብዬ አተስሎ” እንዴ ቤለ እብ እሻረት እትሳል እብ አጫብዑ እት እዝን ማኑ አሸረ።

“ራሄል ኢትፍርሂ እሊ ሑኪ ወድ ዐድኪቱ ምስሉ ህሌኪ፡ እግል ሮቤል ወሜሮን ህዬ ወድ ዐድ ረከብኮ እለ እንዴ እቤ እግል አስእሎምቱ፡ ሰፈር ሰላም” እንዴ ቤለ ዔጻቱ አትሌነ ወተሀርበበ ምኒነ።

ምነ አተቡስ ክምሰል ትከረ ራሄል እበ ሽባክ ተአትቃምቱ ዐለት።

እብ ረአየት ጀዛ’ቢት ወዲብ አዳም አጊድ ለትትሓበር ምንመ ትመስል፡ እንዴ ዘገንኮ ህግየ እግል አንብት ምስለ ኢቀደርኮ። ህታመ ክም እሊ ሽዑር ለናዬ ዐለ እ’ታ ትመስል።

እብ ገሌ ተአገርስ ለህሌት መስል ዐለት። ለአርድ ብዙሕ ክም ኢተአምሩ ወጋሻይት ክምተ እምርት ዐለት።

ለፍንጌ ክልኢትነ ለዐለ ሓጅዝ ክጅል እግል ልትገልጸጽ “እት ናይሮቢ ብዙሕ ወዴኪ? ላኪን ካሻይት ትመስሊ?” እንዴ እቤ ለህጅክ እብ ሰኣል አምበትኮሀ። ለእብ ጠቢዐት ለትካሐለ ዕንታተ ምስለ ቁሩን ሐወጅበ እንዴ ተአሽለማልም ክም ወለበተኒ እንዴ ዘገንኮ እግል እርአየ ኢቀደርኮ።

“ምን ኸርቱም ማሌ መጽአኮ፡ ዮም ካልኣይት አምዕልዬ ተ !” ትብለኒ እት ህሌት ላመ ክርንተ ፍንቱይ ቃነ ክምበ አግረስኮ።

“ምን ኸርቱም አስክ ካምፓለ እብ ጁበ ወኢሔሰ እግልኪ?” አዜመ ህጅክ እግል ልግበእ እግልናቱ እትሰአለ ለዐልኮ።

“እሊ ሳርሐኒ ለዐለ ሑ አቡዬ አስክ ጁበ ቱ ተዝከረት ሓጅዝ እግልዬ ለዐለ። ሐሬ ላኪን “ኤረትርዪን ምን መጣር ጁበ አስክ ኸርቱም በሉሶም ህለው ሰምዐ፡ ከአስክ ናይሮቢ ተዝከረት ብዕደት ዲበ ደፍዐ እግልዬ፡ ቴለተኒ።

“እሊ ኸበር እሊ ምን ምን ሰምዐዩ?” ክም እቤለ፡ “አቡዬ ተስፋይ ምን ምን ኢሰምዕ? ላኪን ሀገጊት ናይ ሐበሻ ገብእ፡ እሊ ሑ አቡዬ ላኪን ለገብአት ሓጀት ሐቆ ቤለየ ነፈር ኢበልሱ። እትሊ ዐድ ስኒን ዋዲ ቱ። ሕነ እንዴ ኢንትዋልድ ቱ ምን ኤረትርየ ለፈግረ።ምን ትብሎም እሎም ኤረትርየ ለኢአተው? ጀብሀት? እንዴ ቴለት፡ ሐሬ ኖሰ አከደተ ኣቤ ምን ጀብሀት ቱ ወኤረትርየ ኣቲ ኢኮን” ቴለት።

ራሄል ድግመ ተአተላሌ ዐለት መስለኒ፡ አነ ላኪን “ኣዮእ! ሕቡሽ ቤለ ቤለው እት ኢኮን ስመዕ ክልኤ እዝናቱ ወእብ ክልኤ ዕነ ረኤነ ሚዶል እግል ትፍገር ምንክምቱ?” ለልብል ሀገጊት ብርሃኔ እሉ ትፋቀድኮ።

“ሀገጊት ሐበሻ ምን ተአምኑ ኢትትረየሕ ወምን ኢተአምኑ፡ ኩሉ ምን ሕድ ለአኬ።

እብ ከብጄ “እሊ ሰፈር ላሊ እብ ግዲደ ምስል ራሄል እንዴ እትሃጀክ ወለ ቅዱይ ትንፋሰ እንዴ እትነሸዕ ምን እሳፍሩ ምነ እሙር ዘመኑ ምን ዘይድመ ወይአቤኩሁ” እብል ዐልኮ።

እት ክእነ ተፍኪር እት ህሌኮ ላኪን ዎሮት እት እዴሁ ጭሬማይ ናይ ወረቀት ለጻብጥ ሶማሊ ሻብ ምን ሰልፍ እንዴ አንበተ ከራሲ እንዴ ለዐልብ እት መጸአነ ረኤኩሁ።እግልነ ክምሰል በጽሐ ህዬ በጥረ። ለራሄል ግሲት እቱ ዐለት ክርሲሁቱ።

ሕነ ጼነ አድሕድ እንዴ ሐዜነ ምስል ግሱያም ክም ህሌነ እግሉ ምህም ኢኮን። ላዝም እተ ሓጅዝ እቱ ለህለ ክርሲ እግል ልትገሴ ሐዘ።ለእት ፍንጌነ ለህለ ናይ ሉቐት ኢመፋሀመት እንዴ ኢከረዐኒ እግል አፍህሙ ጀረብኮ። ለእለ እቤ ምን እቤ እግል እትዐወት ኢቀደርኮ።ህግያዬ እዝን ጽምት እንዴ ሀበየ እግል ራሄል እግል ትቅነጽ አሸረ እለ።

ብጣርዬ እንዴ ገብአኮ እተ አተቡስ ክልኦት ክርሲ ፋድያም ምስል እግል አትቃምት አምበትኮ።ናይ ዎር-ዎሮት ነፈር ምን ኢገብእ ክልኦት ክርሲ ምስል ኢረከብኮ።አነ ወራሄል በን-በን እንዴ ትገሴነ እግል ኢንሳፍር ሌጠ እግል አስተስለም ይሐዜኮ።

ስድፈት እተ ቀዴማይነ ለዐለ ከራሲ ምኑ ሐቴ ወለት ብጣረ እንዴ ገብአት፡ “ሐበሻ እንተ?” ቴለተኒ እብ ሉቐት ትግርንየ። እብ ግርመት አክል ራሄል ምንመ ኢትገብእ እብ ዕምር ላተ ስነን ተን። አዜመ እትለ አተቡስ ብዕድ ጼነ ሐበሸ ትረከበ።

አነ እንዴ ይእበልስ እለ፡ “ንዒ ምስልዬ ትገሰይ እሊ ክርሲ ፋዲቱ” ቴለተ ወምነ ግሲት እቱ ለዐለት ክርሲ፡ እተ እንክር ሽባክ ለዐለ ክርሲ ቀርበት ምነ።

ራሄል ምነ ግሲት እቱ ለዐለት ክርሲ እንዴ ቀንጸት “ ደሐን ትገሴ በሉ” ትቤ ወዲብለ ትትላከየ ለዐለት አክለ ለትገብእ ወለት ጌሰት።

ም’ነ ሑ አቡሀ እንዴ መጥጠ ለሰለሜኒተ ‘ወለት ዐጄ’ ለፈንቴኒ ሶማሊ ሰኒ አቤኩሁ። ምስሉ በደል እትገሴ እቤ ከዲበ አተቡስ ምንረሐር ክርሲ እግል ሕዜ ሐር አትቃመትኮ። ራሄል ብዙሕ ረዪምዬ ሰበት ይዐለት፡ ሐር ክርሲ ረከብኮ ምን ገብእ ምነ እግል ኢሪምቱ እቤ ከእንዴ ይእፈቴ ምስለ ሶማሊ ትገሴኮ።

ራሄል ወለ ወለት ለትላኬተ እግል ሕድ ጋሸ ኢገብአየ። ብዲር ክምሰል ልትኣመረ፡ እትሚ ልትሃጀከ ክም ህለየ እፍህመ ለኢዐልኮ ህጅክ እተ አተየ።ራሄል ክመ ምስልዬ ትትሃጀከ ለዐለት ሃድአት እት እንተ ትትሃጌ ዐለት። ለሐዳስ ወለት ላኪን ህግያሀ እብ አፍ ሌጠ እንዴ ኢገብእ እብ እደያመ ትወስክ ዐለት።

አነ እት ሰፈር ኩሉ ረአሱ ይእሰክብ። ለሽባክ ንኢሽ አኬነት ፍትሐት እቱ ዐለት።እብለ አኪነት ንኢሽ ለአቴ ለዐለ ሀወእ እንዴ ለሄሬኒ አስክለ ጽልመት በረ አቅትቃምት ዐልኮ።

አነ እግል እባልሑ ለኢእቀድር ተፍኪር ወሰኣላት እቱ ትሸምምኮ።

“እለ እት አስላፋት ዕስራታት ለህሌት ሻበት ራሄል ሚ እግል ትውዴቱ ካምፓለ ገይስ ለህሌት? ምን ኤረትርየ እግልሚ ፈግረት? ወከአፎ ፋግረት ገብእ?” ለማይ ማዮ መስል አጬብዓተ፡እብ ዕንታት ሌጠ ለልትፈረግ ሓምል ገጸ ዶል ትርኤ እብ መራዐየት ወሕንቃቄ ዓብየት ክምተ እተ ገጸ ልትአመር።

እሊ ኩሉ ሸባባት ዐዱ ወዳሩ እንዴ ሐድገ እት ኩለ ዓለም ጭንግዕ ፍቱሕ ጋብእ ለህለ፡ ሚዶል ቱ ገብእ እት ዓዱ፡ መስከቡ፡ ዳሩ ወቀዕረቱ ለአቀብል? ኣግልሚቱ ህዬ ክእነ እንፈኔ ለህሌነ? አነ እት ክእነ ሀም ክሩይ እት ህሌኮ ለገይነ ክም ተኮበት እንዴ ትትጠየም ትትወሔ ዐለት።

ለነሳብ ሶማሊ ለዳገነየ ምንዬ እት ጼናሀ ዳፍእ ለዐልኮ ራሄል ምስለ ወለት እብ ሐወጅበ ወአስፋረ ትትሃጌ ዐለት። ለራሄል ገሌት ምንዬ ሳልሳይነ ሐበሻ ስጋደ ዕኑን ዲብ እንቱ እት ራሄል እንዴ ትጸገዐት እብ ስካብ እንዴ ተሐርር ሰምዐኮሀ። ምነ ስካባ ወመትረይሖተ እትለ ገበይ ጋሻይት ክም ኢኮን እምር ዐለት።

እትለ ገበይ ረያም እብ ዝክርያት ገጬ ሐር ወለ አተቡስ ረአሰ ቀደም እንዴ ትትነፌ መዬነ። ላሊ ሰኒ ሐቆ ትከፈለት ለምን ገበይ ቡስየ ለሐይስ ለልትበሀል መርከዝ ጀዋዛት ማላባ በጽሐነ።

ክሎም መሳፍሪን ዲብ ሰቦዕ (7) ለገብኦ ሸባቢክ ናይለ ኬንዪን መወዘፊን ጀዋዛት ሰፍ ጸበጥነ። ክል ዎሮት ወሳይቑ እንዴ ጸብጠ ቪዘት ኽሩጅ እግል ንውዴቱ ሰፍ ጻብጣም ለዐልነ።

ምን ምግብ ለእብ እንክር ድማን ጀፈር ለዐለ ሽባክ ወለት ዐለት እቱ።አነ እት ምግብ ሰፍ ጻብጥ ዐልኮ። ምነ ለዐልኮሀ አካን እተ አንሳይት ለዐለት ቱ ሽባክ እንዴ ቀይርኮ ሰፍ ጸበጥኮ።ዎሮት ምነ ስፉፍነ ታብዖ ለዐለው ዐሳክር እተ ለዐልኮ ዲቡ ሽባክ እግል አቅብል አሸረ እግልዬ።

ገብእ ለዐለ እጅረኣት ሻፍግ ምንመ ይዐለ፡ ገሌሆም አጊድ እጅረኣቶም እንዴ ወደው እተ አተቡስ መጋሲቶም ጻብጠም ዐለው። ሐቆ ሰር-ሳዐት ገብእ ተረቼ መጽአት ወጀዋዝዬ ሰለምኮ።

ለመወዘፍ ናይለ ጀዋዛት እግልዬ ወዲበ ጀዋዝዬ ለዐለት ሱረቼ እብ ተር-ተረት ልርኤ እንዴ ዐለ፡

“እለ ሱረት ዲብለ ጀዋዝ ለህሌት እብ መእማን ናይካተ” ቤሌኒ፡ እተ ጀዋዝ ለዐለት ሱረት አስክዬ እንዴ አትወለበየ።

“አኪድ ናዬተ፡ አናቱ !” እቤሉ።

“እሊ እተ ሱረት ለህለ ላኪን ነፍሱ ሰኔት ተ” ቤሌኒ ምን ጅወ ለሰሕበዩ ትንፋስ ክልኤ ለምጅግሙ ዲቡ እንዴ ጀምዐዩ ጠለቀዩ ምኑ።

“እለ ኬንየ ዐድክም ኢናሰበተኒ ሀመርኮ ገብእ?” እቤ እት እትበሰም እሉ።

ህቱ ላኪን ገጹ እንዴ ጭዉግ እት እንቱ ገንሔኒ።

ለጀዋዝዬ እግል ዎሮት ብዕድ ምስሉ ለሸቄ እንዴ ሀበዩ “እብለ ሕለፍ”ቤለ ወእዴሁ ገጽ ሐር እንዴ ተሐብር አስክለ እትጀህ ድማን ለዐለት ቤት ኢባርሀት ወኢጽልምትት አሸረ እግልዬ።

እተ እለ ሐበረውኒ ቤት ክም አቴኮ፡ ለሰኒ ልትረኤ ለኢዐለ ነፈር እግለ ጀዋዝዬ እብ በጣርየት ልርእዩ ዐለ።

አነ አዳም ክም ህለ እርኤ ሰበት ዐልኮ፡ “ሰላም” እቤሉ። እተ ሰላምዬ እንዴ ኢበልስ፡“ለልደፈዕ ብከ፡ ሰላዲ እግል ትድፈዕ ቱ” ቤሌኒ እብ ክርን ሰኒ ሕፍስት።

“ሰልፍ አነ ጣልብ ጃምዐት ማኬሬሬ አነ ወቪዘት ናይ ጣልብ ህሌት እግልዬ ረአየ። ካልኣይት ህዬ እብ አሳስ ኣትፋቅየት ኮሜሳ ኤረትርዪን ናይ ቪዘት ይእንደፍዕኒ። ወናይ ቪዘት ኖሱ አስክ ሐቴ ደውለት እንዴ ተአቴ ዲብ ኢኮን እንዴ ትፈግር ምን ሚዶል ትደፈዕ” እቤሉ።

ኬንየ እንዴ አቴ ምስል ሐቴ ወለት ኬንየ ወብዕደት ኢራንየት እብ መኪነት ካስ አቴነ ወለ ሰአሌኒ ዐለ አለቡ። እተ ወቅት ለሀይ ቪዘት ድኹል በላሺ ለዘብጠው እግልዬ አዜ እንዴ እፈግር ድፋዕ እግል ልበሉኒ ዋጅብ ኢኮን።

እሊ ኩሉ እብ ገበይ ቃኑንየት ለትሰአልኩሁ ሰኣላት በሊስ እንዴ ኢለሀይበኒ እቱ “እንተ ሐሳይ እንተ፡ ጣልብ ጃምዐት ኬሬሬ መ ይእንተ። እት ጁበ ተጃረት ትሸቄ ማሚ?” ቤለ፡ እብ አጫብዑ አስክዬ እንዴ ለአሽር።

እተ ህግያሁ እስትቅሩብ እት አነ፡ “አነ ተጃረት ይእሸቄኒ” እቤሉ።

ለጀዋዝዬ እንዴ ባለሱ ዲብ ሐቴ ቀደም ሰነት ለገብእ አስክ ጅኑብ ሱዳን መዲነት ጁበ ለአቴኮ እበ ቪዘት አርኤኒ።

በጣርየት እንዴ ወለዐ ህዬ፡ እተ ሰበብ ዝያረት ትብል ለዐለት አካን እተ እብ እንግሊዚ “እት ጅቡ ተጃረት ሸቄ” ለልብል ክቱብ አርኤኒ።

አማኑቱ፡ላኪን እት ጁበ ወብዕዳት መዳይን ጅኑብ ሱዳን ዝያረት እንዴ እወዴ እታጅር ይዐልኮ።

ዎሮት ዲብ ክለ ለዐለም ዝያረት ወዴ ለዐለ ኣንድሬ ብቱጅሩ (Andre Brugiroux ) ለልትበሀል ፈረንሲ፡ ጅኑብ ሱዳን እት ሰነት 2011 ምን ሽማል ሱዳን ክም ሐዳስ ደውለት እንፍስለት ሰበት ዐለት፡ ምን ኡጋንደ አስክ ጅኑብ ሱዳን ምስል ሳፈርነ። አስክ ጁበ ወብዕዳት ከረ ቶሪት ለልትበሀለ መዳይን ጅኑብ ሱዳን ዝያረት ወዴነ።

ዲብ ካምፓለ ቪዘት ለሀበተኒ ስፋረት ጅኑብ ሱዳን፡ እተ ቪዘት “ታጅር” ካትባም እግልዬ ዐለው። ክምሰልሁ ካትባም እግልዬ ክም ህለው ኖሼ ልብ ካሪ እተ ይዐልኮ። እሊ ለዲብ መርከዝ ጀዋዛት ለጸንሔኒ ወድ ኬንየ ላኪን ሰላዲ እግል ለአድፈዐኒ ክም በዐል መጸት ሑድ ኢትረገሰ።

“አነ ተጃረት ይእሸቄ፡ ታጅርመ ምን እገብእ ወካፊ ማል ምን ብዬ አምበል ቃኑን እግል እድፈዕ ይእቀድርኒ” እቤሉ።

“ክእነ ሐይስ ቴልከ? ሐሬ ላኪን እግል ትተዐሳቱ፡ ያሬት ዳፍዕ ወገብአኮ እግል ቲበልቱ” ቤሌኒ፡ ከለ ጀዋዝዬ ዲበ ብዲር ሀበዩቱ ነፈር እንዴ በልሰዩ፡ ሚ ቤለዩ ይአምር እብ ሉቐት ኪስዋህሊ ተሃገዩ።

ለ ሑ አቡሀ መተንሰይ እግል እግበእ እለ ለሰለሜኒተ ራሄል፡ ምስለ ሐሬ ለትሓበረተነ ወለት እተ ስፉፍ እርእየን ዐልኮ። እለ ለሐሬ ተሓበረተነ ወለት ዐድ ክል-ዶል ምን ካምፓለ አስክ ናይሮቢ ሰበት ተአትቃብል፡ ሰብለ ጀዋዛት ወፈሳዶም ኣምረቶም ክም ዐለት ሐሬ ኸበር ረከብኮ። ምን ተሐዜ ህዬ እግል ክልኢትነ መተንሰይ እንዴ ገብአት ወሰዴተነ።

አነ ወራሄል እት አፍ-ባብ ናይለ አተቡስ ትከባበትነ። “እጅራኣት ይአትመምካኒ?” ቴለት ድንግጽት እት እንተ። “እትሙም ይህሌኮ፡ ጀዋዝዬ ጻብጠም ምንዬ ህለው” ክም እቤለ፡

“ጀዋዝ ናይ ሚቱ ለህለ ምስልከ?” ቴለት፡

“ናይ UN” ክም እቤለ፡

“ኤረትሪ ይእንተ?” ክም ቴለተኒ፡ “አዜ እግል ራሄል እብ ቀሊል እግል አፍህመ ክም ይእቀድር ሰበት ፈሀምኮ፡ ለሰኣለ እንዴ አምሸሽኮ ምኑ፡ “ሸንጠቼ እግል እክሬቱ ምስል እለ አተቡስ እግል እሳፍርቱ ኢመስለኒ” እቤለ።

“ያ አለህ!! ቀለም ብኮከ? ረቅም ተሌፎን ናይ ሜሮን ሑዬ እግል እክተብ እግልከ። ዐፍሽ ክቡድ ምን ብጎከ ህዬ ምስልዬ እግል ኢጊስ እቡ ሰዳይት ገብእ እግልከ?” ቴለተኒ።

ምነ ጂብዬ ቀለም አፍገርኮ ወአብኮሀ። ጭሬማይ ናይ ወረቀት እግል ትሕዜ፡ ለእግለ ሓዝለት ዐለት ሽንጠት እንዴ ከሬተ ሰኒ ቀናፈለተ ወኢረክበት እተ።

“ደሐን እንሰር ክቴቡ” እቤለ ወረሐት እዴዬ መደድኮ እለ።

ረቅምለ ተሌፎን እግል ትክተብ እግልዬ፡ ምስለ ብርድ ወለ ሓምላት እዴታተ እዴዬ ክምሰል ጸብጠት ፍንቱይ ሽዑር እቡ አግረስኮ። እብ መልሄታየ ለረቅም ከትበት እግልዬ ወሸንጠቼ እንዴ ነስአኮ ዲበ መወዘፊን ጀዋዛት ለዐለው እቱ ሸባቢክ አቅበልኮ።

ለልትሐቀቅ ምንዬ ዐለ ጸሊም መስኡል እተ ጽልምትት ቤት እት እንቱ፡ እግል ዎሮት ነፈር፡ “እሊ ወሳይቕከ ናቅስ ቱ፡ ወእለ ዳፍዐ ለህሌከ ሰላዲ ካፍየት ኢኮን፡ እንተ ምን እለ አስክ ኤረትርየ ዐድከ እግል ትትጠረዝ ህሌት እግልከ” ልብሉ ዐለ።

ነፈር እተ ጽልመት ሰኒ ልትፈረግ እግልዬ ምንመ ኢዐለ እንዴ በርከ፡ እግለ መስኡል ለለአትፋርሁ ለዐለ “ሐሰብ ወዐይብ” ልብሉ ዐለ።

ለምሽክለት አክልሕድ እግል ኣምረ ምንመ ኢቀደርኮ፡ በጽሕ ሽንጉል እት ቀደም እናስ ስነቱ “ሐሰብከ ወዐይብከ ረሕመኒ” እት ልብል ወእት ልሽሕግ ክም ረኤኩሁ መረ አሰፌኒ። አክልሕድ ክመ ዲብዬ ሓስለት ለህሌት ምን ቃኑን ለኢሸክፈ ነፈር እግል ልግበእ ቀድር። ለምሽክለት ላኪን እግል ለአትምሙ ለቡ ዋጅባት ወህቱ ለጠልቡ ሕቁቅ ሰበት ይኣመረ አረይ ናይለ ለኢለአስትህሎም ማል ለለሐዙ ገብእ ክም ህለ ቀየምኮ። እትሊ ወቅት እሊ ላኪን ኢኮን እግል እስደዩ እግል ኖሼ ሰዳይት ሐዜ ዐልኮ።

ምስልዬ ለዐለው ክሎም እጅራኣቶም አትመመው ወለ አተቡስ እግል ትትበገስ ዳሌት። ክል ሙሳርፍ እት ክርሲሁ ትገሰ፡ አተቡስ ትበገሰት ወአነ እተ መርከዝ ናይለ ጀዋዛት ምስለ መወዘፊን በይንዬ ተረፍኮ።

ሐቆ ርቡዕ ሳዐት ገብእ ለሰልፍ እተ ህተ ለዐለት እቱ ሽባክ ሰፍ ጻብጥ ለዐልኮ፡ እት ቀበት ብዝሓም ሰብ ለዐለት ወለት፡ ደፈእ እት ትብል እንዴ መጽአት፡ “ሚ ትታኬ ህሌከ?” ቴለተኒ።

“ጀዋዝ ዬ” እቤለ፡

“አየ ህለ?” ክም ቴለተኒ፡ “ሎሀይ ነፈር ምስሉ ህለ” እቤለ ከ ለሰልፍ ወሳይቕዬ ለነስአ ምንዬ ነፈር ዲቡ አሸርኮ እለ።

እንዴ ጌሰት እበ አነ እግል እፍሀመ ለኢእቀድር ሉቐት ኪስዋህሊ ተሃጌቱ። ለጀዋዝዬ እንዴ ነስአት ሰኒ ቃለበቱ፡ ኽሩጅ እንዴ ዘብጠት እቱ ህዬ ጀዋዝዬ ሰለመተኒ።

ለአተቡስ ብዲር እንዴ ሐድገተኒ ጌሰት። ምን መዕበር ናይ ኬንየ መዕበር ናይ ኡጋንደ እንዴ በጽሐት ሙሳፍሪን እጅረኣቶም ወዱ ክም ጸንሖ እሙር ቱ። እት ፍንጌ እሎም ክልኦት መዕበር ማላባ ኬንየ ወ ማላባ ኡጋንዳ ለልትበሀለ መዳይን ለህሌት ንሳፈት ምን ክልኤ አስክ ሰለስ ኪሎ ምትር ኢተሐልፍኒ። ዎሮት ወደግ ሌጠ ክም ተዐዴከ እተ ናይ ኡጋንደ ማላባ ትበጽሕ።

ምስተዕምረት እንግሊዝ ምን አርድ የአርዱ እንዴ መጽአው ለረስመዉ “ሕዱድ” ለልትበሀል እግል ልተምተም ለኢቀድር ኸጥ ህለ። ምን ገጽ አምዕል ሸዐብ ናይለ ደዋይሕ ክም ምራዶም ኬን ወእንሰር ሰበት ለአትቃብሎ እሎም እንዴ መሰልከ እግል ትሕለፍ ሳህል ቱ። እትለ ጽልመት ትክ አኑን ላኪን መደረትመ እግል ትሳድፈከ ትቀድር።

እግል ነአብጸሐከ ለልብሎ ሰብ ዐጀላት ወለ እትሊ መናጥቅ “ቦዳ ቦዳ” እንዴ ትበሀለ ለልትሰመኤ መዋትር ዐለው፡ እሎም ላኪን ላሊ ምድር ወበይን ኩሉ ረአሱ ደማን አለቦም። ሰበት እለ ዎሮት ቀደሜዬ ዎሮት ሕርያን ዐለ፡ህቱ እንዴ አቀመጭኮ እተ ጽልመት ሐራስ በይንዬ አስክ መዕበር ኡጋንዳ እግል እትዐዴ ሌጣቱ ወክምሰልሀ ቀረርኮ።

እት ገበዬ ዶል ዶል አክራን አዳም ወንዋይ እሰምዕ ዐልኮ። አማን ተሐይስ ለፈርሀት ላተ ዐለት። ምን ግያስ ወኬን ላኪን ብዕድ ሕርያን ይዐለ እግልዬ።

ንሳፈቲት ክምሰል ግስኮ “ቤት ጎማት መዲነት ማላባ አሰናይ እት ደውለት ኡጋንዳ እብ ደሐንክም መጽአክም ትብለክም” ለትብል እብ ሉቐት እንሊዚ ለትከተበት ላፍተት ክምሰል ረኤኮ፡ግያስዬ ምነ ዐለዩ ዝያድ ወሰከ ወእብ ራሐት አግረስኮ።ጠላለት፡ገማለት ወጼነ ናይ ክልኢቱ መናጥቅ ሐቴቱ። አደብ ወጠባይዕ ኬንዪን ወኡጋንድዪን ላኪን ፎሖ ወብሶት ቱ።

ዲብ መሐጠት ተፍቲሽ ለዐለው ዐሳክር ኡጋንዳ እንዴ ልትሳሐቆ እሰምዖም ዐልኮ። ብዝሓት ድወል ባጽሕ አነ፡ ክም ኡጋንድዪን ላኪን እብ ኩሉ ልቡ ለልትሰሐቅ ሸዐብ ሱዱፍዬ ኢኮን።

“ምነ ሐልፈት አተቡስ ተረፍኮ” እብሎም እት ህሌኮ ምን ለሐምቆ “ምን እስወ አተቡስ? ምስተነዳትከ አየ ህለ?” ወብዕድ ሰኣለት እግል ልትሰአሉኒ ክምቱ ሸክ ይዐለ እግልዬ። ህቶም ላኪን እት ቅስም ጀዋዛት እንዴ ጌስኮ እጅረኣቼ እግል እውዴ ወለ አተቡስ አዜመ እግል ኢትሕደገኒ እግል እሽፈግ ክም ብዬ ሌጠ ሐበረውኒ።

ብዙሕ አዳም አስክ ኡጋንደ እግል ልእቴ አው እግል ልፍገር ብዙሕ መሻክል ኢሳድፉ አምበል ሑዳም። እሎም መ መብዝሑ ዶል ምኖም ለሳድፍ ነዋቅስ ቱ።

ራሄል ወለ ምስለ ለዐለት ወለት ዐድ እጅራኣተን እትሙማት ጸንሐያኒ። ሹቅላት እብዬ ሰበት ዐለየ ህዬ ክምሰል መጽአኮ ሰኒ ፈርሐየ።

ታርፈትነ ለዐለት ገበይ ምነ ላሊ እብ ሪመ እት አርድ ኬንየ እንገይሱ ለትመዬነ ኢትውሕድኒ። ቀደምለ ዔማት ነሃር ኒል ላተ መዲነት ጂንጃ እንበጽሕ፡ እብ ኢጋንጋ ለትትበሀል መዲነት ክም ሐለፍነ እሊ ባካት ግድም እግል እፈርጉ አንበትኮ።

እትለ መርከዝ እዳረት ቡሶጋ ላተ መዲነት ኢጋንጋ ዎሮት ዐቢ መርከዝ ዕባደት ናይ ህኑድ ህለ። ምስለ ኸደማት ዓፍየት እግል ለሀቦ ምን ካምፓለ መጽኦ ለዐለው ሰብ ምህነት አናመ እመጽእ ዐልኮ።

አምር ወተጃርብ ሕክምነ ምንመ አለብዬ እግለ ዘኑድ ለለሐዙ ወነሻፍ ገሮብ ለሳደፈዮም አንፋር እብ ፍንቱይ ዜድ መሳጅ እት እወዴ ዓልጆም ዐልኮ።

ለ ላሊ እብ ግዲደ ለአንስአ ሰፍርነ ወፈጅሪተ ጸሓይ ካምፓለ ሰኒ ክም ትወቀለት ወሐፍነት ዲብ እንቱ “ኣርዋ ፓርክ” ለልትበሀል መውገፍ አተቡስ ካምፓለ በጽሐ።

ራሄል እግል ሜሮን ሑሀ እት ገበይ ዲብ ሕነ እትስልት እቱ ሰበት ዐለት፡ ምነ አተቡስ ክሪ ክም ቴለት እግል ትርአዩ እብ ኩሉ እትጀሃት አትቃመተት። ሜሮን ላኪን ማጽእ ይዐለ። ፈዋክህ እት እንበልዕ ኩሉ እትጀሃት እግል ተአርኤነ ለትቀድር አካን እተ በጠርነ።

ራሄል ወለ ምስልነ ለመጽአት ሳልሳይትነ እትሊ ሰፈር እሊ ሌጠ ለትኣመረየ ኢመስላኒ። ሐቴ ከእብ ገበየ እግል ቲጊስ መትፈናታይ ቀርብ ሰበት ዐለ ንየየን ሓጭር እት እንቱ ዐናዊን ምን አድሕድ ነስአየ።

ህተን እግል ሕድ ልብ ካርያት እት እንተን ወእንዴ ዳግመ ሜሮን ምስል ዎሮት ብዕድ ነፈር እንዴ መጽኦ ረኤኩሁ። ብዲር ምንመ ይአምሩ እት ቀበት ኡጋንድዪን ዎሮት ራሄል ለመስል ነፈር ምን እፈርግ ሽእ ጠቢዒቱ። ምነ ኡጋንድዪን ሌጠ እንዴ ኢገብእ ምነ ምስሉ መጽእ ለዐለ ወድ ዐድ መ ፍሩጉ ዐልኮ።

እግል ራሄል “ሜሮን ሑኪ ማጽእ ህለ” እቤለ ስድፈት ምን ቅሩብ እንዴ ረኤቱ እግል ኢትደንግጽ እንዴ እቤ።

ራሄል እብየ መጽእ ክም ህለ ሰበት ይኣመረት ሰኒ ፋርሐት እት እንተ፡ድማን ወድገለብ ትዋለበት ወምን ቅባል ረኤቱ። እብ ሸፋግ አስኩ ሰዔት፡ ወሐር አስክዬ እንዴ ትወለበት፡ “ምን እስዕሙ ደሐንቱ” እት ትብል ትሰአለተኒ።

እተ ሰኣለ ሰኒ እስትቅሩብ እት አነ፡ ሑሀ ወድ እም መ ኢኮን ጋናመ ምን ትስዕም ለገብአት መደረት ክም ኢትመጽአ ሙትአክድ ዐልኮ።

“አይወ አይወ” ሌጠ እቤለ እብ እዴዬ እንዴ አሽር እለ።

ምነ አስክዬ ገነሐ ለዐለት ሐር ውልብ ዶል ትቤ ለእብ ብጥረት ምነ ለኢለሐምቅ ሜሮን ሑሀ ረአየ ወእብ ሰዓማት እት ስጋድ አድሕድ ትለውለው። ምን ክልኢቶም ህዬ ዕንብዕ ሕፍን ናይ ሰፈላል ዘሬት።

ራሄል ሑሀ ክም ረክበት እግልዬ ወእግለ ምስልነ ለመጽአት ሳልሳይትነ መትወላብነ አቤት። ምስ’ለ እት ገበይ ለትኣመረተ ወለት እግል ሕድ ዐናዊን ሃይባት ዐለየ። አናመ ለብዲር ሀበተኒቱ ረቅም ተሌፎን ሜሮን እት ኖተቼ ስጁሉ ዐልኮ።

ሜሮን “ራሄል ሕቼ ምስልከ መጽአት ሙሽ? አቡዬ ተስፋይ እንዴ አተሰለ ዎሮት ወድ ከረን ረከብኮ እለ ብህልዬ ዐለ” ቤሌኒ።

እት ናይሮቢ ዲበ አተቡስ “ሐበሻ እንተ” እንዴ ቤለ ስኡልዬ ለዐለ ሑ አቡሀ ተስፋይ፡ክትምየት ኤረትርዪን ይአበድያኒ። ኤረትሪ ምን ምግብ ሚልዮናት እግል እፈግሩ እቀድር ብህልዬ ምንመ ዐለ፡ እግል ወድ ሑሁ ህዬ ወድ ከረን ክም አነ እንዴ አሰአለዩ ጸንሔኒ። እትሃገዩ ሰበት ዐልኮ እብ ለህጀቼ ምን ኢፈርገኒ አነ ምን ውላድ ከረን አነ ብህሉ ይአነ።

“ሕነ እብ ታክሲ እግል ኒጊስቱ፡ አስክ ናንጃና-ኩምቢ ምን እንተ ምስልነ ጊስ” ቤሌኒ ሜሮን።

“አነ አስክ ኩላቢ እግል ኢጊስቱ” እቤሉ ወእብ እዴዬ አስክ ምውዳቀ እንዴ አሽር።

ለእብ ሰፈላል ምስል ዕንበዐ ትትጋደል ለዐለት ራሄል፡ “ሳምሐኒ ኩሉ ዲብ ሕድ ተሓበረ እቼ፡ ሰላም እንዴ ይእብለከ እግል ኢጊስ እቤ” ቴለት ወእብ መላትሕነ አሕድ ሰዐምነ።

ራሄል ምስል ሐማለት ናይለ መላተሐ ወለ ቅዱይ ትንፋሰ፡ልብ ለሰልብ ጠባይዕ አንሳይት ወግሩም መካሪት ገሮበ ሓስድ ዘሊል ለተአተብል ሻበት ተ።

ራሄል እንክር ገለቦም እት እንተ ወለ ክልኦት ሻብ እግለ ሸንጠት ሻም-ሻምሎ ዋድያም እት እንቶም እብ እንክር ድማን ልትፈንተው ምንዬ እት ህለው፡ ምስል ብዝሔለ አዳም አስክ ለአረይሞ ምንዬ እብ ዕንቼ እተልዮም ዐልኮ። ለፍስታን ቀይሕ ወሐጪር ላብሰት ለዐለት፡ አምዒተ ጭቅመት እዴ ለኢተምም ወግሩም መማኒተ ራሄል ምን ረእየተ እንዴ ይእጸግብ ቀበትለ ፈልሕ ለዐለ ሸዐብ ሸረበት ምንዬ። እት ልብዬ እንዴ ትሰመረት ህዬ ዲመ እትፋቀደ ዐልኮ።

ሚ ገብአት ሑሀ ወድ እም መ ቀደሜሀ እንዴ ትርእዩ ዲብዬ እንዴ ትወለበት “ሜሮን ሑዬ ህዬ እግል እስዐሙ እቀድር?”እንዴ ቴለት ለትሰአለተኒ? እት እብል ነፍሼ ትሰአልኮ።

አነ ወራሄል ምነ ምን ናይሮቢ አስክ ካምፓለ ለመጽአናሀ ብዙሕ አውረሐት ሓልፍ ዐለ። ምን ኡጋንደ አስክ ኖርወይ እግል እሳፍር እንዴ እትባገስ ሑዳት አምዔላት ክም ተርፈያኒ፡ አስክ ኖርወይ ለእነስኡ ገሌታይ ዐፍሽ እግል እትዛቤ እተ ኤረትርዪን ለነብሮ እቱ ካሳንጋ ወ ጋላባ-ጋላ ለልትበሀል ደዋይሕ ካምፓለ ጋይስ ዐልኮ።

እት ዎሮት መጥዐም ጭቡይ ናይ ሐበሻ ግሱይ እት ህሌኮ፡ ዎሮት ሻብ ሐመልሚል እንዴ ቀንጸ ሰላም ፋይሐት ቤሌኒ። አነ ይኣመርኩሁ እት ኢኮን ህቱ ፋርግዬ ዐለ።

“ከአፎ ህሌከ? ባስጥ ወርዩሕ? ትዘከር ገብእ ምስል ራሄል ምን ናይሮቢ ዶል መጽአክም አነ ወ ሜሪን እት “አርዋ ፓርክ” መውገፍለ አተቡሳት ትከበትናክም” ቤሌኒ።

“አይዋ ሰኒ እዘከረከ! ከአፎ ህሌከ? ለአምዕል ስሜትካመ የሰአልከኒ ሰኒ ኢተኣመርናኒ፡ ትገሴ፡ ራሄል ከአፎ ህሌት? አዜ ላተ ካምፓለ ላምደተ ትገብእ? እት እብል ሰኣል አሰር ሰኣል ደርብ ሕድ ደራገግኩሁ እቱ።

“ራሄል!” ቤለ ወዲብለ ስምጬ እት ክርሲ ትገሰ።

“ራሄል” ሌጠ ምን ቤለ ወለሐን ናይለ ክርንቱ ይዐጅቤኒኒ።

“ከአፎ ህሌከ ወሜሮን መለሀይከ ህዬ ከአፎ ህለ?” እቤሉ፡

“ሜሮን መለሀዬ ጁበ ህለ፡ ናሰቦቱ አበ” ቤሌኒ።

“ቑርበት ሰኔት ሚተ? ከአፎ እግል ልናስቡ” መናበረት ዐለዮ ሰኒ መራርተ”እቤ ወለ ህግያሁ ዝያድ አተረድኮሀ።

“ናይ ሜሮን ቑርበት ሌጠ ኢኮን” እት ልብል ዲብ ለአስተንትን በልሰ እግልዬ።

“ለአምዕል ሚ ገብአት ራሄል ሜሮን ሑዬ ምን እስዕሙ ሚቱ? እንዴ ቴለት ምን ትሰአለተኒ፡ ዳገመት እግልክም ገሌ? ምነ አስተንታን ለዲቡ ዐለ እግል አፍግሩ ሌጠ እንዴ ይእገብእ፡ ለሰኣል ራሄል መ በሊስ እግል እርከብ እሉ ሐዜ ዐልኮ።

“አሃ. .! ምን ኤረትርየ ዶል መጽአት ፈታየ እት ሱዳን ጸንሐየ። ዲብ ሸገራብ ቱ መስለኒ እት ገበይ እንዴ ተሓቀፈው ልትሳዐሞ ክም ረአዎም ዙብጣሞም ዐለው። ቃኑን ሱዳን ሚቱ ለልትበሀል “ሻርዕ?” ቤለ ወአብተሰመ።

እለ “ሻርዕ” ልብለ ለህለ ሸሪዓት ተ።

“እበ ትሰአለተከ ሱዳንዪን እድንጉጻመ ዐለው።ኢትደንግጽ እት ኢኮን ራሄል አዜ እት እድንየ ይህሌት” ቤለ ወሰኒ እሱፍ እት እንቱ ተሐት ገንሐ ምንዬ።

ድንጋጽ ሌጠ እንዴ ኢትገብእ አርደናይ እንዴ ነስአ እቡ ለሸወጤኒ መስለ እቼ።

“ራሄል እት እድንየ ይህሌት?! ሚ ገብአት?! ወሚ ዶል ትወፌት?” እቤሉ ሰኒ ድንጉጽ ዲብ አነ።

“ራሄል እብ ብቆት ናይ መኪነት ትወፌት። እሊ እት ሱዳን ህቱ ወህተ ትራከበው ለእቤለከ ሕጹየ እት ጁበ ዐለ። ምን ንእሾም ምስል ዐበው፡ ክም ፈተች ሌጠ እንዴ ኢገብኦ ሐው መስሎ ዐለው። ምን ናይሮቢ ክም መጽአክም ሐቆ ሐቴ ሳምን ጌሰት እቱ።

“ህዳዮም እንሰር ዲብ ካምፓለ እግል ልገብእ ለሐዙ ሰበት ዐለው ምን ጁበ አቅበለት። ቃዐት ህዳዮም ለገብእ እተ አጀረት ወብዕድ መዳሊት አትመመት። ምን ህዳዮም አክልሕድ ሳምን ዶል ተርፈት፡ ምን ፈቅደ እት ገበይ ጁበ ወ ካምፓለ አተቡሳት ሓድስ ዋድያት ዐለየ። መለሀዩ እግል ሮቤል፡ ምን ጁበ እንዴ አተሰለ አተቡሳት ሓድስ ዋድያት ህለየ ወሮቤል ምስለን ሱፉርቱ አኽባሩ ድለይ” ክም ቤለየ፡ ድንግጽት እት እንተ አኽባር ሮቤል እግል ትድሌ ፈግረት ወዲብ ሻርዕ መኪነት ደግሸተ። ዲብ እሊ ዐድ ህዬ ስዋገት ሰኒ እኪት ተ። እተየ ርኡይቱ ሰወጎት እብ እንክር ድገለብ ናይ ጽርግየ፡ ብዝሓም እሎም ኸጡ ወአረይ ገብኦ”ቤለ ወለ ዲብ ዕንታቱ ለዐለት ዕንብዕ ማሰሰ።

እብ ሞት ራሄል ሰኒ ተአሰፍኮ ወዕንታቼ ዕንብዕ ማልኣ።

“ለሓጺሀ ዐለ ህዬ ምነ ሓድስ ደሐነ ገብእ” እት እብል ትሰአልኩሁ።

“ተዝከረት ሓጅዝ ዲብ እንቱ፡ ስካብ ሐልፈ እቱ ወምነ አተቡስ ተርፋ። ሐያት ክእነ ስደፍ ተ። ምነ ህለየ ላኪን ሞት ወሔሰት እሉ። ግብእ ረአስ ግብእ እም ራሄል እግል ህዳየ ማጽአት ዐለት። እብ ሕማም ደቅጥ ወፋጥም ትትዕብ ዐለት። እለ ብቆት ናይ ራሄል ክም ሳደፈት ሰለስ ዮም ዲብ እስብዳልየት ረግደት ወሐቆሀ ትወፌት። ገናይዝ እም ወ ወለተ ህዬ ምን እንሰር አስክ ኤረትርየ ምስል ጌሰ። እሊ ዐድ እት መጃል ዓፍየት ሰኒ ድዒፊን ቶም፡” ቤለ ወሰኒ አስተንተነ።

“እንተ ምን ኢተአሸክተኒ፡ምን ወአውደቄኒ?”ልትበሀል።እሊ ሻብ ኡጋንድዪን እብ እትጀህ ድገለብ ናይ ጸርግየ ሰወጎቶም፡ ወድዕፎም እት መጃል ዓፍየት ሰበብ ወፋት ራሄል ወ ዋልዳይተ ክ’ማ ልርእዩ ለህለ መስለ እቼ። ህቱ ንኡሽ ቱ እት ኢኮን እዳረት እንግሊዝ እት ኤረትርየ እት ህለው፡ እት ኤረትርየ መ መካይን እብ እንክር ድገለብ ናይ ጽርግየ ልትሰወገ ዐለየ። ጋሻይ ወቐሪብ ቃኑን ወድ ዐድ እንዴ ተበዐ ነብር እት ኢኮን፡ እግል በዐል ዐድ እት ዐዱ ወመስከቡ እንዴ መጽአካሁ ቃኑንከ ቀይር ኢትብሉኒ። እት ሮማ ሐቆ ህሌከ ላዝም ቃኑን ሮማንዪን እግል ትተበዕ ብከ።

ራሄል ወሓጺሀ ለዐለ ሮቤል እት ኤረትርየ ለዘት ሻሞም እግል ኢለአዳውሮ፡ሕጻዮም ወህዳዮም እት ዐዶም ወዳሮም እንዴ ወደው እግል ኢልውለዶ ወኢልትለዶ ሚ ዶል ኡጋንድዪን ሸዕተረዎም? ዎሮት ነፈር እብ ኦስ እንዴ ደርገግካሁ ትሳበረ ወትገራደመ እግል ቲበሉ ኢትቀድርኒ። ሰበብ ናይ መትሳባሩ ወመትገራዳሙ ናይለ ኖስከ እብ ኦስ ለአሽከት ቱ።

“ሰበብ ሓድስ ናይ ራሄል ህዬ ለምን ጁበ አተሰለ መለሀይ ሕጹያቱ።ዲብ ገበይ አተቡሳት ሓድስ ወደየ ወ ሮቤል ምስለን ሱፉር ቱ፡ ርድኢ ብህለ ምን ኢገብእ ራሄል ሳክበት ቃስነት ዐለት፡ እሊ ሓድስ እሊ እብየ ወመጽአቱ? ሳክት ሸፋግ ናይ ሐበሻ ቱ፡ እንዴ ኢደሉ ገሉ”ልብል እት ህለ ለሻብ ምነ ክልኤ ዕንቱ ዕንብዕ ቅዝር ትውሕዝ ዐለት።

“ሐበሻ” ለትብል ዘዐት ዶል ሰምዐኮ ብርሃኔ በዐል ናይሮቢ ፈቀደኮ።

“ምክራይ እግርከ ሐቆ ኢፈጠንከ ወ አሰር ሐበሻ ሐቆ ጌስከ እብ ኦስ ትደርገግ” ልብል። ሐበሻ እት እንቶም ሐበሻ ለለአቡ ሑዳም ኢኮን፡ እቢ ብርሃኔ ላኪን ስደ ለሐልፈት ተ።

ብርሃኔ እበ እብ “ጨዴዳ” ለልትአመር እብ ጅኑብ ኣምሪካ አስክ ሽማል አምሪከ እግል ልእቴ እብ ገበይ ተህሪብ ክልኤ ዶል ጅሩብ ዐለ ወኢተዐወተ። ሳልሳይት ዶል ላኪን አስክ መክሲኮ እት ለአቴ ምስለ መሀቢን ትበአሰ ወቀትለዉ። እት ኤረትርየ ዓኢለቱ ኸበር ወፋቱ ክም ሰምዐት ቀደም ክልኦት ወርሕ ገብእ ሳምዕ ዐልኮ።

“ረቢ ልርሐመከ ብርሃኔ” እቤ እብ ልብዬ።

ለሻብ ሞባይሉ እንዴ አፍገረ፡ “እለ ሱረት ሜሮን ለአከየ እቼ” እንዴ ቤለ ለሞባይል ሀቤኒ። መጥ-መጦር፡ እብ ዎሮት ሸክል ለትነደቀው ክልኦት ቀብር ቶም። እት ምግብ ህዬ ምን ድማን እት ድገለብ እብ ስምጥ ለትከረ ሕቅፍ ናይ ዝሁር ዐለ። እተ ደገለባይ ቀበር ሱረት ናይ ራሄል ዐለት። ምንተሐት ህዬ “ራሄል ወልዱ ለባሲ” ምን መዋሊድ 28-04-1993 ለልብል ክቱብ ዐለ።

እሎም ክልኦት ቀብር ናይ ራሄል ወ ዋልዳይታ ቱ። ሜሮን ሐቆ ሞት ዋልዳይቱ ወራሄል ሕቱ ረአሱ ሰኒ ይህላኒ። ሓጺሀ ለዐለ ህዬ ክልኤ ዶል እግል ለአንትሕር ጀረበ ወእት ልትዐቀብ ነብር ህለ”ቤሌኒ። ለሻብ ነፍሱ ሀቀብ-ቀበት ምኑ ወረእሱ አድነነ። አናመ ረአሼ ምስሉ አድነንኮሁ። ረአስነ ለተአደንን ወልብነ ደም ለተአነብዕ ቅሰት ሰሀም ሸባባት።

እለ ቅሰት እብ ደሳሌ በረኸት ለትከተበት እት ገብእ እት ክታብ መቅበረት ክብት ወዘን ምን ሰፍሐት 51 አስክ ሰፍሐት 77 ክትብት ህሌት።