መጅልስ አምን ወለዛልም ቀራራቱ ድድ ኤረትርየ 23ይ ክፈል

እብ ዶ/ር አሕመድ ሐሰን ድሕሊ ተርጀመት፡ መሐመድ እድሪስ መሐመድ ተቅሪር “መራቅባይ ሐሽም”

መራቅባይ ሐሽም ዲብ ዮም 10 ማርስ 2010 ዲብ ምጅልስ አምን ለቀደመዪ ተቅሪር እሊ ለተሌ ጽበጥ ብእቱ። ሴድያይት ሼክ ሸሪፍ ይዐለት።

መትዐዳይት ፈደራልየት ሕኩመት ሶማል ምስል ሶማል ወሐረከት “አልሸባብ” እብ አትመጣዋር ትትረኤ እት ህሌት ድዒፈት ተ።
እብ ጀሀት ቅያደት ጠያዐት ስያሰት ሰበት ይህሌት፡ ቅስም አምን አሳስያይ ብንየት ትሕትየት አለቡ።
ምስለ ክሉ ቅዋት አምን ሕኩመት ሶማል እብ ውላድ ካርጅ ለገብአ እግለ ተእሂላት ወሰዳይት፡ ልሰዕ ዲብ ክሉ ደረጃት ሜርሒተ ወውሕዳተ ኢንዝምት ወእግል ተአድምዕ ለኢትቀድር ፋስደት መአሰሰት ተ። አስክ ዲብ አባያመ ስለሕ እግል ተአዝቤ ባጽሐት ዐለት።
እግል ፈራልያይት ሕኩመት ለልትሀየብ ክምሰል ስለሕ፡ ርሳስ ወብዕድ ዲብ ሙሰልሒን መትቃውመት ሐሽመትቱ ገይስ ለህለ።
80 ምእታይት ምነ ተእሂል ለነሰኦ ሶማልዪን ምስል ስልሖም ወርሳሶም ክምሰልሁመ ዐስከርያይ ልባሶም ሀርበው። እግለ “እግል ልድሐን ቀድርቱ” ለትበሀለ እግል አድሐኖት፡ እብ መትኣታይ አቶብየ ወዱቅሪ ሰዳይት እዳረት አሜሪከ ዲብ ዮም 13 ማርስ 2010 ፍንጌ መትዐደይት ፈደራልየት ሕኩመት ሶማል ወለ እግል አቶብየ እንዴ ትበሀለት ለትሸረሐት መነዘመት አሶፊ “አሀል አሱነ ወልጃምዐ” ዲብ አዲስ አበበ እትፋቅየት ትፈረመት። እለ እትፋቅየት እላመ እንዴ ተሌት ዲብ ዮም 19 ፌብርዋሪ 2010 መብደእያይ እትፋቅያት ለትበሀለ ብዕድ እትፋቅ ትሳደቀ። ምን አሳሱ ህዬ “አሀል አሱነ ወልጃምዐ”

5 ምህም ናይ ሰልጠት አካናት ተሀየበው። ሰር ምኖም ውዘረእ ካርጅየት፡ ከርስ፡ ድፈዕ ወማልየት እግል ልሰሜ ቀድር። እት ረአስ እሊ አንፋሩ ዲብ ቅስም አምን ወጄሽ እበ ዐለ እሎም ዐስከርያይ ተፈውቅ አካናት ብዙሕ ዐለ እሎም። ክምሰለ ተቅሪር መራቅባይ ሐሽም ለለሐብሩ፡ ውሕዳት ሕኩመት “ፋስዳም” እግል ለአድመዖ ለኢቀድሮቶም ለዐለው። ለዲብ ሰነት 1991 ለተአሰሰት መነዘመት “አሀል አሱነ ወልጃምዐ” ዲብ ሰነት 2009 ለትሰረረተ፡ ክምሰል ቅወት ለበ ዲብ ሜዳን ሶማል ትትረኤ ይዐለት። ለወቅት ለሀይመ ግራሀ ዲብ ሕኩመት ሼክ ሸሪፍ አሕመድ ደማን ለይዐለት እለ። ሕኩመት አቶብየ እበ አቅረበቱ እተ ዱቅሪ ዐስከርያይ፡ ማልያይ ወቴክኒክያይ እብ ዶ/ር አሕመድ ሐሰን ድሕሊ ሰዳይት ተ እግል ተሐጥጥ ለቀድረት። መራቅባይ ሐሽም ዲብለ እብ ሰበት ሶማል ለአቅረበዩ ተቅሪር፡ ቅዋት አቶብየ ዲብ ኦጎስት 2009 ምስል “አሀል አሱነ ወልጃምዐ” እብ ሕበር ድድ “አልሸባብ” ዐመልያት ዐስከሪ ክምሰል ለሀርሶ አትአመረ።

መትደቃብ መሻክል ሕኩመት ሼክ ሸሪፍ

ለዲብ ጅቡቲ እብ ጅህድ ሕኩመት ሼክ ሸሪፍ አሕመድ፡ እብ ገሌ ናይ ምውዳቅ ጸሓይ ድወል ወናይ መንጠቀት ጀሃት ክምሰልሁመ እድንያይ መነዘማት ከባካብ ትሩድ ምንመ ገብአ እሉ፡ አግደ ሰበብ መሻክል ሶማል እግል አርሀዮት ለለአደሜዕ ዶር ኢዐለ እሉ ሌጠ እንዴ ኢገብእ እብ መሻክል ከርስ ዳየሰ። ገሌ ምነ አስባብ ህዬ፡

ለሕኩመት፡ ምን ካርጅ እብ ፍንቱይ ህዬ ምን እዳረት አሜሪከ ወሕኩመት አቶብየ ወብዕዳም ናይ መንጠቀት ቅዋት ለተሀየበየ ዐገል ስያሰት እት ፍዕል እግል ተውዕል ትቀሰበት።
ለሕኩመት፡ ምን ቴልየት ዐብደለ ዩስፍ እበ ላቶም ምን ሴድየት ቅዋት ወምን መአይደት ሼክ ሸሪፍ ሼክ አሕመድ ለትከወነት ሰበት ዐለት፡ ህቶም ህዬ ለትፈናተ ስያስያይ አጄንዳት ወናይ ከርስ መሻክል ሰበት ዐለ እሎም፡ ምነ እምበ ጠቢዕያይ አግቡይ ለትወለደት እተ አምዕል እንዴ አስተብዴት ትሸለለት።
ሕኩመት ሼክ ሸሪፍ ዲብ ረአስ ሶማልዪን ወእብ ቀስብ ድወል ካርጅ ለትከወነት ሰበት ዐለት፡ ዲብ ሐንቴ ናይ ካርጅ ቅዋት በህለት ቅዋት ኡጋንደ ወብሩንዲ እት ትትዐቀብ ሰበት አተላሌት ለታኬቱ ናይ ሸዐብ ተእዪድ እግል ትርከብ ኢቀድረት።
ሕኩመት አቶብየ ሴድያይት ሼክ ሸሪፍ ይዐለትናይ ሼክ ሸሪፍ ሰዳይት ይዐለት። ዲብ ረአስ ኮሎኔል ዐብደለ ዩስፍመ ገሌ ተሸክካት ዐለ እለ። ለዲብለ ወክድ ለሀይ ምህም አካናት ለዐለ እሉ ተንዚም “አሀል አሱነ ወልጃምዓቱ” ለትሰዴ ለዐለት። እሊ ህዬ እግል ዐናስር ሼክ ሸሪፍ ወኮሎኔል ዐብደለ ዩስፍ ለነከደ ዐለ።
ዲብ ክሉ መአሰሳት ስያስያይ፡ እቅትሳድያይ ወእዳርያይ ፈሳድ ሰበት አስሐበበ፡ ምን ከርስ እንዴ ሐለከ ከርዐዩ። ዓም ረአይ መቃዲሾ ወብዕድ መዳይን ሶማል ህዬ ድድ እሊቱ ለዐለ።
እት ወርሕ ማዮ 2010 ፍንጌ ሰብ ሰልጠት ርኢስ ሕኩመት ሼኽ ሸሪፍ ሼኽ አሕመድ ወበዐል መንበር ውዘረ ዐብደልረሺድ ዐሊ ሸርማርኪ ወርኢስ በርለማን ለዐለ ኣድም ማዱብ መሽክለት ዐባይ ቀንጸት። እሊ ሀዬ እብ ሰበብለ በርለማን ለበዐልመንበሩ ወቅቱ እንዴ ተመ ሰቡዕ ወሬሕ ሑሉፍ ምን ዐለ ከምን ሰለቱ ምን ከረዩ ለትከለቀ ንዛዕ ቱ። ኣደም ማዱቢ እግል በዐልመንበር ውዘረ ምን ሰልጠቱ ለነውክ ቀራር ክም ሓለፈ ወርኢስለ ደውለት ምን አየደዩ ለቀድየት ክም እሳት ቀርሐት። ምናተ፡ ርኢስ ውዘረ እግለ እብ በዐልመንበር እበ ርኢስ ለትነሰአት ምስዳር ደስቱር ሶማል ለልትቃወም ምን ገብአ ወምን ሰልጠቱ ለከርዮ በርለማን ሌጠ ምንገብአ ነክረዩ። ሰበት እሊ ርኢስ ለቀራሩ ልስሕብ እት ሀለ ርኢስ ውዘረ ሀዬ እት አካኑ እንዴ ገብአ አተላለ። በዐልመንበር በርለማን ላኪን አካኑ እግለ ዲብ እዋን ወራር ኢትዮጵየ፡ ዲሰምበር 2006 ናይ በዐልመንበር በርለማን ሰልጠቱ ለሐድገ አግደ አባዩ ሸሪፍ ሐሰን ሼኽ አሕመድ እንዴ ሐድገየ እግል ሊጊስ ትቀሰበ። እት እያም ወራር ኢትዮጵየ አካኑ ኣደም ማዱቢ ቱ ዳብአ ለዐለ።
አንፋር በርለማን እተ ሕኩመት ወሙስተቅበለ እምነት የዐለት እሎም። አክል- አክል ዲብ ሞቃዲሾ እት አርወሐቶም ፈሩህ ዐለው።እብሊ ሀዬ ሰር ናይ አንፋር በርለማን እት ሰልፍ 2010 ክሎም ምን ሞቃዲሾ ፈግረው። ኤለክትሮኒካይት ሸበከት “ኣልሙኽተሰር” እት ጀኑወሪ 2010 ኣበ ሐበረተ፡ ናኢብ በዐልመንበር መሐመድ ዑመር ጠልሐ፡ አንፋር በርለማን ዲብ ቀበት ክልኤ ሳምን ሞቃዲሾሆም የአቅበለው ምንገብእ ምስዳር ክም ትነሰእ ዲቦም እግል ለአትፋርህ ትቀሰበ።
ውዘረ እብ ሐሽምት እብ ምራድ ኖሶም ጠለቆቶም ሀዬ መሻክል ሕኩመት ሶማል እት ልትኬለም ክም ጌሳቱ ለለርኤ።እት ዮም 10 ጁን 2010 አርበዕ ሶማልዪን ውዘረ ሰልጠቶም ሐድገው። ህቶም ህየ፡ ወዚር ደውለት እት ቀድያት ድፈዕ፡ ዮሱፍ መሐመድ ስያድ አንዴዓዲ፡ ወዚር ቀድያት ካርጅ ዐብደልርሕማን ዐብደልሸኩር፡ ወዚር ደውለት እት ዴዋን ሕኩመት ሐሰን መዐልም መሕሙድ፡ ወዚር ዓዳት ወለዓሊት ደረጀት ተዕሊም መሐመድ ዐብደለ ኦማር ቶም። ወዚር ዕላቓት ኻርጅየት ሰልጠቱ እተ ሐድገ ዲበ መደት እተ ሀበዩ ሸርሕ “ርኢስ ሼኽ አሕመድ ሼኽ ሸሪፍ እት ቀበት በርለማን ለትረአ ፈርግ እት አስከቦት ፈሽለ። ሜርሒቱ ሀዬ እት እዴ ፋስዳም በርደት፡ ወሕኩመት ሶማል እዳረት ሳልሐት አለበ። እግል እሊ አዜ ለሀለ ንዛም ሙጅተመዕ ዐለም እግል ለርትዖቱ ለትብል እምነትመ አለብዬ እት ክሉ መጃላትቱ ለፈሽለ” ቤለ።
ቅዋት አልሸባብ ወአልሙጃህዲን ወዋሕዳት ሕዝብ እስላሚ ሀዬ እተ ወክድ ለሀይ ሕልቅም ሼኽ ሸሪፍ እግል ልሽነቆ አስክ ሞቃዲሾ ትባደረው። ክምለ እት

12 ጁን 2010 እት ሞቃዲሾ ለትረአ ሀዬ እት ቀበት ዋሕዳቶም ፈንጨጋር እት ልትኬለም ሰበት ጌሰ እት ደግሽ ዐስከሪ በጽሐው።

ሐረከት እስላምየት ዲብ ሶማል

እስላምዪን መትቃውመት ሶማል እት ቀበት ዎሮ ተንዚም (አልቃዒደ) ለልትሐርኮ ሕድ ላጻጣም ቶም እንዴ ትቤ ሐሲብ ጌገ ዐቢቱ። ክምሰልሁመ እብ ሐረከት አልሸባብ አልሙጃህዲን አው ሕዝብ እስላሚ፡ አውመ እብ ማርሐቶም ክም ከረ ሐሰን ጣህር ኡዌስ አው መሐመድ ዐብዲ ጉዳኒ እግል ትሽርሖም ለልትቀደር ኢኮን። እት ሶማል 13 ሐሽም እስላምዪን ሐረካት ሀለየ። ህቶም ሀዬ ሐሽም ‘ተጀሙዕ እስላሚ”፡ “ኣል ሸባብ ኣልመጃህዲን”፡ “መጃልስ እስላሚ ሶማል”፡ “ተሓሉፍ ዳግም ተሕሪር ሶማል”፡ ሐሽ መቃወመት“ክታብ ኣሱና ወሶፊያ”፡ “ሐረከት ተስሊሕ እት ቀር አፍሪቀ”፡ “ጀብሀት እስላም ሶማል”፡ “ሕዝብ እስላሚ”፡ “ተራብጥ ሶማልዪን ዕሉማም”፡ “ተክፊር ወሂጅራ ሶማል”፡ ሐሽም “መሐብረት ወመፈስረት”፡ ተንዚም “ኣሃል ኣሱና ወጀማዓ”፡ “ጥሩቅ ኣሶፍያ ሶማል” ቶም። እሎም ሶማልዪን ሐሽምት እስላም እሎም፡ እት ፍንጌ ተጠሩፍ ወምግባይ መባጥር ለወድዎ ንዛዕ ሌጠ እንዴ ኢገብእ፡ ናይ ኣይድዮሎጂየት ወዲን እምነት መትኣታይመ እት መጅተመዕ ሶማል ተእሲር ዐለ እሉ። ክምሰሁመ ክልኦት ዕቁድ ለገብእ (20 ሰነት) ለአተላለ እት ቀባይል፡ አቃርብ፡ ጅንስ ለተንከበ አከይመቅሬሕ ግዴቱ ዋዲቱ።