መጅልስ አምን ወለዛልም ቀራራቱ ድድ ኤረትርየ (22ይ ክፈል)

እብ ዶ/ር አሕመድ ሐሰን ድሕሊ ተርጀመት፡ መሐመድ እድሪስ መሐመድ

ወራር አቶብየ እት ሶማል ለእብ ዘዐት ርኢስ ወዘረእ አቶብየ መለስ ዜናዊ “አቶብየ ምን ረሐ እግል ትዳፌዕ ሐቅ ምን ሕቁቃ ቱ” ልትበሀል ለዐለ ሸሬሕ፡ እብ ፍንቱይ መቃዲሾ ዲብ እዴ መሓክም እስላሚየ ክምሰል ወድቀት ወተሩ ምን አሳሱ በደለ። ሰብ ሰልጠት አዲስ አበበ “መዳፈዐት ኖስ” ለትብል ህግየ ምነ እንዴ አዝመው፡ “መትዐዳይት ፈደራልየት ሕኩመት” እብ ቅዋት ገለድ “መሓክም እስላሚየ” ህጁም ሐቆመ ሳደፈዮም፡ ዱቅሪ አስክ ሶማል ዐስከርያይ መትኣታይ እግል ሊደው ክምቶም እንዴ ሸርሐው እግል ለሀድዶ ወለአሳቅሮ አስተብደው። ወዚር እዕላም አቶብየ ብርሃኑ ሀይሉ “እግል ሕዱድ ወሕኩመት ሶማል እግል ንዳፌዕ ሐቅ ብነ” ዲብ ልብል ሸርሐ። ወካለት አክባር ከነደ ዲብ ዮም 19 ጁላይ 2006 ክምሰለ ለሐብሩ ህዬ፡ ሸሬሕ ርኢስ ወዘረእ አቶብየ፡ አቶብየ ሶማል እግል ወሪር እግል ቅዋት ገለድ መሓክም እስላሚየ እግል ታያን ሕዚት ክምሰል ህሌት ለለአፍህም ክምቱ ሸርሐ።

ሕኩመት አቶብየ እግለ ሜዳን ሶማል ለሐልፍ ለዐለ ተጠውራት “እግል ወጠንያይ ደሐንዬ ወእስትራተጅያይ መሳልሕዬ ምን ቅያስ ወለዐል ለለአፈርህቱ” ዲብ ልብል ክምሰል ምራዱ ለአንትህዙ ዐለ። ክምሰልሁመ እግለ “መሓክም እስላሚየ” ድድ አቶብየ ጠልቁ ለዐለ ስቅራታት ምን አማን ለሬመ ስያስያይ ወዲናይ ስቅራታት

ክምሰል ምስምሰ ትነፈዐ እቡ። እምበል እሊ መሓክም እስላሚየ ናይ ከርስ ቴለሉ እብ ዋጅብ እግል ለአስፌ ኢቀድረ። እብ ተውሳክ ክምሰል ሲነመት አትነኖት ስጃረት ወጫት ላቱ እምበል በሐስ ምን መንዐ፡ ምስል ሸዐብ ሶማል ጀብሀት ከስተ። ግረ እለ አሰልፍ አቶብየ እግለ ዲብ ባይደወ ለዐለት መትዐዳይት ፈደራልየት ሕኩመት እግል ዕቅበት ውሕዳት ነድአት። ሐቆሁመ ድድ ቅዋት መሓክም እስላሚየ ናይ እቅትሳድ ወዐስከርየት ሐርብ እግል ክስተት ዲብ ዮም 28 ዲሰምበር 2006 አስክ ዓሲመት ሶማል መቃዲሾ አቴት። ዲብ ግብለት ለህሌት መዲነት ኪስማዮ ህዬ ጸብጠት። ዲብ ባይደወ ለዐለት መትዐዳይት ፈደራልየት ሕኩመት ሶማል ህዬ ዲብ ደባባት አቶብየ እንዴ ትጸዐነት መቃዲሾ ሰበት አቴት፡ ሸዐብ ሶማል ደማን ሐግለ። ቅዋት አቶብየ ዲብ ረአስ ሶማል ወሶማልዪን ለለሽዐልል ጀራይም አጅረው።

ዲብ ፈደራልየት ሕኩመት ሶማል ናይብ ርኢስ ወዘረእ ወወዚር ካርጅየት ለዐለ ሕሴን ዓይዲድ “ቅዋት አቶብየ ዲብ መቃዲሾ ፈነ ሕበር አጅረው” እንዴ ቤለ ምን መስኡልየቱ እንዴ ትከረ አስክ ኤረትርየ መጽአ። ርኢስ በርለማን ሶማል ሸሪፍ ሐሰን ሼክ አሕመድ እብ ጀሀቱ፡ እግለ ሓድሰት እግል ልክሀሉ ሰበት ኢቀድረ ምስል እብ ዶ/ር አሕመድ ሐሰን ድሕሊ ብዕዳም 40 አንፋር በርለማን እት ገበኦ፡ ምስለ እግል ተሕሪር ሶማል እብ ሐዲስ ለጠልቡ ቅዋት እንዴ ተሓበረት ዲብለ ዲብ 2007 ዲብ ዓሲመት ኤረትርየ አስመረ ለገብአ ሙእተመር ተእሲሲ ሻረከ። ሙእተመር አስመረ 2007 እግል ወራር አቶብየ ለልትቃወሞ ስያስዪን ቅዋት ሶማል፡ ሙእተመር እስላሚየ ዲብ መትዐደይት ፈደራልየት ሕኩመት ወውዘረእ ለዐለው፡ ርኢስ በርለማን ምስል 40 ብዕዳም አንፋር በርለማን ምን መጅተመዕ መደኒ ሶማል ለትወከለው ሶማልዪን፡ ዲብ ዮም 6 ሰብተምበር 2007 ዲብ አስመረ ሙእተመር ወደው። ለሙእተመር እብ ርኢስ ሼክ ሸሪፍ ሸክ አሕመድ “ገለድ ተሕሪር ሶማል ምን ሐዲስ” ለትሰመ ተንዚም አሰሰ። ሸሪፍ ሕሰን ሼክ አድም ህዬ ርኢስ ምጅልስ ተንፊዚ እንዴ ገብአ ተሐረ። ሙእተመር ዲብለ ዲብ ዮም 14 ሰብተምበር 2007 ዲብ አስመረ ለአፍገረዩ ናይ መትመሚ በያን አው አዋጅ ክምሰል ሸርሑ፡ እሊ ለተሌ አግደ ቀራር ሓለፈ።

ሶማል እብ ሰዳይት እዳረት አሜሪከ አረይ ወራር አቶብየ ጋብአት ህሌት።
ቅዋት አቶብየ ድድ ሸዐብ ሶማል መትጃግራይ ለአለቡ ጀራይም አጅረው። እብ ዓኒ እግል መዲነት መቃዲሾ ደመረወ። አምኣት ኣላፍ ላጽሕ ሸዐብ ሸዕተረው።
ተሕሪር ሶማል ናይ ክሎም ሶማልዪን ዋጅብ ቱ።
ዌራይ ጄሽ አቶብየ ምን ሶማል እንዴ ኢፈግር ምስል መትዐደይት ፈደራልየት ሕኩመት ለገብእ ህድግ አለቡ።
ቅዋት ኡጋንደ ምን ሶማል እግል ልፍገሮ ቦም።
ሕኩመት ኬንየ ምስል ዌራይት አቶብየ ትወድዩ ለህሌት መትሰዳዳይ እግል ሶማልዪን እምበል ጀሪመት ወምስምሰ እስሮ እግል ለአብጥሮ ቦም።
መነዘመት ምጅልስ ቅራን፡ እተሓድ አፍሪቀ፡ አልጃምዐ አልዐረብየ ወሙእትመር እስላም እግል ዌራይት አቶብየ እግል ልስቀቆ ንትላኬ።

8. ምጅልስ አምን እብ አሳስ ሚሳቅ መነዘመት ምጅልስ ቅራን ማደት 7 ድድ አቶብየ ለተትሐዜ ምስዳር እግል ልንሰእ ንትላኬ

እዳረት አሜሪከ ድድ ሶማል ለትተብዐ ስያሰት እግል ልትበደል ነአትፋቅድ።
“ ገለድ ተሕሪር ወብንየት ሶማል እብ ድግማን ተንዚም እርሃብ ኢኮን። ዲብ ረአስ ሶማል ኢዓድል ወራር እግል ለአጅሬ፡ ሕር ወውሕደተ ለአከደት ጥውርት ምስል ግዋሬሀ እብ ሰላም ለትነብር ሶማል ጀላብ እግል ኢተሀሌ እግል ዐንቀፎት። “እርሃብ” ለትብል ዘዐት ሰበብ ጋብአት ህሌት። ሰበት እሊ መትቃውመት ስያስዪን ቅዋት ሶማል ስፉፎም እንዴ ነዘመው፡ እብ ዓም ረአይ ሶማል፡ ድድለ ምስል ዌራይት አቶብየ ለትመሳኔት መትዐዳይት ፈደራልየት ሕኩመት ክምሰል ልትዐንደቆ ወደው። ዲብ ረአስ ቅዋት ሕኩመት ርኢስ ዐብደለ ዩስፍ ወቅዋት አቶብያመ ድቁብ ስያስያይ ወናይ መዕነውየት ወዐስከርየት ጽፍዒት ወደው።

ፈሸል ሕኩመት ርኢስ ዐብደለ ዩስፍ

ሕኩመት አቶብየ ሶማል እግል ወሪር ክምሰል ናይ ፈገዖት ዝያረትቱ ናስአቱ ለህሌት። ምናተ እብሼሽ ዲብ ክራጅ ለአለቡ ተማስ ትወሐለት። ቅዋት አቶብያመ እግል መትቃውመት ተናዚም ሶማል ዲብ መቃዲሾ ዲብ ክሉ ለአተው እተን መዳይን ወደገጊት ሶማል እምበል አትካራም ጀሬ እቶም ለዐለ ለተአመጽጽ ጽፍዐት እግል ልክሆሉ ኢቀድረው። ሰበት እሊ አቶብየ እግል መትዐደይት ፈደራልየት ሕኩመት ሶማል እግል ትርፈዕ መስኡልየት እግል ትንሰእ ኢቀድረት።መጥ-መጦረ ዲብ ትደቀብ ትገይስ ለዐለት መቃወመት ስለሕ፡ ድድለ እብ ጄሽ አቶብየ ለትትዐቀብ ሕኩመት ዐብደለ ዩስፍ እግለ እግል ሕኩመት ዐብደለ ዩስፍ ምን ባይደወ አስክ መቃዲሾ እግል ልእቴ እግል ወራር አቶብየ ለሰዴት እዳረት አሜሪከ፡ ናይ ሸዐብ መቃወማት ጠወረ። ዲብ እሊ አሰልፍ

ለትሸረሐ ናይ ስያሰት ወዐስከርየት ተጠውራት ሜዳን ሶማል እብ መተንካብ እዳረት አሜሪከ፡ እግል ጂኦ እስትራተጅየት መሳልሐ ዲብ ሶማል እበ ተሐፍዝ ገበይ እበ ዎሮ እንክር፡ እግለ ታሪካይት ግውርነተ እብ ሶማልዪን ለዐለት ዲብ ወክድ ሐጪር ለኢትዳዌ እቢ ወድምለ እት ወግም እንዴ ኢተኣቴ እግለ ተሀየበየ ወቀይ እምበል ሸክ እት ፍዕል ለውዐለት አቶብየ እንዴ ኢትከጅል ለትፈግር ቡ አግቡይ ህዬ እበ ብዕድ ሐል ለተአመጽእ ገበይ ዲብ አናደዮት ትሳሰዔት።

ሕኩመት ሸሪፍ ሼክ አሕመድ 2009 ሕኩመት ዐብደለ ዩስፍ እንዴ ኢትፈሽል፡ ለዲብ መቃዲሾ ክርዱን ለዐለ ጄሽ አቶብየ እግል አንገፎት ምን መራቀበት ዋሽንግቶን አዲስአበበ ለፈግረ መሓክም እስላሚየ እግል ሶማል እግል ኢልራቅብ ገበይ እግል ክልአቱ፡ ብዝሓት ናይ መንጠቀት ወእዲነ ክምሰልሁመ ድወል ምውዳቅ ጸሓይ ምስል እዳረት አሜሪከ እብ መትመቃረሕ፡ እግለ ዲብ ሰነት 2007 ዲብ ኤረትርየ ለተአሰሰ “ ገለድ ተሕሪር ሶማል እብ ድግማን” እግል ፈንጠሮት እብ ክለ ሒለቶም ሸቀው። ክምሰል ፍገሪቱ ህዬ እግል ርኢስ ናይለ ገለድ ሼክ ሸሪፍ ሼክ አሕመድ ወርኢስ ምጅልስ ተንፊዚ ሸሪፍ ሐሰን ሼክ ኣድም እግል ልክሰቦ ቀድረው። ዲብ ሰነት 2008 ህዬ ፍንጌ መትዐዳይት ፈደራልየት ሕኩመት እግለ ምን ገለድ ተሕሪር ወብነ ሶማል እብ ድግማን ለአንፈሰለት ጀሀት “ዕሪት” ለትብል ቄሻይት ስቅራት እንዴ ትሆገለው ዲብ ጅቡቲ ሙእተመር ወደው። አሜሪከ ድድ ንየት ኮሎኔል ዐብደለ ዩስፍ እግል ሼክ ሸሪፍ ሼክ አሕመድ ርኢስ ሶማል ውድየተ ህዬ ለለትዐጅብ ይዐለ። ሰበት እሊ፡ ለሀደፍ ፍንጌ መትቃውመት ሐራካት ሶማል ምስል ክሉ እስላምያይ ፈርጎም፡ ደግሽ ወአከይ መቅርሕ እግል ክልቀት እግለ ሸሪፍ ሼክ አሕመድ ሜርሓይ ሙእተመር እስላሚየ ገብእ እት ህለ፡ እብ ሸዐብ ሶማል ለረክበየ ሕሽመት እግል ወቀሎት ቱ። ዲብለ ናይ ሰልፍ ወክድ ዋሽንግቶን፡ “ምስል እርሃብዪን ዐናስር አልቃዕደ ዕላቀት ቡ” ዲብ ልትበሀል ሸኬ ዐለት። ዲብ እሊ ሓርያይ ወቅት ላኪን ለበሀል እንዴ ትበደለ፡ እብ ረአይ ዋሽንግቶን ሸሪፍ ሼክ አሕመድ ሙተጠርፍ ለኢገብአ እስሌማይ ሜርሓይ ገብአ።

እብ እዳረት አሜሪከ “ እርሃብ” ለልብል ፈሀም እብ ገበይ ዕልምየት እንዴ ኢገብእ፡ አስክ አዪ እግል ደሐን አምን ወጠነ ወእስትራተጂያይ፡ ስያስያይ ወእቅትሳድያይ መሳል ከድም እበ ልብልቱ ለልትመዘን። ሰበት እሊ፡ አሜሪከ እግለ ተሐዝዩ ላጽሕ እግል ቲደዩ፡ ለኢተሐዝዩ ህዬ እምበል ለገብአት ትግበእ ሰበብ እርሃብ ለትብል ስሜት ከርስ እግል ተትዐግቡ ለለዐይብ አው ለትከጅል እቡ ጋር ኢኮን። እብሊ ህዬ ማሌ “እርሃብ” ለትብሉ ለዐለት ዲብ በል ሸም “ወጠኒያይ

ሜርሓይ” እግል ቲበሉ ምሽክለት አለበ። እሊ ህዬ ስያስያይ ልባብ ወናይ ሐቂቀት አዋይን ምነ ኢጠይዕ መቃዪስ አምዋጅ ማኬየቬላይ አፍካር ለመጽእ ቱ። እብሊ አሳስ እሊ ህዬ ፍንጌ “መትዐደይት ፈደራልየት ሕኩመት” ወለ ለምን “ ገለድ ሙእተመር እስላሚየ” ለአንፈሰለት ጀሀት ሸሪፍ ሼክ አሕመድ፡ እብ ስቅራታት እዳረት አሜሪከ ወሕኩመት አቶብየ እንዴ ተለ፡ ምን ዮም 31 ማዮ አስክ 9 ጁን 2009 ናይ “ዕሪት” ሙእተመር ዲብ ጅቡቲ ገብአ። ዲብለ ሙእተመር፡ ምን ፈረንሰ፡ ብሪጣንየ፡ ስዑድየ፡ ጅቡቲ፡ እተሓድ አፍሪቀ፡ አልጃምዐ አልዐረብየ ወሙእተመር እስላም ወእተሓድ አሮበ ክምሰል መራቅቢን ሻርኮ ዐለው። ዲብ እሊ ለተሌ ቀራራት ህዬ ትዋፈቀው።

እግል ሰላም ዳይመት ለለአደምን ሐል ስያሲ አናደዮት።
ክሉቅ ለህለ ናይ አምን ጋግ አርሀዮት።
ደሐን ስካን አድመኖት።
ራድኢት እንሳንየት ቀደሞት።
ስያደት፡ ሕሽመት ወውሕደት ምድር ሶማል አከዶት።
ዲብ ቀበት ዎሮ ወሬሕ ዘብጥ አብጠሮት።

ምናተ፡ ናይ ሰልፍ ፊልም እንዴ ሸቄከ፡ ሐዲስ በርናምጅ አው ሲናርዮ እብ አዳላይ፡ ዲብ መርሐለት ሆሊዉድ እግል ተአቅርብ ቀሊል እግል ልግበእ ቀድር። ምስል አሕዳስ ወለህሌት ሓለት ሶማል ዲብ ምድር ለሀለ እግል ትክደም ላኪን ቀሊል ሽእ ኢኮን። እግል መሰል እትፋቅየት ጅቡቲ ዲብ ዮም 31 ጃንዋሪ 2009 እግል ሸሪፍ ሼክ አሕመድ ወርኢስ “ መትዐደይት ፈደራልየት ሕኩመት ሶማል” እንዴ ትበሀለ ምንመ ተሐረ፡ ዲብ ሶማል ሰላም ዲብ መዲድ ላኪን ፋሽል ቱ። ለሕኩመት እግል ኖሰ ዲብ ናይ ረኣሰት ዴዋን (ፓላስ) እግል ኖሱ እግል ልዕቀብ ለኢቀድር ምን ገብአ፡ እብ ከአፎ ሰላም እግል ትምጸእ ትቀደር? ለእብ ዶልዶሉ እግል ገሌ ሸዋሬዕ መቃዲሾ ለራቅብ ቅዋት ኡጋንደ ወብሩንዲ እግል ኖሱ እብ መትቃወመት ሶማል ትርድት ጽፍዐት ዲበ ሳደፈየ እቱ ወክድ አው ገሌ ምን ውሕዳተ ምን መዐሳክሮም እንዴ ፈግረው ዲብለ ልትሐረኮ እቱ ወክድ ዲበ ኢልምሕክ ከቢን እንዴ አተው ዶል ልጸፈዖ፡ ዲብ ረአስ ላጽሓም ሶማልዪን ለለሽዐልል ጀራይምቱ ጀሬ ህለ። ሰበት እሊቱ ህዬ ሕኩመት ሼክ ሸሪፍ እግለ ሕዳም ሶማልዪን ምነ እግሎም ወእግል ወጠኖም እግል ክልኤ ዕቁዳት ታምም ለሳደፈ መሻክል እግል ልካርጆም ለዐለት እሎም ሰእየት አቀለዖተ ለለትዐጅብ

ኢኮን። ተቃሪር “መራቅባይ ሐሽም ሶማል ወኤረትርየ” ክምሰለ ለሐብሩመ ሃይበት ድወል መነዘመት ምጅልስ ቅራን ዲቡ ደማን ወእምነት እብድያም ዐለው።