መጅልስ አምን ወለዛልም ቀራራቱ ድድ ኤረትርየ (21ይ ክፈል)

እብ ዶ/ር አሕመድ ሐሰን ድሕሊ ተርጀመት፡ መሐመድ እድሪስ መሐመድ

እሊ ታሪካይ፡ ስያስያይ፡ እቅትሳድያይ ወመሕበራይ ቴለል ሶማል፡ “ገለድ መሓክም እስላሚየ” እብሼሽ ሜዳን ሶማል እግል ልራቅብ አስተብደ። ቅደይ ምዋጥኒን ሶማል እግል ለአስክብ ሰበት አስተብደ ህዬ ተእሲሩ እንዴ ፈይሐ ህዬ ከብቴ ስካን መቃዲሾ ረክበ። ዲብ ሰኒ ሐጪር ወክድ ህዬ “መናቢት ሐርብ” ለለርዕብ ብቆዕ ስያስያይት ሒለት ገብአ። “መናቢት ሐርብ” እግል መቃዲሾ ናይ ብሕተ መሳልሖም እበ ከድም ጥሉቅ አግቡይ እግል እዳረት፡ እብ ሐቂቀት እብ ናይ ብሕተ ምልክ ሰበት ልትአዘዞ፡ ለገብአ ስያስያይ መሕበራይ ወዐስከርያይ ክምሰልሁመ ዲብ ቅወት እግል ትጃገሮም አው ዲብ ናይ እዳረት ቅደይ መቃዲሾ ምስሎም እግል ልሻርክ ሰበት ለሐዙ፡ ፍንጌሆም ውሕዳት “ ገለድ መሓክም እስላምየ” ዓም መዓርክ ዐስከሪ እግል ልትከሰት ጠቢዕያይ ቱ ለዐለ።

ዋሽንግቶን ወአዲስአበበ መብዘሖም እግል መሻክል ሶማል ምን ቅሩብ ለታበዖ ጀሃት፡ ሚሊሻታት “መናቢት ሐርብ” ዲብ ረአስ ቅዋት “ገለድ መሓክም እስላሚየ” እብ ቀሊል መደምራይ ዐውቴ ልታከው ዐለው። ምናተ ቅወት መሓክም እስላሚየ እበ ድምርት መርከብ “መናቢት ሐርብ” እግል ልክሀሉ ለኢቀድር መርበይ ሰበይ መጽአ፡ “መናቢት ሐርብ” ወለ ሰዳይት አሜሪከ ወአቶብየ ምንመ ልውሕዝ እቶም፡ ምን ተሪቅ መርከቦም እግል ትንጄ ኢቀድረት። ሰሮም ክምሰል ሰለመው፡ ሰር ህዬ ክምሰል ሞተው ለተርፈው አርወሐቶም እግል ለአንግፎ፡ እብ ምድር ወዐስተር አስክ ክሉ እትጀሃት በህለት

አዲስአበበ ወዋሽንግቶን ሀርበው። ቅዋት “ገለድ መሓክም እስላሚየ” ዲብ ረአስ ሚሊሻታት “መናቢት ሐርብ” ትሉሉይ ዐስከርያይ ዐውቴታት እግል ለአክዶ ለቀድሮ እቡ አስባብ፡ ክምሰለ ገሌ ጀሃት ለጌመመዉ ናይ ካርጅ ሰዳይት ሰበት ትከዔት እቶም ኢኮን።

ለደመዊ ወመደምራይ ሐርብ መቃዲሾ እብ መስለሐት ውሕዳት ፥”ገለድ መሓክም እስላሚየ” ክምሰል ተምም ለወደ ሓድር ቴለል እሊ ለተሌቱ።

1. ስካን መቃዲሾ ድድለ ዲብለ መዲነት ደማር፡ ከራብ፡ ወመቅርሕ ለለአነግሶ፡ “መናቢት ሐርብ” ሰበት በጥረው።

2. ዕጋል ናይለ መዲነት ምንለ ድቁብ ምስል እግል ዎሮት ዕቁድ ወሰር እግል ሶማል ዲብ መሻክል ትሩድ ለሸመው፡ “መናቢት ሐርብ” ጀላብ እግል ልትባለሖ፡ “እግል መሓክም እስላሚየ” ሰበት ሰደው ወአየደ።

3. ሰብ ትጃረት ዲብ ዓሲመት እብ ዶ/ር አሕመድ ሐሰን ድሕሊ ሶማል ምስል “መሓክም እስላሚየ” ሰበት በጥረው፡ “መናቢት ሐርብ” ምን መቃዲሾ ለሀርበው፡ ዲበ መዲነት፡ ሸዐብ ሶማል ዲብ መምተለካቶም ወአርወሐቶም ለፈርሀው ወራታት ትጃረት እግል ልሳይሮ ቀድሮ ይዐለው።

4. ገሌ “መናቢት ሐርብ” ድድ “ገለድ መሓክም እስላሚየ” ሐርብ ዊደት ፋኢደት ክምሰል አለቡ ፍህማም ዐለው። ተቃሪር አሜሪከ ክምሰለ ለሐብሩ ህዬ፡ ገሌ ምኖም፡ እዳረት አሜሪከ እብ ገበይ መክተብ ምግባይ ወኪል ስለለለ አሜሪከ ሲ.ኣይ.ኤ. ዲብ ዓሲመት ኬንየ - ናይሮቢ ሰዳይት ማል ክምሰል ተሀየበው ዲብ መስለሐቶም ትፈረረው።

5. አሜሪከ “እግል መናቢት ሐርብ” ለተሀይቡ ዱቅሪ ወእብ ወለት ገበይ ሰዳይት እግል ወድ ሶማል ላቱ ምዋጥን ነከደዩ ወእግለ ተሐልፈ መሪር ቴለል ክምሰለ ልዘከሩ ዋዲሁ ሌጠ እንዴ ኢገብእ፡ ስካን መቃዲሾ ምስል “ገለድ መሓክም እስላሚየ” ክምሰል ልትዓወኖ ዋዲሆም ቱ።

6. “መትዐዳይት ፈደራልየት ሕኩመት ሶማል” እብ ማርሒት ኮሎኔል ዐብደለ ዩስፍ ምን ናይሮቢ አስክ ባይደወ ክምሰል አቅበለ፡ ዳይመት ምሽክለት ሶማል ዲብ አስከቦት አሳስ ብነ ናይለ ክሉ ወድ ሶማል ምዋጥን ለልትሐለመ ውሕደተ ለተአከደት ዲብ አክዶት ፈሽለት።

7. “መሓክም እስላሚየ” እግል አምዕላይት ሐያት ምዋጥኒን እብ መስኡልየት ወበቃዐት እግል ልምረሕ ሰበት ቀድረ፡ ዲብ ሸዐብ መቃዲሾ ትምሳል ሰኒ ካልቅ ህለ። ምስለ ቀደም ለሀ ለዐለ ቴለል እብ አትመጣዋር ህዬ መቃዲሾ ሸበህ አምን ወመስኩበት ረክበት።

8. ቅዋት “መሓክም እስላሚየ” ዲብለ ለትመቃርሑዉ ባካት፡ ምነ ዲብ መደት “መናቢት ሐርብ” ለዐለት ፈውደት እብለትፈናተ ንዛም (ዲስፕሊን) ባንያመ ዐለው።

9. ሚሊሻታት “መናቢት ሐርብ” እግል ቀሊብ መሓክም እስላሚየ ለተበዐዩ ስርጉል ዐስከርያይት እስትራተጅየት፡ እግል ስታቲባት እዳረት አሜሪከ ወሰብ ሰልጠት አቶብየ ሐምረገዩ። አጄንደት “መሓክም እስላሚየ” አጄንደት መሓክም እስላሚየ ሚ ክምሰል ዐለ ምነ ቅያደቱ ምስል ወሳእል እዕላም ዐረብ ወቀርብ ውድዉ ለዐለው ልቃኣት እንዴ ትበገሰው፡ እብ ክእነ ለተሌ እግል ልጨመም ቀድር።

1. ዲብ ሶማል አክል ሕድ ክምሰለ ዲብ አፍጋኒስታን ለትረአ ንዛም ጣሊባን ለመስል ንዛም እስላሚ እግል ነአስስ ክሉ ረአሱ ፍክር አለብነ።

2. ሕኩመት እስላምየት ናይ ተኪል ሀደፍ አለብነ። ሸዐብ ሶማል ሚ ጅንስ ንዛም ክምሰል ለሐዜ ኖሱቱ ለቀርሩ። ፈደራልያይ ልግበእ ወለ ምርኩዝ እሉ ከስስ።

3. ሶማል መሐብዒት “መርዕደት” እግል ትግበእ ንየት አለብነ። እግል ሀደፍ ወወራታት እርሃብ ለለአይዶ ሐሽመት ኢነአይዶም።

4. ሸዐብ ሶማል ለአትበገሰዩ መቃወማት ምስል አልቃዕደ ልግበእ ወኡሳመ ቢንላንዲን ዕላቀት ለአለበ ሳፍየት በዳሪት ሶማልየት ተ።

5. ዲብ ሶማል መስኩበት፡ አምን፡ ስኒት ወሰላም እግል አከዶትቱ።

6. ሀደፍነ፡ ፍንጌ ክሎም ሶማልዪን እብ ሰላም ክምሰል ልትናበሮ ለለአክድ ዐድል፡ መሳዋት ወረአይከ ናይ ሽርሐት ሕርየት ለትመደደ እተ ውሕደተ ለአከደት ደውለት አሰሶት።

7. መሻክል ግብለት ክምሰል አርሄነ፡ ናይ መንጠቀት ወእዲነ እዕትራፍ ለበ ውሕደት ሶማል አከዶት ታሪካይት ሐቂቀት ሰበት ተ፡ ምስል ፑንት-ላንድ ወሶማሊ ላንድ እብ ውሕደት እብ ሕበር ለለአሸቄነ መካኒዝም እንዴ ትከለቀ ዲብ ዎሮ ስያስያይ ፍክር እግል ምጽአት እግል ንትዐወት ቱ።

8. ዲብ ቀር አፍሪቀ ናይ እቅትሳድ መትሰዳዳይ ወመትዓዋን እግል ለሀሌ ነአምን። ተኣምርታት “መሓክም እስላሚየ” ወ “መትዐደይት ፈደራልየት ሕኩመት”

1. “መትዐደይት ፈደራልየት ሕኩመት” ሐቆ ናይ ክልኤ ሰነት ማራቶናይ ህድግ ዲብ ናይሮቢ ትከወነት። “መሓክም እስላሚየ” ላኪን ዲብ ቀበት ሶማል ተአሰሰ። እለ ቀድየት ህዬ እግል ኖሰ ምህም ምንመ ኢትትበሀል፡ አሀምየት ዐባይ በ።

2. ተክዊን “መትዐዳይት ፈደራልየት ሕኩመት” ዲብ ናይ ዐሻይር ተክዊን ሶማል ለተአሰሰት ተ።

እግል መሰል ርኢስ ሕኩመት ኮሎኔል ዐብደለ ዩስፍ ምን ዐሺረት ማጅረን ወዳሮድየ ገብእ እት ህለ፡ ርኢስ ወዘረእ ዐሊ መሐመድ ጄዲ ህዬ ምን ሃውያ ቱ። ብዕዳም ወዘረእመ እብ ክምሰልሁ ለተአሰሳ ቱ። ዲብ ሶማል ናይ ቀባይል ወዐሻይር ገለዳት ዲብ ወራታት ስያሰት እብ ክእነ እብ ሸፋግ ለአሰሰየ እብ ሸፋግ ቱ ለፈርስ። እሊ እምብል ዲብ ህሌነ ተሸክካት እግል ከሊቅ እንዴ ኢገብእ፡ ዲብ ክምሰልሁ መተንካብ ክምሰል ኢለትሐዜ እግል አትፋቃድ ቱ። እብ ቃብል እሊ “መሓክም እስላሚየ” ክምሰለ ስሜቱ ለሐብሩ ዲብ ቀበትለ እግል ዎሮ ዕቁድ ወሰር “መናቢት ሐርብ” ለከልቀዉ ስያስያይ፡ መሕበራይ ወእቅትሳድያይ ፈውደት፡ ፍንጌ “መሓክም እስላሚየ” አብያት ፍርድ እበ ገብአ ገለድ ለተአሰሳ ቱ። “መሓክም እስላሚየ” ናይ ዎሮ ርያል ክልኦት ገጽ ኢኮን ለዐለ። ሜርሐቱ ክምሰል ሼክ ሐሰን ጣህር ዕዌስ ርኢስ ቤት ጎማት ምጅልስ ወርእስ ምጅልስ ሼክ ሸሪፍ ሼክ አሕመድ፡ ዲብ ቀበቶም ዲብ ገሌ ቀድያት ናይ ረአይ መትፈናታይ ምንመ ዐለ እሎም፡ ፍንጌ ናይለ ትፈናተ “ መሓክም እስላሚየ” ውሕደት ወመቅርሕ እግል ክልቀት እብ ክለ ሒለቶም ሸቁ ክምሰል ዐለው ለሐብሮ። ዲብ ነኣይሽ አምዕላይ ቅደይ እግለ ሳድፍ ኽላፍ ርእየት ቀሊል ምንማቱ፡ ዲብ መራጄዕ ሶፍየ፡ ሰለፍየ፡ ወሃብየ፡ ጅሃድየ ወመርከዝ እንዴ ተንከብከ ርእየቱ ላኪን ለትኬለመ ወለተሐባለካ ቱ። እሊ እግል ፈልሰፈት አልቃዕደ እብ ብንላንዲን እንክር እንዴ ከሬከ በህለት ቱ።96