መረቅ ለኢትከዐ እቱ ብሩድ ለአመስሉ!

እብ ዑመር መሐመድ ዓሊ አቢብ
ሰውረት ኤረትርየ እት መደት ሐርብ ብሩድ ሰበት ትወለደት፡ ለትትጋለብ ለዐለት ስያሰት እዲነ እብ መስለሐት ትትዋሌ ዐለት። እብሊቱ ላመ እብ ስያሰተ እት ክልኤ ክፍልት ለዐለት እዲነ እት ሰዳይት ሰውረት ኤረትርየ ክምሰል በጽሐት እት ሐቴ ንቅጠት አተፈቀት።እሊ ህዬ መስለሐተ ወእስትራትጅየተ እንዴ ረኤት፡ “ሸዐብ ኤረትርየ ሕርየት ምንመ ለኣስታህል ምን አጅል መስለሐትነ እት አቶብየ ንቅረኑ እት ትብል እብ ዋድሕ ተሃጌት። እብሊቱ ህዬ ሰውረት ኤረትርየ ለተርፈ እለ ዎሮት ኽያር እት ዔጻት ሸዐበ እግል ተአትንክብ ወደማን እለ እግል ትውዴ ሐሬት። እት ዳኽል ኤረትርየ ለዐለ ሸዐብ ኤረትርየ ምን አጅል ሕርየት እብ ደሙ ወዓጭሙ እንዴ ትበረዐ እብ ልብ ናስሕ ሰውረት ኸድመ ወወጠኑ ሐረረ። ለዲብ ልጁእ ነብር ለዐለ መዋጥን አምበለ አስክ ሰውረት ሳርሖም ለዐለ ውላዱ መስደር ርዝቅ እንዴ ገብአ ሰውረት ረፍዐ።

እሊ ኩሉ ለትደፈዐ ዐውል እብ ሕርየት ወዲሞቅራጥየት እብ ፍቲ ወሕሽመት አድሕድ ረአሱ እንዴ አሽነነ ለነብር እተ ኤረትርየ እግል ልርከብ ቱ። ሸዐብ ኤረትርየ ላኪን ክም ትምኔቱ ኢረክበ ወፈኩ ኢትፈደ ሌጠ እንዴ ኢገብእ፡ ምን ዘመን እስትዕማር ለትአኬ፡ እብለ ትኬለመት ሓለት፡ ሞት፡ ስጅን፡ ልጁእ ወመትሸዕታር ገብአ ፈኩ።

ለናይ ብዲር ጀብሀት ሸዕብየት ወናይ ዮም ጀብሀት ሸዕብየት እግል ዲሞቅራጥየት ወዐዳለት፡ እስትሽሃድ፡ አየዶት ወመትሰባል ሸዐብ ዲብ ሽቅል አመት ወመንባሀ ቀየረቱ። ሸዐብ ለትበሀለቱ፡ ለወዴ ወለ ጠይዕ እት ኢኮን ህግያሁ ወጎማቱ ዐውል አለቡ ገብአ። ክመ ምን ደቃም እት መገርድዕ ለልትበሀል ምን ሕክም ዎሮት ሕዝብ ጀብሀት ሸዕብየት ዲብ ሕክም ጃእር ዲክታቶር ትከረ። እሊ ደውለት እብ ተማመ እት መአሰሰት ዎሮት እናስ ጃእር ብዱለ ለህለ ሕክም ሸዕብየት ደውለት እብ ተማመ እት ድምነት ቅዩረ ህለ።

አምበል ሸክ አምዕሉ ክም ተመት ኩሉ እግል ሀለዮት እሊ ሕክም ዛልም ኸድም ለህለ እት ቀደም ፍርድ ክም ቀርብ አኪድ ቱ። ዝያድ ኩሉ ህዬ እት መደት እስትዕማር አቶብየ ልግበእ አው እት መደት ሕክም ሸዕብየት ኤረትርየ ናር ኣልጅሒም እንዴ ገብአት እቶም ለለጅአው፡ ዲብ ድወል ዲሞቅራጥየት ወዐድል እንዴ ነብሮ፡ ሕኩመትነ ወስያደት ወጠነ እንዴ ቤለው እብ ደም ወለህበት ናይለ እት ዳኽል ኤረትርየ እግል ዝያድ 30 ሰነት እብ እስትዕማር ውላድ ዐድ ልትዐዘብ ለህለ ሸዐብ ኤረትርየ ልተልሀው ለህለው ቶም። እሎም መብዝሖም እት መደት እስትዕማር አቶብየ እንዴ ለጃአው እብ ማል ሕልቅሞም ባጽሓም ለህለው፡ ዐዶም እት መጃዐት ወድብር ሽምት እት ህሌት ህቶም ጽጉባም ዲብ እንቶም ለነብሮ፡ እበ እሉ ረክበው ማል እግል ልስኮኑ ለኢቀድሮ እግል ስሜት ወፋሽ ሌጠ አብያት ለበነው፡ ለዲብ ኤረትርየ ሐሽም ሸዕብየት ለአቅረሕየ እሳት ምን ቅሩብ ወምን ረዪም ለኢተዐሬ እቦም፡ መብዝሖም ክልኤ ጅንስየት ወጀዋዝ ስፈር ለሓምላም እት አምዕል እኪት እግል ኖሶም ወአፍረዐቶም ጽላል ወመጽሀይ እዱልያም ለህለው ቶም።

እግል መሰል ሰነት 1998 ሐርብ አቶብየ ክም አንበተ ወወያኔ መጣር አስመረ እግል ተአንድድ ክም ጀረበት ለዲብ ዳኽል ኤረትርየ ለዐለው ምኖም ለምን ድወል ብዕድ ሓምላሙ ለዐለው ጀዋዛት እንዴ ጸብጠው እግል እለ ዮም “ሕኩመትነ ወስያደትነ” ልቡለን ለህለው እንዴ ሐድገወን ለሀርበው ቶም።

ሓለት ስያሰት ወእጅትማዕየት ኤረትርየ ምን አኬት ወእትለትኬለት ገይስ ክምሰል ረአወ ቀደም አዳም ሐዎም ወሐዋቶም ወኩሉ ሰብ ጅልደቶም ምን ኤረትርየ ለአፍገረው፡ ወአስክ ዮም ማ እብ ረሽወት ወሑዬ ሑከ እብ መጣር አስመረ አዳሞም እንዴ አትሀረበው ኤረትርየ ምን ቅባል ለአትቃሙተ ለህለው ቶም።

እግል መሰል ወእብ እስባታት ምን እንረኤ ውላድክም ምን ኤረትርየ ተአትሀርቦ ህሌክም እንዴ ትበሀለው፡ ለቀደም እለ እግል ሕርየት ወስያደት ወጠን ውላዶም ለትፈንተው ዋልዴን ወልዱ ለሀርበ ኸምሲን አልፍ ልድፈዕ አው እግል ትትሳጀኖቱ ዶል ትበሀለው ለመስኪን ሐቴ ለአለቡ ልትሰጀን እት ህለ፡ ለእት ኻርጅ እንዴ ገብአው ሕኩመትነ ወስያደትነ ልብሎ ለህለው እግል ዋልዴኖም እተ ዶሎም 50 አልፍ ነቅፋ እንዴ ደፍዐው እሎም ምን ዐዛብ ጃእር ሕክም ሸዕብየት አንገፈዎም። ወሓግል ሐቴ ለአለቡ ወዲብ መደት እኪት ወስድት እግል ኤረትርየ ህሌኮ እግልኪ ለቤለ እት ስጅን ዐዛብ ልርኤ ዐለ።

እሎም ዲበ ነብሮ እቱ ድወል ክም ምራዶም እግል ልትሃገው ወእግል ለአስምዖ እት ቀድሮ፡ ህግየ አማን ወሐቅ ምነ እንዴ አዝመው ምስል ሸዕብየት ለአጣቅዖ ወእግላ ህግያሁ እግል ትትሰመዕ ኢኮን እት ድፍዓት እንዴ ገብአ እጃዘት ለትከለአ ዋልዴኑ ወውላዱ እግል ልርኤ በክት ራክብ ለኢህለ “ሰኒ ህሌከ” ምን ልቡሉ ወህቶም ምነ ነብሮ እቱ ድወል እግል እጃዘት ዶል መጽኦ እግል ኤረትርየ ምን ሽማል አስክ ጅኑብ ወምን ሸርቕ አስክ ቐርብ ክም ምራዶም ለገይሶ፡ እግላ ዲብ ዳኽል ኤረትርየ እግል ልትሐረክ ምኑዕ ለህለ “ሻንን እንተ” እንዴ ቤለው ምን ለሐሉ እሉ፡ምን እግል ልእመኖም።

እግል ኤረትርየ ምን ቅብላት ሌጠ ለለአሙረ፡ እት ሰነት ሐቴ ዶል እግል ዝያረት እንዴ መጽአው፡ መዳይን ከርሀበት አለቡ ክም ጸንሐዮም እጃዘቶም እንዴ ኢለአተሞ ለለአቀብሎ፡ ሸዕብየት እግል ለአርዱ እት ወሳይል እዕላም እንዴ ፈግረው “ኤረትርያነ ትትዐመር ወትጠወር ህሌት” ምን ልብሎ ምን ሰምዖም ገብእ፧

እት መናሰባት ሐሸም ሸዕብየት ልባስ ናይለ እት ወጠነን ለትሰጀነየ ወምክራየን ቅዊት ለህሌት ቆምያት እንዴ ለብሰው ሰስዖ ወበርጆ ለህለው አምበል ጅልድ ኢጅልድከ እት አሾክ ሰሐቡ እብሚ እግል ልትወሰፎ፧

እተ እብ ልጁእ ለነብሮ እቱ ድወል ክም ምራዶም እት መናብር መጃልስ ወእዳራት ሕኩማት ለለሐሩ ወለ ልትሐረው፡ እግለ ደሙ ወዓጭሙ እት ኤረትርየ ለከዐ ወለ ደፍነ እግል ዝያድ 30 ሰነት እግል ልሕሬ ወልትሐሬ በክት ለኢረክበ ሸዐብ ኤረትርየ፡ መንባሆም እግል ለአርዱ “ደስቱር ኢለአትሐዜከ” ምን ልቡሉ፡ ምነ ቄትላይ ወዛልም ዲክታቶር ሚ ትፈንትዮም፧

ምን ሐቁ ምኢሽ ምን ነቅስ ምኑ፡ እበ ለነብር እተ ደውለት ለረክበን ሕርየት ወዐዳለት አምበል ፍርህ ሐቁ ዲብ ጣልብ፡ እግለ አምበል መረትብ ወዕርፍ እግል ዐስሮታት ሰኖታት ለኸድማ ምን አጅል ኤረትርየ መቅጠን ወዴ ምን ልቡሉ ዲብሚ ልትሐሰብ፧

እብ ህግየ ብትክት እት ኻርጅ እንዴ ገብአው ለገበይ በደ እንዴ ጸብጠት ገይስ ለህሌት ሸዕብየት ለለአይዶ ክሎም እት ኻርጅ መስከብ ለአጥፈሐው ቶም። እት እቅትሳድ ወስያሰት ጣፍሐት መንበረት ለነብሮ እብ ኣንያብ ጸሮም ሖጸ እግል ልቀርጥጦ ለልተምነው ወመጸት ኤረትርዪን ሐቴ ለኢትመስሎም እንሳንየት ለነቅሰት ምኖም መኽሉቅ ቶም። አምዕል ዛልም ወዝልም ምን መሸንገል ኤረትርየ ወሰብአ ልትገልጸጾ እግል ልትገለቦ ሐቴ ኢተሐይሎም። ምን ሐቅ ወዐዳለት እግል ልህረቦ ላኪን ኩሉ ረአሱ ኢቀድሮ። እግልሚ ዝልም እንዴ ልርኡ ምስል ዛልም ሰበት በጥረው።