Wp/tig/ሐሺሽ እት ሸባብ ወደውለት ለልአጀርየ መደረት

ሐሺሽ እት ሸባብ ወደውለት ለልአጀርየ መደረት

እተ ሐልፈመ አውካድ ቅሩብ ዲብ ከሰለ፡ መስቱረ እተ ትትበሀል አካን፡ ዝያድ 250 ኪሎግራም ለልትመዘን፡ ዐውል ዎሮት ትሪልዮን ጀኒ ሱዳን ለልተመን ሐሺሽ አፍጋኒስታን፡ እብ ቅዋት አምን ናይለ ደውለት ትጸበጠ። ብዝሓት ዔማት አክባር ህዬ ለሀድገ እቡ አስመነየ።እሊ ሐሺሽ እብ ገበይ የመን ዱቅሪ አስክ ከሰለ ወምኑመ እተ ብዕድ ውላያት ሱዳን ክም ልትወዘዕ ልትአ’መር።

እሊ እት ከሰለ ለትረከበ ሐሺሽ፡ እግልናመ ለልአትሻቅል ቱ። ሰበቡ ህዬ፡ምን የመን አስክ ከሰለ፡ምድር ኤረትርየ እንዴ ኬደ ሰበት ለሐልፍ፡ እሎም ግሁፋም ሰብ መሀረባት ሐሺሽ ሱግ ምን ረክቦ እብ ሕብዔ ወአዝበው ሌጠ።ምዴርያት ገሉጅ ወተሰነይ ህዬ ለምስል ከሰለ ልትሓደድ ምድርነ ሰበት ቱ፡ምን እሊ ሼ’ላይ መጅተምዓት ላቱ ሐሺሽ ፈርሀት እት ነኣይሽ ወሸባብነ እግል ተሀሌ ሸይ ጠቢዒ ቱ።ከእሊ መደምራይ ሐሺሽ እት ግዋሬነ ውላየት ከሰለ መትጸባጡ፡እብ ከም ወራታት ሕብዔ ወተሀሪብ ባጽሐ እግል ለሀሌ ቀድር፡ ወምድርነ እግል ልእቴ ለሀለ አብካት ዶል ተአትዋይን፡ ለቴለል እብ አማን ለሻቅል ቱ።

እብ ሐሺሽ ለትሀነነት ሻበት ሐሺሽ እብ ሕቡብ ወእበር ምድረት ሐሺሽ እት ኣደሚ ግረህ ሐሺሽ እት አፍጋኒስታን ሓይሳም ቄርአት ኤረትርየ ሐዳስ፡ ዓሙድ ዐማር ዮም፡ሐሺሽ ዲብ ወራታት ዐማር ናይ ሐቴ ደውለት ለልአመጽአ ከሳር ወመንካሰ እግል ነአፍህም፡ ምን ጀሪደት ‘እርትርያ አልሐዲሳ’ -ዐረቢ፡ ኡስታዝ መሐመድ ኑር ያሕያ ለከትበዩ መውዶዕ ትርጁማም እኩም ህሌነ፡ ቅራአት በኪተት፦ እለ ዛህረት እለ፡ እተ ሐቴ ምን ድወል ግዋሬ መትረካበ፡ እት ሸባብ ዐድነ ወመንጠቀትነ ንጋረት ፈርሀት ለትአዘብጥ ተ። ፖሊስ ዐድነ ዲብ አቃሊም እግል ሸዐብ ወደረሰ እተ ወድዩ ሰሚናራት፡ሐሺሽ እት ሸባብ ወመጅተመዕ ለልሐድገ ሽንርብ ሰኒ ክብድት ክም ተ ምን አተንበሆት ዑሩፍ ኢኮን። ሰበቡ ሐሺሽ እግለ ዐጀል ተጠውር ላቶም ሸባብ ሰበት ሸልል ወደምር፡ተጠውር ዐማር ናይ ሐቴ ደውለትመ እብ መጆቡ ልትሀነእ ወሐር ለአቀብል።

አባያም ሀደፎም ደመሮት መጅተመዕ ሰበት ቱ፡እት ተጃረት ናይ ለትፈናተ ሐንገል መጅተመዕ ለልአበውር ሐሺሽ እንዴ ትከሰአው፡ ምስል ሽዑር ወጠን ለአለቦም መትሐላልፈት አዳም ወሐሺሽ እት ልትዋጅሆ ወዕላቃት እት ወዱ፡ ዲብ ድወል ወገባይሉ ለልአጀርወ መደረት ዐባይ ተ። እብ መስኡልየት ለኢልሽዕሮ ረኪሳም መዝብየት ወተሸሽ ሐሺሽ፡ ሸበካት ናይ እለ ኢቃኑንየት በረሾት ዐደድ ለአለበ ሰላዲ ክም ጃቅፍ አክልሕድ ዳልያም ሰበት ቶም፡ ለገብአት ክጡረት እንዴ ነስአው እብ ተቃርብ እግል ልተጅሮ ለወጡኑ አውካድ ሑድ ኢኮን።

ተጃረት ሐሺሽ እብ ቃኑን እዲነ እብ ክቡድ ለትአጃዜ ምንመማ ተ፡ መነዘማት ዐለም እሊ መደምራይ ወለፍ ዲብ ልርእያሁ፡ዲብ ሓረቦቱ ሐ’በት ለአወቅየ ኢህለየ። ኩለን ድወል እሊ ቃኑን እት መዓሉ እግል ለአውዕላሁ ህዬ ጅቡራት ተን። ላኪን እት ሓረቦት ሐሺሽ፡ ምስል ኢልትበገሰ ወከጥዋት ኢነስአ። እት ለትፈናተ ድዋራት ዐለም፡ ሐሺሽ ክም ትጸበጠ እንሰሜዕ ወእንቀርእ እንገብእ። ላኪን እሊ ለትጸበጣዲ ሐን መራቀበት አተ፡ ለእብ ሕብዔ እንዴ ሐልፈ ለኢትጸበጠ ህዬ? እንዴ ትቤ ዶል ተሐስብ ላኪን፡ ለመደረት ኣክረተ ለእኪት ትትረኤከ።እት ኩለን ድወል ህዬ፡ ከም እሎም ሸባብ እብሊ ሐሺሽ ወወለፉ ልትዘመቶ ክም ህለው ኣመሮት ምህም ጋር ገብእ።

በዲር ሑድ አጅናስ ሐሺሽ ቱ አስማዩ እንሰሜዕ ለነበርነ። አዜ ላኪን አስማዩ ወምድረቱ ሰኒ እት በዜሕ መጽእ ለሀለ ተጃረት መሀረባት ጋብእ ሀለ። ገሌሁ ሐሺሽ እብ መጆብ እበር፡ ገሌ እብ ከናይን ወገሌ እብ መጆብ ሐሪጭ እግል ዝቤ ልትዳሌ። ለልትወሐጥ፡ ለልትመጨር፡ ለልትጼኔ፡ ለተንን፡ እብ እብረት ለልትረገዝ ወእብ መጆብ ፌሻይ ለልትሰቴ እንዴ ትበሀለ ህዬ ልትካፈል። ምስለ ድቁብ አጅናስ ሐሺሽ ለኢልትዐለብ ላኪን መደረት ለቡ ክም ማስቲሺ ወበንዚን እብ ጼነዮት ወአትነኖት ለነስኦመ ህለው። እት መዳይን አስመረ፡ ከረን፡ደቀምሐሬ፡ ተሰነይ፡ አቁርደት፡ባርንቶ፡ገሉጅ፡ ወብዕድ ድዋራት ኤረትርየ፡ እሊ ማስቲሺ ወበንዚን እት ጼኑ ለልትረከቦ ሽባን ወሽክል ነኣይሽ ሕዳም ኢኮን።እሊመ ምን አዜሁ እግል ልትከረዕ፡ ሕስር ውቁል እግል ልትሀየቡ ወመጅተመዕነ እግል ለሓርቡ ለወጅቡ ቱ።

ገሌ ምነ ናይ አፍጋኒስታን ሐሺሽ ዶል እንሳሜ፡ ክም ኔርፋክስ፡ ትራማዶል፡ ክሪስታል ናርኮቲክስ፡ ሄሮይን፡ ኮከይን፡ አምፊታሚን፡ ከናይን ሃሉሲኖጀኒክ ወብዕድ ሀለ። እትሊ ወክድ ጎነ፡ተጃረት ወመሀረባት ሐሺሽ እት መክሰብ ማል ወጃቃፉ ሌጠ እንዴ ኢትበጥር፡ ለሰብአ እኪት ወሕብዕት ስያሰት እት ፍዕል እግል ልተርጅሞመ፡ እተ እግል ልድረስ ወለአፍሬ ለቀድር ሸባብ ጃምዓት ዐለም ለወለፍ እንዴ ኣተው፡ ሐን መግዘም ወለፍ ሐሺሽ እግል ልገቡሮም ወጥኖ ህለው።

እሎም እት ተጃረት ሐሺሽ ለክስኣም፡ናይ ማል ወስያሰት መካስብ እግል ልርከቦ፡ እሰልፍ ሽከረት መጅተመዓት ላቶም ሸባብ እሎም ደምሮ። ፖሊስ ዐድነ እት ምድረት ሐሺሽ ድሩስ ለሀይብ ወለትአትፋዜዕ ምንመ ለሀሌ፡ እት ጋብሆቱ ላኪን፡ ሜርሐት ደያናት፡ መደርሲን፡ ዋልዴን፡ ክምሰልሁመ መሓብር ወመአሰሳት ሕኩመት ሕበር እግል ልሽገበ ዲቡ ወጅብ። እብ ፍንቱይ፡ መሕበር ወጠን ሸባብ ወደረሰ፡ እግል ሸባብ ወነኣይሽ ደረሰ ለልአደርስ ወነፌዕ በራምጅ እንዴ ኤተነ እግል ለዐልም ወለአፍህም ወጅብ። እሎም ሸባብ መርበዮም፡ አፍካሮም፡ ፍድብናሆም ወምዩሎም እንዴ ፈረገ፡እብ አክላቅ ሰኒ እት ረብዮም፡ መፍርየት እት በራምጅ ዐማር ለወዴ መሕበር ሸባብ ሰበት ቱ፡እሊ ለሀደግናሁ ሐሺሽ ዲብ ሓረቦትመ ሐዞቱ ውቅል ተ። ምን መአንብታይት ደረጀት አስክ ኩልየት ሸባቡ እግል ልራቅብ ህዬ መስኡልየት ለቡ መሕበር ቱ።

መሕበር አንሳትመ፡ፈዛዐት እማት እንዴ ወቀለ፡እት ረበዮት አጅያል ሳሌሕ ክም ሸቅየ፡ ጀራይም ክም ለሓርበ ወወለፍ ሐሺሽ ክም ጋብሀ ወደ ምን ገብእ፡ እት ዐማር ለትሀሌ እሉ ሐዞት ቀላል ኢትገብእ። መአሰሳት ደያነትመ እብ እንክረን፡ ዲብ ምድረት ሐሺሽ ለረከዘ አትፋዝዖት እት ሸባብ ወመጅተመዕ ምን ወድየ፡ ክሊነ ምስል ለዛህረት እንዴ ኢትመጽአነ ወሀነእናሀ ዐልነ። አባያምነ ምሽብሼበት ምን ረክቦ፡ እብሊ መደምራይ ሐንገል ሸባብ ላቱ ሐሺሽ እግል ለአብዱነ እት ተርሆ ቶም ለልትመየው። ክሱሰን እሊ እት ለሀጎጌ ገይስ ለሀለ ሐሽም ወያኔ፡ እብ ሐሺሽ ለገብሮም ሸባብ ትግራይ ብዝሓም ዐለው ወህለው። ከኢትደገግነ ምን ገብእ፡ ምኖም አስክነ እግል ለሓሉፉ ቀድሮ። እምበልሁመ፡ ለከስሰን ጀሃት ምስል እድንያይ ወናይ መንጠቀት መአሰሳት እንዴ ትሳደየ፡ እግለ እት ተጃረት ወአትዓዳይ ሐሺሽ ለሸቅየ ምጅርማት ሸበካት ለከስስ ሐብሬታት እንዴ ጀምዐየ፡ እት መራቀበትለ ሸበከት ለከድሞ አንፋረን ምን ለአደርሰ ሰርገል ወትረከበ። ሰበቡ በቃዐት ክም ረክበው፡ እት መራቀበትለ ለአቴ ሐሺሽ ወሸበከት አትሐላላፉ ወቀይ ሰኒ ለአገዱ።እብ መጆቡ ህዬ መንገፎ ሸባብነ ተሀሌ ወደውለትነ ትሰኔ ወትትዐመር። እት ሓብዖትለ ሐሺሽ እለ ሸበከት ትጃረት ሐሺሽ ለትትነፈዕ እቡ አብሳር ሰኒ ረቂቅ ወቄሻይ ሰበት ቱ፡ ምን ቀዳምከ መትደጋግ ለአትሐዜ። በዲር እት ገሮብ ኣደሚ እተ ኢልትፈተሽ ቀርዋቱ ወሃባጡ፡ወእት ከብዱ እንዴ ትወሐጠ ለሐልፍ ለዐለ ሐሺሽ፡እትሊ ወክድ ጎነ ህዬ እት ከረ ክያር፡ብርጪቅ፡አስወድ፡ድባ ወብዕድ ፍሬታት ወሐምሌ እንዴ ሐብዐው ቶም ለሓሉፉ ለህለው።

ሰበት እሊ፡ለሓብዖት ወአብሳር ሓላፍ ሐሺሽ እት ልጠወር መጽእ ሰበት ሀለ፡እንታመ መጦሩ መዳፍዐትከ እንዴ አደቀብከ፡ ለአብሳር ምን ጽባብሑ ምን አቅሩዱ ትናጭቡ። አግቡይ አትሐላላፍ ሐሺሽ ህዬ እብ ዋጅብ እት ስታት አትፋዝዖት እንዴ አተ፡ኩሉ መጅተመዕ ክም ለአምሩ እግል ልግበእ ወወሳእል እዕላም እግል ልተረድ ዲቡ ለቡ ጋር ቱ።ሰበቡ ፈዛዐት ገቢል፡መዐውታይት በራምጅ ዐማር ወሄራሩ ሰበት ገብአት።