Wp/tig/ሐሊብ እንሰ

ሐሊብ እንሰ

እት ጽሙእ ወባዶብ ላቱ ድዋራት እዲነ ለነብር ገቢል ለበዝሐት ሐያቱ ምስል ርዕዮ ንዋይ ወእብ ፍንቱይ ህዬ ምስል ርዕዮ እንሰ ለትጻበጠት ተ፣

እት ምድር ዐረብ ወድዋራት አፍሪቀ እብ በደውዪን ለልትአመሮ ሰብ እንሰ መንበረቶም እት እንሳሆም ለተንከበት ሰበት ተ፡ ለበዝሐ ወክድ ሐሊብ እንሳሆም

እት ልትመወኖ ነብሮ፣ እብሊ ህዬ፡ምነ ብዕዳም ምጅተምዓት መንፈዐት ሐሊብ እንሳሆም ለልአትዳውሮ ሰልፋያም ጋብኣም ልትረከቦ፣ ሐሊብ እንሰ ምን ዘበን ቅዱም እንዴ አንበተ ምነ ብዕድ ሐላይብ ለሔሰ ሐሊብ ወስራይ ለትፈናተ አምራድ ገብእ ክም ዐለ ምን አብዕቦታትነ ለጸንሔነ አድጋማት ለሐብረነ፣

እትሊ አያም ቅሩብ እበ ገብአ በሐስ ህዬ፡ሐሊብ እንሰ እብ ገበይ ዕልምየት እንዴ ትረአ መንፈዐቱ እግል ሳረዮት ሕሙማም ወዓፍየት ገሮብ ምህም እት እንቱ ሰበት ትረከበ፡ እብ ገበይ ዕልንት እት አሮበ እግል ልትዘቤ ልትከደም እግሉ ህለ፣ እት ጀርመንቱ፣መንፈዐት ሐሊብ እንሰ እት ወግም እንዴ ኣቴት ሐቴ እግል ርዕዮ ንዋይ ለትከሰሰት ሸሪከት ሐርስ ወርዕዮ እት ቀሪም ገርሀተ እንሰ እግል ተአንስስ ወፈርያተ እት ዐዳጋታትለ ዐድ እግል ትክረዩ ሰበት ሰተተት፡ እት አፍረዮተ ክስእት ትትረከብ፣ እለ እት ውላየት ሳክሶንያ

ለትትረከብ መዝርዐት፡ ቀደም እለ እት አፍረዮት ወረበዮት አፍሩስ ብግስት ምንመ ዐለት፡ አዜ ላኪን መናፍዕ እንሰ ዝያድለ ትሸግብ እቱ ለጸንሐት እንሱስ እት እንተ ሰበት ረክበተ፡ ሒለተ እት አፍረዮት እንሰ ድ’ልት ህሌት፣ ክምሰለ ዔማት አክባር ጀርመን ለሐበረቱ፡ ለመዝረዐት ምን መትነፍዐት ሐሊብ እንሰ ብዞሕ ከብቴ ሰበት ረክበት፡ እሊ ሽቅል

እሊ እብ ክለ ሒለተ ትከድም እቱ ክም ህሌት አፍሀመት፣ ሐሊብ እንሰ እግለ እልትሃባት ገኖበት (ሐሳስየት ገኖበት )ለቦም አንፋር እት ሳረዮት ዶር ሰኒ ለቡ እት እንቱ ሰበት ትረከበ፡ዝያድ ብዕድ ፈርያት ሐሊብ ሕሩይ ህለ፣ እት አሮበ አስክ እለ ዝቤሁ እሙር ለኢጸንሐ ሐሊብ እንሰ እት ሆለንደ ምን ጀረበ ወሐር እንዴ ትዳለ እት አስዋግ ክም ትከ’ረ ወእብ ዐውል ቃሊ ልትሻቶፉ ክም ህለውመ ትወደሐ፣ እሊ እብ ቫይተሚናት ወፕሮቲን ታጅር ላቱ ሐሊብ እግል ለገብአት ሐሳስየት ገኖበት ለቡ ለናስብመ ክም ኢኮን ኣመሮት ለአትሐዜ፣ እበ አስክ እለ ገብአ በሐስ፡20%

ሐሳስየት ገኖበት ለቦም አንፋር ምን ስታይ ሐሊብ ሐ ጸብጦም ለዐለ ክም ቱ እት ልትአከድ፡ እብ እንሳመ አክሉ እግል ልትጸበጥ በክት ክም ቡ አሸረው፣