Wp/tig/ህድግ

ጽበጥ እሊ ህድግ ሚቱ፧?

አብ ዐሊ ዐቤ÷ ዕያሉ ሰበት ቤተ ዲቡ እት ገመሉ ዕጨይ ሕዮ እንዴ ጸዕነ እት ሱግ እግል ለአዝብዩ ወሐሬ እበ ተመኑ ረቤብዓት እክል እግል ለአትርብ እንዴ ቤለ አስክ ከረን ትበገሰ። ምናተ ዐሊ ወልዱ ወእሲት ወልዱ። ለዐለት ፈርሀት ዲብ ሕሳብ እንዴ ኣተው እግል ልክርዕው ምንመ ወጠነው። ጎማቱ እንዴ በትከ አስክላ ኣ’ማ ለዐለ ከረን ትወከለ

አብ-ዐሊ ዐቤ ዐዱ እብ ተረቡ እግል ልእቴ ዲብ አተቃባል ገበዩ ገብአ፣ ህቱ ላኪን ሐቆ እለ ፈጅር እለ ገመሉ ወኖሱ እለ ኬደ ይአተበለ፣ ማይት እት እንቱ ልግበእ ወሕያይ ረቢ አርኤኒ ለልብልመ ኢትረከበ፣ ዐዱ ምን ሳዐት ዲብ ሳዐት። ምን ምዕል እት ምዕል። ምን ሳምን እት ሳምን። ወምን ወርሕ ዲብ ወርሕ ምንማ ሰአው ወትጸበረው። ሰአየቶም ሰአየት ው’ላድ መካን ገብአት፣ ዐሊ ወልዱ። ለጣንሽ ዕንታታ እሙ ወዓፌት እሲቱ ምድር አክለ መሰ ወጸበሓከ እብ ትዕስ ስጋ ሕድ ትገርተረው፣ ሰበብ መጋይሱ ለሀይከ ዲብ ለሀይሐዘዩ፣ ምንማ አተናተነው ወሐዘው። አብ-ዐሊ ላተ ጢኑ ትሰተረ፣ ዲብ ዝሮን። ብሬከንትየ። ሐመልማሎ። ገብሲ ወዲብ ደበት ሱጥር ወጸባብ ለዐለ ዴሽ አቶብየ እብ ሕርዳት አብርየእ ሔልፈት ገበይ። እሙር ሕጉግ ዐለ፣ ዕውድ-ዋድ አመቃርብ ለቀትለው ነፈር ህዬኒ። ለግርጉር አከሪት ምድር ቤት ጁክ ወብሌን ግ’መቱ ሌጠ ለአተጽቤሕ ምኑ። ወልዱ ዐሊ ሰረት እሳት ዲብ ከብዱ እንዴ ተዐቀረት እሉ። ከብድ ሳክባም ተርሀ፣ ወለት ሑሁ ላሊ ወአምዕል እብ ትዕስ። ስጋ ብእሰ ዐሊ መጭረት ወገልገለት ሌጠ፣ ለዕድር። ድብር ወእብር ምን ሕድ ልትናዮለ ለዐለ እም-ዐሊ እሲት ዐቤመ ምን ዐሊ ወዓፌት አኬት፣ ‘’እንዴ ክርም ትክረመኒ አናዲ። ዕያል ሰፍረ። አትርብ እግልነ እቤሉ ከዲብ አፍ ሃይሞት ከሬክዉ። እንዴ አናዲ ከረስ እብለዕ! ምን ግም - እት ግም (2ይክፋል) ለፈጅርለ በገሱ ለህግያ ዓፌት እንዴ ሰምዐነ። ረቢ እንዴ ወደየ ያሬት ድኩላሙ ወዐልነ። ለምዕል ለሀ ሚ ጸብጠተነ ገብሸ? ኢዓፌት ፈጅርለ በገስ አብ ገብሸ እደይና ሚ ኣስረቶ ወአፈችና ሚ ላግመቶ? አና ወለት አቡዬቱ። እብ ትዕስ ለኢፈጉረ አምዕል ጸላም ጸብጠተነ ኢኮን የሀው? አብ ገብሸ ሐሊባይ ዕንታትነ እንዴ ልርኤ ወእዘንና እንዴ ሰምዕ ምን ገበይ ሞት ለጻብጡ ኢረክበ ኢኮን? ለከርዑ ሐግለ። ህግየ ዓፌት ህግየ እሲት ገብአት ከትቀበበት፣ ህግየ ገብሸ ህግያ ንኡሽ ገብአት። ወአና ለሻይበት ክም ጋናሁ ሽባቡ ገብአኮ እንዴ ብዙሕ ኢእብለዕ በሎ።?” ትብል ወአርወሐተ ትመጭር፣ ከረን ጊሰት ወእቅባለት ገበይ አርባዕ አምዕል ምንማተ። አብ ዐሊ ዐቤ ላተ ሐቆለ ፈጅር ለምን ዐዱ አግወሐያተ አካን እገሌ ኬዳ እንዴ ኢልትበሀል። ምንለዐል ክልኤ ሳምን ክምሰል ሓለፈ። ለገሜላዩ ድርሆይ ሕሳሉ እንዴ ባተከ እብ ሑየቲቱ ዲብለ ዐድ ዔረ፣ ግድም ዐዱ ለከብድ ስፍሪት እግል ለአጽግብ ወትንፋስ እግል ለአተክሬ እግል ለአትርብ እሎም አስክ ከረን ለሳርሐው ዐቤ። ሀድፍለ ጃእራም መቃጭፈት ክምሰል ገብአ እት ሸክ ኢገአው፣ ምናተ እግል ኢልጽበሮ ኖሶም ኢቀብረው ወቀበርኮ ለልብል አዳም ኢረክበው፣ ዐሊ አርወሐቱ እብ ትዕስ ዲብ ምድር እግል ልሽረበ ወይአበ፣ ሐሩቀት ወትርሃን ካፈለ፣ እግል ሓዚ ረአስ ወከበር አቡሁ አሬመ ወአቅረበ፣ ምናተ ህቱመ አቡሁ ለረክበት እግል ኢትርከቦ ኬርዐቱ በዝሐው፣ ሐቆ መደት ሰለስ ወረሕ ደአም፡ ‘’እተ ምፍጋር ጃርዲን መከላሲ ዲብ ደበት ሱጥር አልዐስር አመቅረብ ተልያ ምን ቃብል እናስ ዐቢ እብ ገመሉ ዕጨይ ጽዕን። አመት አለቡ ለጀሀት ባብ ጀንገሬን ፍርት ውዕለት ለዐለት ከመንዶስ እንዴ ተዐይር ተሃደፈቱ፣ እት ቀደምዬ እበ ዲብ እዴሁ ለዐለ ፋሱ ቀትለው፣ አነ ህዬ። እሰልፍ ሰበት ረኤክዎም ዲብ ቀጬተት እብ ቃንጪሀ ዐረግኮ ከተሐበዕኮ ምኖም፣ ወህቱ እንዴ ቀትለው ዲበ ገመሉ ከትረዎ ከእንዴ ልስሑቦ አስክ መዐስከር ጸባብ ሐልፈውኒቡ” ለልብል ከበር ሰበት ትረከበ። ዐሊ አውድ አቡሁ ወደ፣ ላኪን በልዐ ወትበልዐ፣ እንዴ ሰቴ ጸምእ።