Wp/tdd/ᥓᥝᥲ ᥘᥣᥒᥰ ᥛᥩᥢᥰ ᥘᥣᥳ
ᥛᥫ ᥙᥨᥢᥳ ᥛᥣᥰ ᥛᥩᥐ ᥞᥥᥒᥴ ᥙᥤ ᥘᥢᥳ “ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ” ᥚᥩᥒᥰ ᥒᥛᥰ “ᥛᥫᥒᥰ ᥛᥣᥝᥰ ᥘᥨᥒᥴ ” ᥕᥝᥳ။ ᥘᥧᥐ ᥕᥤᥒᥰ ᥗᥣᥳ ᥛᥨᥒᥴ ᥓᥥ ᥘᥣᥢᥳ “ᥘᥣᥒᥰ ᥕᥥᥲ ᥑᥩᥒᥱ ” ᥙᥥᥢ ᥘᥣᥒᥰ ᥖᥪᥰ ᥓᥧᥛᥲ ᥕᥝᥳ။ ᥙᥤ 1029 ᥝᥢᥰ ᥘᥫᥒ ᥑᥫᥒ ᥔᥫᥐᥱ ᥘᥬᥰ ᥞᥣᥒᥲ ᥞᥨᥝᥴ ᥖᥒᥰ ᥘᥣᥭᥴ ᥛᥣᥙ ᥞᥫ၊ ᥖᥨᥒᥳ ᥑᥩᥢᥰ ᥐᥣᥱ ᥔᥥᥒᥲ ᥕᥝᥳ။ ᥝᥢᥰ ᥘᥣᥐᥱ ᥘᥣᥭᥰ ᥘᥨᥒᥴ ᥘᥣᥒᥴ ᥘᥢᥳ “ᥘᥣᥒᥰ ᥕᥥᥲ ᥑᥩᥒᥱ ” ᥐᥫᥖᥱ ᥘᥧᥐ ᥚᥣᥴ ᥚᥥᥴ ᥕᥤᥒᥰ ᥘᥦᥲ ᥓᥣᥭᥰ ᥛᥣᥰ ᥕᥝᥳ။ ᥕᥤᥒᥰ ᥙᥥᥢ ᥙᥤ။ ᥐᥫᥖᥱ ᥝᥢᥰ ᥘᥣᥐᥱ ᥘᥣᥭᥰ ᥘᥢᥳ ᥘᥦᥲ ᥖᥣᥒᥱ ᥓᥪ “ᥓᥝᥲ ᥛᥫᥒᥰ ᥘᥣᥐᥱ ” ᥘᥭᥴ ᥔᥥᥴ ᥝᥣᥭᥰ ᥘᥪᥢᥰ ᥛᥣᥰ ᥙᥥᥢ “ᥓᥝᥲ ᥛᥩᥢᥰ ᥘᥣᥳ၊ ᥓᥝᥲ ᥛᥩᥢᥰ ᥘᥣᥳ ” ᥘᥭᥴ ᥐᥣᥱ ᥕᥝᥳ။ ᥓᥣᥭᥰ ᥙᥥᥢ ᥘᥩᥒᥳ။ ᥔᥬᥱ ᥓᥪ “ᥑᥧᥢᥴ ᥐᥨᥝᥱ ᥘᥣᥒᥰ ” ᥔᥥᥴ ᥙᥥᥢ ᥘᥨᥝᥱ ᥔᥦᥒᥴ ᥖᥪᥢᥰ ᥑᥛᥰ ᥛᥣᥢᥲ ᥛᥫᥒᥰ ᥘᥦᥲ “ᥓᥝᥲ ᥘᥨᥝᥱ ᥛᥫᥒᥰ ” ᥘᥭᥴ ᥐᥩᥲ ᥞᥩᥒᥳ ᥕᥝᥳ။ ᥙᥤ 1057 ᥘᥢᥳ “ᥟᥣᥳ ᥘᥨᥝᥱ ᥘᥣᥳ ᥗᥣᥱ ” ᥑᥧᥢᥴ ᥞᥨᥝᥴ ᥑᥛᥰ “ᥛᥫᥒᥰ ᥙᥧᥳ ᥐᥛᥱ ” ᥟᥣᥢᥰ ᥛᥫᥰ ᥝᥭ ᥒᥣᥰ ᥔᥦᥒᥴ ᥑᥛᥰ ᥚᥣᥰ ᥘᥣᥰ ᥖᥤ ᥝᥥᥒᥰ “ᥖᥣᥱ ᥘᥤᥰ ”(Tail) ᥟᥢ ᥙᥥᥢ ᥒᥝᥲ ᥒᥧᥢᥰ ᥛᥫᥒᥰ “ᥘᥣᥢᥳ ᥓᥝᥲ ” (ᥐᥢᥱ ᥗᥣᥱ ᥘᥣᥳ ᥘᥤᥖᥳ )ᥘᥦᥲ ᥟᥩᥢ ᥘᥧᥛᥰ ᥘᥣᥒᥰ ᥔᥥᥴ ᥛᥫᥰ ᥗᥪᥒᥴ ᥛᥫᥒᥰ ᥛᥣᥝᥰ ᥘᥨᥒᥴ ᥕᥧᥱ ᥕᥝᥳ။ ᥛᥫᥒᥰ ᥙᥧᥳ ᥐᥛᥱ ᥘᥢᥳ ᥛᥣᥢ ᥝᥣ “ᥙᥣᥳ ᥐᥣᥢᥱ ᥙᥤᥱ ”(ပုဂံပြည် )ᥘᥭᥴ ᥔᥥᥴ ᥛᥤᥰ ᥝᥭᥳ ᥘᥣᥲ ᥚᥣᥐᥱ ᥖᥬᥲ ᥛᥫᥒᥰ ᥛᥣᥝᥰ ᥕᥝᥳ။ ᥖᥣᥱ ᥘᥤᥱ ᥔᥛᥳ ᥛᥤᥰ ᥚᥣᥐᥱ ᥘᥫᥴ ᥛᥫᥒᥰ ᥛᥣᥝᥰ ᥘᥦᥲ ᥛᥫᥒᥰ ᥛᥣᥝᥰ ᥛᥤᥰ ᥝᥭᥳ ᥐᥥ ᥐᥣᥒ ᥔᥩᥒᥴ ᥛᥫᥒᥰ ᥘᥢᥳ ᥕᥝᥳ။
ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥘᥦᥲ ᥒᥣᥰ ᥔᥦᥒᥴ ᥚᥣᥰ ᥘᥣᥰ
ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥐᥪᥖᥴ ᥘᥫᥲ “ᥝᥥᥒᥰ ᥛᥨᥢᥰ ” ᥘᥬᥰ ᥗᥧᥒᥳ ᥛᥫᥒᥰ ᥛᥣᥝᥰ ᥕᥝᥳ ᥞᥦᥢᥰ ᥟᥝ ᥑᥨᥝᥰ ᥑᥩᥒᥴ ᥐᥧ ᥕᥫᥒ ᥞᥣᥭᥰ ᥓᥧᥰ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥔᥥᥴ ᥕᥩᥢᥰ ᥞᥬᥲ ᥙᥩᥭᥱ ᥐᥨᥢᥰ ᥓᥩᥭ ᥔᥨᥒᥱ ᥖᥣᥒᥰ ᥗᥪᥒᥴ “ᥖᥣᥱ ᥘᥤᥰ ” ᥘᥭᥴ ᥕᥝᥳ။ ᥖᥤ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥐᥪᥖᥴ ᥘᥪᥲ ᥘᥢᥳ ᥞᥩᥒᥳ “ᥛᥣᥢᥲ ᥙᥧᥳ ᥐᥛᥱ ”ᥔᥥᥴ ᥛᥤᥰ ᥝᥭᥳ ᥕᥧᥱ ᥗᥪᥒᥴ ᥕᥣᥛᥰ ᥘᥥᥝ ᥕᥝᥳ။ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥞᥬᥲ ᥐᥨᥢᥰ (10) ᥐᥨᥝᥳ ᥘᥣᥛᥰ ᥖᥣᥒᥰ ᥔᥨᥒᥱ ᥗᥪᥒᥴ ᥝᥥᥒᥰ ᥖᥣᥱ ᥘᥤᥰ။ ᥑᥧᥢᥴ ᥞᥨᥝᥴ ᥑᥛᥰ ᥖᥣᥱ ᥘᥤᥰ ᥟᥛᥱ ᥞᥙᥳ ᥖᥩᥢᥲ ᥐᥨᥢᥰ ᥙᥧᥳ ᥐᥛᥱ။ ᥟᥛᥱ ᥙᥢ ᥑᥝᥴ ᥑᥝᥲ ᥝᥥᥒᥰ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥙᥩᥭᥱ ᥚᥩᥒᥰ ᥑᥥᥝᥴ ᥑᥝᥲ ᥐᥙᥴ ᥔᥪᥙᥱ ᥖᥣᥢᥱ ᥞᥪᥴ ᥐᥩᥲ ᥟᥛᥱ ᥙᥢ ᥑᥝᥲ ᥛᥫᥒᥰ ᥘᥣᥰ ᥘᥣᥰ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥙᥩᥭᥱ ᥚᥧᥱ ᥘᥤ ᥐᥨᥢᥰ ᥛᥣᥢᥱ ᥙᥣᥰ ᥟᥝ ᥑᥨᥝᥰ ᥑᥩᥒᥴ၊ ᥚᥣᥢᥱ ᥖᥣᥱ၊ ᥞᥭᥴ ᥒᥪᥢᥰ၊ ᥞᥭᥴ ᥑᥛᥰ၊ ᥛᥨᥝᥲ ᥒᥪᥢᥰ၊ ᥛᥨᥝᥲ ᥑᥛᥰ ᥑᥝᥲ ᥞᥣᥭᥰ ᥐᥩᥲ ᥖᥣᥱ ᥖᥥᥴ ᥙᥢ ᥞᥬᥲ ᥑᥝᥲ ᥝᥭ ᥒᥣᥰ ᥔᥦᥒᥴ ᥚᥣᥰ ᥘᥣᥰ ᥖᥥᥳ ᥑᥧᥢᥴ ᥖᥣᥱ ᥘᥤᥰ ᥟᥛᥱ ᥚᥩᥛᥳ။ ᥟᥝ ᥚᥣᥰ ᥘᥣᥰ ᥑᥥᥝᥴ ᥟᥩᥢᥱ ᥔᥧᥱ ᥘᥫᥒ ᥚᥣᥐᥱ ᥖᥩᥢᥲ ᥑᥪᥢᥰ ᥐᥩᥭᥰ ᥕᥝᥳ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥐᥩᥲ ᥐᥣ ᥘᥭᥲ ᥞᥣᥢᥳ ᥓᥬ ᥔᥥᥴ ᥘᥨᥒᥰ ᥛᥫᥰ ᥑᥪᥢᥰ ᥕᥧᥱ ᥕᥝᥳ။ ᥓᥝᥲ ᥛᥩᥢᥰ ᥘᥣᥳ ᥖᥥᥱ ᥘᥣᥲ ᥞᥫᥢᥰ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥘᥨᥒᥰ ᥗᥪᥒᥴ “ᥝᥥᥒᥰ ᥛᥨᥢᥰ ”ᥑᥪᥢᥰ ᥕᥝᥳ ᥑᥝᥲ ᥓᥧᥰ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ။ ᥕᥩᥢᥰ ᥞᥥᥖᥱ ᥙᥩᥭᥰ ᥚᥣᥰ ᥘᥣᥰ။ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥚᥩᥛᥳ ᥓᥩᥛᥰ ᥔᥥᥴ ᥛᥩᥐᥱ ᥙᥣᥒᥰ ᥑᥣᥲ ᥛᥣᥢᥲ ᥐᥨᥢᥰ ᥛᥫᥒᥰ ᥞᥨᥛ ᥞᥩᥛᥰ ᥘᥧᥱ ᥖᥣᥢᥰ ᥓᥩᥛᥰ ᥘᥦᥲ ᥞᥥᥖᥱ ᥙᥩᥭᥰ ᥚᥣᥰ ᥘᥣᥰ ᥞᥪᥒᥴ ᥓᥥᥖᥱ ᥝᥢᥰ ᥓᥥᥖᥱ ᥑᥪᥢᥰ။ ᥖᥤ ᥙᥩᥭᥰ ᥚᥣᥰ ᥘᥣᥰ ᥘᥢᥳ “ᥟᥣᥳ ᥘᥨᥝᥱ ᥘᥣᥳ ᥗᥣᥱ ” ᥞᥢᥴ ᥓᥝᥲ ᥛᥩᥢᥰ ᥘᥣᥳ ᥔᥥᥴ ᥑᥬᥲ ᥐᥨᥙᥳ ᥐᥧ ᥐᥪᥐᥱ ᥕᥧᥱ ᥕᥝᥳ။ ᥙᥣᥢ ᥘᥢᥳ ᥙᥧᥳ ᥐᥛᥱ ᥙᥭᥱ ᥛᥨᥝᥴ ᥞᥥᥖᥱ ᥘᥣᥰ။ ᥛᥫ ᥑᥪᥢᥲ ᥛᥫᥰ ᥓᥩᥛᥰ ᥖᥣᥒᥰ ᥘᥬᥰ ᥛᥫᥒᥰ ᥖᥭᥰ ᥘᥢᥳ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥞᥢᥴ ᥖᥦᥢᥲ၊ ᥚᥣᥭᥴ၊ ᥘᥣᥰ ᥛᥤᥰ ᥐᥧ ᥖᥤ ᥘᥦᥲ ᥛᥢᥰ ᥓᥝᥲ ᥑᥩᥭᥴ ᥖᥭᥰ ᥖᥥᥳ ᥖᥥᥳ။ ᥑᥬᥲ ᥘᥭᥲ ᥐᥨᥢᥰ ᥛᥫᥰ ᥐᥨᥝᥱ ᥔᥣᥒᥲ ᥔᥩᥢᥴ ᥙᥢ ᥛᥫᥒᥰ ᥛᥢᥰ။ ᥙᥫᥒ ᥘᥫᥒ ᥐᥩᥲ ᥘᥭᥲ ᥞᥢᥴ ᥞᥦᥒᥰ ᥖᥭᥰ ᥑᥫᥒᥱ ᥑᥛᥳ ᥘᥦᥲ ᥑᥬᥲ ᥙᥥᥢ ᥟᥨᥭᥰ ᥘᥤ ᥖᥭᥰ ᥔᥥᥴ ᥓᥒᥱ ᥑᥬᥲ ᥐᥨᥙᥳ ᥐᥧ ᥐᥪᥐᥱ ᥓᥝᥲ ᥛᥩᥢᥰ ᥘᥣᥳ ᥕᥝᥳ။ ᥝᥣᥭᥰ ᥙᥩᥭᥰ ᥚᥣᥰ ᥘᥣᥰ ᥕᥝᥳ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥞᥦᥢᥰ ᥟᥝ ᥑᥨᥝᥰ ᥑᥩᥒᥴ ᥚᥣᥢᥱ ᥖᥣᥱ ᥛᥩᥐᥱ ᥕᥣᥲ ᥒᥪᥢᥰ၊ ᥛᥩᥐᥱ ᥕᥣᥲ ᥑᥛᥰ၊ ᥞᥛᥰ ᥙᥧᥰ၊ ᥞᥛᥰ ᥚᥥᥰ ᥑᥝᥲ ᥓᥧᥰ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥔᥥᥴ ᥖᥣᥒᥱ ᥕᥩᥢᥰ ᥐᥨᥙᥳ ᥐᥧ ᥐᥪᥐᥱ ᥓᥝᥲ ᥛᥩᥢᥰ ᥘᥣᥳ ᥕᥧᥱ ᥕᥝᥳ။ ᥓᥝᥲ ᥛᥩᥢᥰ ᥘᥣᥳ ᥙᥥᥢ ᥘᥣᥒᥰ ᥕᥤᥒᥰ ᥕᥧᥛᥱ ᥕᥛ ᥚᥣᥰ ᥘᥣᥰ၊ ᥖᥣᥰ ᥘᥣᥰ။ ᥟᥣᥱ ᥕᥧᥳ ᥗᥪᥒᥴ (28)ᥙᥤ ᥕᥝᥳ ᥔᥥᥴ ᥖᥣᥳ ᥟᥛᥱ ᥖᥩᥢᥳ ᥝᥨᥢᥳ ᥘᥩᥒ ᥖᥥᥴ ᥖᥥᥱ ᥘᥣᥲ ᥞᥫᥢᥰ ᥔᥥᥴ ᥙᥩᥐ။ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥕᥣᥛᥲ ᥞᥬᥲ ᥐᥨᥙᥳ ᥐᥧ ᥐᥪᥐᥱ “ᥓᥝᥲ ᥙᥫᥒᥱ ᥜᥣᥳ ”ᥐᥩᥲ ᥛᥢᥰ ᥘᥣᥒᥰ ᥟᥛᥱ ᥚᥩᥛᥳ ᥛᥣᥰ။ ᥖᥥᥴ ᥘᥭᥲ ᥐᥨᥙᥳ ᥐᥧ ᥐᥪᥐᥱ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥔᥥᥴ ᥛᥫᥰ ᥓᥩᥛᥰ ᥖᥣᥒᥱ ᥛᥣᥢᥲ ᥖᥣᥒᥱ ᥛᥫᥒᥰ ᥘᥭᥴ ᥘᥢᥳ ᥛᥢᥰ ᥘᥣᥒᥰ ᥑᥦᥢᥰ ᥟᥛᥱ ᥚᥩᥛᥳ ᥞᥙᥳ ᥘᥭᥲ ᥕᥝᥳ။ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥝᥨᥢᥳ ᥔᥩᥢᥱ ᥙᥧᥢ ᥙᥣᥒ ᥐᥣᥢ ᥛᥣᥢᥲ ᥛᥫᥒᥰ။ ᥟᥣᥢᥰ ᥞᥬᥲ ᥟᥧ ᥛᥨᥢ ᥛᥫᥒᥰ ᥛᥣᥝᥰ ᥞᥨᥛᥱ ᥒᥛᥰ ᥗᥪᥒᥴ ᥛᥫᥒᥰ ᥚᥣᥐᥱ ᥖᥬᥲ ᥘᥦᥲ ᥑᥬᥲ ᥞᥬᥲ ᥓᥝᥲ ᥛᥩᥢᥰ ᥘᥣᥳ ᥐᥨᥙᥳ ᥐᥧ ᥐᥪᥐᥱ ᥟᥣᥳ ᥘᥨᥝᥱ ᥘᥣᥳ ᥗᥣᥱ။ ᥛᥫ ᥟᥢ ᥕᥩᥢᥰ ᥘᥣᥒᥰ ᥗᥪᥒᥴ ᥔᥣᥛᥴ ᥙᥩᥐ ᥕᥝᥳ ᥘᥢᥳ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥖᥨᥐᥱ ᥘᥨᥒᥰ ᥚᥩᥛᥳ ᥓᥩᥛᥰ ᥘᥦᥲ ᥓᥝᥲ ᥛᥩᥢᥰ ᥘᥣᥳ ᥐᥩᥲ ᥐᥣ ᥘᥭᥲ ᥐᥨᥙᥳ ᥐᥧ ᥔᥥᥴ ᥛᥫᥰ ᥓᥩᥛᥰ ᥙᥧᥳ ᥐᥛᥱ ᥕᥧᥱ ᥕᥝᥳ။ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥚᥥᥴ ᥝᥣᥐ ᥙᥢ ᥑᥫᥒ ᥓᥬᥳ ᥐᥧ ᥙᥫᥒ၊ ᥓᥣᥒ ᥐᥧ ᥓᥫᥰ၊ ᥛᥨᥝᥴ ᥐᥧ ᥕᥫᥒ၊ ᥐᥨᥢᥰ ᥐᥧ ᥗᥣᥢᥳ၊ ᥓᥫᥒᥳ ᥘᥦᥲ ᥑᥣᥲ ᥛᥣᥢᥲ ᥐᥨᥢᥰ ᥛᥫᥒᥰ ᥛᥫᥰ ᥓᥩᥛᥰ ᥓᥝᥲ ᥛᥩᥢᥰ ᥘᥣᥳ။ ᥑᥝᥴ ᥓᥫᥰ ᥘᥢᥳ ᥛᥫᥰ ᥖᥒᥲ ᥝᥥᥒᥰ ᥛᥬᥱ ᥔᥬᥱ ᥓᥪ ᥝᥣ “ᥛᥫᥒᥰ ᥛᥣᥝᥰ ”ᥔᥥᥴ ᥕᥧᥱ ᥔᥝᥰ ᥝᥭᥳ။ ᥟᥩᥢ ᥐᥢ ᥐᥨᥝᥱ ᥚᥣᥭᥴ ᥞᥥᥖᥱ ᥘᥣᥰ။ ᥖᥤ ᥟᥢ ᥘᥭᥲ ᥟᥝ ᥞᥤᥢᥴ ᥟᥝ ᥔᥣᥭᥰ ᥐᥨᥝᥱ ᥞᥥᥖᥱ ᥚᥣᥭᥴ ᥘᥢᥳ ᥔᥬᥱ ᥓᥪ ᥝᥣ “ᥚᥣᥭᥴ ᥞᥤᥢᥴ ”ᥘᥦᥲ ᥛᥣᥢ ᥞᥩᥒᥳ “ᥓᥩᥐᥳ ᥔᥥᥱ ”ᥔᥥᥴ ᥛᥤᥰ ᥕᥧᥱ ᥗᥪᥒᥴ ᥕᥣᥛᥰ ᥘᥥᥝ ᥕᥝᥳ။ ᥛᥥᥰ ᥘᥣᥒᥰ ᥟᥣᥳ ᥘᥨᥝᥱ ᥘᥣᥳ ᥗᥣᥱ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥛᥤᥰ ᥛᥥᥰ ᥘᥣᥒᥰ ᥟᥢ ᥐᥪᥐᥱ ᥙᥪᥢᥰ ᥔᥤᥱ ᥐᥨᥝᥳ။ ᥔᥤᥱ ᥘᥤᥳ ᥛᥣᥱ ᥘᥣᥱ၊ ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ၊ ᥛᥣᥳ ᥘᥤᥳ ᥓᥢᥱ ᥖᥣᥱ၊ ᥓᥝᥲ ᥛᥩᥢᥰ ᥘᥣᥳ ᥘᥭᥴ ᥕᥝᥳ။ ᥔᥤᥱ ᥘᥤᥳ ᥛᥣᥱ ᥘᥣᥱ ᥟᥛᥱ ᥓᥬ ᥑᥫᥰ ᥑᥧᥢᥴ။ ᥟᥣ ᥘᥨᥝᥱ ᥘᥣᥳ ᥗᥣᥱ ᥟᥝ ᥝᥭᥳ ᥓᥥᥛ ᥛᥫ ᥙᥭᥱ ᥑᥪᥢᥲ ᥙᥥᥢ ᥑᥧᥢᥴ ᥔᥥᥴ ᥞᥨᥛ ᥐᥢ ᥛᥤᥰ ᥝᥭᥳ ᥘᥧᥐ ᥓᥣᥭᥰ “ᥓᥝᥲ ᥘᥧᥰ ”(စောလူး ) ᥘᥭᥴ ᥘᥢᥳ ᥐᥨᥝᥳ ᥘᥫᥒ။ “ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ ” ᥙᥥᥢ ᥘᥧᥐ ᥕᥤᥒᥰ ᥑᥧᥢᥴ ᥛᥫᥒᥰ “ᥝᥥᥱ ᥔᥣᥱ ᥘᥤᥱ ”။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥙᥥᥢ ᥑᥧᥢᥴ ᥛᥣᥰ ᥕᥝᥳ ᥖᥣᥱ ᥟᥩᥐᥱ ᥘᥣᥲ ᥟᥩᥐᥱ ᥖᥣ ᥘᥬᥰ ᥐᥥ ᥑᥧᥢᥴ ᥛᥫᥒᥰ ᥘᥒᥱ ᥐᥢ ᥘᥢᥳ ᥑᥬᥲ ᥘᥭᥲ ᥛᥥᥰ ᥘᥣᥒᥰ ᥑᥫᥰ ᥑᥧᥢᥴ ᥘᥦᥲ ᥞᥬᥲ ᥚᥩᥒᥰ ᥛᥫᥒᥰ ᥛᥢᥰ ᥐᥣᥱ ᥞᥣᥴ။ ᥚᥩᥒᥰ ᥛᥫᥒᥰ ᥗᥪᥒᥴ ᥐᥣᥱ ᥛᥫᥒᥰ ᥝᥥᥱ ᥔᥣᥱ ᥘᥤᥱ။ ᥑᥝᥲ ᥞᥥᥖᥱ ᥟᥫᥭᥰ ᥘᥤ ᥕᥝᥳ ᥘᥣᥖ ᥘᥥᥴ ᥘᥩᥒ ᥖᥣᥒᥰ ᥘᥦᥲ ᥑᥧᥢᥴ ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥟᥝ ᥘᥧᥐ ᥕᥤᥒᥰ ᥛᥢᥰ “ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ ”ᥟᥣᥙ ᥙᥢ။ ᥙᥢ ᥓᥩᥛᥰ ᥓᥫᥒᥳ ᥘᥣᥒᥰ ᥙᥦᥖᥱ ᥔᥤᥙᥴ ᥓᥩᥛᥰ ᥞᥥᥖᥱ ᥘᥧᥛᥰ ᥘᥣᥒᥰ။ ᥘᥬᥰ ᥑᥣᥝᥰ ᥖᥣᥒᥰ ᥛᥫᥰ ᥑᥪᥢᥰ ᥙᥧᥳ ᥐᥛᥱ ᥘᥢᥳ ᥚᥩᥒᥰ ᥛᥫᥒᥰ ᥘᥦᥲ ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ ᥞᥐᥳ ᥙᥦᥒᥰ၊ ᥐᥝᥰ ᥟᥥᥢᥲ ᥐᥢ။ ᥚᥩᥒᥰ ᥛᥫᥒᥰ ᥝᥨᥢᥳ ᥐᥨᥝ ᥑᥣᥝᥱ ᥑᥣᥴ ᥘᥢᥳ ᥚᥥ ᥗᥪᥒᥴ ᥟᥣᥳ ᥘᥨᥝᥱᥱ ᥘᥣᥳ ᥗᥣᥱ ᥘᥦᥲ ᥟᥛᥱ ᥑᥬᥲ ᥞᥬᥲ ᥓᥫᥒᥳ ᥘᥣᥒᥰ ᥙᥥᥖᥱ ᥔᥤᥙᥱ ᥘᥢᥳ ᥛᥫᥰ ᥓᥩᥛᥰ ᥕᥝᥳ ᥔᥥᥴ ᥛᥫ ᥓᥛ ᥖᥥᥴ ᥚᥦᥝᥴ ᥛᥫᥒᥰ ᥙᥧᥳ ᥐᥛᥱ ᥘᥢᥳ ᥓᥬ ᥟᥩᥐᥱ ᥐᥣᥱ ᥙᥦᥖ ᥖᥣᥒᥱ ᥖᥣᥒᥰ ᥕᥧᥱ ᥕᥝᥳ။ ᥗᥪᥒᥴ ᥙᥧᥳ ᥐᥛᥱ ᥕᥝᥳ ᥟᥝ ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ ᥟᥣᥙ ᥙᥢ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥔᥥᥴ ᥖᥣᥳ ᥟᥛᥱ ᥘᥪᥛᥰ ᥘᥣᥒᥰ ᥘᥭᥲ ᥘᥦᥲ ᥚᥩᥒᥰ ᥛᥫᥒᥰ ᥘᥢᥳ ᥙᥩᥭᥱ ᥑᥣᥝᥱ ᥝᥣᥱ “ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ ... ᥟᥛᥱ ᥓᥬ ᥘᥧᥐ ᥑᥧᥢᥴ ᥝᥥᥱ ᥔᥣᥱ ᥘᥤᥱ ... ᥟᥝ ᥓᥫᥒᥳ ᥘᥣᥒᥰ ᥛᥢᥰ ᥙᥢ ᥛᥣᥰ ᥐᥩᥭᥰ ... ᥔᥒᥴ ᥝᥣ ᥙᥥᥢ ᥘᥧᥐ ᥓᥝᥲ ᥑᥧᥢᥴ ᥓᥪᥒ ... ᥟᥛᥱ ᥙᥩᥭᥱ ᥖᥨᥝ ᥘᥥᥝ ᥑᥤᥒᥰ ᥐᥩᥭᥰ ᥛᥣᥰ ᥘᥒᥱ ᥘᥭᥴ ... ᥖᥥᥴ ᥙᥣᥰ ᥓᥫᥒᥳ ᥘᥣᥒᥰ ...ᥘᥧᥛᥰ ᥘᥣᥒᥰ ᥛᥣᥰ ᥓᥩᥛᥰ ᥕᥧᥱ …” ᥘᥭᥴ ᥘᥦᥲ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥑᥣᥝᥱ ᥘᥢᥳ ᥗᥪᥒᥴ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥐᥣᥱ ᥕᥧᥱ ᥕᥝᥳ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥓᥬ ᥘᥛ ᥘᥦᥢᥱ ᥔᥥᥴ ᥘᥛᥰ ᥘᥨᥭᥰ ᥙᥤᥢᥱ ᥓᥐ ᥐᥣᥳ ᥘᥣᥱ ᥘᥤᥱ ᥟᥩᥐᥱ ᥞᥣᥒᥲ ᥞᥨᥝᥴ ᥐᥛᥰ ᥘᥥᥝ။ ᥛᥢᥰ ᥘᥣᥒᥰ ᥙᥣᥭ ᥐᥧᥱ ᥕᥧᥱ ᥝᥭᥳ ᥖᥤ ᥟᥫᥒᥱ “ᥙᥣᥳ ᥘᥤᥛᥱ ᥛᥣᥳ” ᥞᥤᥛᥰ ᥘᥛᥳ ᥛᥥ “ᥠᥤᥢᥰ ᥖᥧᥢᥰ ”(ᥑᥦᥝᥰ ᥖᥩᥒᥰ )ᥘᥢᥳ ᥔᥥᥴ ᥐᥫᥖᥱ ᥘᥥᥒᥳ ᥘᥧᥐ ᥓᥣᥭᥰ ᥟᥢ ᥙᥥᥢ ᥛᥣᥰ “ᥓᥣᥢᥱ ᥓᥤᥖᥳ ᥖᥣᥰ ” ᥔᥥᥴ ᥖᥥᥴ ᥙᥥᥢ ᥚᥧᥱ ᥐᥖᥳ ᥑᥦᥢᥱ ᥘᥨᥒᥴ ᥛᥫᥒᥰ ᥙᥧᥳ ᥐᥛᥱ ᥘᥢᥳ ᥕᥝᥳ။ “ᥛᥣᥳ ᥘᥤᥱ ᥓᥢᥱ ᥖᥣᥱ ” ᥙᥥᥢ ᥘᥧᥐ ᥕᥤᥒᥰ ᥑᥧᥢᥴ ᥞᥨᥝᥴ ᥑᥛᥰ ᥛᥫᥒᥰ ᥛᥩᥢᥰ။ ᥛᥫ ᥛᥫᥒᥰ ᥛᥩᥢᥰ ᥛᥤᥰ ᥚᥥᥰ ᥘᥢᥳ ᥛᥫᥒᥰ ᥙᥧᥳ ᥐᥛᥱ ᥖᥪᥐᥱ ᥓᥩᥭ ᥘᥦᥲ ᥑᥧᥢᥴ ᥛᥫᥒᥰ ᥛᥩᥢᥰ ᥓᥨᥛᥰ ᥔᥫᥰ ᥕᥣᥙᥱ ᥓᥬ ᥔᥥᥴ ᥟᥝ “ᥛᥣᥱ ᥘᥤᥳ ᥓᥢᥱ ᥖᥣᥱ ” ᥔᥨᥒᥱ ᥐᥨᥙᥳ ᥐᥧ ᥐᥪᥐᥱ ᥝᥭᥳ ᥘᥭᥴ ᥕᥝᥳ။
ᥘᥩᥒ ᥐᥫᥰ ᥕᥛ ᥖᥤ ᥙᥧᥳ ᥐᥛᥱ
ᥛᥫ ᥓᥝᥲ ᥛᥩᥢᥰ ᥘᥣᥳ ᥗᥪᥒᥴ ᥐᥣᥱ ᥙᥧᥳ ᥐᥛᥱ ᥘᥢᥳ ᥐᥨᥢᥰ ᥖᥒᥰ ᥛᥫᥒᥰ ᥐᥫᥰ ᥕᥛ ᥔᥣᥱ ᥔᥢᥰ ᥘᥣᥱ ᥐᥫᥒᥰ “ᥟᥣ ᥘᥤᥰ ᥓᥤᥰ ” ᥝᥭᥳ ᥕᥝᥳ။ “ᥟᥣ ᥘᥤᥰ ᥓᥤᥰ ”ᥘᥭᥴ ᥘᥢᥳ ᥘᥧᥒ ᥔᥣᥒᥱ ᥐᥣᥢᥰ ᥟᥣ ᥕᥩᥒᥱ ᥔᥩᥛᥱ ᥛᥪᥖᥴ။ ᥝᥭᥳ ᥑᥨᥢᥴ ᥞᥨᥝᥴ ᥕᥣᥝᥰ ᥔᥤᥱ ᥘᥤᥝᥳ။ ᥟᥩᥛᥱ ᥜᥭᥰ။ ᥓᥩᥐᥴ ᥑᥣᥛᥲ ᥖᥧᥛ။ ᥞᥬᥲ ᥛᥤᥰ ᥛᥣᥒᥱ ᥐᥣᥱ ᥘᥣᥱ ᥘᥤ ᥞᥬᥲ ᥛᥣᥐ ᥛᥤᥰ ᥘᥤ ᥙᥥᥢ ᥞᥬᥲ ᥛᥤᥰ ᥘᥧᥐ ᥘᥣᥢ ᥘᥐᥴ ᥘᥦᥛᥴ ᥘᥦᥲ ᥖᥪᥰ ᥐᥛ ᥗᥧᥒᥰ “ᥔᥨᥒᥱ ᥛᥩᥐᥱ ᥔᥨᥭᥱ ᥚᥤᥱ ”။ ᥚᥬᥴ ᥟᥛᥱ ᥞᥥᥖᥱ ᥓᥩᥛᥰ ᥗᥧᥒᥰ ᥘᥢᥳ ᥐᥩᥲ ᥖᥨᥙᥱ ᥖᥣᥛᥱ ᥑᥧᥢᥴ ᥘᥐᥴ ᥘᥐᥴ ᥘᥣᥴ ᥘᥣᥴ ᥘᥭᥴ ᥕᥝᥳ။ ᥗᥧᥒᥰ “ᥔᥨᥒᥱ ᥛᥩᥐᥱ ᥔᥨᥭᥱ ᥚᥤᥱ ” ᥘᥢᥳ ᥔᥒᥴ ᥝᥣ ᥐᥨᥙᥳ ᥐᥧ ᥖᥥᥱ ᥘᥣᥲ ᥞᥫᥢᥰ ᥘᥭᥴ ᥓᥪᥒ ᥖᥒᥲ ᥟᥝ ᥑᥛ ᥐᥨᥙᥳ ᥐᥧ ᥗᥪᥒᥴ ᥓᥥᥖᥱ ᥝᥢᥰ ᥓᥥᥖᥱ ᥑᥪᥢᥰ ᥖᥥᥴ ᥘᥭᥲ ᥟᥝ ᥘᥣᥒᥰ ᥕᥤᥒᥰ ᥐᥨᥙᥳ ᥐᥧ ᥛᥬᥱ ᥘᥢᥳ ᥔᥨᥒᥱ ᥙᥢ ᥟᥣᥱ ᥘᥤᥰ ᥓᥤᥰ ᥕᥧᥱ ᥐᥤᥢ ᥘᥩᥢᥰ ᥓᥩᥛᥰ ᥕᥝᥳ ᥓᥒᥱ ᥓᥝᥲ ᥚᥨᥝᥴ ᥖᥥᥴ ᥘᥭᥲ ᥐᥣᥱ ᥞᥙᥳ ᥛᥣᥰ ᥑᥪᥢᥰ ᥘᥭᥴ ᥕᥝᥳ။ ᥘᥪᥙ ᥞᥨᥝᥲ ᥓᥝᥲ ᥛᥩᥢᥰ ᥘᥣᥳ။ ᥓᥝᥲ ᥛᥩᥢᥰ ᥘᥣᥳ ᥘᥙᥳ ᥕᥛ ᥔᥣᥱ ᥔᥢᥱ ᥘᥣᥱ ᥙᥧᥐᥳ ᥗᥣᥳ ᥘᥦᥲ ᥚᥦᥝᥴ ᥛᥫᥰ ᥙᥧᥳ ᥐᥛᥱ ᥕᥝᥳ ᥞᥨᥛ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥘᥧᥱ ᥖᥣᥢᥰ။ ᥙᥣᥒᥰ ᥔᥣᥒᥱ ᥑᥧᥱ ᥑᥝᥲ ᥞᥨᥝᥰ ᥖᥣᥰ ᥘᥣᥰ ᥘᥬᥰ ᥞᥣᥒᥲ ᥞᥨᥝᥴ။ ᥙᥤ 1059 ᥘᥢᥳ ᥞᥨᥛ ᥐᥢ ᥖᥥᥱ ᥐᥩᥒᥰ ᥛᥧᥰ “ᥔᥨᥭᥱ ᥓᥤᥰ ᥑᥨᥒᥱ ” ᥟᥢ ᥖᥭᥰ ᥞᥩᥒᥳ ᥝᥣᥲᥴ “ᥐᥩᥒᥰ ᥛᥧᥰ ᥔᥣᥭᥰ ᥑᥛᥰ ” ᥘᥢᥳ ᥕᥝᥳ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥞᥐᥳ ᥙᥦᥒᥰ ᥓᥝᥲ ᥛᥩᥢᥰ ᥘᥣᥳ ᥖᥥᥳ ᥖᥥᥳ။ ᥐᥫᥰ ᥕᥛ ᥟᥛᥱ ᥛᥫᥢᥴ ᥐᥢ။ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥓᥩᥛᥰ ᥓᥬ ᥘᥭᥴ ᥔᥥᥴ ᥐᥨᥢᥰ ᥖᥒᥰ ᥞᥨᥝᥴ ᥟᥛᥱ ᥚᥩᥛᥳ ᥞᥙᥳ ᥞᥢᥴ ᥘᥤ ᥓᥝᥲ ᥛᥩᥢᥰ ᥘᥣᥳ။ ᥖᥥᥱ ᥐᥩᥒᥰ ᥛᥧᥰ ᥕᥒᥰ ᥙᥭᥱ ᥖᥢᥰ ᥕᥝᥳ ᥐᥨᥢᥰ ᥖᥒᥰ ᥞᥨᥝᥴ ᥟᥩᥢ ᥐᥢ ᥘᥥᥰ ᥓᥝᥲ ᥛᥩᥢᥰ ᥘᥣᥳ “ᥙᥥᥢ ᥢᥣᥒᥰ ᥕᥤᥒᥰ ... ᥛᥤᥰ ᥛᥥᥝᥰ ᥟᥛᥱ ᥘᥤ ... ᥟᥩᥐᥱ ᥘᥥᥱ ᥞᥣᥴ ᥐᥤᥢ ᥐᥧ ᥑᥪᥢᥰ ... ᥛᥤᥰ ᥚᥫᥳ ᥛᥤᥰ ᥜᥤᥴ ᥟᥛᥱ ᥘᥤ ᥘᥦᥲ ... ᥛᥨᥒᥲ ... ᥛᥦᥒᥰ ... ᥖᥨᥝᥱ ... ᥖᥦᥢ ... ᥟᥤᥱ ᥐᥧᥐ ... ᥓᥐᥴ ᥓᥣ ... ᥟᥛᥱ ᥐᥪᥖᥴ ... ᥐᥤᥢ ᥐᥧ ᥛᥥᥝᥰ ... ᥐᥤᥢ ᥛᥥᥝᥰ ᥘᥤ ᥐᥨᥝ ᥘᥤ ᥚᥣᥢᥲ ᥘᥩᥢᥳ ᥘᥩᥢᥳ ... ᥞᥥᥖᥱ ᥐᥦᥒᥲ ᥘᥙᥳ ᥗᥪᥴ ᥚᥣᥰ ᥘᥣᥰ ᥖᥣᥰ ᥘᥣᥰ ᥔᥥᥴ ... ᥟᥣᥢᥰ ᥛᥣᥰ ᥕᥣᥳ ᥛᥨᥭᥳ ᥖᥒᥰ ᥞᥨᥝᥴ ᥕᥝᥳ ...” ᥔᥨᥝᥱ ᥔᥨᥢᥰ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥓᥒᥰ ᥛᥢᥰ ᥘᥣᥒᥰ ᥕᥧᥱ ᥕᥝᥳ။ ᥛᥫ ᥖᥥᥱ ᥖᥥᥱ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥟᥛᥱ ᥕᥧᥛᥱ။ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥘᥭᥲ ᥑᥣᥝᥱ ᥝᥣ “ᥑᥣᥝᥰ ᥑᥛ ᥛᥪᥖᥳ ... ᥖᥨᥝ ᥘᥦᥒᥰ ᥛᥣᥙ ... ᥟᥩᥐᥱ ᥖᥤ ᥞᥨᥝᥴ ᥓᥝᥲ ᥛᥩᥢᥰ ᥘᥣᥳ ᥔᥥᥴ ... ᥘᥥᥱ ᥞᥣᥴ ᥐᥤᥢ ᥕᥧᥱ ᥐᥧ ᥑᥪᥢᥰ ” ᥘᥭᥴ ᥗᥦᥢᥲ။ ᥑᥪᥢᥰ ᥘᥫᥒ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥘᥭᥲ ᥞᥢᥴ ᥔᥣᥭᥴ ᥘᥦᥒᥰ ᥟᥩᥐᥱ ᥛᥣᥰ ᥖᥤ ᥓᥩᥛᥱ ᥞᥨᥝᥴ ᥓᥝᥲ ᥛᥩᥢᥰ ᥘᥣᥳ ᥔᥥᥴ ᥞᥫ ᥙᥫᥒᥰ ᥖᥨᥝ ᥐᥣᥱ ᥖᥒᥰ ᥞᥨᥝᥴ ᥘᥦᥲ ᥛᥢᥰ ᥓᥝᥲ ᥕᥧᥛᥱ ᥕᥛ ᥝᥣ ᥑᥣᥛᥰ ᥙᥫᥢ ᥕᥣᥛ ᥘᥣᥖ ᥛᥣᥰ ᥖᥒᥰ ᥔᥥᥒᥲ ᥘᥢᥳ ᥗᥧᥐᥴ ᥛᥦᥢ ᥖᥥᥳ ᥕᥝᥳ ᥘᥭᥴ ᥔᥥᥴ ᥘᥛᥰ ᥘᥨᥭᥰ ᥓᥝᥲ ᥛᥩᥢᥰ ᥘᥣᥳ ᥟᥩᥐᥱ ᥞᥣᥒᥲ ᥞᥨᥝᥴ ᥛᥫ ᥙᥤ 1063 ᥘᥢᥳ ᥕᥝᥳ။
ᥐᥩᥒᥰ ᥛᥧᥰ “ᥔᥨᥭᥱ ᥓᥣᥱ ᥕᥣᥢᥱ ”
ᥓᥝᥲ ᥛᥩᥢᥰ ᥘᥣᥳ ᥐᥩᥲ ᥓᥨᥝᥰ ᥟᥩᥢ ᥓᥫᥒᥳ ᥘᥣᥒᥰ ᥛᥢᥰ “ᥘᥣᥒᥰ ᥑᥛᥰ ᥔᥣᥱ ”ᥔᥥᥴ ᥘᥨᥒᥰ ᥞᥣᥒᥲ ᥞᥨᥝᥴ ᥐᥣᥱ ᥕᥧᥱ ᥕᥝᥳ။ ᥘᥧᥛᥰ ᥘᥣᥒᥰ ᥛᥢᥰ ᥘᥣᥒᥰ ᥟᥢ ᥕᥧᥱ ᥛᥫᥒᥰ ᥛᥣᥝᥰ၊ ᥚᥣᥭᥴ ᥞᥤᥢᥴ ᥘᥬᥰ ᥛᥫᥒᥰ ᥙᥧᥳ ᥐᥛᥱ ᥘᥢᥳ ᥐᥩᥲ ᥘᥐᥳ ᥙᥩᥭᥱ ᥐᥨᥢᥰ ᥛᥫᥰ ᥖᥣᥒᥱ ᥗᥪᥒᥴ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥑᥢᥴ ᥑᥢᥴ ᥝᥭᥰ ᥝᥭᥰ ᥕᥧᥱ ᥕᥝᥳ။ ᥓᥝᥲ ᥛᥩᥢᥰ ᥘᥣᥳ ᥘᥦᥲ ᥘᥣᥒᥰ ᥑᥛᥰ ᥔᥣᥱ ᥐᥩᥲ ᥚᥦᥝᥴ ᥛᥣᥢᥲ ᥘᥬ ᥘᥫᥲ ᥔᥝᥰ ᥕᥩᥢᥰ ᥐᥤᥢ ᥛᥣᥢᥲ ᥘᥢᥳ ᥔᥥᥴ ᥔᥪᥙᥱ ᥑᥣᥝᥰ ᥖᥣᥒᥰ ᥛᥫᥰ ᥑᥪᥢᥰ ᥛᥣᥢᥲ ᥐᥝᥱ ᥛᥫᥒᥰ ᥘᥒᥴ ᥕᥧᥱ ᥘᥩᥭᥰ ᥘᥩᥭᥰ ᥕᥝᥳ။ ᥘᥧᥐ ᥞᥨᥝᥴ ᥙᥧᥳ ᥐᥛᥱ ᥘᥖᥴ ᥙᥨᥢᥳ ᥔᥤᥙᥴ ᥛᥣᥢᥲ ᥕᥝᥳ ᥔᥥᥴ ᥗᥪᥒᥴ ᥘᥛᥳ ᥞᥩᥒ ᥖᥤ ᥘᥫᥒ ᥘᥦᥲ ᥐᥪᥖᥴ ᥘᥪᥲ ᥘᥩᥢᥰ။ ᥖᥪᥢᥱ ᥛᥣᥰ ᥕᥝᥳ ᥓᥝᥲ ᥛᥩᥢᥰ ᥘᥣᥳ ᥘᥨᥒᥰ ᥔᥧᥐ ᥘᥣᥲ ᥖᥤ ᥘᥛᥳ ᥞᥩᥒ ᥘᥦᥲ ᥞᥢᥴ ᥔᥣᥭᥴ ᥘᥦᥒᥰ ᥛᥣᥙᥱ ᥞᥫᥲ ᥟᥩᥐᥱ ᥛᥣᥰ ᥘᥬᥰ ᥘᥛᥳ ᥘᥦᥲ ᥐᥨᥛᥲ ᥖᥨᥭᥰ။ ᥘᥭᥲ ᥞᥢᥴ ᥙᥤᥱ ᥞᥧᥴ ᥛᥢᥰ ᥘᥣᥒᥰ ᥘᥣᥒᥰ ᥑᥩᥢᥴ ᥘᥫᥒ ᥖᥨᥐᥱ ᥝᥭᥳ ᥕᥧᥱ ᥘᥬᥰ ᥘᥛᥳ ᥔᥥᥴ ᥔᥣᥭᥴ ᥘᥦᥒᥰ ᥞᥫ ᥛᥣᥙ ᥟᥩᥐᥱ ᥛᥣᥰ ᥖᥤ ᥙᥤᥱ ᥞᥧᥱ ᥘᥢᥳ ᥕᥧᥱ ᥘᥦᥲ ᥓᥒᥱ ᥞᥧᥳ ᥝᥣ ᥗᥣᥖ ᥖᥨᥝᥱ ᥚᥣᥰ ᥘᥣᥰ ᥙᥥᥢ ᥓᥝᥲ ᥛᥤᥰ ᥝᥭᥳ ᥘᥬᥰ ᥐᥨᥒ ᥙᥤᥱ ᥞᥧᥴ ᥛᥢᥰ ᥘᥣᥒᥰ ᥕᥧᥱ ᥕᥝᥳ။ ᥖᥤ ᥘᥢᥳ ᥓᥝᥲ ᥛᥩᥢᥰ ᥘᥣᥳ ᥐᥨᥝᥱ ᥔᥣᥒᥲ ᥐᥩᥒᥰ ᥛᥧᥰ ᥓᥥᥖᥱ ᥔᥩᥐᥱ ᥔᥧᥱ ᥘᥫᥒ။ ᥟᥝ ᥙᥤᥱ ᥞᥧᥴ ᥛᥢᥰ ᥘᥣᥒᥰ ᥑᥩᥢᥴ ᥘᥫᥒ ᥞᥥᥖᥱ ᥓᥬ ᥐᥩᥒᥰ ᥛᥧᥰ ᥝᥭᥳ ᥕᥝᥳ။ ᥞᥪᥒᥴ 45 ᥝᥢᥰ ᥐᥩᥒᥰ ᥛᥧᥰ ᥕᥝᥳ ᥖᥨᥝ ᥕᥝᥳ ᥐᥩᥰ ᥔᥪᥙᥱ ᥑᥣᥝᥰ ᥖᥣᥒᥰ ᥛᥫᥰ ᥗᥦᥢᥲ။ ᥘᥛᥳ ᥞᥩᥒ ᥙᥤᥱ ᥞᥧᥴ ᥛᥢᥰ ᥘᥣᥒᥰ ᥖᥨᥐᥱ ᥘᥢᥳ ᥛᥣᥢ ᥞᥩᥒᥳ ᥝᥣ “ᥢᥣᥳ ᥖᥩᥒᥰ ᥓᥧᥳ ᥠᥩᥒᥰ ”။ ᥐᥩᥒᥰ ᥛᥧᥰ ᥛᥢᥰ ᥘᥣᥒᥰ ᥖᥥᥱ ᥝᥭᥳ ᥘᥢᥳ ᥛᥣᥢ ᥔᥬᥱ ᥓᥪ ᥝᥣ “ᥔᥨᥭᥱ ᥓᥧᥱ ᥕᥣᥢᥱ ” ᥘᥭᥴ ᥔᥥᥴ ᥛᥤᥰ ᥓᥥᥒᥱ ᥓᥣᥢᥰ ᥝᥢᥰ ᥟᥩᥐᥱ ᥛᥣᥢᥰ ᥖᥥᥰ ᥘᥥᥰ ᥖᥤ ᥐᥭ ᥕᥣᥢᥴ 13 ᥘᥐᥴ ᥘᥢᥳ ᥕᥧᥱ ᥞᥣᥢᥳ ᥘᥭᥳ။
ᥓᥝᥲ ᥛᥩᥢᥰ ᥘᥣᥳ ᥘᥩᥢᥰ ᥚᥥᥰ။
ᥖᥥᥱ ᥐᥩᥒᥰ ᥛᥧᥰ “ᥔᥨᥭᥱ ᥓᥣᥱ ᥕᥣᥢᥱ ”ᥕᥝᥳ ᥓᥝᥲ ᥛᥩᥢᥰ ᥘᥣᥳ ᥔᥪᥙᥱ ᥑᥣᥝᥰ ᥖᥣᥒᥰ ᥘᥖᥴ ᥛᥣᥢᥲ ᥙᥣᥒᥱ ᥔᥣᥱ၊ ᥐᥩᥒᥰ ᥘᥤᥢᥰ၊ ᥘᥣᥰ ᥐᥧᥰ၊ ᥘᥣᥰ ᥘᥤᥢᥰ၊ ᥘᥣᥰ ᥑᥭᥳ၊ ᥘᥣᥰ ᥔᥨᥝᥳ၊ ᥔᥥᥰ ᥖᥧᥰ ᥔᥥᥴ ᥑᥪᥢᥲ ᥛᥫᥰ။ ᥖᥥᥱ ᥐᥩᥒᥰ ᥛᥧᥰ ᥔᥧᥒᥴ ᥓᥥᥖᥱ ᥔᥩᥐᥱ ᥝᥭᥳ ᥐᥧ ᥛᥣᥢᥲ။ ᥗᥪᥒᥴ ᥛᥣᥢᥲ “ᥛᥨᥝᥱ ᥐᥫ ” ᥞᥤᥛᥰ ᥔᥤᥱ ᥙᥨᥝᥳ ᥘᥢᥳ ᥐᥩᥲ ᥖᥥᥱ ᥐᥩᥒᥰ ᥛᥧᥰ ᥔᥧᥒᥴ ᥓᥥᥖᥱ ᥔᥩᥐᥱ ᥔᥥᥴ ᥟᥝ ᥙᥤᥱ ᥞᥧᥱ ᥛᥢᥰ ᥘᥣᥒᥰ ᥟᥢ ᥐᥪᥖᥴ ᥕᥧᥱ ᥑᥩᥢᥴ ᥘᥫᥒ ᥘᥢᥳ ᥞᥥᥖᥱ ᥓᥬ ᥘᥧᥱ ᥖᥣᥢᥰ ᥓᥩᥛᥰ ᥗᥦᥢᥲ။ ᥙᥥᥢ “ᥐᥩᥒᥰ ᥛᥧᥰ ᥛᥨᥝᥱ ᥐᥫ ” ᥟᥢ ᥛᥣᥢ ᥞᥩᥒᥳ ᥝᥣ “ᥙᥨᥝᥱ ᥓᥨᥝᥱ ᥚᥣᥳ ᥕᥣᥰ ” ᥘᥢᥳ ᥕᥝᥳ။ ᥐᥩᥒᥰ ᥛᥧᥰ ᥛᥨᥝᥱ ᥐᥫ ᥘᥢᥳ ᥒᥝᥲ ᥖᥥᥱ ᥛᥢᥰ ᥔᥧᥒᥴ ᥓᥥᥖᥱ ᥔᥩᥐᥱ ᥐᥩᥭᥰ။ ᥓᥝᥲ ᥖᥣᥱ ᥘᥣᥳ ᥝᥣᥭᥰ ᥘᥪᥢᥰ ᥑᥪᥢᥰ ᥐᥨᥝᥱ ᥟᥨᥛ ᥔᥩᥢᥳ ᥔᥬᥱ ᥗᥦᥢᥲ ᥘᥦᥲ ᥕᥣᥛᥰ ᥘᥥᥝ ᥖᥥᥴ ᥘᥭᥲ ᥞᥢᥴ ᥔᥧᥒᥴ ᥕᥬᥱ ᥘᥫᥴ ᥝᥭᥳ ᥕᥧᥱ။ ᥖᥒᥲ ᥟᥝ ᥘᥨᥒᥰ ᥞᥨᥝᥴ ᥙᥧᥳ ᥐᥛᥱ ᥘᥢᥳ ᥘᥭᥲ ᥘᥖᥴ ᥞᥨᥭᥲ ᥘᥖᥴ ᥘᥩᥭ ᥙᥭ ᥖᥣᥒᥰ။ ᥖᥥᥱ ᥐᥩᥒᥰ ᥛᥧᥰ ᥕᥝᥳ ᥐᥝᥲ ᥔᥧᥱ။ ᥞᥫᥳ ᥛᥩᥭ ᥟᥨᥢᥲ ᥖᥨᥝ ᥟᥨᥢᥲ ᥓᥬ ᥘᥦᥢᥱ ᥘᥦᥲ ᥝᥣᥭᥰ ᥖᥥᥱ ᥐᥩᥒᥰ ᥛᥧᥰ ᥛᥨᥝᥱ ᥐᥫ ᥕᥝᥳ ᥓᥝᥲ ᥛᥩᥢᥰ ᥘᥣᥳ ᥓᥙᥴ ᥑᥭᥲ ᥓᥙᥴ ᥘᥣᥝᥴ။ ᥕᥨᥖᥱ ᥕᥣ ᥟᥛᥱ ᥘᥭᥲ ᥕᥝᥳ ᥔᥥᥴ ᥘᥩᥢᥰ ᥚᥥᥰ ᥐᥣᥱ ᥖᥤ ᥛᥨᥝᥱ ᥐᥫ ᥘᥢᥳ ᥛᥫ ᥙᥤ 1065 ᥕᥧᥱ ᥕᥝᥳ။ ᥓᥝᥲ ᥘᥨᥒᥴ ᥞᥨᥛᥱ ᥛᥫᥒᥰ ᥞᥧᥳ ᥑᥣᥝᥱ ᥘᥧᥐ ᥕᥤᥒᥰ ᥘᥭᥲ ᥑᥣᥛᥱ ᥘᥪᥙ ᥘᥨᥒᥰ ᥞᥣᥒᥲ ᥞᥨᥝᥴ ᥘᥭᥴ ᥕᥝᥳ ᥐᥩᥲ ᥓᥬᥳ ᥐᥣᥱ ᥘᥝ ᥓᥝᥲ ᥘᥨᥒᥴ ᥔᥦᥢᥴ ᥓᥥ ᥐᥛᥰ ᥘᥥᥝ။ ᥓᥝᥲ ᥘᥨᥒᥴ ᥔᥦᥢᥴ ᥓᥥ ᥙᥢ ᥙᥧᥢ ᥚᥩᥢᥰ “ᥑᥧᥢᥴ ᥐᥨᥝᥱ ᥘᥣᥒᥰ ” ᥟᥩᥢ ᥑᥧᥢᥴ ᥑᥛᥰ ᥟᥩᥖᥱ၊ ᥑᥧᥢᥴ ᥑᥛᥰ ᥕᥩᥖ၊ ᥑᥧᥢᥴ ᥑᥛᥰ ᥑᥩᥖᥱ၊ ᥑᥧᥢᥴ ᥛᥫᥒᥰ ᥘᥤ ᥑᥝᥴ ᥐᥩᥢᥰ ᥟᥝ ᥗᥣᥳ ᥛᥨᥒ၊ ᥞᥥᥒᥴ၊ ᥙᥣᥐᥱ ᥛᥣᥢᥲ ᥑᥩᥢᥲ 413 ᥛᥫᥒᥰ ᥛᥣᥝᥰ ᥘᥨᥒᥴ ᥓᥪᥒ ᥖᥭᥰ 99 ᥝᥥᥒᥰ ᥑᥩᥖᥱ ᥚᥩᥖ ᥖᥙ ᥓᥣᥒᥳ၊ ᥖᥙ ᥛᥣᥳ ᥘᥨᥒᥰ ᥓᥧᥰ ᥙᥧᥳ ᥐᥛᥱ ᥐᥛᥰ ᥘᥥᥝ ᥕᥝᥳ။ ᥛᥫᥒᥰ ᥙᥧᥳ ᥐᥛᥱ ᥘᥢᥳ ᥕᥧᥱ ᥞᥩᥒᥱ ᥘᥣᥲ ᥓᥣᥢᥰ ᥛᥤᥰ ᥛᥩᥐ 200 ᥘᥐᥴ။ ᥘᥣᥲ ᥖᥨᥐᥱ ᥘᥣᥲ ᥟᥩᥐᥱ ᥛᥤᥰ ᥛᥩᥐᥲ 80 ᥘᥐᥰ ᥐᥨᥭᥰ။ ᥟᥛᥱ ᥕᥬᥱ ᥐᥣᥒᥲ ᥐᥣ ᥞᥪᥴ။ ᥖᥨᥝᥱ ᥗᥪᥒᥴ ᥑᥧᥢᥴ ᥞᥨᥝᥴ ᥑᥛᥰ ᥛᥣᥢ ᥙᥣᥢ ᥘᥪᥢᥰ ᥔᥧᥖᥴ ᥐᥩᥲ ᥖᥒᥰ ᥐᥣᥒᥲ ᥘᥒᥴ ᥘᥤᥢ ᥛᥫᥒᥰ ᥟᥢ ᥛᥣᥢ ᥚᥩᥒᥰ ᥒᥛᥰ ᥘᥭᥲ ᥘᥢᥳ ᥛᥤᥰ ᥛᥩᥐ ᥘᥢᥳ ᥐᥨᥭᥰ ᥘᥒᥱ ᥐᥝᥱ။ ᥛᥫᥒᥰ ᥐᥦᥙ ᥘᥦᥲ ᥞᥦᥒᥰ ᥔᥫᥐᥱ ᥙᥧᥳ ᥐᥛᥱ ᥟᥥᥱ ᥘᥫᥴ ᥞᥦᥒᥰ ᥛᥫᥒᥰ ᥖᥭᥰ ᥖᥥᥳ ᥖᥥᥳ။ ᥖᥣᥱ ᥖᥥᥴ ᥞᥣᥒᥲ ᥔᥫᥐᥱ ᥖᥪᥐᥱ ᥐᥢ ᥘᥢᥳ ᥘᥦᥙ ᥟᥛᥱ ᥙᥥᥳ ᥘᥭᥲ ᥘᥦᥲ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥙᥣᥒᥰ “ᥓᥝᥲ ᥟᥣᥳ ᥘᥣᥳ ᥞᥛᥱ ” ᥟᥩᥐᥱ ᥖᥩᥒᥰ ᥙᥣᥢᥱ ᥔᥪᥐᥱ ᥛᥫᥒᥰ ᥖᥭᥰ။ ᥑᥧᥢᥴ ᥐᥨᥝᥱ ᥘᥣᥒᥰ ᥟᥛᥱ ᥚᥩᥛᥳ။ ᥟᥛᥱ ᥘᥭᥲ ᥖᥩᥙᥱ ᥖᥦᥢᥰ ᥟᥛᥱ ᥓᥧᥰ။ ᥖᥣᥝᥳ ᥔᥪᥒᥱ ᥚᥩᥒᥰ ᥛᥫᥒᥰ ᥟᥣᥰ ᥘᥣᥱ ᥕᥣ ᥞᥣᥢᥰ “ᥓᥝᥲ ᥟᥣ ᥘᥣᥳ ᥞᥛᥱ ” ᥘᥦᥢᥱ ᥔᥥᥴ ᥟᥩᥢ ᥐᥢ ᥘᥣ ᥖ ᥘᥩᥒ ᥘᥤ ᥙᥢ ᥖᥤᥐᥴ ᥖᥤᥐᥴ ᥘᥦᥲ ᥑᥧᥢᥴ ᥐᥨᥝᥱ ᥘᥣᥒᥰ ᥓᥒᥱ ᥚᥩᥛᥳ ᥕᥝᥳ။ ᥚᥩᥛᥳ ᥐᥪᥖᥴ ᥔᥫᥐᥱ ᥕᥝᥳ ᥐᥩᥲ ᥞᥨᥛ ᥐᥢ ᥖᥥᥱ ᥐᥩᥒᥰ ᥛᥧᥰ ᥒᥛᥰ ᥕᥥᥢ “ᥚᥣᥰ ᥘᥣᥰ ᥕᥥᥱ ᥝᥧᥢᥱ ᥖᥩᥒᥱ ” ᥞᥤᥛᥰ ᥙᥣᥒ ᥟᥧ ᥘᥨᥒᥴ (မေမြို့ )ᥘᥢᥳ ᥔᥥᥴ ᥛᥤᥰ ᥕᥧᥱ ᥖᥨᥝᥱ ᥗᥪᥒᥴ ᥕᥣᥛᥰ ᥘᥥᥝ ᥕᥝᥳ။ ᥖᥨᥐᥱ ᥘᥨᥒᥰ ᥐᥪᥖᥴ ᥔᥫᥐᥱ ᥕᥝᥳ ᥑᥧᥢᥴ ᥐᥨᥝᥱ ᥘᥣᥒᥰ ᥞᥨᥢᥴ ᥘᥒᥴ ᥛᥫᥰ ᥑᥪᥢᥰ ᥐᥛᥰ ᥘᥥᥝ။ ᥗᥪᥒᥴ ᥛᥨᥝᥱ ᥐᥫ ᥘᥭᥲ ᥞᥨᥙᥳ ᥙᥣᥒ ᥓᥣᥳ ᥙᥤ ᥘᥣᥒᥰ ᥙᥬᥳ ᥝᥭᥳ ᥕᥧᥱ ᥘᥦᥲ ᥗᥪᥒᥴ ᥓᥬ ᥖᥥᥳ ᥖᥥᥳ။ ᥞᥫᥳ ᥑᥣᥝᥰ ᥖᥣᥒᥰ ᥐᥩᥭᥰ ᥛᥝᥱ ᥐᥣᥰ ᥚᥤᥖᥴ ᥓᥬ ᥘᥦᥢᥱ ᥟᥣᥰ ᥘᥣᥰ ᥘᥦᥲ ᥑᥧᥢᥴ ᥐᥨᥝᥱ ᥘᥣᥒᥰ ᥐᥤᥢ ᥟᥛᥱ ᥘᥭᥲ ᥘᥩᥢᥰ ᥟᥛᥱ ᥘᥙᥴ။ ᥓᥩᥛᥰ ᥘᥒᥱ ᥙᥫᥒ ᥚᥣᥴ ᥚᥥᥴ ᥐᥢ ᥘᥢᥳ ᥔᥥᥴ ᥘᥩᥢᥰ ᥚᥥᥰ ᥓᥩᥛᥰ ᥙᥤ ᥘᥣᥒᥰ ᥛᥢᥰ ᥓᥝᥲ ᥐᥣᥱ ᥖᥤ ᥛᥣᥢᥲ ᥛᥨᥝᥱ ᥐᥫ ᥘᥢᥳ ᥕᥧᥱ ᥕᥝᥳ။ ᥐᥩᥒᥰ ᥛᥧᥰ ᥘᥦᥲ ᥑᥧᥛᥴ ᥑᥣᥴ ᥔᥩᥒᥴ ᥙᥤ ᥘᥩᥒᥳ ᥘᥢᥳ ᥑᥧᥢᥴ ᥙᥩᥒ ᥛᥣᥢᥲ ᥛᥫᥒᥰ ᥔᥤᥱ ᥙᥨᥝᥳ ᥐᥧ ᥙᥣᥢ ᥙᥣᥢ ᥔᥪᥙᥱ ᥘᥧᥛᥰ ᥘᥣᥰ ᥐᥧᥛᥰ ᥗᥤᥒᥰ ᥛᥣᥰ ᥙᥣᥢ ᥔᥪᥙᥱ ᥙᥣᥢ ᥘᥦᥲ ᥛᥤᥰ ᥝᥭᥳ ᥕᥧᥱ ᥖᥤ ᥛᥨᥝᥱ ᥐᥫ ᥞᥣᥢᥳ ᥖᥨᥝᥱ ᥕᥣᥛᥰ ᥘᥥᥝ။ ᥐᥩᥒᥰ ᥛᥧᥰ ᥛᥨᥝᥱ ᥐᥫ ᥘᥢᥳ ᥛᥣᥢ ᥝᥣ ᥙᥥᥢ ᥐᥩᥒᥰ ᥛᥧᥰ ᥖᥥᥱ ᥝᥭᥳ ᥖᥤ ᥟᥧᥲ ᥛᥢᥰ ᥘᥣᥒᥰ ᥛᥣᥰ ᥞᥙᥳ ᥘᥦᥲ ᥙᥥᥢ “ᥙᥨᥝᥱ ᥓᥨᥝᥱ ᥚᥣᥳ ᥕᥣᥰ ” ᥟᥢ ᥙᥩᥒᥱ ᥝᥣ “ᥚᥣᥰ ᥘᥣᥰ ᥖᥤ ᥙᥨᥝ ᥛᥣᥰ ᥞᥙᥳ ” ᥘᥭᥴ ᥕᥝᥳ။ ᥘᥬᥰ ᥙᥪᥢᥰ ᥔᥛᥳ ᥟᥛᥱ ᥘᥭᥲ ᥞᥢᥴ ᥙᥨᥝ ᥛᥢᥰ ᥘᥣᥒᥰ ᥛᥣᥰ ᥞᥙᥳ ᥘᥦᥲ “ᥙᥨᥝᥱ ᥓᥨᥝᥱ ” ᥟᥢ ᥙᥩᥒᥱ ᥝᥣ “ᥙᥨᥝ ᥞᥙᥳ ” ᥘᥢᥳ ᥟᥛᥱ ᥓᥣᥒ ᥛᥐᥴ ᥛᥢᥲ ᥘᥭᥲ။ ᥛᥣᥢᥲ ᥛᥨᥝᥱ ᥐᥫ ᥘᥭᥴ ᥘᥢᥳ ᥔᥛᥳ ᥛᥤᥰ ᥝᥭᥳ ᥖᥥᥳ ᥕᥧᥱ။ ᥟᥛᥱ ᥞᥧᥳ ᥙᥪᥢᥰ ᥘᥦᥲ ᥐᥛᥳ ᥚᥩᥒ ᥐᥩᥲ ᥛᥐᥴ ᥛᥢᥲ ᥞᥩᥒᥳ ᥓᥩᥛᥰ ᥛᥣᥢ ᥝᥭᥳ ᥕᥧᥱ ᥘᥦᥲ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥙᥪᥢᥰ ᥞᥝᥰ ᥖᥥᥴ ᥓᥣᥒ ᥞᥣᥭᥴ ᥘᥣᥭ ᥕᥧᥱ ᥕᥝᥳ။
ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥘᥩᥢᥰ ᥚᥥᥰ
ᥝᥣᥭᥰ ᥔᥥᥴ ᥔᥪᥐᥱ ᥛᥫᥒᥰ ᥛᥣᥝᥰ ᥛᥫᥰ ᥕᥝᥳ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥐᥨᥝ ᥖᥭᥰ ᥘᥨᥒᥰ ᥖᥩᥙᥱ ᥖᥦᥢᥰ ᥑᥪᥢᥰ ᥘᥦᥲ ᥑᥣᥐ ᥞᥦᥒᥰ ᥔᥪᥐᥱ ᥙᥬᥳ ᥓᥥᥒᥱ ᥓᥣᥢᥰ ᥝᥢᥰ ᥟᥩᥐᥱ ᥑᥩᥙᥱ ᥛᥫᥒᥰ ᥙᥧᥳ ᥐᥛᥱ ᥔᥥᥴ ᥛᥤᥰ ᥛᥣᥰ ᥕᥣᥛᥰ ᥛᥨᥐᥰ (43)ᥖᥙ ᥑᥩᥢᥲ (ᥐᥤᥢᥰ ᥗᥧᥰ )ᥕᥝᥳ။ (43) ᥕᥣᥛᥰ ᥛᥨᥐᥴ ᥘᥢᥳ ᥕᥣᥛᥰ ᥘᥥᥝ ᥙᥥᥢ ᥝᥭᥳ ᥛᥣᥢᥲ (33)ᥛᥣᥢᥲ ᥘᥭᥴ ᥕᥝᥳ။ ᥙᥤ 1077 ᥘᥢᥳ ᥟᥣᥱ ᥘᥨᥝᥱ ᥘᥣᥳ ᥗᥣᥱ ᥟᥩᥐᥱ ᥓᥩᥙᥱ ᥔᥩᥐ ᥘᥬᥰ ᥛᥫᥒᥰ ᥙᥧᥳ ᥐᥛᥱ။ ᥛᥫ ᥘᥪᥲ ᥔᥝᥰ ᥘᥬᥰ ᥗᥫᥢᥱ ᥖᥤ ᥘᥫᥒ ᥘᥢᥳ ᥙᥧᥒᥱ ᥘᥣᥰ၊ ᥞᥧᥰ ᥘᥣᥰ ᥔᥩᥢᥱ ᥐᥣᥱ ᥘᥣᥰ ᥝᥣ “ᥓᥝᥲ ᥛᥨᥢ ᥕᥬᥱ ᥑᥧᥢᥴ ᥞᥨᥝᥴ ᥑᥛᥰ ᥞᥝᥰ ... ᥟᥛᥱ ᥖᥢᥰ ᥗᥪᥒᥴ ᥝᥥᥒᥰ ᥔᥥᥴ ... ᥖᥥᥴ ᥓᥣᥒ ᥘᥩᥢᥰ ᥚᥥᥰ ...” ᥘᥭᥴ ᥘᥦᥲ ᥟᥣᥳ ᥢᥨᥝᥱ ᥘᥣᥳ ᥗᥣᥱ ᥓᥬ ᥘᥛ။ ᥓᥬᥳ ᥟᥝ ᥖᥧᥛ ᥑᥖᥴ ᥑᥣᥖ ᥐᥪᥐᥱ ᥖᥤᥢ ᥙᥧᥒᥱ ᥘᥣᥰ ᥓᥫᥰ ᥘᥢᥳ ᥕᥝᥳ ᥙᥦᥖ ᥑᥝᥴ ᥝᥭᥳ ᥘᥬᥰ ᥗᥫᥢᥱ ᥔᥥᥴ ᥛᥢᥰ ᥓᥝᥲ ᥛᥫᥰ ᥑᥪᥢᥰ ᥐᥛᥰ ᥘᥥᥝ ᥕᥝᥳ။ ᥖᥢᥰ ᥗᥪᥒᥴ ᥚᥐᥴ ᥖᥧ ᥝᥥᥒᥰ ᥐᥩᥭᥰ ᥘᥭᥲ ᥑᥣᥝᥱ ᥑᥣᥭᥰ ᥞᥥᥴ ᥞᥣᥭᥳ ᥘᥨᥒᥴ ᥖᥨᥝ ᥘᥫᥒ ᥘᥛᥰ ᥖᥨᥝᥰ ᥕᥣᥳ ᥐᥝᥰ ᥛᥫᥒᥰ ᥕᥧᥱ ᥘᥭᥴ ᥘᥦᥲ ᥒᥦᥐ ᥙᥤᥢᥱ ᥞᥨᥝ ᥓᥣᥒᥳ ᥛᥢᥰ ᥟᥩᥐᥱ ᥘᥛᥰ ᥞᥣᥴ ᥑᥣᥭᥰ ᥐᥛᥰ ᥘᥥᥝ ᥕᥝᥳ။ ᥛᥫ ᥐᥣᥱ ᥞᥨᥙᥳ ᥑᥣᥭᥰ ᥞᥣᥭᥳ ᥘᥨᥒᥴ ᥘᥢᥳ ᥘᥧᥲ ᥘᥩᥒᥳ၊ ᥘᥧᥛᥰ ᥘᥣᥒᥰ ᥛᥢᥰ ᥟᥩᥢ ᥐᥢ ᥟᥩᥐᥱ ᥙᥣᥭ ᥙᥦᥖ ᥛᥨᥖᥴ။ ᥐᥣᥭᥰ ᥞᥣᥭᥳ ᥙᥖ ᥗᥩᥒᥰ ᥙᥦᥖ ᥘᥦᥲ ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥝᥨᥒ ᥚᥣᥖᥱ ᥓᥣᥒᥳ ᥔᥥᥴ ᥞᥣᥭᥴ ᥘᥣᥭᥴ ᥐᥣᥱ။ ᥟᥛᥱ ᥖᥨᥙᥱ ᥞᥢᥴ ᥑᥪᥢᥰ ᥖᥨᥝ ᥖᥣᥭ ᥛᥢᥰ ᥔᥥᥴ ᥙᥩᥐ ᥕᥝᥳ။ ᥐᥩᥒᥰ ᥛᥧᥰ ᥔᥣᥭᥰ ᥑᥛᥰ ᥐᥩᥲ ᥟᥛᥱ ᥖᥢᥰ ᥕᥝᥳ ᥖᥨᥝ ᥐᥣᥱ။ ᥑᥧᥢᥴ ᥟᥢ ᥛᥣᥢ ᥝᥣ ᥚᥧᥒᥰ ᥛᥨᥢ ᥕᥬᥱ ᥘᥦᥢᥱ ᥘᥭᥴ ᥘᥢᥳ ᥑᥣᥭᥰ ᥗᥩᥒᥰ ᥙᥖ ᥞᥣᥭᥴ ᥘᥣᥭ ᥐᥣᥱ ᥕᥧᥱ ᥕᥝᥳ။
ᥟᥣᥳ ᥘᥨᥝᥱ ᥘᥣᥳ ᥗᥣᥱ ᥑᥪᥢᥲ ᥛᥣᥰ ᥙᥣᥒᥰ ᥑᥥᥝᥲ ᥒᥣᥰ ᥔᥦᥒᥴ ᥐᥦᥢᥱ ᥓᥝᥲ
ᥘᥬᥰ ᥙᥤ 1058 ᥘᥢᥳ ᥓᥝᥲ ᥟᥣ ᥢᥨᥝᥱ ᥘᥣᥳ ᥗᥣᥱ ᥛᥫᥒᥰ ᥙᥧᥳ ᥐᥛᥱ ᥑᥪᥢᥲ ᥛᥣᥰ ᥖᥣᥒᥰ ᥛᥫᥒᥰ ᥖᥭᥰ ᥔᥥᥴ ᥘᥖᥴ ᥐᥣᥱ ᥓᥧᥰ ᥛᥫᥒᥰ ᥘᥣᥢᥳ ᥓᥝᥲ၊ ᥖᥩᥢ ᥖᥣᥱ ᥖᥥᥴ ᥐᥣᥱ ᥙᥣᥒᥰ ᥟᥝ "ᥑᥥᥝᥲ ᥒᥣᥰ ᥔᥦᥒᥴ ᥐᥦᥢᥱ ᥓᥝᥲ " ᥖᥤ ᥓᥝᥲ ᥞᥨᥝᥴ ᥔᥦᥒᥴ ᥘᥣᥢᥳ ᥓᥝᥲ (ᥟᥧᥲ ᥖᥥᥱ ᥜᥣᥳ )။
ᥟᥤᥒ ᥘᥫᥴ ᥓᥝᥲ ᥟᥣᥳ ᥢᥨᥝᥱ ᥘᥣᥳ ᥗᥣᥱ ᥛᥣᥰ ᥘᥩᥙᥱ ᥖᥩᥖ ᥙᥢ ᥞᥭᥴ ᥒᥪᥢᥰ ᥞᥭᥴ ᥑᥛᥰ ᥔᥥᥴ ᥓᥝᥲ ᥞᥨᥝᥴ ᥔᥦᥒᥴ ᥟᥧ ᥖᥭᥱ ᥜᥣᥳ ᥙᥥᥢ ᥟᥢ ᥛᥦᥢ ᥓᥬ ᥞᥨᥛᥴ ᥓᥨᥛᥰ ᥘᥣᥱ ᥘᥦᥲ ᥓᥒᥱ ᥘᥭᥲ ᥕᥧᥐ ᥕᥨᥝᥰ ᥟᥝ ᥒᥣᥰ ᥔᥦᥒᥴ ᥐᥦᥢᥱ ᥓᥝᥲ ᥕᥪᥢ ᥝᥣᥒᥰ ᥙᥢ ᥓᥝᥲ ᥟᥣ ᥘᥨᥝᥱ ᥘᥣᥳ ᥗᥣᥱ ᥞᥙ ᥛᥫᥰ ᥐᥫᥰ ᥘᥤ ᥘᥙᥳ ᥝᥭ ᥐᥣ ᥖᥤ ᥛᥫᥒᥰ ᥙᥧᥳ ᥐᥛᥱ။
ᥞᥨᥙ ᥕᥣᥰ ᥖᥒᥰ ᥓᥝᥲ ᥛᥩᥢᥰ ᥘᥣᥳ
ᥝᥣᥭᥰ ᥘᥢᥳ ᥓᥝᥲ ᥞᥨᥝᥴ ᥑᥛᥰ ᥟᥣ ᥘᥨᥝᥱᥱ ᥘᥣᥳ ᥗᥣᥱ ᥐᥩᥲ ᥙᥩᥐ ᥝᥣᥭᥱ ᥑᥪᥢᥰ ᥛᥫᥰ ᥛᥫᥒᥰ ᥙᥧᥳ ᥐᥛᥱ။ ᥔᥛᥳ ᥛᥣᥰ ᥐᥪᥖᥴ ᥕᥒᥳ ᥑᥣᥝᥰ ᥖᥣᥒᥰ ᥖᥤ ᥖᥩᥢᥲ ᥘᥤᥢ ᥗᥧᥒᥳ ᥛᥫᥒᥰ ᥛᥣᥝᥰ ᥗᥦᥢᥲ ᥘᥦᥲ ᥘᥭᥲ ᥞᥦᥢᥰ ᥟᥝ ᥑᥩᥒᥴ ᥜᥣᥐᥱ ᥑᥨᥝᥰ ᥖᥩᥢᥲ ᥛᥩᥐᥱ ᥕᥣᥲ ᥒᥪᥢᥰ ᥛᥩᥐᥱ ᥕᥣᥲ ᥑᥛᥰ ᥞᥛᥰ ᥙᥧᥳ ᥞᥛᥰ ᥚᥥᥰ ᥑᥝᥲ ᥗᥪᥒᥴ ᥓᥧᥰ ᥖᥛ ᥖᥤ ᥓᥝᥲ ᥞᥨᥛᥱ ᥛᥫᥒᥰ ᥔᥥᥴ ᥗᥣᥛᥴ ᥕᥩᥢᥰ ᥟᥝ ᥓᥝᥲ ᥘᥣᥒᥰ ᥛᥩᥢᥰ ᥘᥣᥳ။ ᥞᥨᥝᥴ ᥑᥛᥰ ᥓᥝᥲ ᥞᥨᥛᥱ ᥛᥫᥒᥰ ᥐᥩᥲ ᥕᥩᥢᥳ ᥙᥫ ᥖᥨᥭᥰ ᥞᥢᥴ ᥚᥩᥢᥰ ᥙᥣᥒ ᥔᥩᥒᥴ ᥙᥣᥲ ᥔᥩᥒᥴ ᥜᥣᥭᥱ ᥑᥣᥝᥰ ᥙᥩᥖᥴ ᥑᥣᥝᥰ ᥕᥣᥝᥰ ᥔᥥᥴ ᥓᥒᥱ ᥚᥩᥛᥳ ᥘᥭᥲ ᥓᥬ ᥖᥨᥐᥱ ᥘᥨᥒᥰ ᥟᥝ ᥓᥝᥲ ᥛᥩᥢᥰ ᥘᥣᥳ ᥞᥨᥛ ᥛᥤᥒ ᥐᥨᥙ ᥐᥧ ᥙᥢ ᥖᥒᥰ ᥓᥝᥲ ᥟᥣᥳ ᥘᥨᥝᥱ ᥘᥣᥳ ᥗᥣᥱ။