Wp/ssf/kmalawa s futulh, lhpazishan numa klhiw

kmalawa s futulh, lhpazishan numa klhiw 製作弓、箭與弓弦

kahiwan thau izai ya amakalawa s izai futulh, miaqay tmala s izai riptha wa ribush,maqa s izai riptha wa ribush mathuaw marumiz, mamzai shikiwarin antu mupriz.numa sa thau ya izai kmalawa sa izahai futulh, miaqay tmala s izai riptha wa ribush, ya kinashitalan kmalawa izai futulh, mathuaw maqa s izai a riptha mathuaw makundur a kawi, kinashitalaniza kmalawa. niza tu kmashiqtha ya minawayza maqa izai futulh ya miaqay izai futulh amingqaraiza kafazaqin ita s izai futulh ya miakuza ya maqitan malhimpanaq. numawan s izai futulh shanathau mani.

ya makushwit a thau makushwit pan s izai futulh, maqa makushwit a thau ianan izai kushwit izai amashuruz izai futulh. ya antu makushwit a thau antu makushwit mani izai futulh, maqa uka s akushwit ashuruz. numawan s izai thau ya tata wa parhaway ianan tata wa futulh numa izahai lhpazishan.

numa s izai futulh izai klhiw mani pasain mani tu sain binanaw’az man asinalam a klhiw mani. numa ya minfutulh a klhiw ya quthquthanuan izai fazfaz numa pungqaqaudinan izai fatu. maqa dai izai amashibuntuth, ya antu mashibuntuth amuhiaw mutun, numa ya ikain pungqaqaudinan s izai fatu, maqa dai amashibuntuth izai klhiw. numa s izai lhpazishan pasain shkish, numa s izai shkish ianauranuan izai pasansan, maqa pasansan numa makamalunduz. numa ya malunduziza pinasansaniza

malunduziza. isisuaiza ya putuaniza s izai balis a lhpazishan. numa pasain izahai lhpazishan pasain klhiw izai balis murunrun, numa ya rinunrunaniza pasainiza izai zakzak mrishup, amaqa pisain zakzak mrishup numa antu akumpshiq izahai shkish ya izai panaqiza. numawan s izai thau mathuaw ya itia s izai zakzak, antu palhaqaan thaythuy, puilin thaythuy, numa ya kmalawaiza s izai futulh, kmalawaiza s izai lhpazishan miaqay pasain zakzak pataupdaq, maqa s izai lhpazishan amakundur, numawan izai thau kahiwan ya izai mashtay s izai thau kahiwan ya s tata wa parhaway ianan s izai futulh numa lhpazishan.

lhpazishan kahiwan izai lhpazishan a izai shkish ya putuan s izahai tu rumfaz a kupur pataupdaq mani, amaqa dai amalunduz ya panaq ita antu dai taukiwakiwar. ya putuan pataupdaqan s izai ranaw a lhizash izai lhpazishan a pishpish. pataupdaqan s izahai rumfaz a izai pali, numa ya mufutulhiza malunduz dai, numa miaqay tmariqtu.

thau tu kahiwan mashtay sa parhaway ianan sa futulh. numa ya mzai amuribush miahalahalaiza kmathu s izai futulh, numa iatan sa funush. pashtay thau tu kahiwan parhaway ianan sa futulh masa izahai lhpazishan funush.