Wp/sjd/Пе̄тар ланнҍ

	Ланнҍ
Пе̄тар ланнҍ
рӯшас Санкт-Петербург
	Пе̄тар ланҍ тыгквэннҍ сай
Фла̄гк	Ге̄ррп
	59°57′00″ т. кт. 30°19′00″ н. кк.HGЯO
Воа̄ллтланнҍ	Рӯшше̄ммьне
Субъект	Пе̄тар ланнҍ
Губернатэр	Александр Беглов
Исторья я е̄ммьнете̄дт
Тӯййшуввма лӣ	16. (27.) вӯссьма̄н 1703 ыг.
Э̄ввтлэсь нэ̄м	1914—1924 ыг.:; Петроград; 1924—1991 ыг.:; Ленинград
Э̄ля ко̄ммтвудт	1439 км²
А̄ййк эвв	MSK (UTC+3:00)
Е̄ллей
Е̄ллье числа	5 652 922 о̄л.
Нарэд сӯгкесьвудт	4029,17 о̄л./км²
Циффер идэнтификатэр
Тэльфонн ко̄дт	+7 812
По̄шта индэкс	190000–199406
Ка̄рта
	Медьяфа̄ял Викируэкэсьт

Тэдта лӣ э̄ххт кӣллт са̄мь Википедья шувв лыстэнҍ.

Пе̄тар ланнҍ вай Пе̄дар ланнҍ (рӯшас Санкт-Петербург, ла̄дӓс Pietari), э̄ввтла Петроград (1914—1924 ыг.) я маӈӈа Ленинград (1924—1991 ыг.) лӣ ныммьп шурьмусс ланнҍ Рӯшше̄ммьнесьт маӈӈа Москвасьт. Со̄нн ля̄шш Ла̄дтҍлӯхт рынтэсьт Нева ёг ня̄льмэсьт Рӯшше̄ммьне таввь-вуэрьйлэсьт. 2025 ыгесьт ланӭсьт я̄лл поштэ 5,6 милльён о̄ллмэдтӭ.^[1] Ланҍ э̄ля ко̄ммтвудт лӣ 1439 км².^[2] Пе̄тар ланнҍ лӣ федеральнэ ланнҍ я Таввь-Вуэррьял административнэ о̄круг кэ̄сскпа̄ҋҋк.

Исторья

Пе̄тар ланнҍ вӯссьма̄н 16. (27.) пе̄йвэсьт 1703 ыгесьт цоа̄рэнҍ Пе̄дрэнҍ I тӯййшуввма. Нэ̄ммдуввма со̄нн ля̄йй пассь Пе̄дар цысста, ноа тэнн э̄л кӣчханна оа̄йкэнҍ шэнтэ е̄намп Пе̄дар I нэ̄мэнҍ корнэдтма. 1714—1728 я 1732—1918 ыге па̄ль Пе̄тар ланнҍ ля̄йй Рӯшш воа̄ллтланҍ вуэййвланнӭнҍ.

Е̄рркъя па̄ль райесьт та̄ррьмъя Пе̄тар ланҍ е̄ммьнесьт, ко̄йт коадчетҍ Ингерманландиянҍ вай Ингриянҍ, ӣлленҍ ла̄дтҍ-югра о̄ллмэ – во̄дҍ я ижора, а 17. агесьт тоагэ ныдтҍшэ ла̄дтҍ о̄ллмэ пӯдтӭнҍ.

Ёадтӭмна̄ль

Пе̄тар ланнҍ лӣ по̄ррт ланнҍ я Рӯшше̄ммьне ныммьп шурьмусс транспортнэ чӯллм. Со̄нэсьт ле̄в рӯввьт я автэмбилль чӯһкас, ме̄рр я ёгк ёадтӭмна̄ль, метрополитэнн я ерапоррт.

Пе̄тар ланнҍ по̄ррт лӣ шӯрр, 22 км куһкьвудэнҍ кӯррьем ця̄һксэнҍ, кӯ о̄ммп ыгь а̄в лӣ. Васильевскэ сӯллэ соа̄йвэсьт лӣ ме̄рр ёадтӭй терминалл.

Ва̄йймлэнне мэ̄нант ёгк ёадтӭмна̄ль Пе̄тар ланҍ ёгэ я каналэ мӣлльтэ. Ёгк ёадтӭмна̄ль мэ̄нънэм па̄лль оа̄лкхувв алльт кыдтма̄н ке̄дже я пудант ӣӈӈма̄нэсьт.^[3]

Пе̄тар ланҍ ерапоррт — Пулкова (рӯшас Пулково) — ля̄шш ланҍ соа̄ййв ре̄вьнэсьт Московскэ раёнэсьт 15 километрэдтӭ ланҍ кэ̄сскпа̄ҋк райесьт. Пулкова ерапоррт ля̄йй 1932 ыгесьт а̄ввьда.

Пе̄тар ланнҍ рӯввьт чуэкас чӯллм лӣ ныммьп шурьмусс Рӯшше̄ммьнесьт маӈӈа московскэсьт я авьтмусс тӯййшуввэм а̄йк мӣлльтэ — рӯшш рӯввьт чӯһксэ исторья оа̄лкхувэ тэста 19 агесьт. Пе̄тар ланӭсьт ле̄в выдт рӯввьт чуэкас вокзал: Балтийскэ, Витебскэ, Ладожскэ, Московскэ я Финляндскэ. Кэскэсьт Москва я Пе̄тар ланҍ вэхтъесь по̄яс «Сапсан» мэ̄нант.

Пе̄тар ланҍ метрополитэнн ро̄бхушш 1932 ыгь райесьт. Оа̄лк 2019 ыгесьт ланӭсьт ля̄йй 72 ста̄нцъедтӭ 5 ця̄һкас альн, ко̄нн э̄ххтса куһкьвудт ля̄йй 124,7 км.

Пе̄тар ланҍ трамвайй са̄ййм лӣ шурьмусс Рӯшше̄ммьнесьт я ня̄льянт шурьмусс э̄ллмантэсьт. Со̄нн ро̄бхушш 1907 ыгь райесьт. 2000. ыге кэск райесьт Пе̄тар ланҍ трамвайй са̄ййм ля̄йй шурьмусс э̄ллмантэсьт трамвайй са̄йймэнҍ, мэ̄нн эвтэсьт ля̄йй Гинэсс рекордэ кыррья ва̄ллтма.^[4] Адтҍ Пе̄тар ланӭсьт ро̄бхушш 45 трамвайй ушшэ. Са̄йм куһкьвудт лӣ 231 км, пугк ужэ э̄ххтса куһкьвудт лӣ 500 км.^[5]

Алльмэсс

Алльмэсс Пе̄тар ланӭсьт (ИЦП), 1991—2020 ыге но̄рма
Ме̄ррь	О̄дт.	По̄ррк.	Нюххч.	Кыдт.	Вӯссь.	Ке̄ссь.	Сӯййн.	Поар.	Че̄ххч.	Рэ̄г.	Ӣӈӈ.	Коам.	Ыгкь
Кэскмусс пя̄йвас макс., °C	−2,5	−2,4	2,3	9,5	16,3	20,5	23,3	21,4	15,9	8,7	2,8	−0,5	9,6
Кэскмусс температура, °C	−4,8	−5	−1	5,2	11,5	16,1	19,1	17,4	12,4	6,2	0,9	−2,5	6,3
Кэскмусс пя̄йвас мин., °C	−7,2	−7,6	−4	1,7	7,2	12,2	15,3	13,9	9,4	4,1	−0,9	−4,5	3,3
Кэдчнэг но̄рма, мм	46	36	36	37	47	69	84	87	57	64	56	51	670

Ланҍ па̄ҋк

Пе̄тар ланӭсьт лӣ 18 раённэ:

1. Адмиралтейскэ	10. Курортнэ
2. Василеостровскэ	11. Московскэ
3. Выборгскэ	12. Невскэ
4. Калининскэ	13. Петроградскэ
5. Кировскэ	14. Петродворцовэ
6. Колпинскэ	15. Приморскэ
7. Красногвардейскэ	16. Пушкинскэ
8. Красносельскэ	17. Фрунзенскэ
9. Кронштадтскэ	18. Центральнэ

Ныдтҍшэ ланҍ раёнэ рӣвьнэ сыссенҍ лӣ 9 ланнӭ (Зеленогорск, Рӯппьсесь Сыййт (рӯшас Красное Село), Кронштадт, Ломоносов, По̄ввэл ланнҍ (рӯшас Павловск), Петергоф, Пушкин, Сестрорецк) я 21 сыййтэ.

Ка̄йв

↑ Численность постоянного населения Российской Федерации по муниципальным образованиям на 1 января 2025 года. Федеральная служба государственной статистики (кыдтма̄н 25. п. 2025). (кӣһча лӣ кыдтма̄н 29. п. 2025)
↑ Петербург в цифрах. Официальный сайт Администрации Санкт-Петербурга. (кӣһча лӣ по̄рркма̄н 19. п. 2013) Архивва пыййма лӣ вӯссьма̄н 1. п. 2012.
↑ Водный транспорт. Городской транспорт. (коаммыййма̄н 30. п. 2005, ко̄пья архивэсьт)
↑ Ветеранские будни трамвая // Газета «Известия». — 2007. Архивировано из оригинала 16 июля 2007 года.
↑ Юрий Антонов. В будущее — «рельсов нет» // Газета Невское время. — рэ̄гкэмма̄н 18. п. 2008. Архивва пыййма лӣ нюххчма̄н 1. п. 2018. .

[1] Численность постоянного населения Российской Федерации по муниципальным образованиям на 1 января 2025 года. Федеральная служба государственной статистики (кыдтма̄н 25. п. 2025). (кӣһча лӣ кыдтма̄н 29. п. 2025)

[2] Петербург в цифрах. Официальный сайт Администрации Санкт-Петербурга. (кӣһча лӣ по̄рркма̄н 19. п. 2013) Архивва пыййма лӣ вӯссьма̄н 1. п. 2012.

[3] Водный транспорт. Городской транспорт. (коаммыййма̄н 30. п. 2005, ко̄пья архивэсьт)

[4] Ветеранские будни трамвая // Газета «Известия». — 2007. Архивировано из оригинала 16 июля 2007 года.

[5] Юрий Антонов. В будущее — «рельсов нет» // Газета Невское время. — рэ̄гкэмма̄н 18. п. 2008. Архивва пыййма лӣ нюххчма̄н 1. п. 2018. .

[1]

[2]

[3]

[4]

[5]