Wp/sea/Vok Foong Kew
Vok Foong Kew numom sengoi hik ju suku kaom Semai de kiyos ku 6 April 1981. Tentuk mai bikenjip pelik yakma muh ilei begei cerawas? Ku jaman manah entem, jeoi mai cerawas kerjak en luri nyong senubai nu kampug. Ju kenjeh, amek ilei kikenal ru iapak laluk ubai gigei. Hamaka, muh ilei begei muh cerawas mende bijijoi muh iapak. Ilei kibesekulah ku Sekolah Kebangsaan Chenderong Kelubi ju umor 6 tahut lei 12 tahut. Telas ajeh, ilei kimuj nu Sekolah Menengah Dato Bendahara C.M. Yusof, Tanjung Tualang ju Tingkatan 1 lei Tingkatan 3. Ku mase ajeh, galak kibelakuk nong gecat ya baag. Jadik, ilei bitukar isekulah nu Sekolah Menengah Air Kuning, Kampar ju Tingkatan 4 lei guj Tingkatan 5. Ilei kicerot nej belajar nu Tingkatan 6 Bawah lei Tingkatan 6 Atas ku Sekolah Menengah Sultan Yussuf, Batu Gajah, Perak.
KERENJAK Peksendok ilei kikerjak sebegei guru, mong bebegei kerjak kilek de kicebur. Sementare kipuj keputusan perikse STPM, ilei kijoi iperingak kerjak ku empal senubai cerawas. Mong jugak kikerjak ku kilang kemere. Mase kikerjak ku kilang ajeh, ilei isik borang kaha semanj muj nu maktab. Ilei pen kikep surat penangel temuduge. Pek kilepak, ilei pen kiet nu temuduge ajeh. Mimang mong irejeki, ilei bipangel lapor dirik nu Maktab Perguruan Tuanku Bainun, Pulau Pinang perinkat Diploma Perguruan Malaysia seluneu nik tahut mulak ju tahut 2002 lei tahut 2004. Ilei kikep surat penempatan ku Sekolah Kebangsaan Chenderong Kelubi iaajeh sekulah ku kampug ilei, sekulah de kisekulah manah entem.Ju kenjeh, ilei bikenal sebegei Cikgu Vok. Ilei tok kiberentik belajar had perinkat diploma, ilei kicerot nej nu perinkat Ijazah Sarjana Muda Pendidikan ju tahut 2011 lei tahut 2015.
SENUMBANG Seluneu kikerjak sebegei guru, ilei jugak mong kiog memerip senumbang begei tenules ru penilei bob teks. Antare bob teks de kitules ialoh Buku Teks Bahasa Semai Tahun 4 KSSR (2013) ru Buku Teks Bahasa Semai Tahun 6 KSSR (2015). Ilei kijadik penilei Buku Teks Bahasa Semai Tahun 5 KSSR Semakan 2017 ru Tahun 6 KSSR Semakan 2017. Ilei jugak pernah bilantek sebegei Penolong Editor ha Buku Teks Bahasa Semai Tingkatan 1 KSSM (2016). Ilei jugak mong kikep Anugerah Perkhidmatan Cemerlang (APC) ku tahut 2006.
PERINGAK Cikgu Vok kikep ijodoh ru mai nyak ju Negeri Sembilan suku kaom Temuan de bermuh Cuaili bin Sulim. Igensir ilei pen kikerjak sebegei guru ru kibeajar ku sekulah de samak ru ilei. Liubai baikernal semase baibelajar ku Maktab Perguruan Tuanku Bainun, Pulau Pinang. Liubai mong nik urag kenon keral. Hunen, kenon ubai kek ilong kibelajar ku Kolej Vokasional Pertanian (Chenor) Maran, Pahang kateh bidag Mekanisasi Agro (Semester 2 - 2023). Kenon ubai kek ingah kibesekulah ku Sekolah Menengah Sains Teluk Intan, Perak ku Tingkatan 2 (2023/24).