Wp/sdh/سەید محەمەدتاھێر سەیزاێەێ ھاشمی
سەید محەمەدتاھێر سەیزاێەێ ھاشمی (١٩١٣ لە مامێزک لە دەوڵەت ئاواێ ڕەوانسەر -٢٣ ژووئەن ١٩٩١ لە کرماشان) ھەڵووەسوان، خوەشنۊس، دیرووکنۊس و زاناێ دینی کورد بۊ.
ژیان[edit | edit source]
سەید محەمەدتاھێر سەیزاێەێ ھاشمی کوڕ سەید قەیدار ھاشمی و ئەختەرخانم وەڵەدبەگی دۊەت فەتابەگ سەردار ئەکرەم بۊ و لە ساڵ ١٩١٣ زایینی لە دەوڵەت ئاواێ شارستان ڕەوانسەر ھاتە دنیا. لە مناڵییەو داڵگی کووچ دۊایی کرد و داڵگ باوگی ئێماتی کرد. لە دەورەێ جەوانیی وە خاتر شەڕەیل عەشایری و ھۊژم وە دەوڵەت ئاوا ناچار بۊ وەگەرد باوگ و برایل و خزمەیلی بچوودە عێراق.
سەید محەمەدتاھێر ھاشمی لە لاێ محەمەدڕەحیم ڕووحانی و بەدیعوزەمان سنەیی دەرسەیل ئسلامی خوەنی و بجگە وە زوان داڵگی خوەی ک کوردی بۊ وە فارسی و عەرەبی شارەزا بۊ و ھەڵوەس وەتیاد. ھەلەێوا لە خوەشنۊسی شارەزا بۊ و وەتایوەت شێوەێ نەسخ وە شێواز حافز عوسمان وە خاسی بەڵەێ بۊ و کتاوەیلێگ جوور قورئان، دلائل خیرات، صحیفه سجادیه و ... وە خوەشنۊسی نۊسابۊ. لە وارەێ تەسەوۆف خوەنین فرەێگ داشت و خاوەنڕا بۊ.
لە دەورەێ جەوانی لە شار کرماشان نیشتەجێ بۊ و بۊ وە کارمەن بانک کشاوەرزی لق کرماشان؛ وەلێ وە دۊاێ ماوەێگ وە خاتر نەچەترگیاێن ئەو پێشە وەگەرد ڕووحیەیلی دەس لەو کارە کیشا و چییە دەوڵەت ئاواێ باوان خوەی. لەو سەردەمە ک لە کرماشان بۊ وەگەرد غوڵامڕزا کەیوان سەمیعی ھەڵس و بنیش داشت. لە دەوڵەت ئاوا لە پەیرەوی لە نەریت بنەماڵەگەیان چییە ناو سڵسڵەێ قادریە. لە ساڵ ١٩٤٦ مەدرەسەێ دینی دەوڵەت ئاوا وازسازی و نووسازییەو کرد و کتاوخانەێ گەورەێگ لەورە کوو کردەو.