Wp/sdc/Aggi' accolthu un'ammentu

Aggi' accolthu un'ammentu (1991) è un poema sassaresu di l'autori Tino Grindi.

Testhu

Soru l'amori ridesci

a mandammi

chissu dozzi pinsamentu

chi arribbu

da candu t'aggiu cunnisciddu.

Difatti l'ammentu

è un diricaddu isciddassi

chi m'alluntana umbè

da la mè ulthima dì.

Candu pinsamentosu,

soggu isciddaddu

in una notti

dozzi e ciara senza ventu,

intendu parauri freschi di luna,

cumpagna e amigga

di tanti rasgiunamenti e...

d'occi chi fabiddabani cun passioni.

Tu... m'hai purthaddu la prima voltha

in una sera fumosa d'isthiu,

a ciacciarà cun "edda",

chi z'abbaiddaba tettara

cu la sò ucciadda viradda

e un sensu di pazi

z'abbauccaba finz'a manzaniri,

candu s'ippoglia e ischumpari

in un zeru limpidu e nettu

sulchaddu soru

da pizoni chizzurani

cirindroni e vagabundi.

Cussì, aggi' accolthu, pai tè

da la me vidda... chisth' ammentu!