Wp/rsk/Яким Костелник
| Яким Костелник | |
|---|---|
| Народзени | 1889. |
| Умар | 28. юния 1974. (85) |
| Державянство | австроугорске, югославянске |
| Язик творох | руски, горватски |
| Школа | Учительска школа, Крижевци |
| Период твореня | 1910—1954. |
| Жанри | просвита, култура |
| Поховани | на теметове у Вуковаре |
| Припознаня | Златни криж за заслуги од Папи Пия ХІ 1925. року |
Яким (Йоаким) Костелник (*1889—†28. юний 1974), учитель, културни дїяч, зачатнїк орґанизованого културно-просвитного живота у Миклошевцох.
Биоґрафия
Яким Костелник ше народзел 1889. року у Петровцох, у худобней селянскей фамилиї. Основну школу закончел у своїм валалє. После нїзшей ґимназиї закончел и препарандию (учительску школу) у Крижевцох. За учителя у Шидзе є поставени 6. октобра 1910. року и там службовал по 21. януар 1911. року. До Миклошевцох є премесцени за учителя 30. януара 1911. року.
Праве у чаше його службованя, вєдно зоз учительку Даницу Лабошову, национална свидомосц Руснацох у Миклошевцох почала роснуц. Обидвойо участвовали у общим описменьованю жительства, як предусловию за дальше националне освидомйованє и културне воздзвигованє. Тоту їх акцию прервала Перша шветова война.
По законченю воєних дїйох Яким Костелник ше одозвал на поволанку о. Дюри Биндаса и вєдно зоз Дюром Оросом, як представнїки Миклошевцох, участвовали 2. юлия 1919. року на Сновательней схадзки Руского народного просвитного дружтва. По шмерци учителя Емилияна Ґубаша, Яким Костелник вибрани 23. мая 1921. року за окончователя длужносци другого подпредсидателя Главного одбору РНПД, а на Трецей (виберанковей) схадзки 1922. року, и официйно є вибрани на тоту длужносц. За кратки час после того основал хор у Миклошевцох, котри мал перши явни наступ на Вельку ноц 1922. року. Його хор участвовал на святочносци у Руским Керестуре, з нагоди дзешецрочнїци РНПД-а, як найлєпши руски хор на тих просторох.
Зоз театралну режию Яким Костелник ше почал занїмац 6 роки познєйше и у чаше од 1928. по 1952. рок зоз миклошевскима дилетантами поставел на сцену 18 театрални фалати. Як длугорочни учитель здобул вельки угляд нє лєм при Миклошевчанох, алє и вельо ширше. За свою всестрану културно-просвитну дїялносц и посцигнути резултати 1925. року Папа Пий ХІ го одликовал зоз Златним крижом за заслуги, цо нє дожил вецей анї єден Руснак.
Як учитель у Миклошевцох Костелник робел од 1911. (лєм зоз полрочну прерву) аж по одход до пензиї 1947. року, а на културним полю предлужел робиц аж по 1954. рок, кед ше з фамилию преселєл до Вуковару.
Яким Костелник умар 28. юния 1974. року у Баня Луки, а поховани є 30. юния у Вуковаре.
Литература
- Дюра Латяк: Театрални живот Руснацох, часц І, Театрални музей Войводини и НВУ Руске слово, Нови Сад, 2003, боки 318-321.
- Дюра Лїкар: 85 роки културней дїялносци у Миклошевцох, Видаватель КУД Яким Ґовля, Миклошевци, 2005, особлїво боки 272-273.
- Тат’яна Лїкар: История розвою школства у Миклошевцох, Studia Ruthenica, ч. 3, 1992/1993, Дружтво за руски язик, литературу и културу, Нови Сад, 1993, б. 269-279.