Wp/rsk/Тащок

Самец

Тащок домашнї, тащок обични, лєм тащок (лат. Passer domesticus), припаднїк фамелиї тащкох (Passeridae). Населює векшину простору Европи и Азиї. Нєшка то найрозширенша птица на планети.

Чловек их нароком, лєбо нє, уведол до подсахарскей Африки, до векшей часци обидвох Америкох, на Нови Зеланд и до Австралиї. У Америки го наволую английским тащком же би го розликовали од автохтоного америцкого тащка. До городох Зєдинєних Державох евопски тащки масовно приношени медзи 1850. и 1875. роком же би зменшали число чкодлївцох. Гришка позно замеркована, а тащки ше уж одомашнєли. По 1883. рок их тримали за чкодлївцох, а їх уводзенє за катастрофу.

Самица

Опис и карменє

Домашнї тащок мала птица, длугока од 14 до 16 центиметри. Самец ма шиву коруну, шиву твар и брух, док карк и писки чарней фарби. През лєто, писки белаво-чарни, а ножки кафовей фарби. Вжиме, пирє блядей и смутней фарби, док писки жовкасто-кафови. Самица нє ма чарну фарбу на карку, пискох и глави, анї шиву коруну. Млади тащки маю цмейше кафово пирє, а писки им шветложовти.

Млади тащки ше кармя з лїчинками инсектох, углавним з лїчинками чкодлївцох. Одроснути, медзииншим, єдза нашенє и заренка, а кеди-нєкеди лапаю и мотилї. Вяри, тащкох прицагує квеце, окреме жовте, з котрим ше тиж кармя (шафран, яглїки).

Гнїздзенє

Тащки ше гнїздза на розличних местох: под стреху, у дзирох и пражнїнох будинкох на цагачох и блющу коло хижох, на морских стинох и гущавох. Гнїздо змесцене у цагачу лєбо у дзири часто розтрешене, направене зоз сламкох, шмеца и наполнєне зоз пирйом. Пространи и добре збудовани гнїзда тоти цо на древох и у гущавох, найвецей у валалских крайох.

Домашнї тащки барз аґресивни при однїманю за места дзе ше буду гнїздзиц и часто насилно знїщую гнїзда предходних бивательох, а дакеди директно правя свойо гнїздо на постояцим у хторим ше находза живи птички. Ластовки и птици зоз роду белавих птицох (лат. Sialia) окреме чувствительни на таке справованє.

Тащата у гнїздзе

Пейц до шейсц вайца од праху, вицифровани зоз чарно-шивима шпляхами на крем-билей подлоги то типични опис вайцох цо нєшу тащки. Варирую по велькосци и фурми як и по шпляхох. Домашнї тащок ма найкратши инкубациони период од шицких птицох - 10 до 12 днї. У Новей Анґлиї, у ЗАД, самица през лєто може знєсц и до 25 вайца.

Референци

1. https://www.nabluebirdsociety.org/sparrowcontrol.htm „House Sparrow Control

2. https://www.sialis.org/hosp/#managementchoices „House Sparrow History” by E.A. Zimmerman

3. https://archive.ph/20130114034945/www.bbc.co.uk/nature/wildfacts/factfiles/252.shtml BBC Домашнї тащок (профил)