Wp/rsk/Ризико
| Ризико | |
|---|---|
| Продукователь | Гасбро |
| Датум видаваня | 1957. рок |
| Жанри | Воєни бависка
Бависка на табли |
| Бавяче | 3-6 |
| Час поставяня | 5-10 минути |
| Намислова шанса | мала (руцанє коцкох) |
| Потребни схопносци | Дедукция |
Опис бависка
Ризико то дружтвене бависко хторе ше бави на табли (board game). Циль бависка перши виполнїц вицагнути задаток. Кажди задаток скрити по конєц бависка и бавяч роби на витвореню истого.
Бависко направене за найменєй трох, а найвецей шейсцох бавячох, од котрих кажди вибера свою фарбу: белаву, чарну, лилову, жовту, желєну або червену. На табли ше находзи стилизована карта швета котра подзелєна на реґиї. Шицки континенти (Сиверна и Южна Америки, Австралия, Азия, Африка и Европа) подзелєни на менши обласци и реґиї котри наволани по даєдних державох, покраїнох або ґеоґрафских обласцох.[1]
Попри фиґуркох войска, дзе єден вояк представя єден батальон, конянїк пейц батальони и дзело дзешец батальони и подлоги на хторей ше бави, у шкатули єст два шпили картох и 5 коцки. У єдним шпилу єст задатки чийо вивершенє конєчни циль бависка, у другим шпилу картох нарисовани гранїци обласцох зоз їх меном, а при сподку каждей карти слика єдней од фиґуркох. Бависко почина так же ше ровномирно подзеля карти зоз обласцами (держави або реґиї) и єднаке число батальнох. После того кажди бавяч зоз шпилу задаткох вицагнє єдну карту котра представя його задаток у бависку. На картох задаткох понукнути и алтернативи (напр. освойце 24 обласци або знїщце желєну армию и под.). Напади и одбрана у бависку виводза ше зоз руцаньом коцкох и успишносц тих нападох або одбрани завиши од достатого числа котри муши буц векши од процивнїкового же би бул успишнєйши. Нападач зоз трома або вецей батальонами напада зоз трома коцками, док ше процивнїк бранї зоз двома або єдну, завиши од того кельо ма батальони на нападнутей териториї. После каждого нападу нападач може преґруповац войско, алє лєм з єдней до другей сушедней териториї, дзе после того цага карту зоз шпилу обласци и войска. Зоз тим закончує свой круг у бависку.[2]
Карти котри ше збераю после каждого преґрупованя служа же би ше обновели воєни моци. Кед бавяч назбера три исти карти, шлїдуюцираз кед придзе на ньго шор за напад достанє тельо войска у зависносци яки символ на тих картох. Под час нападу кед бавяч руци коцку и видзе му число 3, а процивнїкови число 1, процивнїк траци 2 тенки, а кед нападач руци коцку и достанє число 3, а процивнїк число 2, процивнїк траци 1 тенк. Исто так, бавяч котри завежнє цали континент и затрима го по идуце руцанє, достава войско у вредносци котра означена на плочи за бавенє за кажди окремни континент. Тоти вредносци виражени пропорционално од чежини забераня, односно затримованя континента.
Кед бавяч виполнї, лєм йому познати, задаток, вон одкрива свою карту и указує ю як доказ же виполнєл мисию и бависко ше закончує.