Wp/rsk/Полка
.jpg)
Полка[edit | edit source]
Полка весели и живши танєц централноевропкого региона хтори популарни широм Европи и Америки. Полка настала на початку 19. вику а походзенє єй зоз Ческей. Полка ше розширела по велїх державох а даєдни вариянти полки мож стретнуц аж и у Велькей Британиї и Мексику.
Характеристики полки[edit | edit source]
Полка то танєц веселого и темпераментного характера, швидшого темпа, написана у дводїлней мери, найчастейше у 2/4 такту. Ма наглашени ритмични фиґури. Як народни танєц мала форму кола, а под назву полка стретаме ю од першей половки 19 вику, точнєйше после 1835. року. Теди є швидко прилапйована по европопских городох Польскей, Нємецкей, Италиї и других державох и постала барз популарна.
Прилапена є як танєц хтори ше танцовало у парох на розвагох, на балских вешельох, на дворох у салонох и векших салох аристокрацийного дружтва. Патрело ше на полку як на скандалозни танєц за гевтот час, пре способ блїзкого триманя танцошох-партнерох у танцу. Полка була наисце тип анимираного танца. Тото цо було значне за єй популарносц у Европи и индзей, то моцни упечатлїви ритем, у 2/4 такту, брилянтни темпо, рижни фиґури танца, шарм танцошких рухох и радосц хтору подкрипела музика. Шицки тоти елементи спричинєли же би ше полка доживйовала и була прилапена на єден нєпоштредни, природни способ.
До уметнїцкей музики полку уведол Бедржих Сметана-чески композитор. После нього полку ше находзи у дїлох А. Дворжака, З. Фибицха, И. Стравинского, тиж и у дїлох Йогана Штрауса младшого и старшого и велїх других.
Мено и назва полки походзи зоз Ческей од слова пулка цо значи и одноши ше на мали половки крочая у танцу. Тиж на ческим язику полка ма значенє и за жену зоз Польскей-Полькиню, та часто єст забунки же походзенє танца полка зоз держави Польска.