Wp/rsk/Мария Горняк Пушкаш
| Мария Горняк Пушкаш | |
|---|---|
 | |
| Народзена | 16. авґуста 1931, Дюрдьов |
| Умарла | 20. фебруара 2017 (85) |
| Державянство | Югославия, Сербия |
| Язик творох | руски |
| Школа | Штредня економска школа,
Висша педаґоґийна школа |
| Универзитет | Филозофским факултету, ґрупа за южнославянски язики и общу линґвистику |
| Период твореня | 1955—1990. |
| Жанри | проза, радио емисиї |
| Похована | у Новим Садзе |
Мария Горняк Пушкаш (* 16. авґуста 1931, Дюрдьов—† 20. фебруара 2017, Нови Сад) - новинарка, редакторка радио емисийох, писателька и ґлумица-аматер.
Биоґрафия и образованє
Мария Пушкаш (дзивоцке Горняк)[1] професийно патрене, була перша жена-новинарка медзи Руснацами у Войводини. Народзела ше 16. авґуста 1931. року у Дюрдьове и там закончела шейсц класи основней школи а малу матуру у Руским Керестуре 1946. У Новим Садзе 1950. закончела економску штредню школу. Попри роботи вона ше уписала на Висшу педаґоґийну школу хтору закончела 1956. року а 1967. року дипломовала на новосадским Филозофским факултету на ґрупи за южнославянски язики и общу линґвистику. Була активна и у театралней дїялносци Дюрдьова як ґлумица-аматер, а з тоту активносцу од 1950. року предлужела и у Новим Садзе, у КПД Руснацох Максим Горки.
Роботна кариєра
По законченю економскей штреднєй школи у септембру 1950 почала робиц у Рускей редакциї Радио Нового Саду. На початку пейдзешатих рокох пририхтовала и музични емисиї на руским язику, бул то час кед ше програму емитовало на живо. И у периодзе од 1955. року, кед утаргнути руски информативни емисиї на Радио Новим Садзе, Мария Горняк Пушкаш остала робиц у РНС. Пририхтовала и водзела нашо музични емисиї и робела у новинарскей документациї.
1966. року на Радио Новим Садзе обновени бешедни емисиї на руским язику та Мария Горняк Пушкаш прешла до Руске редакциї РНС и почала пририхтовац емисиї за дзеци алє робела, по потреби, и на других емисийох. Була длугорочна редакторка руских емисийох за дзеци и запаметана є и по тим же знала анґажовац на дзешатки дзеци у емисиї за дзеци, вона у нїх розвивала руски дух и позитивну дзеку за сотруднїцтво та вше мала надосц дзеци як помоц у роботи на емисиї.
Авторка є вецей текстох котри обявйовала у периодики на руским, сербским, словацким, мадярским, албанским, македонским и українским язику. Писала и кратки приповедки за дзеци. Року 1973. обявена єй збирка кратких приповедкох за дзеци На рукох мацериних.[2]
Цали свой роботни вик Мария Горняк Пушкаш препровадзела у Радио Новим Садзе. До пензиї пошла 29.06.1990. року.
Умарла 20. фебруара 2017. року.
Вонкашнї вязи
- У нащиви - Мария Горняк Пушкаш, портрет новинарки, ТВ Войводина, Нови Сад
- Умарла Мария Горняк, Рутенпрес, 21. фебрара 2017. року
Референци
- ↑ Мария Горняк Пушкаш, биоґрафия на НАР
- ↑ Ирина Гарди Ковачевич:Препатрунок стану дзецинскей литератури, Мария Горняк, Творчосц за 1979 рок, б.37