Wp/rsk/Ирена Колесар
| Ирена Колесар | |
|---|---|
 | |
| Народзена | 22. новембра 1925. |
| Умарла | 3. септембра 2002. (77) |
| Державянство | югославянске, горватске |
| Язик творох | горватски, сербски |
| Жанри | филм, театер, радио |
| Похована | на заґребским теметове
Мироґой |
| Припознаня | Златна арена за доприношенє
филмскому творительству |
Ирена Колесар (*22. новембер 1925—†3. септембер 2002.), югославянска филмска и театрална ґлумица
Биоґрафия
Ирена Колесар (Колєсар) народзена у Славонским броду 22. новембра 1925. року. Оцец Михайло (Мия) и мац Розалия, Нємица родз. Струмберґер. У Беркасове, родзеним месце єй оца, Ирена як дзивчатко препровадзала лєтнї розпусти у своєй баби. Од нєй Ирена научела даскельо руски писньочки хтори знала напамят и у часох кед постала позната ґлумица а кед нащивела Руски Керестур и Петровци.
Ирена ше як дзевецрочне дзивче зоз родичами преселєла до Заґребу[1]. До Народно ошлєбодительного руху ше укапчала як 17 рочна дзивка. На предклад команданта Тринастей пролетерскей бриґади Милана Жежеля Ирена постала членїца партизанскей тетралней ґрупи. По законченю войни Ирена Колесар ступела до ґлумецкого ансамбла Заґребского казалишта[2].
Кариєра у театре и на филму
На поволанку режисера Вєкослава Африча Ирена одбавела главну женску улогу у першим югославянским повойновим филму Славица. Премиєра филма була на яр 1947. року и потим тот филм видзели прейґ 2 милиони патрачох а Ирена Колесар постала и остала права и перша ґлумица послевойнового югославянского филма. Пре партизанску биоґрафию єй були отворени велї дзвери, алє вона тото нє хасновала анї у таких евентуалних вигодносцох нє уживала. И попри велькей популарносци хтору єй осиґурала улога Славици у истомменним филму Ирена Колєсар ше тримала свойого особного порядку вредносцох. Єй були вельо важнєйши похвали хтори достала за ґлуму Лаури у Склєняней менажериї дзе ґлумела вєдно зоз Белу Крлежа або Гедвиґу у Дзивей качки у режиї Бранка Ґавели, як наступи пред филмскима камерами. После спомнутих улогох Ирена Колесар постала нєприкосновена перша дама заґребскей театралней сцени.
На поволанку Бояна Ступици Ирена Колесар 1953. року пришла до Беоґраду и постала теди ґлумица новоустановеного Югославянского драмского театру дзе остала до пензионованя 1973. року. У своєй кариєри була замеркована як Пера (М. Држич, Дундо Мароє), Юлия, Гермия, Офелия, Дездемона и Лейди Ен (В. Шекспир, Ромео и Юлия, Сон лєтнєй ноци, Гамлет, Отело и Ричард III), Дзивка (Т. Вилиямс, Склєняна менажерия) и други. Єй Офелия у Шекспировим Гамлету режисера Марка Фотеза, спрам думаня шветових шекспиролоґох, єдна з найлєпше одбавених. У другей половки 50-тих на Дубровецких лєтнїх бавискох роками бавела Офелию у Гамлету и була тримана за вельку гвизду того фестивала[3].
Под час своєй театралней кариєри одбавела 76 улоги, 6 главни женски улоги у филмох и коло двацец у ТВ драмох и серийох. Филмски фестивал у Пули єй 1981. року додзелєл и Златну арену за доприношенє филмскому творительству.
Театрална ґрупа младих ґлумцох зоз Сримскей Митровици ноши мено Ирена Колесар.
Ирена Колесар умарла у Заґребе 3. септембра 2002. року у доме за старих. Похована є на заґребским теметове Мирогой.
Филмоґрафия
| Рок | Назва | Улога |
|---|---|---|
| 1947. | Славица | Славица |
| 1948. | Безсмертна младосц | Зорица |
| 1950. | Белави9 | Нена |
| 1953. | Камени горизонти | Мала |
| 1956. | Остатнї гайзибански шини | Єлена Миятович |
| 1957. | Врацим ше | Яна Дуйшин, супруга |
| 1960. | Сплєтка и любов (ТВ) | |
| 1961. | Нє губ ми щесце | |
| 1963. | Инкоґнито | |
| 1963. | Чловек и жвир | Парасткиня |
| 1966. | Ґалски когут (ТВ серия) | |
| 1967. | Нїґда нє мож знац | |
| 1968. | Нє бав ше з любову (ТВ) | |
| 1968. | Страхота | |
| 1971. | Капитан зоз Кепеника | |
| 1972. | Лавочка у Юрєвскей (серия) | |
| 1972. | Твари | |
| 1981. | Бачи Ваня | Марина |
Вонкашнї вязи
- Приповедка о славней Офелиї - Блиц, Нарциса Божич, 19 фебруар 2014.
- Як ше Ирена Колесар преславела зоз Славицу и упрепасцела филмску кариєру, Национал ч. 356, Ненад Полимац, 11. септембер 2002
- Ирена Колесар, филмоґрафия
- Kolesar, Irena. -www.enciklopedija.hr, Лексикоґрафски завод Мирослав Крилежа, 2021.
- Ирена Колесар, sr.wikipedia.org, 3 юний 2007.
- Ирена КОЛЕСАР, вебсајт НАР, Новинарска Асоцияция Руснацох, 28. децембра 2017.
Референци
- ↑ Ирена Колесар, югославянска ґлумица хтора нєсправедлїво забута, sremskomitrovačka Gradska M televizija
- ↑ Ирена Колесар, Информативни портал РТВ центер Срим
- ↑ Ирена Колесар - символ виталносци єдного часу, Дневник, Нови Сад