Wp/rsk/Дюра Шовш


Дюра Шовш

Народзени	19. октобра 1929.
Умар	11. априла 2020. (91)
Державянство	югославянске, америцке
Язик творох	руски, анґлийски
Школа	Ґимназия, Вербас и Нови Сад
Универзитет	Ветеринарски факултет, Беоґрад
Период твореня	1956—1997
Жанри	ветерина, инспекция
Поховани	Ґрин Бей (Висконсин)

Дюра Шовш (*19. октобер 1929—†11. април 2020), ветеринар, правдиви руски интелектуалєц и почитовани предняк медзи виселєнцами у ЗАД и Канади.

Биоґрафия

Дюра Шовш ше народзел 19. октобра 1929. року у Кули. Оцец Кирил и мац Феброна, родз. Чижмар. Дюра мал, по мацери, старшу полушестру Амалку родз. Джуня. Як хлапец вон часто одходзел до баби до Руского Керестура дзе упознал широки круг приятельох. Основну школу Дюра Шовш закончел у Кули и вєшенї 1940. року ше уписал до ґимназиї у Вербаше. Идуцого року почала война и Мадяре окупировали Бачку та Дюра Шовш предлужел ходзиц у Вербаше до ґимназиї на мадярским язику. До пиятей класи ґимназиї Дюра почал ходзиц у Вербаше у септембре 1944. року, мешац и пол, вец пришло ошлєбодзенє. На яр 1945. року, даґдзе у марцу, вон прешол до хлопскей ґимназиї у Новим Садзе и ту закончел пияту и шесту класу ґимназиї. Остатнї два роки ґимназиї, 1947. и 1948. року Дюра Шовш закончел у Вербаше. После законченя ґимназиї Дюра Шовш пошол на студиї ветерини у Беоґрадзе.

При концу студийох Дюра Шовш ше оженєл зоз Веру родз. Цвеїч. У малженстве мали сина Александра.

Роботна кариєра

Дюра Шовш дипломовал як ветеринар 1956. року и свою першу роботу достал на Косанчичу (Ризкаши) при Руским Керестуре. Робел лєм даскельо мешаци та пошол до войска. После одслуженя воєного року Дюра ше врацел до Руского Керестура дзе робел як ветринар у валалє и на Косанчичу. Штредком 1959. року прешол зоз супругу жиц и робиц до Вербасу. Робел як ветеринар у Месовей индустриї Карнекс а, попри того, преподавал у школи школярох у привреди и бул инспектор за месо.

З Вербасу Дюра Шовш пошол на роботу до Швайцарскей дзе остал два роки, 1968. и 1969. Його супруга Вера жила у Вербаше зоз сином Александром хтори рушел до основней школи. Под час роботи у Швайцарскей Дюра Шовш послал молбу до америцкого конзулату же би му и його фамелиї було одобрене уселєнє до ЗАД. Молба му була одобрена и вон, зоз супругу и сином, 1970. року одпутовали до ЗАД.

Фамелия Шовш ше населєла до варошу Ґрин Бей у союзней держави Висконсин.

Нєодлуга Дюра зробел царски рез на крави, а таке теди у тей часци Америки ветеринаре нє робели, та ше о тим його подняцу нашироко дознало. Теди му були отворени шицки дзвери, Дюра бул почитовани од шицких у його фаху.

Дюра Шовш робел як ветеринар а, понеже мал лиценцу за роботу санитарного инспектора вон, як инспектор, путовал по цалей держави Висконсин, препатрал месо у вельких клальньох и, кед було шицко у порядку, вон одобровал продукцию.

Дюра Шовш путовал по тей часци Америки, одходзел и до Канади медзи наших виселєнцох, и бул почитовани медзи виселєнцами як єден з преднякох за хторих ше зна у старим и у новим краю. Дюра Шовш бул одлучни, з дзекеди експлозвним темпераментом, отворени за контакти з другима, бешедлїви, полни самодовирия, безкрайно любопитлїви. Бул вше порихтани учиц и освойовац нови горизонти. Бул почитовани и як чловек и як фаховец.

Дюра Шовш 1997. року пошол до пензиї. Активносц медзи виселєнцами предлужел окончовац прейґ интернета и з особнима контактами ище полни 20. роки.

Дюра Шовш умар 11. априла 2020. року у варошу Ґрин Бей.

Ґалерия

Дюра Шовш як матурант ґимназиї

Вонкашнї вязи

Гавриїл Колєсар, Торонто, Канада: Радосци и смутки двох руских преднякох у виселєнстве: др Владимир Солонар (1926-2012), патолоґ и Дюра Шовш (1929-2020), ветеринар, Studia Ruthenica, ч. 26, 2021, Дружтво за руски язик, литературу и културу, б. 248.