Wp/rsk/Дружтво писательох Войводини

Дружтво писательох Войводини (скр. ДПВ) (сер. Друштво књижевника Војводине, мадь. Vajdasági írók egyesűlete, рум. Asociaţia Scriitorilor din Voivodina, сло. Spolok spisovateľov Voivodiny) уметнїцке здруженє зоз автономней покраїни Войводини, Република Сербия. То асоцияция войводянских писательох, а облапя писательох хтори пишу на шицких урядових язикох АП Войводини.

Основни информациї

ДПВ ма у составе коло 490 членох хтори пишу на шицких урядових язикох хтори ше хаснує у Войводини. Векшина спомедзи нїх пишу на сербским, а досц велька ґрупа на мадярским язику. Менше число авторох на язикох других меншинох: на горватским, словацким, румунским и руским язику.

Дружтво ма у своїм составе и коло седемдзешат литературних прекладачох. Секция войводянских писательох ше видвоєла зоз Здруженя писательох Сербиї 1966. року, а 1976. року оформене Дружтво писательох и литературних прекладательох Войводини. Шедзиско Дружтва у улїчки Братох Рибникар 5, Нови Сад.

Терашнї предсидатель ДПВ поета и есеїст Йован Зивлак, подпредсидателє Франя Петринович, прозни писатель и Янош Баняї, критичар и есеїст.

ДПВ у своїм вецейдеценийским дїлованю орґанизовало значни литературни манифестациї (Литературна колония у Чортановцох, литературни каравани, литературни вечари, промоциї кнїжкох, Конґрес писательох Югославиї). ДПВ иницировало, видавало або совидавало велї литературни публикациї.

Дружтво писательох Войводини видава на сербским язику углядни часопис Златна греда (2001.). Часопис ше занїма зоз литературу, уметносцу и зоз теорию литератури. Главни и одвичательни редактор Златней греди Йован Зивлак.

Медзинародни новосадски литературни фествал основани 2006. року и представя значних авторох зоз жеми и швета. Отримує ше каждого року остатнього тижня у авґусту.

Од 2008. року орґанизує манифестациї з нагоди Шветового дня поезиї.

Награди хтори додзелює ДПВ

• Бранкова награда (од 1954.) за найлєпшу першу поетску кнїжку обявену на сербским язику авторох по 29 роки старосци.
• награди Дружтва писательох Войводини за животне дїло (од 1980.), за кнїжку на сербским язику и за преклад рока, а од 2003. року награди за найлєпши кнїжки на язикох националних меншинох : награду Илия Окруґлич Сриємац за кнїжку на горватским (установена 2010. на предлог Петка Войнича Пурчара), награду Istvan Koncz за кнїжку на мадярским язику, награду Paljo Bohuš за кнїжку на словацким язику, награду Vasile Vasko Popa за кнїжку на румунским и награду Мирослав Стрибер за кнїжку на руским язику. Награди за меншини ше додзелюю периодично, од двох по штири роки.
• Медзинародна награда за литературу Нови Сад хтору ше додзелює на Медзинародним новосадским литературним фестивалу.

Вонкашнї вязи

Урядови веб боки ДПВ