Wp/rsk/Доберман

Доберман
Алтернативни мена	Доберман пинчер
Жем походзеня	Нємецка
Найчастейше назвиско	Dobie
Класификация	ФЦИ: Ґрупа 2 секция 1 # AKC: Working ANKC: Group 6 (Utility) CKC: Group 3 - Working Dogs KC (UK): Working NZKC: Utility UKC: Guardian Dogs
Одховйовацки стандарди (вонкашнї вязи)	FCI,AKC,ANKC,CKC, KC(UK),NZKC,UKC

Доберман, лєбо доберман пинчер, то пес хтори настал з мишаньом вецей файтох псох. Доберман обично пес чувар лєбо полицийни пес и ма репутацию пса хтори вирни фамелиї и панови. Понеже доберман найчастейше пес чувар и пре його даяки улоги на филмским платну, велї людзе ше боя од добермана; велї нє розумя яки вон уствари. У сущносци, доберман интелиґентни и уважни пес котри напада лєм кед почувствує же його власнїцтво або фамелия у опасносци.

Випатрунок

Сука до гребеня висока коло 65-70 цм и чежка од 40 до 47 кґ, док за пса (самца) стандардна висина до гребеня хрибта од 71 до 76 цм (толеранция +2 цм), а чежина 51-60 кґ.

Фарба

Векшина людзох позна добермана як чарного пса зоз кафову платку. Медзитим, иснованє двох розличних ґенох за фарбу спричинює иснованє штирох розличних фенотипох фарби при доберманох. Традиционална фарба ше зявює кед алели обидвох ґенох доминантни и таки доберман ше звичайно чарни. Кед алел єного ґена рецесивни доберман червени (точнєйше, червено-кафови зоз бронзовима платками), а кед алел другого рецесивни, доберман шиви (белави). Найменєй заступена комбинация алелу (обидва рецесивни) одредзує добермана блядокафовей фарби (даґдзе познати и як чоколадови).

Тераз ше преширело хованє и предаванє пиятей сорти добермана, наволани били добермани. Добермани тей фарби маю мутацию, котра нєзависно од ґенотипа гоч хторей од тих двох ґенох за фарбу, спричинює стварянє протеина пиґменту т. є. животиня албино. Гоч велї потенциялни власнїки доберманох тримаю же фарба красна, албино доберман треба же би ше цо менєй бул на слунку.

Хвост

Велї котри видзели же добермани маю лєм дзешец цм длугоки хвости, може их нєсподзивац податок же ше доберман родзи з хвостом котри длугши як при векшини других файтох. Доберман пинчер после даскельо дньох после родзеня поддани купираню, поступку у котрим му ше одрезує векша часц хвоста. Обяшнєнє за тото то ,,випатрунок” котри би пес требал мац, так як Луис Доберман першобутно задумал за пса. Пре тото пес випатра нєзастрашиво и моцно.

Попри тих причинох за третиранє животиньох на таки, велї би гварели нєгумани способ, постої и практичнєйша причина - склонї ше зґодна ,,ручка” за котру би криминалци лєбо нападаче могли зґрабиц животиню док є чувар або ма полицийну длужносц. Ище єдна причина же ше псом котри маю тип хвоста як доберман (длугоки зоз барз мало шерсци лєбо месом котри го прекрива) же часто маю ,,поламани хвост”.

Поламани хвост може буц шицко од стварного ламаня хвостових персценьох та до барз частих покалїченьох скори, котрих чежко залїчиц пре нєможлївосц завиваня и защити хвоста. Гоч цо людзе думали о тим, мало купцох добермана ма вибор цо ше дотика длужини хвоста; купиранє ше муши одробиц швидко после родзеня пса, цо значи же одлуку вше приноши виховйовач скорей як цо пес будзе понукани на предай.

Уха

Тото медзитим нє важи за резанє ухох, котрих треба одрезац медзи 7. и 9. тижньом, алє ше можу одрезац и после 6 мешацох и єдного року од родзеня пса, та ше обично препущує на дзеку власнїка. Резанє котре окончене после 12. тижня у вельким чишлє ше нє уда т. є. уха нє постаню випросцени. Власнїки у вше векшим чишлє вибераю най любимцу нє режу уха, понеже поступок досц боляци за животиню. Поступок уключує резанє часцох ухох и випросцованя зоз помоцу потримовача, пантлїки лєбо фатьолу, цо допущує похребцини най ше розвиє до випросценого положеня як щенє рошнє.

Щенє и далєй будзе мац способносц най спущи уха на задок або долу. Поступок тирва од даскелїх тижньох до пар мешацох. Кед ше пантлїка пребарз зацагнє може присц до проблему у прецеканю креви, прето то муши поробиц ветеринар або виховйовач з искуством.

Гоч нє реализоване виглєдованє котре би поровнало доберманох з подрезанима и нєподрезанима ухами, вери ше же подрезованє зменшує зявенє ухових инфекцийох и подлїва (кревових мехиркох котри настали з очкодованьом уха, найчастейше пре моцни трешеня глави).

Поступки подрезованя ухох и купираня хвоста велїм ше видзи же то нєгумане, алє традиционални доберман вше мал и єдно и друге. У даєдних жемох тоти поступки нєзаконїти, алє на даяких виставох, поготов у ЗАД, добермани ше можу змагац лєм кед маю традиционални випатрунок.

Здравє

Обчековани животни вик здравого добермана коло 12 роки, з тим же векшина доберманох здохнє помедзи 11. и 13. року. Звичайни здравствени проблеми то преширена кардиомиопатия, Фон Вилебрандова хорота (поремеценє у кревоцеку котре ше може тестовац з ґенетичним тестом) и проблеми з простату; док ридши то хипотиреоза, рак, дисплазия клубох, а при белавих и блядокафових и алопеция (лисосц, опадованє шерсци).

Темперамент

Гоч ше трима же є роботни пес, доберман мета стереотипох о суровосци и аґресиї. Як пес чувар доберман першобутно ховани лєм за тоту наменку. Мушел буц векши и страшнєйши, нєзастрашуюци и дзечни бранїц власнїка, алє же би бул послушни и витренирани же би поступел лєм по команди. Тоти прикмети послужели добeрманови же би постал одлични пес чувар, полицийни або воєни пес, алє го нє препоруручую за любимца. Алє, остатнї децениї доберман пре свою велькосц, кратку шерсц и интелиґенцию постал домашнї пес. Гоч є познати по аґресивносци, доберман нєвироятно вирни пес и барз швидко научи почитовац и защицовац свойого власнїка.

История

Добермана перши виховал Фридрих Луис Доберман у Нємецкей коло 1890. року. Як порцийошу, полицайцу, а дакеди и як ноцному чуварови, бул му потребни пес за защиту, та одлучел же вихова нову расу, котра би по його думаню була идеална комбинация моци, вирносци, интелиґенциї и шмелосци. Розвой и усовершованє раси предлужели Ото Ґелер и Филип Ґрининґ.

Вери ше же доберман настал зоз крижаньом вецей расох котри мали прикмети котри ше глєдали у доберману, уключуюци и пинчера, ротвайлера, туриншского овчара, чарного харта, нємецку доґу, ваймарского поентера и нємецкого овчара. Точне одношенє мишанїни креви, а и раси, остали нєпознати по нєшка, гоч велї фаховци веря же доберман комбинация найменєй штирох од спомнутих расох. Єдини винїмок то документоване крижанє зоз хартом. Тиж розширене думанє же нємецки овчар дал найвецей ґени при вихованю тей раси.

Вонкашнї вязи

Доберман (язик: русийски)