Wp/rsk/Дворeц Фонтенбло

Дворец Фонтенбло
Шветове нашлїдство Унеска
Урядове мено	Дворец и парк Фонтенбло
Место	Фонтенбло, Французка
Координати	48° 24′ 08″ С; 2° 42′ 02″ В
Поверхносц	144 ha
Уключує	Gallery of Francis I Musée national du Châtea de Fontainebleau

Дворeц Фонтенбло (фр. Château de Fontainebleau) ше находзи у истоименним месце у рамику паризкей аґломерациї, у Французкей. Мено (фр. Château de Fontainebleau) виведзене зоз fontaine belle eau жридло красней води. Находзи ше у парку Фонтенбло дзе кральове приходзели ловиц. Од 1981. находзи ше на УНЕСКО лїстини Шветового нашлїдства.

То ренесансни кральовски дворец Франсои I Французкого, започати 1528. року и нєпреривно добудовйовани шлїдуюци 200 роки. У дворцу жили велї французки кральове, од Франсои I по Наполеона III. Ту родзени кральове Филип IV Красни, Анри III и Луй XIII, а Филип ту и умар. Кристина од Шведскей роками жила у Фонтенблоу после своєй абдикациї 1654. Папа Пий VII два роки ту жил у зарабенїцтве (1812-1814).

История

Краль Франсоа I жадал створиц будинок у стилу ренесанси. Звалєл постояци штредньовиковни дворец, окрем кули и єдней часци на сиверу. Обявел поволанку италиянским уметнїком же би проєктовали и ушорели нову палату у парку у котрим краль любел ловиц. З роботу руководзели велї архитектове: Флоримон де Шампеверн (1528-1531), Пјер Пол (1528-1535), Саломон дез Ербен (од 1543). Нєможлїве точно утвердзиц шицких котри допринєсли вибудови. Найзначнєйши будовнї коло „Овалного двора“ проєктовал Жил ле Бретон. Краль жадал же би дворец постал ґалерия ренесансней уметносци. Зазберовал уметнїцки дїла зоз Италиї, антични и сучасни, наручовал дїла на митолоґийни теми, до Французкей принєсол ґипсово оциски античних скулптурох котри рекреовал до бронзи (Лаокон, Аполон Белведере). Ґалерию Франсоа I зоз фресками украшел Росо Фйорентино.

Син и нашлїднїк краля Франсоа, Анри II, комплетовал палату з вибудову дворскей каплїци и сали за бали. Вон поставел Филипа Делорма за нового управителя роботох, котри на тим положеню бул по 1559. У тим периодзе главни декоратере були Николо дел Абате и Франческо Приматичо.

Анри IV преширел палату зоз канцелариями державних службенїкох, як и зоз завартим тениским бавилїщом. Теди у палати могло жиц коло 1000 людзе. Декорацию у тим чаше робели паризки уметники инспировани зоз фламанску уметносцу познати як Друга фонтенблоовска школа. Луй XIV любел приходзиц до Фонтенблоа дзе вибудовал театер. Дня 18. октобра 1685. у тим дворцу подписани Едикт зоз Фонтемблоа зоз котрим понїщени Нантски Едикт и забранєни протестантизем у Французкей.

Под час Французкей револуциї мебель зоз палати розпредани. Палата була касарня и гарешт. Наполеон I од 1805. врацел значносц тей палати котра постала центер политичного и културного живота. У Фонтенблоу подписал и свою абдикацию 1814. року.

Уметнїцка значносц

Дворец Фонтенбло перши приклад италиянскей маниристичней декоративней уметносци и схопносци ушореня паркох, котри прилагодзени французкому смаку. Французки маниризем 16. вика прето и достал назву „фонтенблоовски стил“, котри у малярстве дал Першу фонтенблоовску школу. Найвчаснєйши приклад того стилу то ґалерия Франсои I (будована помедзи 1533. и 1540). Стил комбиновал скулптуру, обробок металу, малярство, штуко декорацию и столарство. У гортикултури уведол ґеометрийне ушоренє паркох. Нукашня декорация комбиновала алеґорийни слики у розкошних ґипсових рамох комбинованих зоз арабесками и ґротесками. Женски фиґури представени так же маю характеристични мали прибрани глави на дугокей шиї, видлужени труп и екстремитети и манди високо поставени перши. Зоз своїм випатрунком вони здогадую на прекрасни привидзеня у позней ґотики. Стил розвити у Фонтенблоу ше преширел по сиверних жемох, а окреме постал популарни у Антверпену, Нємецкей и Лондону.

Ґалерия

• 
  Червени салон
• 
  Библиотека

• 
  Кральова спальня
• 
  Сала з пристолом

Вонкашнї вязи

• Музей дворца Фонтенбло
• Профил зоз презентациї Шветового нашлїдства