Wp/rsk/Грекокатолїцка епархия у Крижевцох
| Крижевска епархия | |
|---|---|
 Катедрала Св. Тройци у Крижевцох, Горватска
| |
| Локация | |
| Територия
Церковна покраїна |
Горватска, Словения, Босна и Герцеґовина
Заґреб |
| Статистични податки | |
| Популация
Парохиї |
(податок зоз 2013. року)
21.270 44 |
| Детальнєйша информация | |
| Виросповиданє
Обряд
Кокатедрала
Мирянски священїки |
Католїцка церква
Византийски обряд
Катедрала Св. Тройци у Крижевцох, Горватска Кокатедрала Св. Кирила и Методия, Заґреб 28
|
| Актуални управителє | |
| Папа
Епарх Епарх Архиепископ митрополит Владика емеритус |
Франсис
Милан Стипич Йосип Бозанчич
|
| Вебсайт | |
Грекокатолїцка епархия у Крижевцох административни ентитет за християнох восточного обряду у униї зоз Римом хтори ше находза на териториї предходней Югославиї.
Историйни прегляд
Епархия походзи з першей половки седемнастого вику кед Рим формовал Марчанску або Вратаньску епархию за православних Сербох и Горватох (познатих як ускоки и Жумберчанє) хтори сцекли од отоманскей турскей власци, населєли ше у австрийским царстве и прилапели церковну унию зоз Римом. Владикове Марчи/Вратанї були у початку под юрисдикцию римокатолїцких владикох зоз Заґребу по 1777. рок кед Рим формовал нєзависну епархию у Крижевцох за шицких грекокатолїкох хтори у тот час жили у австро-габзбурґским царстве, т.є. на териториї Горватскей-Славониї и Бачкей (т.є. нєшкайшей Войводини, реґиону заходно од Дунаю) у Мадярским кральовстве. Зоз приблїжно 5000 вирних у новей епархиї коло штири пиятини були Жумберчанє (Горвати), хтори жили у Славониї у Горватскей, а остаток були Русини/Руснаци, хтори ше од 1746. року почали насельовац до Бачкей, одкадз ше дзепоєдни преселєли до сушедних реґионох - восточней Славониї и Сриму. За тоти три реґиони (Бачку, Срим, восточну Славонию) Крижевска епархия основала такволани Осєцки викарият. По Першей шветовей войни Рим преширел уплїв Крижевскей епархиї на цалу територию новей держави Югославиї. Прето епархия уключела и вирних Українцох и дзепоєдних Лемкох зоз Галичини, хтори ше преселєли до Босни на концу дзеветнастого и на початку двацетого вику, як и дзепоєдних православних вирнїкох у Македониї хтори 1860. року прилапели унию зоз Римом. По стредок двацетого вику национални состав епархиї ше пременєл; од 50000 вирних у тот час прейґ половки були войводянски Русини/Руснаци, док остаток були Горвати, Українци и Македонци.
Шедзиско епархиї
Од початку шедзиско епархиї було у варощику Крижевци у Горватскей (восточна Славония); єй священїки ше учели у Грекокатолїцкей семинариї у Заґребе хтора датує зоз 1690. року. Од першого владики Василия Божичковича (1777-1785) по 1891. рок шицки владикове епархиї були горватского походзеня; шицки познєйши, окрем єдного, були русинского/руского походзеня зоз Войводини: Дионизий Няради (1920-1940), Гавриїл Букатко (1952-1981), Йоаким Сеґеди (1981-1984) и Славомир Микловш (1983-2009). И попри того же дзепоєдни з тих владикох здобули висше теолоґийне образованє у українских грекокатолїцких семинарийох або були прихильни ґу українскей националней ориєнтациї, шицки моцно потримовали локалну руску културу и язик. Вирски публикациї за Руснацох вше обявйовани на їх язику, церковнославянски ше хаснує у служби Божей, а руски у казаньох и на церковних преславох. Владика Няради бул вельки потримовач першей културней орґанизациї Руснацох, Руского народного просвитного дружтва, Просвити, чийо двоме предсидателє, Михайло Мудри и Дюра Биндас, були грекокатолїцки священїки Крижевскей епархиї. Просвитово клерикални вождове дали значне доприношенє витвореню одлуки же би ше руски народни язик з хторим ше бешедовало у Войводини хасновал у публикацийох и образованю, а тиж грекокатолїцки священїк зоз того реґиону, Гавриїл Костельник, кодификовал язик и постал “оцец” його литератури. Попри того, владика Букатко преложел євангелию на руски язик (1985). Русинске/руске националне будзенє по 1989. року мало своїх прихильнїкох и медзи грекокатолїцким священством, уключуюци ту и войводянского священїка Йоакима Холошняя.
Ширенє епархиї
У зависносци од политичних обставинох у Югославиї гранїци Крижевскей епархиї ше у цеку двацетого вика меняли на даскельо заводи. Вони залапйовали Горватску-Славонию и Бачку-Срим, як и цалу Югославию кед тота держава настала концом 1918. року. Кед ше Югославия розпадла 1941. року, Крижевска епархия була огранїчена на горватску державу, док Войводина, заходно од Дуная (по теди знова под власцу Мадярскей), була видзелєна та формована окремна Бачка апостолска администратура з хтору руководзела римокатолїцка архиепископия у Калочи. Зоз обновйованьом Югославиї 1945. року обновене и єдинство Крижевскей епархиї же би покрило шицки републики федеративней держави. Од 1978. року териториї на хторих жили Руснаци (Войводина, Срим и восточна Славония) постали часц епархийового Войводянского викарияту зоз шедзиском у Руским Керестуре хторого творели 18 парохиї.
Од розпаду Югославиї
Крижевска епархия по 2001. рок мала полну юрисдикцию над шицкима восточнима католїками византийского обряду на цалей териториї бувшей Югославиї, уключуюци шици єй держави нашлїднїци: Горватску, Босну и Герцеґовину, Сербию, Чарну Гору и Македонию. У януаре 2001. року формована окремна грекокатолїцка апостолска епархия Македониї за восточних католїкох византийского обряду у Македониї. Вона була подполно одвоєна пд Крижевскей епархиї и под директну власцу Святого Престолу. Року 2003. формовани нови апостолски еґзархат за восточних католїкох византийского обряду у Сербиї и Чарней Гори под назву Апостолски еґзархат Сербиї и Чарней Гори. Перши еґзарх Дюра Джуджар поставнеи 2003. року зоз шедзиском у Руским Керестуре. Тот еґзархат остал у заєднїци зоз Крижевску епархию. После тих пременкох юрисдикция Крижевскей епархию зведзена на Горватску, Словению и Босну и Герцеґовину. Року 2013. шицки католїки византийского обряду у Чарней Гори зверени локалним католїцким владиком та юрисдикция Апостолского еґзархата СЦҐ була зведзена лєм на Сербию, тераз як Епархию Святого Миколая у Руским Керестуре. Од теди Крижевска епархия и Епархия Святого Миколая Руского Керестура вєдно творя Грекокатолїцку церкву Горватскей и Сербиї як sui iuris Восточнокатолїцку церкву византийского обряду у полним заєднїцтве зоз Католїцку церкву.
Предлуженє
Епархия приявела за 2010. рок вкупно 21.509 вирнїкох у узшей епархиї (уключуюци Горватску, Словению и Босну и Герцеґовину) и 22.369 у Апостолским еґзархату за Сербию и Чарну Гору. Пре поровнанє, остатнї теди обявени резултати попису у Републики Горватскей зоз 2001. року бешедую о лєм 6.219 Горватох хтори себе дефиновали як грекокатолїкох.
Историйни тренд наглого опадованя того числа, окреме на подручу Жумберка, толкує ше зоз численима факторами уключуюци ту емиґрацию, окреме до Зєдинєних Америцких Державох (уключуюци Кливленд, Чикаґо и Питсбурґ), и руралну депопулацию, окреме у периодзе после другей шветовей войи.
Дияспора
Перши грекокатолїцки паноцец зоз Горватскей сцигнул до Зєдинєних Америцких Державох 1902. року, чию роботу медзи Горватами византийского обряду у Кливленду потримовал крижевски владика. Крижевци єдна спомедзи штирох востичноевропских епархийох хтори представяю коренї католїцких церквох восточного обряду у Зєдинєних Америцких Державох.
Викарияти
Епархию творя штири викарияти:
- Жумберски викарият
- Босански викарият
- Славонско-сримски викарият
- Далматински викарият, у Горватскей
Владикове
Список владикох Крижевскей гркокатолїцкей епархиї:
| # | Владика | Од | По |
|---|---|---|---|
| 1 | Василиє Божичкович
(1719-1785) |
15. юлий 1777. | 9. май 1785. |
| 2 | Йозафат Басташич
(1740-1793) |
30. марец 1789. | 28. авґуст 1793. |
| 3 | Силвестар Бубанович
(1754-1810) |
8. новембер 1795. | 14. юний 1810. |
| 4 | Константин Станич
(1757-1830) |
10. септембер 1815. | 31. юлий 1830. |
| 5 | Ґабриєл Смичиклас
(1783-1856) |
8 септембер 1834. | 14. марец 1856. |
| 6 | Дюро Смичиклас
(1815-1881) |
21. децембер 1857. | 20. април 1881. |
| 7 | Илия Хранилович
(1850-1889) |
15. марец 1883. | 20. марец. 1889. |
| 8 | Юлиє Дрогобецки
(1853-1934) |
17. децембер 1891. | 18. май 1917. |
| 9 | Дионизиє Няради
(1874-1940) Апостолски Администратор 1917-1920 Владика 1920-1940 |
18. май 1917. | 14. април 1940. |
| 10 | Янко Шимрак
(1883-1946) Апостолски Администратор 1941-1942 Владика 1942-1946 |
16. авґуст 1941. | 9. авґуст 1946. |
| 11 | Гавриїл Букатко
(1913-1981) Апостолски Администратор 1952-1960 Владика 1960-1961 Апостолски Администратор 1961-1981 |
23. фебруар 1952. | 19. октобер 1981. |
| - | Йоаким Сеґеди
(1904-2004) Помоцни владика |
24. фебруар 1963. | 27. октобер 1984. |
| 12 | Славомир Микловш
(1934-2011) |
22. януар 1983. | 25. май 2009. |
| 13 | Никола Кекич
(родз. 1943) |
25. май 2009. | 18. марец 2019. |
| - | Милан Стипич
(родз. 1978) Апостолски Администратор 2019-2020. Владика 2020- терашньосц |
Библиоґрафия
- Гавриїл Костельник, “Крижевска епархия”, Нива, XXVI (Львiв, 1932), б. 134-139, 168-179, 209-215 и XXVII (1933), б. 143-147 и 175-181;
- Йоаким Сеґеди, “200-рочни ювилей Крижевскей епархиї” у Християнски календар 1978 (Руски Керестур, 1977), б. 33-85;
- Йоаким Сеґеди, “Парохиї Осецкого викарията” у Християнски календар 1980, 1981, 1982 (Руски Керестур, 1979-81), б. 109-150, 76-110 и 49-90.