Wp/rsk/Владимир Ковач
| др Владимир Ковач | |
|---|---|
 | |
| Народзени | 30. мая 1936. |
| Умар | 19. децембра 2023. (87) |
| Державянство | югославянске, сербске |
| Язик творох | сербски |
| Школа | ґимназия, Нови Сад |
| Универзитет | Польопривредни факултет, Нови Сад |
| Наукови ступень | Доктор наукох 1975. |
| Период твореня | 1962—2001 |
| Жанри | технолоґия вина, винарство,
винїцарство |
| Поховани | у Сримскей Каменїци |
| Припознаня | Повеля почесного граждана
Сримских Карловцох |
др Владимир Ковач (*30. май 1936—†19. децембер 2023), дописни член Французкей польопривредней академиї, у Секциї за физико-хемийни науки.
Биоґрафия
Владимир Ковач народзени 30. мая 1936. року у Бачинцох. Оцец Михайло и мац Мария. Владимир мал старшого брата Мироня. Владимир Ковач ходзел до основней школи у Бачинцох. Ковачова фамелия ше преселєла 1948. року до Нового Саду дзе Владимир закончел ґимназию и дипломовал на Польопривредним факултету (1960). Од 1962. року робел на Институту за винїцарство и винарство у Сримских Карловцох, як асистент и бул пошвецени науково-виглєдовацкей роботи.
На Технолоґийним факултету маґистровал 1969. року, а докторску тезу "Прилог ґу виучованю оксидох за технолоґию вина" Владимир Ковач одбранєл 1975. року.
После реорґанизациї Новосадского универзитета 1971. року, др Владимир Ковач прешол на Технолоґийни факултет, дзе постал наукови сотруднїк (1976), а потим и висши наукови совитнїк (1982). До пензиї пошол у юлию 2001. року.
Рушанє у фаху
Бул член Медзинардней орґанизациї за преучованє полифенолних злученїнох Groupe polyphenols зоз шедзиском у Нарбону (Французка) од 1971. року. Єден мандат бул член Управного одбору тей орґанизациї.
Од 1976. року бул фахови представнїк Югославиї у Медзинародней орґанизациї за винову лозу и вина (Office International de la Vigne et du Vin - OIV), а два мандати бул и предсидатель ґрупи експертох за "Медзинародни правилнїк о еколоґийних поступкох" котра основана при Зєдинєних нацийох. Од 1976. року вибрани є до роботних целох Медзинародней орґанизациї за лозу и вино у Паризу.
Вельку часц виглєдованьох у обласци винарства мал у лабораториї професора З. Лаволая на Conservatorie National des Arts et Metiers у Паризу.
Участвовал у наукових виглєдованьох и пребувал у иножемстве у Французкей (Нарбоне, Дийон, Монпеллиер, 1967/68). На институту за винарство у Нарбону од 1987. по 1992. рок робел на заєднїцкей теми Французкей и Югославиї на виучованю полифенолних состойкох грозна и вина. На Универзитету у Паризу (Французка 1973/1974) участвовал на виглєдованю и виучованю полифенолних состойкох грозна и вина, а на Универзитету у Мадриду (Шпания, 1993/1994) участвовал на виучованю проантоциянидолох, состойки грозна и вина, котри барз позитивно дїйствую на чловечи орґанизем.
На основи своєй науково-виглєдовацкей роботи першенствено у обласци полифенолних материйох вина и сотруднїцтва зоз численима виглєдовачами и анґажованю у ОИВ (OIV), Владимир Ковач бул 15. децембра 1982. року вибрани за дописного члена Французкей польопривредней академиї наукох, у Секциї за физико-хемийни науки (Аcademie d’Agriculture de France – section V:sciences physic-chimiques).
Др Владимир Ковач коавтор 11 припознатих нових сортох виновей лози медзи хторима: Сила, Пробус, Неопланта, Морава и други и коавтор трох клонох лози сорти италиянски ризлинґ. Автор є познатого червеного вина Vranac Pro Corde компаниї 13 юлий – Плантажи зоз Подґорици.
Публиковал вецей як 120 науково и фахово роботи з обласци винарства, од хторих скоро половка обявена у нас, а 56 у реномированих медзинародних часописох. Коавтор є кнїжки Сорти виновей лози, обявеней у Новим Саде, 2000. року.
Попри науки, добре сотрудзовал з привреду и вше находзел часу же би помогнул тедишнїм винарийом у Крушевцу, Вершцу, Илоку и Ердевику и другим, як и вецей новим приватним винарийом у Сримских Карловцох у продукциї квалитетного вина.
На значносц виглєдовацкей роботи академика Владимира Ковача увагу обрацел документарни филм Мой живот вино, авторки Тияни Трнавчевич, у режиї Милутина Караса, емитовани у децембру 2021. року на 1. програми РТВ Войводини. У филму представене академиково доприношенє сучасному винарству у швеце.
На инициятиву Здруженя винїцарох и винарох Сримских Карловцох aкадемик Владимир Ковач 16. септембра 2003. року, на основи одлуки Скупштини општини, достал Повелю же є почесни граждан Сримских Карловцох. Вон од 90-их рокох, после врацаня допущеня индивидуалним продуковательом же би пласовали вино на тарґовище, отримал серию преподаваньох за винїцарох, после чого у тей часци Сриму засадзени нови винїци и отворени вецей приватни винариї.
Владимир Ковач бул оженєти зоз Миряну родз. Иконич зоз хтору у малженстве мали сина Бориса.
Академик Ковач траґично настрадал 19. децембра 2023. року у Новим Садзе, на Дунаю, на Шордошу, дзе як каякаш и член каякашского клуба бул на порядним рекреативним тренинґу. Поховани є на теметове у Сримскей Каменїци.
Вонкашнї вязи
- Dr Vladimir Kovač:Kreirao sam vina kojima se danas ponosim
- Владимир Ковач:Мой живот вино - сценарио и режия Милутин Карас, автор филма Тияна Трнавчевич
- Др Владимир КОВАЧ, Новинарска асоцияциа Руснацох, НАР
- Нєшка будзе поховани академик Владимир Ковач (1936–2023), М. Тамаш. Рутенпрес, 23. децембер 2023.