Wp/rsk/Бенджо
Бенджо (анґл. banjo) то струнови инструмент. Резонантне цело направене зоз древеного обруча округлей форми, прейґ хторого прецагнута скора як и на буґни. Обруч ше зоз зацагованьом може реґуловац зоз закрутками хтори причверсцени за рам инструмента.[1] Бенджо бул першобутни инструмент хтори до Америки принєсли раби-Ниґере а назва походзи зоз язика кимбунду на хторим ше вола мбанза. У новшим чаше бенджо постал америцки и ирски инструмент.
Бенджо ше состої зоз корпусу и шиї (нєт одредзена длужина шиї) и ма 4 - 6 струни. При пейцструновим бенджу найвисша струна (chantrelle) нє нацагнута од самого верху шиї алє од пиятого прагу. Тота модификация приписана американцови Джоелу Вокеру Свиниа.
Штирострунови бенджо (Джез/Тенор/Ирски)
Штирострунови бенджо ше углавним хаснує у ирским фолклору и джез музики.
Розликую ше:
- плектрум-бенджо (22 праги), штим: C-G-H-D
- тенор-бенджо (17 лєбо 19 праги), штим: C-G-D-A
- ирски тенор-бенджо (17 лєбо 19 праги), штим: G-D-A-E
Тенор-бенджо ше хаснує як ритем инструмент, так же ше граю на нїм акорди, а у ирскей музики ше углавним хаснує як соло инструмент за мелодиї. Штим G-D-A-E одвитує виолинскому штиму, алє наштимовани за октаву нїжей. Прето же за нїзши штим як и у джезу, хасную ше моцни струни, же би ше достал специфични звук.
Пейцструнови бенджо (Bluegrass/Clawhammer)
Пейцструнови бенджо ше найчастейше хаснує у америцкей кантри музики. Тот тип бенджа ма два типи-подфайти:
- Bluegrass-бенджо (g D G H D штим)
- Clawhammer-бенджо (g D G C D лєбо g C G C D штим)
У сущносци то исти инструмент, алє постоя два стили (способи) граня. Стил граня Bluegrass популарни у кантри музики, у хторей ше грає з єдним способом потаргованя струнох зоз верхами пальцох (брущками). Хасную ше пластични лєбо метални пирка (плектрум), хтори ше благо нацагню на верх пальцох. Стил граня «Clawhammer» ше тиж виводзи зоз пальцами, алє ше у тим случаю нє хасную пирка, струни ше потаргую зоз пальцом и указуюцим пальцом.
Познати виводзаче на бенджу
После приходу до Америки, бенджо ше найчастейше применьовал у духовней музики Афроамериканцох, же би познєйше постал єден зоз главних инструментох. У тедишнїм чаше бенджо ше зявює у диксиленд музики, а у цеку 1940-их Бил Монро го вше вецей хаснує у bluegrass музики. У цеку 1970-их, бенджо постал главни инструмент кантри-рок составох (ансамблох), а зявює ше и у фолк музики у жемох як цо то Малавия и Мароко.[2]
Медзи найпознатшима виводзачами бенджа мож спомнуц и фолк музичара Пит Сиґера, хтори написал и Кнїжку о бенджу, Боб Шмит, виводзач бенджа у ирским составе Флоґинг Моли, и Бела Флек. Єден з найлєпших виводзачох на швеце на бенджу то Барни Маккен, зоз ґрупи Даблинерс, котрого преглашую за найлєпшого виводзача на бенджу у Ирскей.
Вонкашнї вязи
Референци
- ↑ Мишић, Милан, ур. (2005). Енциклопедија Британика. А-Б. Београд: Народна књига : Политика. б. 131.
- ↑ Barry Alfonso (2005). Paul Du Noyer, ур. Ilustrirana enciklopedija glazbe. Veble commerce. б. 438.