Wp/rkt/হাল্লা কৰেন

হাল্লা কৰেন
মূলঃ প্ৰণব কুমাৰ বৰ্মন
অনুবাদ: কন্দৰ্পজিৎ কল্লোল

আইসেন, আকজন আকজন কৰিয়া আইসেন অথবা সদলবলে
আৰ হাল্লা কৰেন
হাউস মিটিআ হাল্লা কৰেন যে
চোঁখেৰ সামনাত নাৰী ধৰ্ষণ আৰ প্ৰজন্মেৰ খুন দেখিয়া
চুপচাপ থাকাটা পাপ।

আইসেন আকজন আকজন কৰিয়া কিম্বা সদলবলে
আইসেন প্ৰিয় জনগণ
আকজন আকজন কৰিয়া কথাগুলান কোয়া যান
কেমন কৰিয়া আপনাৰ প্ৰিয় পুত্ৰ কিম্বা ভাই অঘৰী হোয়া নিৰুদ্দেশ হৈল
বুজিআ কোন মহামান্য এই মহোদয় গুলানক

শৰম কৰবেন না, কিয়েবা আছে লৈজ্জা কৰাৰ জৈন্যে
পত্নীৰ মেখেলা খুলাৰ কথা,
কন্যাৰ বক্ষ-বন্ধনী খুলাৰকথা,
ভাণ্ডাৰেৰ ধানগুলা কাঢ়িয়া নেওৰাৰ কথা
কখন কায় দুআৰত টকটকাইছিল
আপনাৰ মুখদিয়া ৰক্তেৰ নদী বোয়াদিছিল
ভয় কৰেন না
আপনি ভয় কৰা মানে এইখান দেশেৰ স্বাধীনতাৰ অৰ্থ শূন্য
টুঁটিফাটেয়া কোয়া দেন, কোয়া দেন
নাহৈলে সহনশীলতাত পাপ বিবেচিত হৈবে

আকজন আকজন কৰিয়া অথবা সদলবলে
আৰ হাল্লা কৰেন
চিনাক্ত কৰেন
আপনাৰ গোলাপেৰ বাগান কায় ছাৰখাৰ কৰছিল
তৰ্জনী ডাঙিআ চিনাক্ত কৰেন
আপনি মৰিবেনে গুলি অথবা নিৰন্ন দিনত
তাহৈলে কি ভয়? কিসেৰ ভয়?

শ্ৰেণী:ৰাওবদল কবিতা