Jump to content

Wp/rkt/কাইল্কা যেঠেই মুঁই খাড়া হয়া আছিলুং

From Wikimedia Incubator
< Wp‎ | rkt
Wp > rkt > কাইল্কা যেঠেই মুঁই খাড়া হয়া আছিলুং
কাইল্কা যেঠেই মুঁই খাড়া হয়া আছিলুং

কাইল্কা যেঠেই মুঁই খাড়া হয়া আছিলুং
আইজ্কা অঠেই মুঁই নাই

কাইল্কা যেঠেই মুঁই খাড়া হয়া আছিলুং
অঠেই আছিল স্বৰ্ণীল সৰীসৃপ শ্বাপদ

আইজ্কা যেঠেই মুঁই খাড়া হয়া আছুং
এঠেই আছে কণ্টক কেকটাছ সদৃশ উদ্ভিদ

কাইল্কা আকজন ৰাম আছিল
অয় আছিল নিৰ্গুণ নিৰাকাৰ ৰাম

আইজ্কাও আকজন ৰাম আছে
এয় হৈল ৰঙীন বৈভব সমৃদ্ধ ৰাম

ৰামতো ৰামেএ আছিল
ৰাম কুনোদিনে শ্যাম নাছিল

আইজ্কা ৰামেৰ ভিত্‌ৰাত শ্যাম
শ্যামেৰ ভিত্‌ৰাত ৰাম

কাইল্কা যেঠেই মুঁই খাড়া হয়া আছিলুং
অঠেই আকজন হজৰত আছিল
নিজে বদলিয়া
অন্যকো বদলেয়া দিবাৰ পাওয়া হজৰত

আইজ্কাও আকজন হজৰত আছে
হালাল আৰ্ হাৰামেৰ মাজত
ঝুলিয়া থাকা হজৰত

কাইল্কা যেঠেই মুঁই খাড়া হয়া আছিলুং
অঠেই আকজন বুদ্ধ আছিল
অঘৰী বুদ্ধ
জনগণেৰ মুক্তিৰ পথ বিছৰিয়া
উন্মাদ বুদ্ধ
বুদ্ধং শৰণং গচ্ছামি
সংঘং শৰণং গচ্ছামি

আইজ্কাও আকজন বুদ্ধ আছে
কোভিড নাইনটিনেৰ মাজত
চেপ্টা খায়া ৰুগ্ন হোআ বুদ্ধ

কাইল্কা যেঠেই মুঁই খাড়া হয়া আছিলুং
অঠেই আকজন যীশু আছিল
নিজে কষ্ট ভুগিয়া
অন্যক ঘাটা দেখোআ যীশু

আইজ্কাও আকজন যীশু আছে
ঘাটা ছাড়িয়া বেঘাটাত বেড়োআ যীশু

আসলতে সময় বদলিছে না মুঁই

না কাইল্কাৰ মুঁই
আইজ্কা আৰ্ মুঁই হোয়া নাই

কিজানিবা
কাইল্কা যেঠেই মুঁই খাড়া হয়া আছিলুং
অইজন মুঁয়েয় আছিলুং

আৰ্
আইজ্কা যেঠেই মুঁই খাড়া হয়া আছুং
এঠেই কিজানিবা মুঁয়েই নাই

আছে আৰ্ নাইৰ ধামখামাত
ধোঙাচ্ছন্ন আকটা জীবন যুঁজিয়া
হয়তো বৰ্তমান অন্য আকজন মুঁই!

কন্দৰ্পজিৎ