Wp/rkt/কবিতা ভালপাওয়া চেংৰীটা
ঐ কবিতা ভালপাওয়া চেংৰী
তুমি কি কবিতা ভালপাইস
ছোমালিয়াৰ আৰ্তনাদ
সৰ্ব্বত্ৰ বায়ুমণ্ডল
পোৰা মাংস গোন্ধোআ সমায়
কাৰো পেটেৰ ভোক অতিক্ৰম কৰিয়া
কাৰো পেটত পৰে যায়া ভাত
এমন দিনত তুই কি কবিতা ভালপাইস
ঐ কবিতা ভালপাওয়া চেংৰী
তুই কি ভালপাইস ?
চুইফট্ ডিজায়াৰৰ আৰামী যাত্ৰা
বিলাসী ৰেষ্টোৰা-বাৰ্
কতো যায় প্রসাধনেৰ নামত সঞ্চিত ধন
দিফৰ ৰাত্তিপর্যন্ত ফোনত বান ভাঙা বাৰ্তালাপ
ইৰম শৰ্মিলাৰ বুকত
প্রকাণ্ড সবুজ পাত্থৰ
চাপৰায়-চাপৰায় মাজুলীৰ বুক ঢসে
চাপৰায়-চাপৰায় ঢসে পাহাৰেৰ ধোলা আঁচল
মুখাৰ আঁৰালেৰ মুখগুলা
বিভৎস হাঁসি মাৰিয়া ডুবায়
সবুজ নদী
ক্ষুধাৰ্ত মানুষগুলা অনশনত বসে
সৰ্বহাৰায় হাৰোআৰ বেদনাত দগ্ধ হয়
ঝ'ড়িত ৰক্তকণিকাৰ টোপাল গড্ডে
ঐ কবিতা ভালপাওয়া চেংৰী
এমন দিনত
তুই কি কবিতা
ভালপাইস ?
• মূল: কিশোৰ বড়ো
• ৰাওবদল: কন্দর্পজিৎ কল্লোল