Wp/rkt/অকবিতা - জ্বলি উঠুক শব্দৰ ফুৰ্ঙা

 অকবিতা - জ্বলি উঠুক শব্দৰ ফুৰ্ঙা

এঠেই খাড়া হোয়া থাকা মুঁই মানুসটা মুঁইয়েয় না
না সময়েৰ ধামখামাত হাৰেয়া যাৱা মোৰ কায়া !
সময় বদলিল ৰাস্তা-ঘাটা বদলিল
বদলিল কবিতাৰ ভাষা শব্দ বাক্য

মুঁই সম্প্ৰতি শব্দহীনতাত দিন কাটাং
তাৰ পৰে কি কবিতা কিসেৰ কবিতা
যেই সময় সময়েৰ গদ্যয় মাথাত ডাঙায়
দলিবালিয়ে ইটাল ভাঙোৱাৰ মতন কৰিয়া
অই সময় আৰ্ কিসেৰ কবিতা

পৰিবৰ্তন
পৰিবৰ্তনেৰ হাৱাত
চলো পাল্টাই কবিতাৰ ভাষা
এলা আৰ্ কবিতা নাহয়
জ্বলি উঠুক শব্দৰ ফুৰ্ঙা

বিঃদ্ৰঃ - ফুৰ্ঙাৰ থাকিয়াও খাণ্ডব দাহ হয় । ‌

             #কন্দৰ্পজিৎ