Wp/rki/ကိသာဂေါတမီထေရီ
ကိသာဂေါတမီထေရီမှာ ဂေါတမမြတ်စွာဖရား လက်ထက်တော်တွင် သင်္ကန်း ခေါင်းပါးစွာ ခြိုးခြံပြီးကေ ကျင့်ကြံနိုင်ခြင်းကြောင့် လူခစီဝရဓာရန ဧတဒဂ်အရာနန့် ချီးမြှောက်ခြင်းခံရသော ဘိက္ခူနီရဟန္တာမ ဖြစ်ရေ။ ကိသာဂေါတမီရေ ပဒုမုတ္တရဖရားသျှင် လက်ထက်တော်ကစပြီးကေ ပါရမီဆည်းပူးခရာ ကဿာပဖရားသျှင် လက်ထက်တော်တွင် ကိလီမင်းကြီးဧ့ ပုေချတော်ခုနစ်ပါးအနက် ဓမ္မာဇာတ်လိုက်မ ဖြစ်လာရေ။ ဂေါတမ မြတ်စွာဖရား လက်ထက်တော်တွင် သာဝတ္ထိပြည် သူဌေးကြီးတစ်ဦးဧ့ ပုေချဖြစ်လာရေ။ နာမည်မှာ ကိသာဂေါတမီဟု တွင်ရေ။
အရွယ်ရောက်ကေ မိဘများ ဆင်းရဲလားအနိန်နန့် ဆင်းရဲ ပင်ပန်းစွာ နေရရေ။ ယင့်ချိန်တွင် သာဝတ္ထိပြည်ဟိ သူဌေးကြီးတစ်ဦးစော်လည်း သူဧ့ ပိုင်ဆိုင်သော ရွှေ၊ ဖေသာများ အားနူံး မသွီးဖြိုက်ကော ဆင်းရဲလားရေ။ ယင်းခါ မိတ်ဆွီတစ်ဦးဧ့ အကြံပီးချက်အရ ထိုက်တန်သူနန့် တွိ့ကေ မသွီးများ ရွှေဖေသာအဖြစ်သို့ ပြန်ပြီးကေ ပြောင်းလဲလာမည်ဟု ယုံမှတ်ကာ ထိုသူဌေးကြီးရေ မသွီးတိကို ဈေးတွင် ဆိုင်ခင်းပြီးကေ ရောင်းချရေ။
တနိန့်သ၌ ကိသာဂေါတမီရေ ဈေးသို့လားရာ ထို သူဌေးဟောင်းဧ့ဆိုင်မှ မသွီးတိကို ရွှေများအဖြစ်နန့်သာ တွိ့မြင်ရအနိန်နန့် 'ဒေရွှေတိကို ကုန်အောင် ဇာသူ ဝယ်နိုင်ပါမည်နည်း'ဟု ဆိုင်သျှင်သူဌေးအား မီးမြန်းမိရေ။ ယင်းခါ သူဌေးဟောင်းရေ ဘုန်းကံဟိသူကို တွိ့ရရာဟု အားပါစွာ ကိသာဂေါတမီဧ့ နေရပ်တိကို မီးမြန်းပြီးကေ မိမိ သားကြီးနန့် ထိမ်းမြားရန် စီစဉ်ရေ။ ကိသာဂေါတမီဧ့ လက်နန့်ကိုင်ခရေ မသွီးတိအားနူံးစော်လည်း ရွှေစင်အတိ ပြန်ပြီးကေ ဖြစ်ခရေ။ သို့နန့် ကိသာဂေါတမီရေ သူဌေးသားနန့် ပဇပ်ရလီရေ။
ယကေလည်းသော နောက်များမကြာမီ သူဌေးကတော် ယောက္ခမကြီးမှာ ရက်စက်ငြိုငြင်တတ်အနိန်နန့် များစွာ စိတ်မချမ်းမသာ ဖြစ်ရလီရေ။ ထိုနောက် အချိန်ကာလကြာကေ သားတစ်ယောက်ကို ဖွားမြင်ရာ သားငယ်အသျှေမှာ သုံးလေးနှစ်အရွယ်တွင် သေဆုံးလားရေ။ ယင်းခါ ကိသာဂေါမတမီရေ သားငယ်ကို ချစ်ခြင်း၊ ယောက္ခမရို့အိမ်တွင် စိတ်ဆင်းရဲခြင်း ပြင်းထန်မှုရို့ကြောင့် ရူးသွပ်ကာ သားငယ်အလောင်းကို ချီပိုး ဗြီးလွှားပြီးကေ နေတော့ရေ။
ယင်းခါ ပညာဟိတစ်ဦးက ကိသာဂေါတမီအား သင်ဧ့ သားငယ်ကို ဂေါတမမြတ်စွာဖရားက အသက်သျှင်အောင် ကုသပီးနိုင်လီဖို့ဟု တရားရစိမ့်သောငှာ မြတ်စွာဖရားထံသို့ ညွှန်လိုက်ဧ့။ ကိသာဂေါတမီလည်း အားပါစွာနန့် သားငယ်အလောင်းကိုပိုက်ပြီးကေ မြတ်စွာဖရားထံတော်သို့ လားလီရေ။ မြတ်စွာဖရားရေ ကိသာဂေါတမီကို မြင်ရေအခါ ကယ်တင်လိုပြီးကေ ပရိယာယ်နန့် လူမသေဘူးသော အမျိုးအိမ်မှ မုန်ညင်းဆီကို ကတ်မေယှာယူခကေ အသက်သျှင်အောင် ပြုလုပ်ပီးမည်ဟု မိန့်တော်မူရေ။
ကိသာဂေါတမီရေ လူမသေသော အမျိုးအနွယ်အိမ်မှ မုန်ညင်းပါးကို ရဟိရန် တစ်အိမ်တက်ဆင်း လှည့်လည် ယှာဖွီရေ။ ယင်းပိုင် ယှာဖွီရာတွင် လူမသေဘူးသော အိမ်ဆိုပနာ မတွိ့ရရေပြင် ကြင်နာသော လူတစ်ယောက်က လူမသေသိသောအိမ်ကို ယှာဖွီပြီးကေ အဘယ်အခါမျှ တွိ့နိုင်ဖို့မဟုတ်ကြောင်း ပြောပြလီရေ။ ယင်းခါမှ ကိသာဂေါတမီရေ အောက်မိရားကေ မသေခြင်းဟူရေမဟိဘဲ လဘော ားလုံးကား သေတတ်သော သဘောတရားဟိကြောင်းကို ဆင်ခြင်စိုင်းစားမိပြီးကေ သားငယ်အလောင်းကို စွန့်ပစ်လိုက်ပြီးကေ မရဏနုဿတိ ကမ္မဋ္ဌာန်းကို စီးဖြန်းရေ။
ထိုနောက် မြတ်စွာဖရားထံသို့ ရောက်ရေအခါ မြတ်စွာဖရားက မုန်ညင်းဆီရရာလောဟု မီးရေ။ ကိသာဂေါတမီလည်း မိမိသံဝေဂရပုံကို လျှောက်ထားဧ့။ ယင်းခါ မြတ်စွာဖရားက တရားဟောပြောပြီးကေ သောတပတ္တမဂ်ကိုရရားကေ ရဟန်း ပြုလီရေ။
တနိန့်သ၌ ဆီမီးကိုအကြောင်းပြုပနာ ခန္ဓာချုပ်ငြိမ်းသော သဘောတရားကို ထင်မြင်ကာ ဝိပဿနာဉာဏ်ရ ရေ။ ထိုနောက် ရဟန္တာဖြစ်တော်မူရာ ကောင်းမွန်သောသင်္ကန်းကို မတပ်မက်ဘဲ ပံ့သုကူသင်္ကန်းကိုသာ ဆင်းရဲခံပြီးကေ ဝတ်ဆင် တတ်အတွက်နန့် မြတ်စွာဖရားက လူခစီဝရဓာရနဧတဒဂ်ဘွဲ့ထူးနန့် ချီးကျူးခြင်း ပြုတော်မူရေ။
ယင်းကနိန်စပြီးကေ ကိသာဂေါတမီထေရီအဖြစ် ထင်ယှားကျော်ကြားခလီရေ။ [1]
ကိုးကား[edit | edit source]
- ↑ ဗမာ့စွယ်စုံကျမ်း၊ အတွဲ(၁)