Wp/rej/Kibut

Artikɕl nɕak bɕak i'o tnulis ngen gmuno baso Jang di'alek Lɕbong. Tɕtɕp sɕmangɕt tɕ smido (calon) Wikipedi'a-tɕ. .

Kibut o ba gen bungai gi dau tɕmboak nɕak Indonesi'a Pɕak Barat. Bungai i'o lɕm baso Indonesi'a tun sɕmbut-nɕ bunga bangkai (bungai buntang). Gɕtai gen-nɕ awɕi o? Do-o kɕrno bungai kibut i'o mbau-nɕ coa si ba'ik, agok kidek. Lajau tun sɕmrai mbon bungai i'e magɕa mbon amɕn tɕ smi'um mbau buntang.

Bungai kibut dau tun salɕak midentipikasi-nɕ magɕa bungai skɕdɕi (baso Indonesia: bunga rafflesia). Kibut ba gi tɕgok lu-us, tɕmboak lɕkat. Amɕn si nɕak imbo lɕbɕt, kibut nam tɕmboak sapɕi 3 tɕak coa 4,5 meter. Tando amɕn tɕ lok namɕn bungai gi ade nɕak muko tɕ o kibut jano coa, tɕ kɕmliak ba'e amɕn kibut o si tɕmboak awɕi ujung botoak (baso Indonesia: penis, phalus). Nah, kundɕi pi'o tɕ namɕn kalɕu kibut magɕa skɕdɕi o bungai gi luyɕn. Amɕn kibut tɕmboak lu-us, lɕkat, skɕdɕi coa si awɕi o. Skɕdɕi o si tɕmboak ijai libɕa. Di'ameter (ga-is donok)-nɕ nam si sapɕi 1,1 meter.

Bungai kibut iso si parasit gi mnupang ba'e ngen inang-nɕ. Si o tɕtɕmboak nɕni'ɕn gi tmu'an akar, ngen awok-nɕ bɕkɕrjo sɕrai ngen tɕtɕmboak luyɕn. Kɕrno si i'o tɕtɕmboak ni'ɕn, tɕ nam tmanɕm kibut nɕak ipɕ ba'e asal lokasi-nɕ cocok.