Wp/rej/Baso Jang
Baso jang (nucêp: [baso d͡ʒaŋ], [baso həd͡ʒaŋ]) adeba dêbuêak baso Austronesia gi nakêi tun Jang dê tinggêa nêak pêak barat daya Pulau Sumatra, têpat-qnê nêak Têbo Bêderet (Bukit Barisan) sapêi moi datêa ngen pêsisia nêak Kulau Têngêak ngen Kulau Utara. Baso Jang nagiak moi lêm lêmo dialek: Lêbong, Musai, Kêban'agung/Kêpahiang, Pêsisia, ngen Awês. Dialek Awês gnuno tun nêak Ai Awês, Kabupaten Musai Awês Utara (Musi Rawas Utara), Sumatêra Sêlatan. Pat dialek luyên nakêi tun nêak Kulau. Khusus nê dialek Pêsisia dê nakêi tun rogok patoi nêak Kulau Utara ngen Kulau Têngêak, dialek baso Jang luyên gnuno nêak têbo, uak kundêi laut.
ꤽꥍꤺꥏ ꥆꤴꥉꤷ ꤴꥉꤷꥈꥆꥉꥆꤰ꥓ ꤷꤼꥋ ꥆꥌꤼ꥓ꤳ꥓ꤽꥋꤵꥉꤼꥇꥆ ꤱꥇ ꤵꤰ꥓ꥆꥉꥆꥇ ꤳꥈꥐ ꤺꥐꤱ꥓ ꤴꥉ ꤳꥇꥐꤱ꥓ꤱꥉꥆ ꤵꥉꥆꤰ꥓ ꤶꥉꥆꤰ꥓ ꤷꤽꤳ꥓ ꤴꤿ ꤶꥈꤾꥌ ꤼꥈꤸꤳ꥓ꤽ, ꤳꥉꤶꤳ꥓-ꤰ꥓ꤵꥉ ꤵꥉꥆꤰ꥓ ꤳꥉꤷꥋ ꤷꥉꤴꥉꤽꥉꤳ꥓ (ꤷꥈꤰꥇꤳ꥓ ꤷꤽꥇꤼꥐ) ꤼꤶꥉꥆꥇ ꤸꥋꥆꥇ ꤴꤳꥉꥆ ꤵ꥓ꤱꥉꥐ ꤶꥉꤼꥇꤼꥇꥆ ꤵꥉꥆꤰ꥓ ꤰꥈꤾꥌ ꤳꥉꥐꤱꥉꥆꤰ꥓ ꤵ꥓ꤱꥉꥐ ꤰꥈꤾꥌ ꥆꥈꤳꤽ.
Baso Jang adeba do kundêi sêmbilan baso asli Kulau sêluyên baso Pasma, baso Sêrawai, baso Minang (Mukomuko), baso Lêmbok, baso Mêlayau, baso Pêkal, baso Nasal, ngen baso Enggano. Ade sêpuluak kabupaten ngen kota nêak Kulau, baso Jang o baso paling dau nakêi tun nêak lêmo kabupaten ngen kota. Sayang kêmbiak sayang, globalisasi uyo mênêa baso Jang pêpêlan laput kêrno coa gnuno igai nêak ruang publik, têgitai magêa baso Mêlayau dê kundêi 'an kênliak sêbagai baso lêkat ngen lingua franca daerah e.