Wp/quc/Yawab' Ixoq
Ri tat Lu’ xutzijoj ri jun xuk’almaj are taq jun q’ij k’o cho ri kachoch ri unan utat, jaw ri xk’iy wi, jewa’ xub’an che utzijoxik. Ri in, in k’o cho ri ja, ri ojer kachoch ri nan nutat, wa’ we ja ri’ k’o chi uxo’l taq ri ab’aj, k’o xuquje’ che’, tikom jalajoj uwach taq che’ ri katijow uwach, jas ta ne ri tura’s, masa’n, oj, ajache’ xuquje’ le sirwel.
Le in, in k’o cho ri ja are taq xwil ri nunan t’uyul cho ri ja pwi’ jun ab’aj, xane tajin kuxiy ri uwi’, xuquje’ tajin kuyaj ri ri ch’ib’ wanab’, xane le xinchomaj in chi ri are’ xa’ yawab’ ixoq chik, ri are’ xaq laj kutze’j, xane man kok ta il cho ri nunan. Le in xaq xewil kanoq, xinb’e xo’l taq ri ab’aj, k’ate’ xwilo teren chi ub’ik chwij, karaj katzijon wuk’ xane man are ta chi wanab’, are jun ixoq ri uq’ab’ rachalal wixoqil Che’p ub’i’, rachi’l jun ral.
Xintzijon jub’iq’ ruk’, xinb’e chi jumul, xinok pa taq ri q’ayes, xane chaq’ab’ chik ri uj k’olik, k’ate’ xinto xuchap nusik’ixik, le in xinwawaj wib’, k’ate’ xwilo k’o q’aq’ pwi’ le uche’al oj. Ktziji’k, kachupik, xane xwilo xe’nutzukuj, chinuwach xt’uyi’ wi, man xinril taj, xpetik, xuk’am uloq ri ral, ri in xinwa’lijik, k’ate’ xwilo xka’y kan chi rij, xane man xinril taj.
Pa jub’iq’ chik k’ate’ xwilo xwa’lij chi ub’ik jun chuchu’ chi nuwach, man xinril ta xuquje’, chi k’ate’ xwilo q’oyol ri wixoqil wuk, chwij k’o wi, atk’o b’a’ xincha’ chech, ink’o ya’ xcha’ chwech. Are wa’ ri xuk’ulmaj ri tat Lu’.
