Wp/quc/Uk’aslemal Qatinamit

Utz uchomaxik rij jas ri’  jun tinamit, jas che kb’ix tinamit che, jawchi’ kriqitaj wi jun tinamit, e jachin taq keriqitaj pa jun tinamit, jas rajawaxik che jun tinamit, jas kyo’w uk’aslemal jun tinamit, jachin on e jachin taq keyo’w uk’aslemal jun tinamit, jas kyo’w ub’e kyo’w uq’ij jun tinamit. 

Are taq kqasolij rij jalan taq no’jwuj kqariq le chomanik ri’ chi kipam: jun tinamit are  jun ch’aqap jun peraj ulew jawi’ keriqitaj e k’i alaxik, e k’i winaq, jawchi’ kk’utun jas taq chak kkib’ano, jas ri kiwa’b’al, jas ri kikojonik, jas kilik jas kib’antajik ri e ajk’amab’al taq b’e, jas kkib’an che uq’atik tzij, jas chak kkib’ano. Xuquje’ pa jun tinamit kriqitaj le e taqanelab’, le ajpopab’, le ajchajinelab’, le tijonik, le kich’ab’al le qanan qatat, uwokom rib’, ukemom rib’ uk’a’mam rib’ le uk’aslemal.

Ri uj mayab’ taq winaq kujriqitaj pa jun amaq’ jawi’ le qatinamital maj usuk’ maj ub’eya’l, maj uchuq’ab’ ya’om, rumal k’u la’ e k’i qawinaq keriqitaj pa le me’b’a’il, loq’ taj chikiwach ri ajpopab’ che kkitijoj kib’ le qawinaq, loq’ taj kel chikiwah kk’ustaj kichomanik qawinaq. 

Uwinaqil tinamit

Rumal k’ula’ ya’tal chaqe kqanik’oj, kqachomaj jas kib’anom, jas tajin kkib’an le e jalan taq Taqanel e k’olinaq che uk’amik ub’e uk’amik uq’ab’ qatinami, jas kriqitaq le qaq’inomal jacha ne’ le ja’, le kaqiq’, le q’ana pwaq, le saqa pwaq, le cho’, le juyub’ taq’aj.

Rajawaxik xuquje’ kqasolij rij jas kkib’an le qachajinel, jas kriqitaj le tijonik, le tijonik pa keb’ ch’ab’al, le nab’e teijonik, le ukab’ tijonik, le tijonik re nim eta’mab’al, jas ub’anom le jalan taq tijob’al, la qas utz keriqitajik, la keb’eyo´pan le qawinaq che kitijoxik kib’. 

Utz xuquje’ kqachomaj jas ub’anom le qawokonib’al, la kuk’am rib’ qatzij, la kukem rib’ qachuq’ab’ rech kopan le utzilal chike qawinaqil, che uk’amik ja’aril chike qanan qatat, rumal che man utz ta ri’ kelik che k’o me’b’a’il, rech man k’o ta chak chike qanan qatat. 

Xuquje, utz kujchoman pa uwi’ qach’ab’al, la kqakoch’o, la man kqaxe’j ta qib’ kujtzijonik, kujch’awik pa qach’ab’al, la kujkowin che uya’ik uq’ij, la kujkowin che uya’ik uchuq’ab’, la keb’e’ qak’u’x che uk’utik chikiwach qalk’wa’l, la kqakoj kuk’ qachi’l pa qachak, pa le komon.

Are kujtzijon che uk’aslemal qatinamit, k’I kuk’am uloq, rumal che kqachomaj jas ub’anom, jas kriqitaj wi, jawchi kqaj kqak’am ub’ik we kqakoch’o kujtob’an che usuk’umaxik ub’e.