Wp/quc/Ri kiq'ij kaminaqib' pa Q'ante'l

From Wikimedia Incubator
< Wp‎ | quc
Wp > quc > Ri kiq'ij kaminaqib' pa Q'ante'l

Nab'e kraj uchomaxik ri qab'anik pa ri qatzij.

We wachib'al ri', kuk'utuwisaj ri qab'atajik are taq man uj k'o ta chi pa qab'aqil

Ri nima'q taq winaq, kkib'ij: "xaq uj ok'owel chi uwach ulew¨¨. Are wa kuya uchomaxik pa qajolom, chi man qas ta chi' taj ri qak'olib'al, ri qachoch. Are k'u taq kujkamik, xb'ixik, ¨Xuxlanik", ruk' wa' kqach'ob'o chi xa xujul chech qapatan, chi k'o qeqale'n petinaq quk', pa ri uwach qaq'ij, are taq ri', xujul chi rech ub'anik, cheh uchakuxik. Are k'u ri' ri xujto'taj chech pa qak'aslemal chi uwach ulew. Kpe chi jun ojer tzij chik,kub'ij, ¨Xb'e pa sutz', pa tew, pa kaqiq'.

Kuk' taq wa' we tzij ri', kijeqeb'am kan ri qati't qamam, chi man uj ajwaral taj, chi xa ujtaqom uloq pa jun b'aqil ti'ojal, rech kuya'o kujpatanin waral chi kixo'l ri qajil qatz'aqat, ri qawinaq, ruk' ri qachak, ri qak'ay, ri eqale'n jachom pa qaq'ab'. Are na k'ut ktaqan ri' ri petinaq pa ri uwach qaq'ij. Xuquje' uj chi ri', we uj nimaninaq chech ri qana'wal.

Rumal k'u wa', are taq kk'oji' jun ne', kutzir ri nan, e k'o qanan qatat, xa keb'isonik, rumal ri saq ta na jas kel pa ri uk'aslemal. Xuquje', e k'o qanan qatat ri nimalaj keki'kotik, rumal chi ri uwach uq'ij, ri Na'wal k'o chech patan pa ri q'ij are taq xil uwach ri ne', je'l taq ri kub'ij chi kub'an ri ak'al pa ri uk'aslemal.

Are ku taq xk'iy ri winaq, xri'job'ik, xto'taj b'ik, xuxlanik, xkamik, kb'isox wi we utz on mqn utz ta xel pa ri uk'aslemal. Xu wi eta'matalik chi xb'e pa sutz, pa tew, pa kaqiq'.

E are taq wa' we tzij ri', ri rajawaxik, kikojik na, qumal ri uj ri'jab' kamik, cha' man ksach ta pa qajolom chi man uj ajwaral taj, chi xa uj okowel chi uwach ulew, chi man ok nimal pa qzak'u'x, chi man qab'an k'ax chech jun qajil qatz'aqa, xa rumal chi we ksach pa qajolom, we ne kqab'an taq k'ax, te k'u ri', ronojel k'ut k'o utojob'alil. We ne keqariqa chi k'ax uj, we ne pa yab'il, we ne choch'at, on we ne jun qalk'wa'l chik ktojowik, on jun i'mam, rumal k'u wa', rajawaxik kqachomaj na jas taq ri kqab'an pa ri qak'aslemal, jas taq ri kqab'ij, cha' man kqatij ta k'ax are taq kujkamik.

K'o na ri kraj uchomaxik, utz'ib'axik, necher, k'a pa jupaj kapaj tzij chi ri' kqana'tajisaj, chi qawach qonojel.