Wp/quc/Dracunculosis

Dracunculosis , xuquje’ ub’ina’am yab’il xjut rech guinea (GWD), are jun yab’il rech xjut rech guinea . Le kayo’w le yab’il are we kqumux joron le ruk’a’am us rech joron le k’o xjut rech guinea chi upam lRachaq chkope. Are taq kumajij le yab’il man k’o ta k’utyab’ilal. are taq kq’ax jun junab’, le kumajij q’aq’anem chi’l q’oxowem are taq le ati’t xjut kub’an jun puj pa le tz’u’mal, nima che le aqanaj. Le xjut kel la pa le tz’umal are taq kqax keb’ oxib’ wuqq’ij. Pa taq wa’ we q’ij wene man kb’an taj kb’an b’inem on chakunem. Wa’ man qas ta kuya’ kamikal.

Le kayo’wik

Xew winaq kkiriq yab’il rech xjut rech guinea. Le unimal le xjut jun on keb’ milímetros uwach, le nim ati’t are 60 pa 100 centímetros unimal (le ama’ib’ are e ko’lik). Le saqmo'l kk'asi' nim chi uwach oxib' wuqq’ij man chi upam ta le winaq.. Rajawaxik ketij kumal le us rech joron mojo’qa wa’. Le rachaq chikop wene kk’asi’ nim chi uwach kajib’ ik’ chi upam le us rech joron. Xa jela’ le yab’il wene kya’taj chi junab’ chi kech taq winaq chech uk’olem pa jun k’olib’al. Jun unik’oxik yab’il kkowinb’ex ub’anik ruk’ le k’utyab’ilal rech le yab’il.

Uq’atexik chi’l ukunaxik

Le uq’atexik are le atam unik’oxik le yab’il chi’l uq’atexik uya’ik le sokonem pa le joron. Nik’aj chi taq ukojik chuq’ab’: ukojik saq joron on uchayuxik le joron we man si ta saq. Uchayuxik pa atz’i’aq sib’alaj ktob’anik. Le tzil joron utz kkunax ruk’ jun kunab’al ub’ina’am temefos chech ukamisaxik le rachaq chikop. Man k’o ta kunab’al on toq’oj le kuq’atej le yab’il. Le xjut rajawaxik no’jimal kelesaxik ruk’ ubolq’otixik chi rij jun laj che’ pa taq wuqq’ij aq’anoq. Le k’atem winaqirisam rumal le xjut wene’ kpujan rumal le chkop. Le q’oxom wene knajtin na jampa’ ik’ are taq kelesataj le xjut.

Epidemiología chi’l b’antal kanoq

Pa ri 2013 xb’ixik chi xya’taj chi kech e 148 wa’ we yab’il. Are wa’ le nitz’ chi uwach 3.5 millones xya’taj pa ri 1986. Wa’ xew ya’tajinaq pa 4 tinamit rech Africa, nitz’ chi uwach 20 amaq’ pa taq ri 1980s. Le tinamit le qas kuya wi are Sudán del Sur. Wene are wa’ nab’e aji’t yab’il chech relesaxik. Le xjut rech Guinea ojer eta’matal loq. Wa’ ya’om ub’ixik pa le kunanem rech Egipto Papiro rech Ebers, umajim loq pa ri 1550 BC. Le b’i’aj dracunculosis Latin "q’oxom rumal taq chkop", Le b’i’aj "xjut rech guinea" xq’alajinik are taq le Aj Europa xkil le yab’il pa le Guinea taq’aj rech África occidental pa ri siglo 17. Jun wokuwach nima junam ruk’ le xjut rech guinea kuya’ yab’il chi kech nik’aj chi e chkop. Wa’ wene man kuya’ ta yab’il chi kech e winaq. Wa’ jachatal pacha’ jun yab'il rech taq'aj le man qas ta kilixik .