Wp/pyu/vativatiyan

kemay makiteng ku diya nu alalusu na kadaw mu, sahar mi muduwaduk i salripi kinger kana temuwmuwan venavati kanta kakuwayanan lra di kumudakuda pa’inava kanta wavaawan.

ulra a saya vatiyan mawu nagku kinasahar kinger na vativati. awac diya mu, kani kanta kinkaduwan na henahenan, sinalem da sadu da kawikawi, marengay i mulri mu, ulra saya ma’idang a varasa’, idu na varasa’ kamawan da ruma’ tu ka’idangan, semalra mutuayawan kani kawikawiyan.

alra kumuda nay, tivustus muhinghing na henan di mupangca’ na varasa’ piyalusu di, mena’u ta tu ’asevan mu, mupacaran a tihasar di vunan di vulay tu pinidadekan a vavayan. kadu a sasaya a ’ayam kani kana kawikawiyan i lakad, nantu pihumulran mu ulra a dangdarang, a velreci’, a rema’at di a malulu’, adi madiyadi “pikiyu! pikiyu!” kema tu rarunuyan, nantu lrengaw mu pukasa kana padawilr di sadeku nu kinger ta.

alra nu pangecengec mena’u mu, idu na vavayan mu micepa ’emavang da ’ayam, nantu humulr lra mu, tu apecaw mased, sadu lra tu inapecan na humulr mu, tu dawayaw da kavang di tu pikavangaw, nu mena’u ta lra mu, salaw kana sadeku di vulay nu mikavang.

adadalrep kana kawikawiyan i dekalr mu, kaadu a sasa a ’ema’alrup, marayas mukuwa ’emalrupa i kawikawiyan. mena’u kanidu na mikavang da vulay di dinaway da humulr na vulavulayan mu, payas sahar di maranger mituruma’an kanidu na vulavulayan. mawmu, ini na vulavulayan adi maruwa palavat kanini na kawikawiyan kema di na ’ema’alrup tu saharan kanini na vulavulayan mu, tu uvurukay di punusar kantu dekalr, mukuwa lra kikaduwa kanidu na kawikawiyan di, mituruma’an lra kanidu na vulavulayan. adi pidaya ’ami mu, markaduwan tu pinialrak, di mutudadekalr lra i kadu, marka’inava lra, markalramalraman, marpulralrang na dinkalranan mpiyapiya.