Wp/pyu/tu pauwayan mulaliyaban dra puyuma

tu pauwayan mulaliyaban dra puyuma

a batibatiyan i puyuma i na temuwamuwan drya i mulelep dra balenan tu drekalr, aw muysatr kantu dinaway na talreb, piyaami muka lra meredeka kadri truwangalan. maidrang i mainay penangutr dra dare, meriyap piyadraya i mukeken na enay, amuna paalrupan. maidrang i babay i penangutr dra dare meriyap piyatimul i mukeken na enay i mu tu marayarayas i amau tu babuyulr kana puyuma. garem a puyuma kema i murkesata kema ta pauwayan. an karaniyan kan denun i mulaliyaban a puyuma tu pauwayan i a semasungal kan baetaw kan tayban, asuwa driya i uniyan dra dawa i drekalr kema a bati. aw kadru a misasa a bangsaran i demalasaw tu ngalad, maaya dra karuwayan tumu akanan, aw muka meredeka i pungsu i atrebung kana dawa, amuna adri karuwa malak kemasu puruma. tu marangeran malak i mubilin driya, i markaladam dra bulabulayan kadru i tayban tu ngalad aw markatawguwin. salaw padrangl kantu bini dra pukiwawanan, i tayban i malradram lra kantu wanger kan demalasaw i pulrang kemiyanger kiami kan baetaw, aw kimianger dra kuwadakudayan kemasu kana bini muwaberek i pungsu i makiwalray i baetaw kan tayban, aw kurnang druwa i puyuma. kadru i puyuma i masupeng kantu drekalr aw marengay lra dra kababelyasan i pungsu, muwaberek i marengay kaymayay dra partratrubung ta driya masalr an pakiyanger mu kanku i, an mareanimy mu kana dawa i mu resiyu kanay ku dra dawa pakan, i amau lra tu pauwayan dra mulaliyaban. na pinuwalak dra pudung na puran i amelri driya tu pauwayan, pukasa malregi dra ngusi an kiyakarun dra puran na mi trepa dra gutgut. driyama kan kikarun driya dra puran i adri inaniyan dra pinutrepa dra ngusi patala dra banangangabang matreetreelr tu pinatala dra paaalaw.