Wp/pyu/na pinalupuk

 marengay ku diya nantu padangaran tu akanen na pinalupuk nu ’amiyan na Pinuyumayan

ini na pinalepuk na ’avay mu, mau ninta inaekan na Pinuyumayan kinawacawacanan di, mau nanta marepadangardi marekamelrimelri tu liwlran. ulra na duma dekalr tu pungadanay kana “binaliyaw”, inta na Kasavakan mu, tu pudanganay da “pinalupuk” kema. mau lra nu kemaderun ema’avay ta da pinalepuk mekan.

a awac diya nu kemadurunan ta mu pitu wari ta vangavangan. adu inta na dinekalranan mapiyapiya mu, marasud ta mukuwa kurelranga kana kemaderunan, alara kana vangavang ta palisiyan na eman diya, uniyan ta da wari demuru mekan, mazu nu kama ta mu, kanini na kemaderunan mu, kadu ta i palakuwan, di maw idu na mekan ta kana “pinalupuk”. maruwaya ta saruma’ena’enan na dawdawan, na lralrak aruwaya kurelrang mapiyapiya kanini na kemaderunan, di muwalaka atu ulepan kanini na kinarepare  kaduwa ’amiyan.

na pinalupuk mu ’ina’avay ta ulra a lrikecan, padiw, dalis, saypu di kusay. nu uri ’a’avay ta mu, paduru ta diya da vira’ na lriyapuy di maw na lravilruvilru di ta tukasakasayaw semavesav, di paduru ta  kana tavi data tatilu’ venetevet. ta deremanay diya na lrikecan da teluwa tuki di ta ilangaw lra, ta puwanay kana luvuk di ta tengesay  emarec di puwanay kana iliyaw icas di tu pakacasay da ’aludun penere’, di nu carangcan lra mu, ta lumayaw pakaapeapelr, di ta reputaw sakepekepel, ta pepe’aw ta puwayay paduk kana ilinglingan na diwngan, padiw, kusay, dalis di tu mucalawcalaw na ’emu, piya cavuwaw kana lravilru, i ini na lravilru mu puka’aresem pakiwalay, maruwaya pakadika siyahuwa kanta cina’i.

pakalikudan lra mu, tu kasakasayaw cemavu tu vira’ na lriyapuy, di tu ayalaw puwa i lanseng demeru, nu aruwa makatelun tuki, karuwa lra tu idaderuwan, ta puvaliyaw diya palritek di maruwa ta mekan, tu imaranan mu pungalayngalay ta pakirev, palru harem kana wari mu, mawu diya nangku kinasahar.