Wp/pyu/a batibatiyan dra karmasamasalr i Pinuyumayan

a batibatiyan dra karmasamasalr i Pinuyumayan

a batibatiyan driya dra karmasamasalr i kema: ”mukisatran kadri panapanay nadruna temuwan i muramilrLa murenak atraw kadri kana kanatal. ” a bati dra kemay timul i: ”a trau i mupangtra dra kemay kana barasa, aw na sasaya i mupangtra dra kemay kana basikaw. ” garem lra i mari usabasabak ta lra dra markamenimeni dra pinitrawan, sadru lra na pauwayan na mubalis, aw marbuwa a bekalan a pauwayan, kamawan ta lra kana aputr markamnimeni tu edat dra bulay i balangaw. kemay dra tu batibati kan maidrang dalising:陳光榮 kadri puyuma kana drekalr. a asuwa driya i bariwan dra balenan tu kinakadruwan dra trau na kanatanatal tu balenanay adri lra kurenau, ta temuwamuwan i adulumaw kay adulusaw nadru na sarumaenan kararuwa makatelun misama tu pinitrawwan i muysatr dra talreb tu lraudaw muka semekadra kadri Pungsu kana kanatal, muka kadru i adri markalradralradram kana trau, kadru kurinu driya kanadru dra samaya bulan, i likudran i, amau na adri mararisan tu kakuwayanan. a driyalra i salaw markaitril a Pungsu kema aw, idru tu inuisatran na talreb tu uisatray driya mudawilr, pakurenang kana ngalun dra samaya ladan, kadrudriya i dawilri pabukubuku lra menau dra kamawan dra daderuwan dra kinakupu, tu udalrepaw i amau a drenan, itralri driya i truwangalan kema ta temuwamuwan. druwa kadri i payas penangutr dra dare i maidrang adulumaw. aw emapiyar kadri enaenay. padawilr tu inapiyaran. aw mulegetr na enay i, matrina na mudrenadrenan kadri piyadraya. kadru lra a dremenadrenan aw kemirami kandru paalrup a mainayan na temuwamuwan. na babayan i adulusaw i, emapiyar dra dare i adri padawilr. aw mulegetr na enay i makiteng na marayarayas, kadrulra a marayarayas aw kemirami gemusgus pubini muuma a babayan. kemay kandru mataradatar ta temuwamuwan kikadru lra. alra munuma leman amiyan i likudran i markamulenak tu pinitrauwan dra matrina a belawalawas garem i amau kadri bene, aw adri lra pakumau dra sangut dra dare, kadru a paaalrup menau kadri makatimul adri pakaumauma dra matrinayan, kemadru aw madrayadrayar dra waasalran, i marpadunudunun tu pinadrayadrayaran, amau lra nadru na miyapitu na maluwadiwadi kana paatayan na madaada kana niyarpayanan, druwa kadri maydatar mataradratar pakirpauwa dratu kaadruwan paragan dra ruma, aw mungsalr matara uma matara alrup, an muwatralun i, kadru maradruk, driyama idri Raurawi tu maidrang kadri paatayan i, paragan dra palakuwan, nantu wawadiyan i kurnang karanantantawan paragan dra palakuwan. kemadru aw, amau na karuseneseneng dra nirebuwaan kikadru dra dare, aw kakuwalengan misaur, kemadru aw tu kiyangeraw lra a uwasauran, aw marpadunudunun puadruk kantu palakuwan na nanema paragan kadri maydatar kana maramaidraidran kana ruma kadru lra kadru nadri na nanema palakuwan tu patabatabangaw tu pitaun, pudrenger lra dratu i paruturutung dra tu palakuwan dra puyuma kema tu pauwayan i misaur kema.