Wp/pyu/’apuc

kani Taiwan na Pinumayan na mu salaw kana misaharan da ’apuc. nu pacepa diya da kasaharan mu, na vavayan lra di na ma’inayan lra mu, kaadiadi mi’apuc pandang di mupacaran, mena’u ta mu salaw kasahasahar. nu mukasakasa ta kana duma data samawan mu, payas di ames ta kurena’u data pinadangan di haiyay madalram ta tu pinicawan, a Pinuyumayan nadiyu a kema.

kemay aidan di pureha ta mi’apuc nu kemata mu, uniyan da cau da madalram lra. kinger ta da ma’ida’idangan nu mararengay mu, kemay a awac ini na kakuwayanan, ninta pinarevuwa’ adi ta miturus da cau kema.

na Pinuyumayan tu ’inupidan na ’apuc mu, na dekadekalr diya adi kamaresanan. maya’ da tu kalre’ayan melak tu kinasaharan na ’apuc na vira’ di na carun ’emupid.

na Ulivelivek a aawac diya tu ’ina’upid da ’apuc mu, ’inuli da lranghi na salriwangwang di na tu vira’ kana vuiyung. tu tinucali na carun mu, mau na ’arapenad, ulra diya vinevetvet da cavai, na lranghi di na salriwangwang mu, tu ka’apucan nu ’ema’upid, na vuiyung mu duwa lra na Payrang ulra lra idu na carunan. na ’arapenad mu temelriw lra i henahenan, nu ma’a’ayil lra salaw ngulringulr tu liwlran.

nu ’ema’upid mu tu pasedesede’aw semeredek na ’apuc na vira’, kavulayan nu mena’u ta. tu ’apuc kana vavayan mu maraupic, na ma’inayan tu ’a’apuc mu marakecivi da saema. aymu na ma’inayan nu adi diya kituvangsar mu, adi maruwa mi’apuc harem lra mu marekasaadulra ulra na micepa na tiyam menaniwan da ’apuc. tu ’inupidan mu marekamelrimelri tu valray, puwapuwa vulay lra. aymu muvalivalis ta lra harem, kaduwan na cau na maracang da parasarasan ’emupid da ’apuc, cemima’ kana sokka na ’apuc di na vira’, di tu ’upidanay da cali da sokka, ’inavaya da ta ’emupimupid da ’apuc kema. na kemani mu, mukuwa ta i dawilr ka’ayil na ’apuc di mi’apuc ta da sokka mu ’inava diya, nu kadu ta i dekalr nu adi adawilr ta inuwadukan mu, mi’apuc ta da tatena’ da ’apuc mu karuwa ta mulrepus pulihu data kakuwayanan.

alra mutu Pinuyumayan ta di melri nu kaadiya madalram data pauwayan nu ’ema’upid da ta ’apuc di nu pu’apuc ta da kapauwayanan.