Wp/pyu/’amiyan

kani Taiwan inta na Yuancumin mu, ulra mukecep misama’ da pata mauwan. na marakaduwaduwan tu pinicauwan mu mau na Amis. na marakaytayan tu pinicauwan mu mau na Saw. iniyam na Pinuyumayan mu, ulra mi kana pukalralruwac kaduwanan naniyam pinicauwan. karuwa da sakudaw misama’ niyam pinicauwan.

a Pinuyumayan mu, ulra mukecep dekalran. nu mulaud mu, meredek i Papulu. nu mudaya mu, mau na Danadanaw, na Mulivelivek, na ’Alripay, na Tamalrakaw di na Likavung. nu mukedet mu, ulra na Kacacipulr di inyam na Kasavakan. nu mu’ami mu, palru i Pinaseki di i Puyuma. kaadu mi kani Valangaw kana henan i makalusu kana cekipan. maredalredalrep mi dekadekalr. salaw mi kalre’ayan mudangidangi.

kana ’a’ami’ami mu, marevulavulas na kasadekadekalran dimikes da pararadukan kana mukecep dekalr di pakadalram diya kana kaadu diya i dawilr na rinuma’enan. nu kaduwan lra nu kaytayan lra tu pinicauwan da dekalr mu, dadikes peniya. na kaduwan tu pinicauwan kana dekalr mu, mukuwa pulralranga kana kaytayan tu pinicauwan. salaw marpulralralralrang matukutukud a Pinuyumayan.

na micepa demikes mu, paadang da marekamelrimelri data kasaharan. meredek lra kanidu na wari kana wakasayan semasaharan mu, muparaduk mi na dekadekalran diya, na ma’ida’idangan di na rahan mu, mungsalr lra semasahar.

na ayawanan i dekadekalr diya mu, kadu kemayan i icas kana selingtay. venavati pukedang kana kadu diya kurelrang na dinkalranan.

palrivak na ma’a’idangan pa’ira’iraw misa’ur pucepa data ’amiyan di, pana’u data kakuwayanan na ma’inayan.

na vangesaran mu, marepakuwakuwa demaway da tadaw, da pecir, da ’ilrus, da resuk di da lrusung. mena’u da i eman na maraarekereked tu dinaway.

na tainayan mu, parepana’una’u datu ’inupidan na ’apuc, tu linne’ucan na pakelrep na pesi di, tu tinu’avay. mau nayiyan na dekalr na maravulavulay tu dinaway. na vulavulayan mu, marepakuwakuwa da kantu pinadangan. tu selrecay na kuwang mu, payas marpakuwa venakevak datu linepucan na kavang di pinadang. ulra na cau na palrivak mikacing. ulra na cau na mituvilr diya di mikacing lra. ulra na cau na penauwa ku lra kema di pavavekas mu, miyadana’ diya di, miya’apuc diya, marepana’una’u lra mu, ulra na muveliyas tu kacing, ulra na ma’iring tu pesi, karalikeliked kadu.

na musavasavak mu, marpakuwa ’emevang da lriyung. tu puwanay na lriyung i paduk kana waadukan di tu calacalawaw na tiru’ di tu vulru’anay kanantu canguru’ na lriyung, adi musavak na lriyung di, mukuwa timilu’a da tu kui na cau, karalikeliked lra mapiya na cau.

na valisen mu, semangalr da pawti di, matulutulud kantu sinangalr paliyus i renarenadan marpakuwa pavekas. na duma nu matatulud mu, madalru’ di tu ce’ce’aw na pawti. na duma mu, pavavekas mu mutani tu sinangalr di mareveliyas diya mukuwa semangalra mu, tu alepaw lra da cau.

na lralrakan mu, tu pakayanaw kana cava’i na vavayan di, tu kedengaw na cava’i na ma’inayan marpakuwa pavekas. nadu nantu dinkalranan mu , kadu i saninin ’emuy’uy pakirev. nu musali’udeng na cava’i mu, kurekedeng pavekas na vavayan. vuri’awan da semaharan na kadu diya menana’u na cau. na sanga lra, na ilikudakudan lra mu, tu pakasaharay papiya. salaw semangal na lralrak.

puwaludus lra mu, na mukecep na dekalr di na kemay dawilr na rinuma’enan mu, mukasakasa madikedikes tu lima muliyuliyus muwarak, ata madalram da markapida idu na inuliyusan. nu tu cilracilraway mu mukasakasa menekun. na ma’a’idang na ma’inayan mu, maresaresan tu pinitalupungan, tu pinilrungpawan. na vangesaran mu pinikacingan da salaw vangesar di maresaresan tu pini’apucan. na vavayan mu, salaw vulay tu pinadangan di pukasa vulay tu pinaliwsan na vulavulayan. kemawan da muwavii na sirusirupan, nu mena’u ta mu, kemawan ta lra kadu i ’apu’apuc kana vulay.

a Pinuyumayan mu. adi kaduwan tu pinicauwan. mawmu salaw mukepel, ta pulrepusaw ini na kakuwayanan na vulay kema ku kemiyanger.