Wp/prg/Līkuts Kunegiks

Līkuts Kunnegiks

Palīkisna

Leōnu Werthu.

Etwinūjaiti mennei wisāi malnīkai, kāi as asma palīkiwuns šin lāiskan eraūgušasmu. As turri swarewīngin tikslin: šis eraūguns ast majs ukawalns ginni, kawīdan as turri en swītu. Āntran tikslin: šis eraūguns mūka izprestun wissan, īr lāiskans per malnīkans. As dīgi turri tīrtan tikslin: tāns buwinna en Prankrīkei, lāilinantei alkin be saltan. Be prawerru tennan glandīntun. Ik šās brewīnslis ast nisātwinan, as rēide mazzi palīkitun šin lāiskan malnīku, kas tāns kadāi bēi. Wisāi eraūgusis kadāi bēi malnīkai (adder nitūlin ezze stan pamenna). Stesse paggan as kitawīdina majjan palīkisnan:

Leōnu Werthu, kaddan tāns bēi līkuts malnīks.

Pirmā Palazīnsna (I)

Kaddan as bēi uššan mettan wūran, asma widāwuns aīnan rēizan blīngewingin bildikan en lāisku, ka ebpeisāi čunglin. Lāiskas bēi pabilītan "Pragīwitai gērbsenei". Bildikan ast pawaidinnus bōwan augerīntin drezzikan. Stan ast glaubālis kōpija: [pragīwitai gērbsenei]

En lāisku ast di enpeisāwus: "Bōwas augerre pastippan swajjan kīninsenin. Panzdau tenēi ni mazzi skatītwei be migga en kērdai stēisan uššan mīnsin, ērgi tenēi ni grāmalai kīninsenin".

Panzdau as mirēi tūlin ezze čunglas gīwin, be mennei izpalla, sen wūpjainan alwinnin, glaubātun majjan pirman glaubālin. Majā glaubāli nummeri 1. Tenā perwaidinna stawīdai: [1]
‎
Asma pawaidinnuns swajjan māisteres-dīlin eraūgusimans be as prasīwuns, anga stan tennans ni bajjina. Be tenēi etrāwusis: kasse paggan keps bajjinlai?

Majjan bildikan ni pawaidinna keppun. Stan pawaidinna bōwan, ka grāmai elapāntan. Panzdau as glaubāi bōwas ēntran, kāi eraūgusis izpreslai. Tenēimans wisaddan prawerru eīskintun. Majā glaubāli nummeri 2 perwaidinna stawīdai: [2]
‎
Eraūgusis mennei ast rādiwusis, kāi as pawērplai glaubāsnan stēisan auwertan be etwirran angzdrin be kāi as eninteressinlai si tūls geōgrafijan, istōrijan, aritmētikin be grammatikin. Stawīdai, sēntei uššai metāi wūran as pawērpuns rikīwiskan kariērin stesse mālaran. As audīrsina si niizpalsenes stesses glaubālin nummeri 1 be 2 paggan. Eraūgusis nikwēigi ni izpresta ka nika subbai, be stan lāilina malnīkans, kāi tenēi turri wisaddan eīskintun.

Mennei bēi prawerīngi, kāi as etrīnklai kittan prōfesiōnin, tītat as pastāi winalaīwas štīritajs. As skrijja biskin en swītu be, akiwīstai, geōgrafijas zinasnā mennei bēi spārtai prawerīngi. As mūka sen aīnan dīran, šlaitīntun Kīnan be Arizōnan. Stan prawerēi, šlāitewingi ik tū blandāi en naktei.

Kāigi winalaīwas štīritajs, as turēi mazīngiskwan, kāi ebtiktun tūlin seriōzans zmūnins. Spārtai tūlin kērdan as izlaīdi sen eraūgusins. Asma dirīwuns en tennans iz taūwiskwan. Adder sta ni kitawīdina majjan presnan ezze tennans.

Kaddan as ebtikkuns eraūgusin, kas mennei perwaidinna biskin aumenewīngi, as segīwuns tenesmu izbandāsenin sen glaubālin nummeri 1, kawīdan as wisaddan turīwuns sēn sin. As kwaitēi bandātwei, anga as ebtikkuns perarwi izpretewīngin zmūnin. Adder eraīnan rēizan tenēi etrāi: -Sta ast keps. - Staddan as ni bilāi sen tennans neggi ezze bōwans, neggi ezze čunglin, neggi ezze lāuksnans. As bilāi ezze bridžan, gōlfan, pōlitikin be krawattins. Be eraūgusis bēi spārtai deiwūtan, kāi tenēi ast ebtikkusis stawīdan gaūdran zmūnentin.

Antrā Palazīnsna (II)

Tīt, as asma gīwuns ainaseīlingei, izarwi ni bilīntei sen niaīnuntan, ērgi gadīnsnan na Saharan, pirzdau uššans mettans. Ka nika gadinna si en motōru. Beggi sēn min ni bēi neggi mekānikeris, neggi skrāistwaišai, as turīwuns pagattawintun si prēi šin brendin reparatūrin, gāncai ainaseīlingei. Di bēi pēr min gīwis adder gallas pawīstis. As turēi undas rezērwin pēr tēr astōnins dēinans.

Pirman naktin as migēi na zigzdan, tūsimts mīlis ezze enbūwintasmu areālin. As bēi spārtais ainaseīlingin, nikāi izlāikuns na pluttan, na ōceanas sirdan. Tītat preistatinnaiti si majjan āustaban, kaddan smejjina tārika min ast baudinnusi. Be dis bilāi:

- Glaubāis mi, madli, kamistikin.
- Ka...?
- Glaubāis mi kamistikin.
‎
Asma etskīwuns tīt dīwai, kāigi min bruklai perkūns. Asma spārtai drazzuns akkins be as stengi widāsnan. As endirīwuns līkutan zmūnikan, kas dirēi en min nōdewingi. Stwi ast tenesse ukawalnan pōrtretan, kawīdan mennei izpalla wīlais teīktun: [kunegiks] Adder māise bildikan, akiwīstai, ni ast tīt ebwaidilānti, kāigi mōdelis. Di ni ast majā wīna. Kaddan as bēi uššai metāi wūran, eraūgusis mennei audīrsinusis ezze mālarausnai, stesse paggan as mukēi glaubātun tēr auwertans be etwirrans bōwans.

As dirēi ēn šin pērgiman sen etwirrans akkins āustabas paggan. Ni mīrstaiti, kāi as bēi tūsimts mīlis ezze enbūwintasmu areālin.

Adder šis līkuts zmūnentiks ni perwaidinna mi blandānti, neggi aulaūjanti pawārgsenes paggan, neggi aulaūjanti guddas adder alkīniskwas paggan, neggi pabajjintan. Gāncai ni ast perwaidinnuns kāigi malnīks, kas blandāi en pāustris sirdu, tūsimts mīlis ezze enbūwintasmu teritōriju. Kaddan as pastāi aubilīnti, asma bilīwuns:

- Adder, ka tū stwi segēi?
Be tāns āntrinuns, kāigi di būlai spārtai swarewīngi pawīstis:
- As madli, glaubāis mi kamistikin.

Kaddan kliptan ast prusnawīngi, ni mūka di emprīkistalītwei. Ikāi sta perwaidīnlai absurditāti - as gi bēi tūsimts mīlis ezze enbūwintasmu teritōriju be as bēi patrintan pra gallin - asma izimmuns papīras lappan be peisāklin iz tāšin. Adder šlāit, asma etminīwuns si, kāi as mukinna si galwai geōgrafijan, istōrijan, aritmētikin be grammatikin, tīt as bilīwuns zmūniku, biskin grāudu, kāi as ni mūka glaubātun. Tāns ast etrāwuns:
-Sta'st nizentlawingi. Glaubāis mi kamistikin.

Beggi as nikwēigi en pragūbingiskwai ni glaubāi, asma pawaidinnuns tenesmu aīnan iz dwāi glaubālins, ka as mukēi glaubātun. Šan sen auwertan bōwan. As bēi austabbintan, kaddan tāns mennei ast etrāwuns: [kamistin1 (enwārguns)]
- Ni, ni! As ni kwāi elapāntan en bōwai. Bōwa ast per wārgingi, be elapānts per debīkan. Mennei ast per līkutan plattibi. Mennei prawerru kamistikin. Glaubāis mi kamistikin.
‎
Tītat asma glaubāwuns.
Tāns nōdewingi dirēi ēn di be bilīwuns: [kamistin2 (awwins)]
- Ni, šin ast jāu spārtai enwārgus. Segēis āntran.
‎
Asma glaubāwuns. Majs ginni smijāwuns si mīlingei be etnīwingiskai
- Dirēis. Stan ni ast kamistikin, stan ast awwins. Tāns turri raggans.
‎
As teikāwuns nawwan bildikan, adder tāns di etmettuns, palīgu pirzdaumamans: [kamistin3 (wūrs)]
- Šin kamistikin ast per wūran. As kwāi kamistikin, ka giwīlai ilgai.
Tīt, nikantrai (as kwaitēi jāu pagaūtun motōras reparatūrin), asma glāubuns stawīdan glaubālin be šaūwuns: [kamistin4 (ēntrai kastens)]
‎
- Sta'st kastens. Kamistikin, ka tū kwāi, ast ēntrai.
Be as bēi spārtai austabbintan widāntei tuldewīngin prusnan stesse līkutan līgintajan.
- Di ast akrāts stan, ka as kwaitēi. Mīri tū, kāi prawerru tūlin zālin pēr šin kamistikin?
- Kasse paggan tū prasijja?
- Beggi mennei ast tīt līkutan plattibi...
- Perarwi sta wīrst sātawus. As dāwuns ti gāncai līkutan kamistikin.
Tāns izlīnkuns kīrsa bildikan.
- Nū, ni tīt līkutan. Dirēis, di enmigus...
Be tīt perwaidinna majāses zināsnas pagaūsenis stesse Līkutan Kunnegikan.

Tirtā Palazīnsna (III)

Mennei immi tūlin kērdan, kāi izprestun, iskwendau tāns perwāndrawuns. Līkuts Kunnegiks prasijja min ezze tūlin pawīstins, adder tāns perwaidinna, kāi tāns ni kirdēi majjans prasīsenins. Tēr wirdāi, ka tāns bilāi prēipalingi, biskin pa biskin, etkeddusis mi wissan. Kaddan pirman rēizan tāns widāwuns majjan winalaīwan (as ni mazzi glaubātun majjan winalaīwan, beggi stan būlai per brendu pēr min), tāns prasīwuns:
- Ka sta ast per pawīstin?
- Sta nist pawīstin. Stan skrāida. Stan ast winalaīwan. Stan ast majjan winalaīwan.
As bēi labatīngi, kāi as mazēi bilītun tenesmu, kāi ast skrāida. Staddan tāns wekkuns:
- Ka? Assei tū krūwuns iz dāngun?
- Jā. - As gērdawuns sūitenikiskai.
- Ak! Smejjawingi...
Be Līkuts Kunnegiks smīja si kalsīwingiskai, ka spārtai min nērwi. As kwaitīlai, kāi laikālai di majjan nideiwūtiskwan seriōzai. Panzdau tāns gērdau:
- Tītat, assei dīgi iz dāngun! Ezze kawīdsmu planetan tū pertīnka?
Stan biskin eīskina tenesse tiksnas kliptan, as izreizan prasīwuns: - Tīt tū perwāndrau iz āntran planetan?
Adder tāns ni etrāi. Tāns izlīnka be nōdewingi dirēi en majjan winalaīwan.
- Faktiskai, tū ni mazēi perwāndrautwei iz tālin sēn stan.
Be pagaūwa pamirītwei, ka wērau ilgai. Panzdau tāns izimmuns kamistikin iz tāšin be pagaūwa nōdewingi dirītwei en swajjan māntan.

Preistatinnaiti si, kāigi intrigītan as bēi, šisse "āntras planetas" paggan. As bandāi erzinātun ka nika tūls.
- Iskwendau tū perwāndrau, līkuts zmūnents? Kwēi tū buwinna? Kwēi tū kwāi īmtun swajjan kamistikan?
Pa mirīsnas mōmentu, tāns gērdau:
- Kastens, kawīdan mennei dāi, ast labban. Sta mazzi šlūzitwei en naktei kāigi kamistikes buttan.
- Perarwi. Be ik tū wīrst būwuns preilāngu, as wīrst dāwuns ti papilniminai wīrbin, kāi wanzālai tennan. Be stulpīkan.
Šī nadasnā šukkina Līkutan Kunnegikan.
- Wanzātun? Kawīds retawīngis prāts!
- Ik tū ni wanzālai tennan, di wīrst gūbus ainuntkwei be wīrst prapallus.
Majs līkuts ginni etkūmps pagaūwa smeītun si.
- Adder kwēi tennan ēilai?
- Ainuntkwei, ēmpirsin.
Staddan Līkuts Kunnegiks bilīwuns seriōzai:
- Niswarewīngi. Mennei ast tīt mazzan plattibi.
Be panzdau stan, tāns preidāi - kāi mennei perwaidinna - biskin sen grūstan:
- Ēntei tēr ēmpirsin ni mazzi di praēitwei per tāli...

Ketwirtā Palazīnsna (IV)

Tīt as erzināwuns āntran spārtai swarewīngin pawīstin: kāi planets, ezze kawīdsmu tāns pertikka, bēi nitūlin debīkaisin nikāi buttan!
Adder stan ni austabbina min spārtai. Asma waīduns, kāi šlāits debīkans planetans, kāigi Zemē, Jūpiteris, Mārss, Wēneri, kawīdamans dāi di pabilīsnans, ekzistijja simtāi stēisan kittan, kwās ast deznimai stawīdai līkutan, kāi ast brendu endirītun tennans īr sen telaskōpan. Kaddan astronōms aupalla ainuntkawīdan iz tennans, staddan dāi tenessei nummerin en emnes deīktu. Tāns pabilāi stan prei perwaidīnsnan "asterōids 3251".

As turīwuns seriōzans tikslins per gērdautun, kāi planets ezze kawīdsmu tāns pertikka, ast asterōids B 612. Šis asterōids bēi widātan tēr aīnan rēizan sen telaskōpan, en 1909 mettan, ezze turkiskasmu zinānikan.

Panzdau tāns segīwuns debīkan enwaidīnsnan stesse aupalsenin en Sirzdauamziskasmu Astronōmijas Kōngresan. Adder niaīnunts tenesmu ni druwēi, tenesse rūkan paggan. Eraūgusis jāu stawīdan ast.

Deiwūtiskwai per B 612 asterōidas labban emnin, tūrkiskas diktatōrs palaipsēi per swajjan amzin, sen gallas sūndas trīnin, kāi tenēi ebwīlklai si eurōpiskai. Astronōms āntrina swajjan enwaidīnsnan en 1920, adder tāns bēi ebwīlktan spārtai elagāntei. Be šin rēizan pastippan swītan ast tenesmu druwīwus.

Asma gērbuns šans malkans ezze asterōidan B 612 be asma dāwuns tenesse nummerin eraūgusimans paggan. Eraūgusis milāi cipperins. Kaddan tū gērba tenēimans ezze nawwan ginnin, tenēi nikwēigi ni prasijja ezze ukaswarewīngins pawīstins. Tenēi nikwēigi ni prasijja: "Kāigi tenesse tāri kālsa? Kawīdai spīlis tenesmu padīnga? Senrīnka tāns pettalkans?" Tenēi wans wīrst prasīwusis:"Kāigi wūran tāns ast? Kelli brātins tāns turri? Kāigi brendu tāns ast? Kelli penningans tenesse tāws peršlūzi?" Staddan tenēi druwēi, kāi erzināwusis tennan.
Kaddan jūs bilāitei eraūgusimans: "Asma widāwuns grazzu buttan sen wūrmins tīgelins, sen gerānijans prei langstans be sen pūlins na stāgan...", tenēi ni mūka preistatīntun si šin buttan. Tenēimans prawerru gērdautun: "Asma widāwuns buttan wērtan sīmtan tūsimtans."
Staddan tenēi wīrst krīkstusis: "Kāigi grazzu buttan!"

Ik jūs bilīlitei eraūgusimans: "Padruktinsnā, kāi Līkuts Kunnegiks ekzistijja, ast, kāi tāns ast ebwaidilāntin be kāi tāns kwaitīlai turītun kamistikin. Ik ainunts kwāi turītun kamistikin, staddan tāns ekzistijja" - tenēi wīrst tensīwusis pettins be pabilīwusis wans malnīkai.

Adder ik jūs wīrstei bilīwusis tenēimans: "Planets ezze ka tāns pertīnka ast pabilītan B 612" - tenēi wīrst pastāwusis endrūwintan be wīrst palāikusis wans sen pakkai. Tenēi jāu ast stawīdan. Ni prawerru ezze tenēimans kwaitītun per tūlin. Malnīkamans prawerru būt etnīwingi per eraūgusimans.

Adder akiwīstai, nūmans - kwāi zinna gīwin, nūmans ni interessanti nummeris! As kwaitīlai pagaūtun šan istōrijan, kāigi pagaūne di gārbikans. As kwaitīlai gērdautun: "Bēi aīnan rēizan Līkuts Kunnegiks, kas enbūwinuns planetan tēr biskin mūisesan nikāi tāns, be kas spārtai kwaitēi turītun ginnin...". Pēr šans, kwāi zinna gīwin, sta pawaidīnlai arwjais.

As ni kwaitīlai, kāi laikālitei majjan lāiskan niseriōzai. As lāilina si debīkan gulsenin gērbantei šan pamīnsnan. Stan jāu ast uššai metāi, kaddan majs ginni izgūbi sen swajjan kamistikin. As bandāi ebpeisātun Līkutan Kunnegikan, kāi ni izmīrslai tennan. Sta'st grāudu izmīrstun ginnin. Be gi ni eraīns turri ginnin. Be as mazīlai wīrstwei palīgu eraūgusimans, kwēimans interessanti tēr cipperis. Stesse paggan asma kāupuns kastennan sen wūpans be alwinnins. Stan ast spārtai brendu, kāi etwartīntun si prei glaubāsnan sēntei tīt wūran, šlāitewingi, kāi māise bandāsnas bēi tēr etwirā be auwertā bōwa, kaddan as bēi uššai metāi wūran! As wīrst bandāwuns segītun tīt labbans pōrtretans, kāigi stan ast mazīngi. Adder as subs ni waīda, anga sta mennei wīrst izpallus. Ainā glaubāli ast labban, antrā gāncai ni. As blandāi, kaddan as glaubāi tenesse aūgan. Stwi Līkuts Kunnegiks ast per aūktan, stwen per līkutan. As dīgi dwigubāi ezze tenesse rūkan bārwins. Tīt as segēi pawīstins aīnan rēizan walnai, āntran wārgais, be as dīgi segēi blāndans prei spārtai swarewīngins pawīstins. Nū, mennei prawerru stan etwērptun. Majs ginni nikwēigi ni eīskinuns nika. Mazīngi tāns mīriwuns, kāi asma tenesmu palīgu. Adder šlāit, grāudu, as ni mūka widātun kamistikins pra kastennans. Mazīngi asma palīgu eraūgusimans. As pastāits wūran.

Penktā Palazīnsna (V)

Eraīnan dēinan as erzināwuns ka nika nawwan ezze tenesse planetan, izjāsnan, pintegan. Šan zinānin as rīnkuns līnai be prēipalingi. Tīt, en tīrtei dēinan, as erzināwuns drāman stēisan baōbaban.

En šismu prēipalin sta audāwus si dīnka kamistiķu. Niggeistai, tāns prasīwuns, turēits swarewīngins dwigubāsnans:
- Ast stan arwi, kāi kamistikēi īst kīrnans?
- Jā, stan ast arwi.
- Ak, asma spārtai deiwūtan!
As ni izprettuns, kasse paggan ast swarewīngi, anga kamistikēi īst kīrnans. Adder Līkuts Kunnegiks preidāi:
- Staddan tenēi dīgi īst baōbabans?

As eīskinuns, kāi baōbabai ni ast kīrnas, adder garēi. Be ik tāns īmlai īr pastippan elapāntan kāimenin, tenēi ni mazīlai īstun mazzais aīnan baōbaban.

Pamirīsna ezze elapāntan kāimenin segēi, kāi Līkuts Kunnegiks smijāi si.
- Prawerīlai lazīntun tennans aīns na āntran.[elapāntai]
Be tāns gaūdrai preidāi:
-Baōbabai, pirzdau tenēi izaūga, ast pirmai līkutan.
-Perarwiskai! Adder kasse paggan tū kwāi, kāi kamistikin īdlai baōbabans?
Tāns etrāwuns: "Labbai, izpretīngi..." - kāigi sta būlai akiwīstan. Sta bēi debīka pastanga, kāi as izpreslai stan šlāit niainasse pagalban.

Enwaidinnus si, kāi na Līkutas Kunnegikas planetan, kāigi na wissans planetans, aūga zālai be nizālai. Stesse paggan stwen dīgi bēi labāi simenēi stēisan zālin be wargāi simenēi stēisan nizālin. Adder simenēi ast niwīdaminan. Tenēi migga aukliptintan en zemmei ērgi tenēi kwaitīlai bustwei. Staddan izaūga nidīrsu daīgan en saūlis līnkin. Ik preipalla, kāi stan ast rōzi adder redīss, staddan mazzi di dātun aūgtwei tenēimans. Adder ik stan ast nizālis, tennan prawerru pernaikīntun dīwai, kaddan tēr endirēi di tennan.[eliminīnts]

Tēnti na Līkutas Kunnegikas planetan tikka bajjawiskai simenēi. Baōbabas simenēi. Planetas wīrsawisku pastāi seriōzai infektītan. Be baōbabs, kaddan izaūga per debīkan, ast nimazīngi, kāi tennan izraūlai. Tāns wīrst ōkupawuns pastippan planetan. Tāns wīrst praarruns planetan sen swajjans saknins. Be ik planets ast līkutan, be ik ast tūlin baōbabai, tenā wīrst pastāwusi dreztan.

- Sta ast kānkstiskwas pawīstis. - bilīwuns mi panzdau Līkuts Kunnegiks. - Pa swajjai ankstāinas tualattin, prawerru segītun dīgi tikriskan planetas tualattin. Tū turri preispārtintun si prēi baōbabas regulāran āupausinsnan, izreizan panzdau tū izšlaitinna tennans ezze rōzins, kawīdas ast baōbabamans palīgu, kaddan tenēi ast spārtai māldan. Stan ast spārtai preiilgewingi dīlin, adder spārtai lāngu.

Be aīnan dēinan tāns mennei rādiwusis, kāi as glaubālai grazzu bildikan, kāi izpalewīngi endītun stan en galwans stēisan māise planetas malnīkan.
- Ik tenēi kadāi wīrst pintegaūwusis - tāns gērdau - stan mazzi būt tenēimans prawerīngi. En rēizans, ik tū palaīde dīlin per wīlaisin kērdan, stan ni ast škūdas tikslin. Adder en baōbaban prēipalu, stan ast wisaddan katastrōfi. As zināwuns planetan, enbūwintan pra wūlakan. Tāns ast ignōriwuns trīns aūgmenins..."

As paglaubāwuns šin planetan pa Līkutas Kunnegikas preizentlisnamans. Mennei ni padīnga būtwei mōralists. Adder baōbaban wārgingisku ast tīt līkutai zinātan, be rīziku pēr šans, kwāi blandālai prei aīnan iz asterōidans, ast tīt seriōzan, kāi en šismu prēipalin mennei prawerru segītun izīmsenin ezze majāmans rēgulins. Be as bilāi: "Malnīkai! Nōdewingi prei baōbabans!"

Kakīnsli ast, kāi ēmpirsergītun majjans ginnins ezze alārman, kawīds wēraui tīt ilgai, adder ast gāncai nizinātan. Lakciōni, kawīdan as dāi, bēi wērtan stawīdan pastangan.[baobab]
Mazīngi jūs wīrstei prasīwusis: kasse paggan wissas glaubālis ni ast tīt blīngewingi, kāigi baōbaban glaubāli? Etrāsenis ast spārtai prastan: as bandāwuns, adder mennei ni izpallus. Kaddan as glaubāwuns baōbabans, as bēi izpilnintan sen jusnan stesses būtewingiskwan.

Uštā Palazīnsna (VI)

Ak! Līkute Kunnegike! As līnai izpretta twajjan grāudin gīwin. Jāu ilgai Saūlis wakarāi ast twāise ainagimmusi enwesselinsna. As erzināwuns šan nawwiniskwan ankstāinai, en ketwirtai dēinan, kaddan tū mennei pabilīwuns:

- Mennei spārtai padīnga wakarāi. Ēimai dirītwei en wakkaran.
- Adder prawerru gēistwei...
- Gēistwei na ka?
- Kaddan Saūli pagaūne aukliptintun si.
Tū perwaidinnuns spārtai austabbintan, panzdau tū smijāi be gērdau:
- As aīnat mīri, kāi asma prēi min.

Faktiskai, wiss waīda, kāi kaddan en Perainintāmans Amērikas Wālstins ast pusideinā, staddan en Prankrīkei Saūli aukliptina si. Ik būlai mazīngi praēitwei minūtis enkērdan, staddan mazīlai di widātun wakkaran. Grāudu, Prankrīki ast per tāli. Na twajjan līkutan planetan tebbei bēi sūit praskajjintun krīslin delli zāngans tālis, kāi widātun wakkaran telli rēizans, kelli tū kwaitēi.

- En aulamtai dēinan as dirīwuns na wakkaran ketturdesimts ketturei rēizai.
Be panzdau mōmentan tāns preidāi:
- Tū waīda... Kaddan ast ainuntsmu grāudu, mīli di wakkarans.
- En dēinai, kaddan tū dirīwuns ketturdesimts ketturei rēizai en wakkaran, bēi tebbei tīt spārtai grāudu?
Adder Līkuts Kunnegiks ni etrāi.

Septmā Palazīnsna (VII)

En pēnktai dēinan, etkūmps dīnka kamistiķu, as erzināwuns nawwan kliptan stesse Līkutan Kunnegikan. Tāns prasīwuns plakkawingi, šlāit niaīnan ēnwadan, kāigi pa ilgai mirīsnas kērdan:
- Ik kamistikin īst kīrnans, tīt staddan dīgi īst kwēitins?
- Kamistikin īst wissan, ka tennan aupalla.
- Īr kwēitins, kawīdai turri kāubrins?
- Jā, īr kwēitins, kawīdai turri kāubrins.
- Tīt pēr ka šluzi kāubris?

As ni waīduns. As bēi per ensegītan sen bandāsnan, kāi etwērbtun wērbin, ka embadda si en motōru. As bēi spārtai nipakīwingiskan, beggi as izpretta, kāigi seriōzan bēi winalaīwas gadīnsenis be undan pagaūwa wangīntun si. As bijāwuns ukawārgan.
- Pēr ka šlūzi kāubris?
Līkuts Kunnegiks nikwēigi ni pawērpi ainawārst preistatīntan prasīsenin. As bēi spārtai nērwitan wērbjas paggan be as etrāi ka nika:
- Kāubris šlūzi pēr nika, stast tēr kwēites skistā wargaprātisku!
Līkuts Kunnegiks nadwīsi, ainuntkawīdai enēizwintan:
- As ni druwēi! Kweitēi ast kuslin, ast lāngiseilingi. Tenēi sargāi si, kāigi mūka. Tenēi mīri, kāi sen kāubrins tenēi ast bajjawiskan.
Ni asma etrāwuns. As staddan mirēi: "Ik šin wērblin ni wīrst dāwus etwērbtun si, as wīrst izspilluns tennan sen kūjan". Līkuts Kunnegiks autēnsi majjan mīrisnan:
- Be tū gērdaui, kāi kweitēi...
- Adder ni! As ni gērdaui nika. As etrāwuns ka nika. Asma ensegītan sen seriōzans pawīstins.
Tāns dirīwuns ēn min austabbintan.
- Sen seriōzans pawīstins?
Tāns widāwuns min sen kūjan en rānkai be kīrsnans pīrstans smārsas paggan, izlīnkstantin kīrsa pawīstin, ka tenesmu perwaidinnus si spārtai klūmbewingi.
- Tū bilāi kāigi eraūgusis.
As gīdina si biskin. Adder, šlāit engraudīsnan, tāns preidāi:
- Tū ni izpresta nika... Tū wissan maisāi!
Tāns bēi spārtai nērwitan. Tenesse skebelāi dribbina sen wītran.
- As zinna planetan, kwēi ast rikīs sen wūrmin prusnan. Tāns nikwēigi ni wūsuns kwēitins. Tāns nikwēigi ni dirīwuns en lāuksnans. Tāns nikwēigi niaīnuntan ni milīwuns. Tāns nikwēigi ni segīwuns nika kittan, nikāi gīrbausnan. Be pastippan dēinan tāns āntrina palīgu tebbei: "Asma seriōzs zmūi! Asma seriōzs zmūi!" Tāns īr belza labbatas paggan. Adder tāns ni ast zmūi, tāns ast krimma!
- Ka?
- Krimma!
Līkuts Kunnegiks bēi īr gaīlin nērtes paggan.
- Ezze miliōnamans mettans kweitēi turri kāubrins! Adder šlāit, kamistikēi īst kwēitins. Be anga tebbei ni perwaidinna si eīskinsnas wērtan, kasse paggan kweitēi segēi stawīdan pastāngan, kāi teīktun kāubrins, kawīdai ni šlūzi per nika? Ni ast kareusnā sirzdau kamistikins be kwēitins swarewīngi? Ni ast stan seriōzan be swarewīngeisin, nikāi gīrbausnas stesse stāran, wūrmin rikijjan? Ik as zinna aīnan kwēitin, ainagimmusin en swītu, ka ni ekzistijja nikwēigi nikāi na majjan planetan, kawīdan kamistikin mazzi iznīktwei izreizan, šlāit pastangan, aīnan ankstāinan, ni waīdantei, ka tennan segēi - stan ni turri zentlisnan, jā?
Tāns wurmjau, panzdau ast ēmpirsin sadinnuns :
Ik ainunts mīli kwēitin, kawīds ast ainagimmus na miliōnans stēisan planetan, tenesmu sātaui tēr dirītwei en lāuksnans, kāi būtwei deiwūtan. Tāns sebbei bilāi: "Majs kwēitis ast stwen ainuntkwei". Adder ik kamistikin īst kwēitin, staddan tenesmu perwaidinna si, kāi wissas lāuksnas gessa. Be stan ast swarewīngi!
Tāns nijāu mazēi bilītun. Tāns dussa rāudas paggan. Pastāi miglā. As pawērpi majjans pagaptins. Ainawīdan mennei bēi kūjs, wērbin, undan, gals. Na aīnan lāuksnan, planetan, na majjan Zemmin bēi Līkuts Kunnegiks, kawīdan prawerēi gladīntun. As immi tennan en rankans be suppina. Asma bilīwuns:
- Kwēitis, kawīdan tū milāi, ni ast en trinewīngiskwai. As wīrst glaubāwuns āustakarban per twajjan kamistikin, as wīrst glaubāwuns twajāses kwēitin kliptawan. As...
As ni waīduns, ka bilītun. As jutta si nipreistalīwingi. As ni waīduns, kāigi prei tennan preikakīntun si, kāigi dallautun grūstan sen tennan. Stan ast tīt kliptinnin, swītan stēisan assaran.

Asmā palazīnsna (VIII)

Panzdau niilgan kērdan as erzināwuns tūls ezze kwēitin. Na Līkutas Kunnegikas planetan kweitēi wisaddan bēi spārtai prastan, grazzintan pra aīnan lappin rīndan, tenēi ni immi debīkan deīktan be niaīnasmu ni gadinna. Tenēi tīnka aīnan ankstāinan en zālu be aulaūwa bītai. Rōzi dīga en dēinas kērdan, iz zīrnin niaīns ni waīda izkwēndau preipīstan, be Līkuts Kunnegiks nōdewingi dirēi nō šin daīgan, ka bēi pastippai nipalīgu ainuntkawīdasmu kittan. Di mazēi būt nawā baōbabas pērgimi. Adder kīrna pa līkutai kērdan wanginnusi aūgtwei be pagaūwa teikātun kwēitin. Līkuts Kunnegiks, kas dirīwuns na pūmpuras tiksnan, jutta, kāi wīrst tīkkus ka nika āustabawingi, adder rōzi kliptintan en swajasmu zallin buttan gattawina si līnai. Tenā tikriskai etrīnka bārwins. Tenā ebwīlka si līnai, senkalsēi lappins - aīnan prei āntran. Tenā ni kwaitēi kweitātwei be perwaidīntun niseīlawingi, kāigi mūkis. Kwaitīwusi tiktwei en pilnasmu blīngan stesse swajjan grazzu. Ak jā! Tenā bēi kōketi! Be tenesses grazinsnā wērau delli dēinans. Adder en aulamtei ankstāinan, akrāts en saūlis teksnai - tenā pawaidinnusi si. [kwēitis]

Be tenā, kwāi dīlawusi prei swajjan wīdan tīt tikriskai, bilīwusi dwasawīntei:
- Ak! Asma ka tēr etbaudinnusi si, madli per etwerpsenin, ni asma dabber kāistan.
Līkuts Kunnegiks ni mazēi iztarītun swajjan endāusinsnan:
- Kāigi grazzu zupūni ast!
- Perarwi - tusnai etrāwusi kwēitis. - As gimma drāugai sen saūlin.
Līkuts Kunnegiks izminna lāngu, kāi tenā ni bēi per sūitenikiskan, adder kāigi ebwaidilāntin!
- Perwaidinna mi si, kāi jāu ast brōkastis kerdā. - tenā preidāi dīwai - Rikīs mazīlai etwīngiskai pamīritwei ezze min...
Līkuts Kunnegiks, pastippai gīdintan, gūbi laukītun laījapudan, kāi enwundintun kwēitin.
En niilgai kērdan tāns pastāi lāilintan pra tenesses pāustiskwan. Aīnan dēinan, prei perwaidīnsnan, bilīntei ezze swajjans ketturins kāubrins, gērdau:
- Tīgerei sen swajjans naggans mazzi perēitwei!
- Na majjan planetan ni ast tīgerei. - emprīkistalāi Līkuts Kunnegiks - Šlāit stan, tīgerei ni īst zālin.
- Ni asma zālis - etrāwusi saldai kwēitis.
- Etwinūsei...
- As ni bijja tīgeres, adder as dergēi wītras strāuwan. Ni turri rikīs pirsidrīmbin ezze wītrai?
"wītras strāuwas bijā... Stan ni ast per labban per aūgmenin. - mirēi Līkuts Kunnegiks - Šis kwēitis ast spārtai kōmplicitan."
- Bītai rikīs ebstegsei min, madli, sen stiklaīnan kūgin. Stwi ast spārtai saltai. Stwi ast wārgas rīkas. Stwen, iskwendau as pergūbi...