Juan Nepomuceno Carlos Pérez Rulfo Vizcaíno, kaj tiktukeytiat Juan Rulfo, se Mexicochanej tawawasuani wan takwikwilchiwani katka.Tikishmatit ika ume iamachti, “Pedro Páramo” tik se shikipil chiknawi tzunti ume pual kashtul (1955) wan ne amachti ipal kutu casoj “El Llano en Llamas” tik se shikipil chiknawi tzunti ume pual majtakti yey (1953). Ne kutu casoj amachti kipia ne wey tikishmatit casoj "¡Diles que no me maten!" (“Shikinhilwikan te ma nechmiktikan!”).

Ne Itunal Ichtaka

Rulfo nesik tik ne shiwit se shikipil chiknawi tzunti kashtul ume (1917) tik ne techan Apulco, takutun ipal Jalisco. Nemanha iteku mikik tik ne shiwit se shikipil chiknawi tzunti se pual yey (1923) wan inan mikik tik ne shiwit se shikipil chiknawi tzunti se pual chikume (1927), inoya kiskalij tik Guadalajara, Jalisco.

Rulfo yajki ne tamachtiluyan Luis Silva School. Ichan nemi tik ne tamachtiluyan intzalan ne shiwit se shikipil chiknawi tzunti se pual chikwey (1928) wan ne shiwit se shikipil chiknawi tzunti se pual majtakti ume (1932). Yajki ukse tamachtiluyan intzalan ne shiwit se shikipil chiknawi tzunti se pual majtakti ume (1932) wan ne shiwit se shikipil chiknawi tzunti se pual majtakti nawi (1934). Tesu yajki se wey tamachtiluyan.

Rulfo yajki ka Ciudad de Mexico. Tik ne shiwit se shikipil chiknawi tzunti se pual majtakti chikwasen (1936), yajki amatachialis tajtamachtilis tik ne wey tamachtiluyan “Universidad Nacional Autónoma de México.”

Rulfo munamiktij iwan Clara Angelina Aparicio Reyes tik Guadalajara, Jalisco tik se tunal se pual nawi pal ne metzti nawi tik ne shiwit se shikipil chiknawi tzunti ume pual chikwey (1948). Kipia nawi ipijpipil intukey katka Claudia Berenice, Juan Francisco, Juan Pablo, wan Juan Carlos Rulfo.

Tay Kichiwa

Kimakaket se takulis pal mumachtia ka “Centro Mexicano de Escritores." Ka né, intzalan ne shijshiwit se shikipil chiknawi tzunti ume pual majtakti ume (1952) wan se shikipil chiknawi tzunti ume pual majtakti nawi (1954), kimawawasuj ume amachti.

Ne achtu amachti, “El Llano en llamas,” kipia miak kutu casoj. Ne cajcasoj ipanpa ne tunal tik ne “Revolución mexicana” (1910-1920) wan ne “Guerra Cristera” (1926-1929). Sejse yek kishmatit cajcasoj "¡Diles que no me maten!" wan "No oyes ladrar los perros" (Tesu tikinkaki tiajwat ne pejpelu).

Ne ume amachti, “Pedro Páramo,” se kutu amachti ipanpa se takat itukey Juan Preciado. Yajki ka inan itechan, Comala, nemanha mikik ika kineki kiajsi iteku. Ajsik Comala wan te akaj nemi tik ne techan, maya tajtamutil. Achtu ka tanamak maya ume shikipil amachti tik ne achtu nawi shiwit. Nemanha, Páramo muchiwki wey. Pedro Páramo kipatket tik ume pual majtakti tajtaketzalis wan ne ingles amachti tanamak ajku shikipil shikipil amachti tik estadosunidos.

Intzalan ne shijshiwit se shikipil chiknawi tzunti ume pual kashtul se (1956) wan se shikipil chiknawi tzunti ume pual kashtul yey (1958), Rulfo tekitki tik se kutu amachti “El gallo de oro” melka kiski tik ne shiwit se shikipil chiknawi tzunti nawi pual (1980).

Gabriel García Márquez ina ka tesu welik tamawawasua nemanha kimawawasuj achtu nawi iamachti wan maya neman kiajsik Pedro Páramo tik ne shiwit se shikipil chiknawi tzunti yey pual se (1961) welik tamawawasua ne wey iamachti “Cien años de soledad.”

Ken Mikik

Rulfo mikik tik ne tiutak tik se tunal chikume pal ne metzti se tik ne shiwit se shikipil chiknawi tzunti nawi pual chikwasen ika kipia "cancer" pal ejekateni ipajpaletia.

Ajamachti

El llano en llamas (1953)
Pedro Páramo (1955)
El Gallo de oro (1980)

Ikwikwil

Mexico: Juan Rulfo Fotógrafo, 2001
Inframundo: El México de Juan Rulfo, 1980/83
Juan Rulfo: Letras e imágenes, RM, 2002https://web.archive.org/web/20110613163940/http://www.clubcultura.com/clubliteratura/clubescritores/juanrulfo/letrasimagenes01.htm#
http://www.guiarte.com/noticias/juan-rulfo-fotografo.html
http://www.elpais.com/articulo/cultura/ojos/Pedro/Paramo/elpepuint/20070903elpepicul_2/Tes
https://web.archive.org/web/20110519065034/http://elangelcaido.org/2005/11/200511jrulfo/200511jrulfoe.html

Ijilpika

Janney, Frank (ed.) (1984). Inframundo: The Mexico of Juan Rulfo. New York: Persea Books.
Interview with Teresa Gómez Gleason, in: Juan Rulfo (1985). Jorge Ruffinelli, ed. Obra completa (2nd ed.). Fundación Biblioteca Ayacucho. p. 214.
Soler Serrano, Joaquín, "Entrevista con Juan Rulfo" in A Fondo ( TV show ), RTVE2, April 17, 1977.