Wp/ppl/Grunya Efimovna Sukhareva
Grunya Efimovna Sukhareva
[edit | edit source]Grunya Efimovna Sukhareva nesik tik ne techan Kyiv, an, se takutun tik Ucrania melka, kakta se takutun tik Rusia[1]. Yaja nesik se tunal majtakti se pal ne metzti majtakti se tik ne shiwit se shikipil chikwey tzunti nawi pual majtakti se (1891) wan mikik se tunal se pual chikwasen pal ne metzti nawi tik ne shiwit se shikipil nawi tzunti nawi pual se (1981).
Yaja yultaketzalis tapajtiani[2] pal siwapil wan piltzín wan tamachtiani katka.
Ne itunal ichtaka:
[edit | edit source]Ne inan itukey katka Rakhila Iosifovna Sukhareva wan ne iteku itukey katka Chaim Faitelevich. Yaja se judía siwat katka. Yaja kipiak se iikaw, itukey katka Maria, yaja tapajtiani nusan katka. Sukhareva mumachtij tik Instituto Médico de Kyiv pal muchiwa tapajtiani. Yaja tesu kipiak ipilawan katka.
¿Tay kichiwki?
[edit | edit source]Tik ne shiwit se shikipil nawi tzunti kashtul (1915) yaja kipejki tekiti tik ne Instituto Médico de Kyiv. Intzalan ne shiwit se shikipil chiknawi tzunti kashtul se wan ne shiwit se shikipil chiknawi tzunti se pual se (1917-1921) yaja tekitki ken se yultaketzalis tapajtiani tik ne Hospital Psiquiatrico de Kyiv. Intzalan ne shiwit se shikipil chiknawi tzunti kashtul nawi wan ne shiwit se shikipil chiknawi tzunti se pual se (1919-1921) yaja se tatuktiani tik ne Instituto de salud mental de la niñez y adolescencia katka.
Tik ne shiwit se shikipil chiknawi tzunti se pual se (1921) yaja yawit tik ne ukse techan, ne yankwik ichan nemi ka Moscú, man, yaja tekitki tik ne Departamento psiconeurológico para la niñez, kan yaja kichiwki se tamachtiluyan, Sukhareva itukey katka ne tamachtiluyan “Escuela sanatorio psico-neurologico y pedagógico”. Man, yaja mumachtij ne sijsiwapipil wan pijpiltzitzin pal kishmatki ipanpa ne Desorden del Espectro Autista, nemanha, iwan uni tamachtilis yaja tamawawasuj ipanpa Desorden del espectro Autista. Yaja tamawawasuj ukchupi se tzunti se pual majtakti amat[3] wan miak amachti.
Tik ne shiwit se shikipil chiknawi tzunti se pual chikwey (1928), Sukhareva tamachtiani katka tik ne achtu wey tamachtiluyan Instituto Medico tik Moscú. Intzalan ne shiwit se shikipil chiknawi tzunti se pual majtakti yey wan ne shiwit se shikipil chiknawi tzunti se pual kashtul (1933-1935) yaja tatuktiani tik se takutun ka psiquiatria tik ne wey tamachtiluyan Universidad de Kharkiv katka. Tik ne shiwit se shikipil chiknawi tzunti se pual kashtul (1935) yaja se tatuktiani tik ne wey tamachtiluyan Instituto central de educación medica de postgrado wan yaja se tatuktiani tik ne Hospital psiquiatrico de Kashchenko nusan katka.
Ne itekiw:
[edit | edit source]Grunya Efimovna Sukhareva ne achtu nuknew ka taketzak ipanpa autismo katka. Ika yaja tekitki innawak ne sijsiwapipil wan ne pijpiltzitzin tik ne tamachtiluyan ka yaja kichiwki, yaja welik kishmati wan taketza inpanpa ne sijsiwapipil wan ne pijpiltzizin ka tesu kenha ken[4] ne muchi sijsiwapipil wan pijpiltzitzin katka.
Yaja tamawawasuj ipanpa autismo tik ne shiwit se shikipil chiknawi tzunti se pual makwil (1925), ne amat kitamawawasuj tik ne ruso tajtaketzalis wan tik ne shiwit se shikipil chiknawi tzunti se pual chikwasen (1926) ne amat kipatki tik aleman tajtaketzalis. Tik ne shiwit se shikipil chiknawi tzunti se pual chikwey (1927) Sukhareva tamawawasuj ukchupi ipanpa autismo. Yajasan tamawawasuj ipanpa autismo tik siwapipil. Katka ne tajtapatianimet yultaketzket ka autismo kachka ne kukulis esquizofrenia, melka Sukhareva kishmatki ka yejemet tesu kenha.
Sukhareva kichiwki wan tamawawasuj ipanpa autismo, se yankwik tamatialis, se pual kashtul shiwit katka ka ukse tajtapajtianimet. An, ne tajtapajtianimet yultaketzat ne itekiw Sukhareva sujsul yek wan ken ne tamatialis ka an tikpiat. Yaja nusan kilkij ka autism nemi tik ne intzuntishyu, an tikmatit ka yaja yultaketzalis nemik yek.
Tik iajamat, yaja achtu tamawawasuj ne taketzalis “psicopatia esquizoide”. Esquizoide kachka ne taketzalis "tesu kenha". Nemanha, yaja kipatki iwan ne taketzalis autismo. Yaja tamawawasuj ipanpa autismo se pual shiwit katka Hans Asperger wan Leo Kanner, melka ne sujsul yek itekiw chupi kinishmatki. Kanner kilwij yaja itukey tik se iamat. Miak tatemuani[5] yultaketza Asperger tesu kinekik tamawawasua yaja itukey ika Sukhareva judía katka wan Asperger tekitki inwan ne Nazis.
Sukhareva tekitki pal ne sijsiwapipil wan pijpiltzitzin kipiat tamakishtilis. Yaja yultaketzki uej sijsiwapipil wan uej pijpiltzitzin tesu nemi pal yawi tik ne kal kan nemit ne tuijikniwan kaj kitzij tiwit[6] , yaja yultaketzki ka tajtapajtianimet nemi pal kinpalewiat yejemet. Yaja mumachtij ne kukulis PTSD tik sijsiwapipil wan pijpiltzitzin nusan.
¿Ken mikik?
[edit | edit source]
Sukhareva mikik tik Moscú, se tunal se pual chikwasen pal ne metzti nawi tik se shiwit se shikipil chiknawi tzunti nawi pual se (1981) keman yaja kipiak nawi pual majtakti shiwit. Yaja kukuyak. Kitalpachuat katka kan nemi ne shajshaput Vostryakovskoye iwan ne itejtekuwan wan iwan ne iikaw.
Ipanpa uni:
[edit | edit source]- ↑ En ese tiempo, la Unión Sovietica.
- ↑ Psiquiatra. Doctora del pensamiento.
- ↑ Artículos, reportes, documentos, papeles.
- ↑ Direfentes. Lit. No iguales.
- ↑ Científicos, investiagadores.
- ↑ Cárcel.
Ijilpika:
[edit | edit source]Sukhareva biografía (Eng.): https://en.wikipedia.org/wiki/Grunya_Sukhareva#:~:text=7%20References-,Biography,1915%2C%20earned%20her%20medical%20degree.
Contribuciones, NIH (Eng.) https://pmc.ncbi.nlm.nih.gov/articles/PMC10038965/
Sukhareva y la descripción de autismo (Eng.) https://www.italianjournalofpsychiatry.it/article/view/540
Sukhareva, la primera en describir el autismo (Eng.) https://www.scientificamerican.com/article/how-history-forgot-the-woman-who-defined-autism/
Sobre su muerte (Eng.) https://www.ncbi.nlm.nih.gov/pmc/articles/PMC10038965/