Wp/ppl/Ayuda:Tay ne WTN

From Wikimedia Incubator
< Wp‎ | pplWp > ppl > Ayuda:Tay ne WTN
Jump to navigation Jump to search
Ne Wikipediaj Tik Nawat

Achtu Iswat
pal Wikipediaj

Tepalewilis
Tajtaiwan
Chinamit

Ne Wikipediaj se enciclopediaj. Yaja ken se amat sujsul wey kan tiwelit timumachtiat muchi tay tiknekit. Ini Wikipediaj nemi tik Nawat, yajika itukay Wikipediaj Tik Nawat.

Ne Wikipediaj[edit]

Ken ne Wikipediaj?[edit]

Ne Wikipediaj Tik Nawat se wikij, kineki ina se kan mutepewa sujsul miak tajkwilul pal tiwelit timumachtiat tay tiknekit, wan te uij ma tiktemukan tay tiknekit tikmatit. Ne Wikipediaj te muajsi tik se amat ken ne ajamat pal ikman, sute tik ne internet, wan weli muita tik se computadoraj su kipia internet. Melka tesu se amat ken katka ne ajamat, muchi ne tajtajkwilul ipal ne Wikipediaj kan ne muijkwilua muchi, tejemet tiknutzat "ijiswat". Muchi ne ijiswat kipiat ijilpika: kineki ina sejse kan tiwelit tikchiwat klik pal tikitat uksejse iswat pal timumachtiat sejseuk tay tiknekit tikmatit, wan ijkiuni, muchi ne ijiswat mupiktiwit ne se iwan ne seuk wan tiwelit tiktemuat muchi tay tiknekit tikajsit pal timumachtiat.

Se amat ipal muchi[edit]

Ne Wikipediaj Tik Nawat se "amat" ipal muchi, tay te timunekit titashtawiat pal tikpiat wan pal tikitat, ika muchi welit kitat su kipiat se computadoraj wan su kipia internet.

Se amat tapujtuk[edit]

Ne Wikipediaj tik Nawat nusan se "amat" tapujtuk ipal muchi, tesu semaya pal tikitat, nusan pal titajkwiluat ijtik yaja. Muchi ká kinekit welit kipalewiat kijkwiluat ini amat su welit Nawat. Su te welit Nawat, te welit, ika muchi ne tajtajkwilul pal timumachtiat nemit semaya tik Nawat. Yajika, ne Wikipediaj tesu kichiwa se takat o se siwat isel, nian ume nian yey. Muchi ne tukniwan ne kinekit welit kichiwat. Su se kineki, weli kijkwilua se tajkwilul pal timumachtiat se. Nusan su kita ka muijkwilujtuka se tajkwilul, wan ka uni tajkwilul tesu kipia muchi tay muneki wan ina ka kinekiuk seuk pal tikmatit, weli kitalilia tay ne kichiwa faltaj. Wan nusan su kita ka se tay mutalijtuk te nemi yek wan su kineki kipata pal naka yek, weli kipata.

Taika muchijki ne Wikipediaj Tik Nawat?[edit]

Ne achtu taika nemi ne Wikipediaj, yaja pal kiane tikpiat se enciclopediaj tik Nawat. Melka uni, tiwelit tinat ka nemit nusan uksejse tajtaika yek ma tikchiwakan ne Wikipediaj Tik Nawat:

  1. Pal tikpiat se kan ne welit tikajsit tamatilis wan tamachtilis tik Nawat, ipal muchi ne Nawataketzat wan nusan muchi ne mumachtiat Nawat.
  2. Nusan pal tikpiat se kan ne Nawataketzat wan ne mumachtiat Nawat welit tajkwiluat tik Nawat pal kielnamikit ne taketzalis wan pal mumachtiat.
  3. Pal kipalewia ne taketzalis ika tiawit tikitat kan ikman te muita katka.
  4. Pal ne taketzalis weya wan muijkwilua mas, pal yaja yek te semaya pal titaketzat, nusan pal titajkwiluat.
  5. Pal nemit mas tukniwan ká yawit musentepewat wan muishmatit pal taketzat wan tajkwiluat tik Nawat, pal kiane yawi chikawaya wan muyulkwepa ne taketzalis.

Ká ipal?[edit]

Ká ipal muchiwa ini Wikipediaj Tik Nawat? Ká welit kikwit pal mumachtiat? Ká welit kijkwiluat wan kichiwat ken yejemet kinekit?

Ini Wikipediaj nemi tik Nawat; yajika, welit tinat ka yaja ipal muchi ká taketzat Nawat, weli ka mumachtijket itech itejteku kwak chijchikitik katka o weli ka mumachtijtiwit kwak takamet wan siwatket o tik ne tamachtiluyan. Nusan yaja ipal muchi ká ashan nemit mumachtiat Nawat wan ipal muchi ká kinekit wan pewat mumachtiat.

Tinatiwit ka ne Wikipediaj ipal muchi, ka tapujtuk ipal muchi, wan ka muchi welit kikwit wan muchi welit kichiwat. Su ijkiuni, te welit tinat, nian tiknekit tinat, nian nemi yek ma tinakan ka aka te weli kichiwa o ka aka te weli kita wan mumachtia iwan ne Wikipediaj, su yaja se ká kipalewia, taketza wan weli ne Nawat wan su yaja mumati ka ne Nawat ipal.

Melka uni, ma te aka kielkawa ka ne Nawat ne taketzalis ipal ne techan metzali itukay ne Pipilmet wan ipal muchi ne Nawataketzat, wan achtu, ipal ne nojnoymet wan ne tukniwan ká senpa welitiwit wan taketztiwit Nawat ika yaja ne intaketzalis ne innoywan wan ne intechan; ika ini techan te kenha su te kipiaskia ne tay ipal wan ne tay ipal yaja ne itaketzalis wan ne ital. Su ashan tikishmatit muchi tay ipal ini techan pal ikman, yaja ika yejemet kipishtiwit wan kalwikatiwit wan techmachtijtiwit. Yejemet ajsitiwit hasta nikan pal ma te muelkawa tay ipal wan pal te puliwi ika ne itechan yawi tajpia ashan wan musta, pal tay ipal naka yultuk wan naka ken tay ipal. Yajika, muchi tikitat yek ka ini Wikipediaj ipal ne techan Pipil wan ne techan Nawataketza, wan tiknekit ma muchiwa ken yawi yek ipal ini techan, ika su te ijkiuni, te nemiskia se taika muchiwaskia.