Wp/pis/Honiara

Honiara, nambapipol insaet 49,107 (1999), 54,600 (2003 est.), hemi barava big taun blo Solomon Aelan. Hem stap lo Guadalcanal but hemi no insaet lo Guadalcanal Provins. Nem blo "Honiara" hemi olsem bikos waitman blo Inglan, taem hem kasem Solo, no save rait we fo tok langwis blo Guale. Lo langwis blo Guale, nem blo diswan ples hemi "Nagoniara". Diswan hem minim "lo fran lo wind". Waitman save se "Honiara" nomoa.

Land en Weda

Honiara stap lo nortkost blo Guale. Hemi garem solwatapot lo Point Cruz. Kukum Highway hem stat lo Henderson (weanao erpot hem stap), en hem go tru Honiara kolsap lo solwata, pas Namba 9 (National Referral Hospital) en go olawe lo White River. Honiara hem stap lo 9°28' lo saut, en 159°49' lo ist (-9.46667, 159.81667).

Weda lo Honiara hemi tropikal. Lo normal de hemi kolsap 28 digri Celsius, en solwata hemi bitwin 26 en 29 digri. Weda hemi wet bitwin Novemba en April winim narawan mans. Lo normal ful yia Honiara garem kolsap 2000mm ren. Diswan hemi no staka tumas fo Solomon Aelan.

Bisnes en Saet blo Selen

Honiara garem wanfala erpot hemi stap lo Henderson. Nem blo hem Honiara International Airport. Erpot hem stap kolsap 10 kilomita lo ist blo taun. Bisnes lo ples kolsap Honiara hemi garem sumfala faktori fo mekim trink olsem Solbrew en biskit olsem Delite. Honiara hem mekim sumfala ting fo sendim go lo ovasis, olsem timba, kokonat, kopra, en fis. Staka diswan hem save go lo Malaisia, Sapan, Saut Korea en Taiuan.

Turisem

Honiara hemi statples fo turisem lo Solomon Aelan. Ofis blo Turisem, Solomon Islands Visitors Bureau, hem stap lo Mendana Avenue bitwin lo Yacht Club en Mendana Hotel. Pipol blo dea save givimaut staka stori blo turisem, en hem save usim radio fo toktok lo ol'ta resthaus hemi farawe. Honiara hemi garem solwatapot weanao pipol save tekim bot fo go lo narawan provins. Gaden blo National Art Gallery hemi nais ples fo wakabaut lo aftanun. Tenaru wotafol hem stap kolsap lo Henderson, but iu nid fo draev kolsap wan aua en wokabout kolsap tri aua fo kasem diswan.

Relison

Most pipol lo Honiara hemi Krisian. Honiara hemi garem ofis blo Sos blo Melanesia, Anglican Sos, Roman Katolik Sos, South Seas Evangelical Sos, United Sos, Seventh Day Adventist Sos. Honiara garem sumfala Bahai, Budist, Jehova Witnes, LDS, en Muslim pipol.

Taem Bifoa

Ples weanao Honiara hem stap, bifoa hemi ples blo Battle blo Guadalcanal lo taem blo Nambatu World War. Honiara hemi riples Tulagi olsem ples blo gavman blo Solomon Aelan taem afta war hem finis. Honiara hemi tru kapitol blo Solomon Aelan lo 1952.

External links

Honiara Travel Guide from Travellerspoint